عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
شكۆی داهاتوو بۆ سییۆن 
1
«ئه‌ی نه‌زۆك، گۆرانی بڵێ،
ئه‌ی ئه‌وه‌ی منداڵت نه‌بووه‌،
ئه‌ی ئه‌وه‌ی ژانت نه‌گرتووه‌،
له‌ خۆشیدا هاوار بكه و گۆرانی بڵێ،
چونكه‌ منداڵی ژنی به‌جێهێڵراو
زیاترن له‌وه‌ی مێردی له‌گه‌ڵیه‌تی،»
یه‌زدان ده‌فه‌رموێت.
2
«شوێنی ڕه‌شماڵه‌كانت فراوان بكه‌،
په‌رده‌ی نشینگه‌كانت لێك بكه‌ره‌وه‌،
ده‌ست مه‌گێڕه‌وه‌،
گوریسه‌كانت درێژ بكه‌ و
سنگه‌كانت توند بچه‌قێنه‌.
3
چونكه‌ به‌لای ڕاست و چه‌پدا په‌ل ده‌هاوێیت،
نه‌وه‌ی تۆ نه‌ته‌وه‌كان ده‌رده‌كه‌ن و
شاره‌ وێرانه‌كان ئاوه‌دان ده‌كه‌نه‌وه‌.
4
«مه‌ترسه‌ چونكه‌ ڕیسوا نابیت،
گاڵته‌ت پێ ناكرێت چونكه‌ شه‌رمه‌زار نابیت.
ڕیسوایی سه‌رده‌می گه‌نجیێتیت له‌بیر ده‌كه‌یت،
ئیتر شوره‌یی بێوه‌ژنیێتیت به‌بیر نایه‌ته‌وه‌.
5
چونكه‌ مێردی[a] تۆ دروستكه‌ره‌كه‌ی تۆیه‌،
ناوی یه‌زدانی سوپاسالاره‌.
ئه‌وه‌ی ده‌تكڕێته‌وه‌ پیرۆزه‌كه‌ی ئیسرائیله‌،
پێی ده‌گوترێت خودای هه‌موو زه‌وی.
6
چونكه‌ وه‌ك ژنێكی به‌جێماو و ڕۆح پڕ له‌ ژان
یه‌زدان بانگت ده‌كاته‌وه‌،
وه‌ك ژنێك كه‌ له‌ گه‌نجیدا شووی كردبێت و ڕه‌تكرابێته‌وه‌،»
خودات ده‌فه‌رموێت.
7
«بۆ ساتێكی كه‌م به‌جێم هێشتیت،
به‌ڵام به‌ به‌زه‌ییه‌كی زۆره‌وه‌ كۆت ده‌كه‌مه‌وه‌.
8
به‌ زریانی تووڕه‌ییه‌وه‌
بۆ ساتێك ڕووی خۆمم لێت داپۆشی،
به‌ڵام به‌ خۆشه‌ویستی نه‌گۆڕی هه‌تاهه‌تایی به‌زه‌ییم پێتدا هاته‌وه‌،»
ئه‌وه‌ فه‌رمایشتی یه‌زدانه‌، ئه‌وه‌ی ده‌تكڕێته‌وه‌.
9
«چونكه‌ ئه‌مه‌ وه‌ك لافاوی نوحه‌ بۆ من
ئه‌وه‌ی سوێندم خوارد، كه‌ لافاوه‌كه‌ی نوح جارێكی دیكه‌ به‌سه‌ر زه‌ویدا تێنه‌په‌ڕێت.
ئاوا سوێندم خوارد، كه‌ لێت تووڕه‌ نه‌بم و
لێت ڕانه‌خوڕم.
10
هه‌رچه‌نده‌ چیاكان نامێنن و
گرده‌كان ده‌هه‌ژێن،
به‌ڵام خۆشه‌ویستی نه‌گۆڕی من بۆ تۆ ده‌مێنێت و
په‌یمانی ئاشتیم ناهه‌ژێت،»
ئه‌وه‌ فه‌رمایشتی یه‌زدانه‌، ئه‌وه‌ی به‌زه‌یی پێتدا دێته‌وه‌.
11
«ئه‌ی شاره‌ زه‌لیله‌كه‌، زریان لێداوه‌كه‌، دڵنه‌وایی نه‌كراوه‌كه‌،
ئه‌وه‌تا من به‌رده‌كانت به‌ به‌رده‌ پیرۆزه‌[b] له‌سه‌ر ڕیز ده‌كه‌م،
به‌ یاقووتی شین[c] داتده‌مه‌زرێنم.
12
قولله‌كانت ده‌كه‌م به‌ یاقووت[d] و
ده‌روازه‌كانیشت به‌ به‌ردی پڕشنگدار،
هه‌موو سنووره‌كانیشت به‌ به‌ردی گرانبه‌ها.
13
هه‌موو كوڕه‌كانت له‌ یه‌زدانه‌وه‌ فێر ده‌بن و
ئاشتی منداڵه‌كانت زۆر ده‌بێت.
14
به‌ ڕاستودروستی ده‌چه‌سپێیت
دوور له‌ جه‌وروسته‌م،
چونكه‌ هیچ هۆیه‌ك نییه‌ بۆ ئه‌وه‌ی بترسیت،
هه‌روه‌ها دووریت له‌ تۆقینیش،
چونكه‌ لێت نزیك ناكه‌وێته‌وه‌.
15
ئه‌گه‌ر په‌لامار درایت، ئه‌وه‌ له‌لایه‌ن منه‌وه‌ نابێت،
ئه‌وه‌ی هێرش ده‌كاته‌ سه‌رت، ده‌بێته‌ ژێر ده‌ستت.
16
«ئه‌وه‌تا من ئاسنگه‌رم به‌دیهێنا
كه‌ كووره‌ی ئاگری خه‌ڵووز ده‌م ده‌دات،
چه‌كی گونجاو دروستده‌كات،
هه‌روه‌ها من له‌ناوبه‌رم به‌دیهێنا بۆ ئه‌وه‌ی بفه‌وتێنێت.
17
هه‌ر چه‌كێك له‌ دژی تۆ شێوه‌ی بكێشرێت سه‌رناكه‌وێت و
هه‌ر زمانێك له‌ دادگا له‌ دژی تۆ ڕاده‌وه‌ستێت به‌رپه‌رچی ده‌ده‌یته‌وه‌.
ئه‌مه‌ میراتی خزمه‌تكارانی یه‌زدانه‌،
بێتاوانیتان له‌لایه‌ن منه‌وه‌یه‌،»
ئه‌وه‌ فه‌رمایشتی یه‌زدانه‌.
  1. a. 54‏:5 په‌یوه‌ندی نێوان خودا و گه‌له‌كه‌ی به‌ په‌یوه‌ندی نێوان ژن و مێرد ده‌چووێنرێت، له‌ ڕووی ئه‌رك و وه‌فا و گوێڕایه‌ڵییه‌وه‌.
  2. b. 54‏:11 به‌رده‌ پیرۆزه‌: به‌ردێكی شینی سه‌وزباو.
  3. c. 54‏:11 یاقووتی شین: ده‌شێت لاجیوه‌رد بێت.
  4. d. 54‏:12 یاقووت: گه‌وهه‌ری سووری تێر.