عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕۆژی خودا بۆ تۆڵه‌سه‌ندن و ڕزگاری 
1
ئه‌وه‌ كێیه‌ له‌ ئه‌دۆمه‌وه‌ دێت
به‌ به‌رگی سوور له‌ بۆزراوه‌،
ئه‌و شكۆمه‌نده‌ی به‌ جلوبه‌رگه‌كه‌یه‌وه‌
به‌ زۆری هێزه‌كه‌یه‌وه‌ نمایش ده‌كات؟
«منم به‌ ڕاستودروستی ده‌دوێم
مه‌زنم بۆ ڕزگاری.»
2
بۆچی به‌رگت سووره‌ و
به‌رگت وه‌ك په‌ستێنه‌ری گوشه‌ری ترێیه‌؟
3
«كه‌س له‌ گه‌لان له‌گه‌ڵمدا نه‌بوو
به‌ ته‌نها گوشه‌رم په‌سته‌وه‌.
له‌ تووڕه‌ییدا ئه‌وانم پڵیشانده‌وه‌،
به‌ هه‌ڵچوونی خۆم پێم لێنان.
جا خوێنیان به‌سه‌ر به‌رگمدا پرژا و
هه‌موو جله‌كه‌م له‌كه‌دار بوو.
4
چونكه‌ ڕۆژی تۆڵه‌سه‌ندنه‌وه‌ له‌ دڵمدا بوو و
ساڵی كڕینه‌وه‌ی گه‌لم هات.
5
ته‌ماشام كرد به‌ڵام یارمه‌تیده‌ر نه‌بوو،
سه‌رسام بووم كه‌ پشتگیری نه‌بوو،
به‌ڵام به‌ هێزی بازووی خۆم ڕزگاریم ده‌سته‌به‌ر كرد،
هه‌ڵچوونم پشتگیری كردم.
6
به‌ تووڕه‌یی خۆم گه‌لانم په‌سته‌وه‌،
به‌ هه‌ڵچوونی خۆم سه‌رخۆشم كردن،
خوێنی ئه‌وانم به‌سه‌ر زه‌ویدا ڕشت.»
نوێژ و ستایش 
7
باسی خۆشه‌ویستی نه‌گۆڕی یه‌زدان ده‌كه‌م،
كاره‌كانی كه‌ شایسته‌ی ستایشن،
بۆ هه‌موو ئه‌وه‌ی كه‌ له‌ پێناوی ئێمه‌دا كردی.
باسی چاكه‌ مه‌زنه‌كه‌ی ده‌كه‌م بۆ بنه‌ماڵه‌ی ئیسرائیل،
ئه‌وه‌ی پاداشتی پێدانه‌وه‌ به‌پێی به‌زه‌ییه‌كه‌ی و
به‌پێی زۆری خۆشه‌ویستییه‌ بێ سنووره‌كه‌ی.
8
فه‌رمووی: «به‌ ڕاستی گه‌لی منن،
كوڕن، ناپاكیم له‌گه‌ڵ ناكه‌ن،»
جا بۆیان بوو به‌ ڕزگاركه‌ر.
9
له‌ هه‌موو ته‌نگانه‌كانیان ئه‌ویش ته‌نگاو بوو و
فریشته‌ی ئاماده‌بوونه‌كه‌ی[a] ڕزگاری كردن.
ئه‌و به‌ خۆشه‌ویستییه‌كه‌ی و به‌ میهره‌بانی ئه‌وانی كڕییه‌وه‌،
به‌رزی كردنه‌وه‌ و هه‌ڵیگرتن
هه‌موو ڕۆژانی كۆن.
10
به‌ڵام ئه‌وان یاخی بوون و
ڕۆحی پیرۆزی ئه‌ویان خه‌مبار كرد،
جا لێیان بوو به‌ دوژمن و
له‌گه‌ڵیان كه‌وته‌ جه‌نگه‌وه‌.
11
ئینجا گه‌ل ڕۆژانی كۆنیان به‌بیر هاته‌وه‌،
ڕۆژانی موسا و گه‌له‌كه‌ی.
كوا ئه‌وه‌ی له‌ ده‌ریاوه‌ سه‌ری خستن
له‌گه‌ڵ شوانی مێگه‌له‌كه‌ی؟
كوا ئه‌وه‌ی ڕۆحی پیرۆزی خۆی
له‌نێویان دانا؟
12
كوا ئه‌وه‌ی له‌لای ده‌ستی ڕاستی موسا
هێزه‌ شكۆداره‌كه‌ی بازووی خۆی نارد،
ئه‌وه‌ی ئاوی له‌به‌رده‌میان دوو له‌ت كرد،
بۆ ئه‌وه‌ی ناوێكی هه‌تاهه‌تایی بۆ خۆی دروستبكات،
13
ئه‌وه‌ی به‌ناو ده‌ریا قووڵه‌كاندا بردنی؟
وه‌ك ئه‌سپ به‌ چۆڵه‌وانیدا سه‌رسمیان نه‌دا،
14
وه‌ك دابه‌زینی ڕه‌شه‌وڵاخ به‌ره‌و ده‌شتایی،
ڕۆحی یه‌زدان پشووی پێدان.
ئاوا ڕێنمایی گه‌له‌كه‌تت كرد
بۆ ئه‌وه‌ی ناوێكی شكۆمه‌ند بۆ خۆت دروستبكه‌یت.
15
له‌ ئاسمانه‌وه‌ ته‌ماشا بكه‌،
له‌ نشینگه‌ی پیرۆز و شكۆمه‌ندیته‌وه‌ ببینه‌،
كوا دڵگه‌رمی و پاڵه‌وانیێتییه‌كه‌ت؟
ئاخ هه‌ڵكێشانی هه‌ناوت و به‌زه‌ییت له‌ ئێمه‌ بڕی.
16
به‌ڵام تۆ باوكی ئێمه‌ی،
ئه‌گه‌ر ئیبراهیم نه‌مانناسێت و
ئیسرائیلیش دانمان پێدا نه‌نێت.
ئه‌ی یه‌زدان تۆ باوكی ئێمه‌یت،
له‌ ئه‌زه‌له‌وه‌ ناوت ده‌مانكڕێته‌وه‌.
17
ئه‌ی یه‌زدان، بۆچی له‌ ڕێگاكانی خۆت وێڵت كردین،
بۆچی دڵت ڕه‌ق كردین هه‌تا لێت نه‌ترسین؟
بگه‌ڕێوه‌ له‌ پێناو خزمه‌تكاره‌كانت،
هۆزه‌كانی میراته‌كه‌ت.
18
بۆ ماوه‌یه‌كی كه‌م گه‌لی پیرۆزت خاوه‌نی پیرۆزگای تۆ بوون،
به‌ڵام ئێستا دوژمنانمان پێشێلیان كرد.
19
ئێمه‌ له‌ كۆنه‌وه‌ گه‌لی تۆین،
ئێستا وامان لێ هاتووه‌ كه‌ تۆ فه‌رمانڕه‌وایی ئێمه‌ت نه‌كردووه‌،
وه‌ك چۆن هه‌رگیز به‌ ناوی تۆوه‌ ناو نه‌نرابین.
  1. a. 63‏:9 مه‌به‌ستی له‌ ئه‌و فریشته‌یه‌ كه‌ هه‌میشه‌ ئاماده‌یه‌ له‌به‌رده‌می یه‌زدان بۆ ڕاپه‌ڕاندنی كاره‌كانی.