عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سه‌نحێریب هه‌ڕه‌شه‌ له‌ ئۆرشه‌لیم ده‌كات 
1
له‌ ساڵی چوارده‌یه‌می حه‌زقیا پاشا، سه‌نحێریبی پاشای ئاشور هێرشی كرده‌ سه‌ر هه‌موو شاره‌ قه‌ڵابه‌نده‌كانی یه‌هودا و داگیری كردن.
2
ئیتر پاشای ئاشور له‌ لاخیشه‌وه‌ فه‌رمانده‌ی ناوچه‌كه‌ی به‌ سوپایه‌كی گه‌وره‌وه‌ بۆ حه‌زقیای پاشا نارد له‌ ئۆرشه‌لیم. كاتێك له‌لای ئاوباری گۆمه‌كه‌ی سه‌ره‌وه‌ ڕاوه‌ستا كه‌ له‌سه‌ر ڕێگای شوێنی جلشۆرینه‌كه‌یه‌،
3
ئه‌لیاقیمی كوڕی حیلقیا سه‌رپه‌رشتیاری كۆشك و شه‌ڤنای خامه‌ی نهێنی[a] و یۆئاحی تۆماركار كوڕی ئاساف چوونه‌ ده‌ره‌وه‌ بۆ لای.
4
فه‌رمانده‌ی ناوچه‌كه‌ پێی گوتن: «به‌ حه‌زقیا بڵێن:
«”پاشای گه‌وره‌، پاشای ئاشور ده‌ڵێت: تۆ پشتت به‌ چی به‌ستووه‌؟
5
تۆ ده‌ڵێیت كه‌ پلان و هێزت هه‌یه‌ بۆ جه‌نگ، به‌ڵام ئه‌وه‌ قسه‌ی پووچه‌. ئێستاش پشتت به‌ كێ به‌ستووه‌ تاكو لێم یاخی بیت؟
6
وا پشتت به‌ پاڵپشتی ئه‌و قامیشه‌ شكاوه‌ی میسر به‌ستووه‌، ئه‌وه‌ی كه‌ هه‌ركه‌سێك خۆی به‌سه‌ردا بچه‌مێنێته‌وه‌ له‌پی ده‌ستی بریندار ده‌بێت و كونی ده‌كات! فیرعه‌ونی پاشای میسر ئاوایه‌ بۆ هه‌موو ئه‌وانه‌ی پشتی پێ ده‌به‌ستن.
7
ئه‌گه‌ر پێشم بڵێیت: ’پشتمان به‌ یه‌زدانی په‌روه‌ردگارمان به‌ستووه‌.‘ ئایا ئه‌وه‌ ئه‌و نه‌بوو كه‌ حه‌زقیا نزرگه‌كانی سه‌ر به‌رزایی و قوربانگاكانی تێكدا و به‌ یه‌هودا و ئۆرشه‌لیمی گوت: ’له‌به‌رده‌م ئه‌م قوربانگایه‌ كڕنۆش ده‌به‌ن‘؟
8
«”ئێستاش گره‌و له‌گه‌ڵ پاشای ئاشوری گه‌وره‌م بكه‌، من دوو هه‌زار ئه‌سپت ده‌ده‌مێ، ئه‌گه‌ر تۆ بتوانیت بۆ خۆت سوار له‌سه‌ریان دابنێیت!
9
ئیتر چۆن ده‌توانیت تاكه‌ ئه‌فسه‌رێك له‌ خزمه‌تكاره‌ بچووكه‌كانی گه‌وره‌كه‌م بگه‌ڕێنیته‌وه‌، ته‌نانه‌ت ئه‌گه‌ر پشت به‌ میسریش ببه‌ستیت بۆ گالیسكه‌ و سوار؟
10
ئێستاش ئایا من به‌بێ یه‌زدان هێرشم كردووه‌ته‌ سه‌ر ئه‌م خاكه‌ هه‌تا وێرانی بكه‌م؟ یه‌زدان پێی فه‌رمووم: به‌سه‌ر ئه‌و خاكه‌دا بده‌ و وێرانی بكه‌.“»
11
ئینجا ئه‌لیاقیم و شه‌ڤنا و یۆئاح به‌ فه‌رمانده‌ی ناوچه‌كه‌یان گوت: «تكایه‌ له‌گه‌ڵ خزمه‌تكاره‌كانت به‌ زمانی ئارامی قسه‌ بكه‌، چونكه‌ لێی تێده‌گه‌ین، به‌ عیبری قسه‌مان له‌گه‌ڵ مه‌كه‌ له‌به‌رچاوی خه‌ڵكه‌كه‌ی سه‌ر شووراكه‌.»
12
فه‌رمانده‌كه‌ش گوتی: «ئایا گه‌وره‌م ته‌نها بۆ لای گه‌وره‌كه‌ت و تۆی ناردووین هه‌تا ئه‌م قسانه‌ بكه‌ین؟ ئایا بۆ لای ئه‌و پیاوانه‌ی سه‌ر شووراكه‌ی نه‌ناردووین، بۆ ئه‌وه‌ی پیسایی خۆیان بخۆن و میزی خۆیان بخۆنه‌وه‌ له‌گه‌ڵتان؟»
13
ئینجا فه‌رمانده‌كه‌ وه‌ستا و به‌ ده‌نگێكی به‌رز به‌ زمانی عیبری هاواری كرد و گوتی: «گوێ له‌ قسه‌ی پاشای گه‌وره‌ بگرن، پاشای ئاشور!
14
پاشا ئاوا ده‌ڵێت: مه‌هێڵن حه‌زقیا فریوتان بدات، چونكه‌ ناتوانێت ڕزگارتان بكات.
15
مه‌هێڵن حه‌زقیا واتان لێ بكات پشت به‌ یه‌زدان ببه‌ستن و بڵێت: ”بێگومان یه‌زدان فریامان ده‌كه‌وێت و ئه‌م شاره‌ ناداته‌ ده‌ست پاشای ئاشور.“
16
«گوێ له‌ حه‌زقیا مه‌گرن، چونكه‌ پاشای ئاشور ده‌ڵێت، ڕازی بن به‌ ملكه‌چبوون بۆ من، وه‌رنه‌ ده‌ره‌وه‌ بۆ لام، با هه‌ركه‌سه‌ له‌ مێوه‌كه‌ی خۆی و له‌ دار هه‌نجیره‌كه‌ی خۆی بخوات و ئاو له‌ ئه‌مباراوه‌كه‌ی خۆی بخواته‌وه‌.
17
هه‌تا ئه‌و كاته‌ی دێم و ده‌تانبه‌مه‌ خاكێكی وه‌ك خاكه‌كه‌ی خۆتان، خاكی دانه‌وێڵه‌ و شه‌رابی نوێ، خاكی نان و ڕه‌زه‌مێو.
18
«با حه‌زقیا فریوتان نه‌دات كه‌ ده‌ڵێت: ”یه‌زدان ڕزگارمان ده‌كات.“ ئایا خوداوه‌ندی هیچ نه‌ته‌وه‌یه‌ك توانی خاكه‌كه‌ی خۆی له‌ ده‌ست پاشای ئاشور ڕزگار بكات؟
19
كوان خوداوه‌نده‌كانی حه‌مات و ئه‌رپاد؟ كوان خوداوه‌نده‌كانی سفه‌رڤه‌یم؟ ئایا فریای سامیره‌ كه‌وتن له‌ ده‌ستم؟
20
كام له‌ هه‌موو خوداوه‌نده‌كانی ئه‌و خاكانه‌ توانی خاكه‌كه‌ی خۆی له‌ ده‌ستی من ڕزگار بكات؟ ئیتر چۆن یه‌زدان فریای ئۆرشه‌لیم ده‌كه‌وێت له‌ ده‌ستی من؟»
21
به‌ڵام گه‌ل بێده‌نگ بوون و به‌ یه‌ك وشه‌ش وه‌ڵامیان نه‌دایه‌وه‌، چونكه‌ پاشا فه‌رمانی كردبوو: «وه‌ڵامی نه‌ده‌نه‌وه‌.»
22
ئینجا ئه‌لیاقیمی كوڕی حیلقیای سه‌رپه‌رشتیاری كۆشك و شه‌ڤنای خامه‌ی نهێنی و یۆئاحی كوڕی ئاسافی تۆماركار هاتنه‌ لای حه‌زقیا و جله‌كانیان دادڕی بوو، قسه‌كانی فه‌رمانده‌ی ناوچه‌كه‌یان پێی ڕاگه‌یاند.
  1. a. 36‏:3 ڕازپۆش.