عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
قوڕبه‌سه‌ری كوش 
1
قوڕبه‌سه‌ر خاكی فڕه‌فڕی باڵه‌كان،
ئه‌وه‌ی له‌وبه‌ری ڕووباره‌كانی كوشه‌،
2
په‌یامبه‌ران به‌ ڕێی ده‌ریادا ده‌نێرێت،
به‌ به‌له‌می قامیش له‌سه‌ر ڕووی ئاوه‌كان.
بڕۆن ئه‌ی نێردراوه‌ خێراكان،
بۆ لای نه‌ته‌وه‌یه‌كی باڵا به‌رز و كۆسه‌،
بۆ لای گه‌لێك خه‌ڵكی دوور و نزیك لێیان ده‌ترسن،
نه‌ته‌وه‌یه‌كی بێگانه‌ و پێشێلكار،
ئه‌وه‌ی ڕووباره‌كان دڕیانداوه‌ به‌ خاكه‌كه‌ی.
3
ئه‌ی هه‌موو دانیشتووانی جیهان و
نیشته‌جێبووانی زه‌وی،
كه‌ ئاڵا له‌سه‌ر چیاكان به‌رزكرایه‌وه‌،
ببینن و
كه‌ كه‌ڕه‌نا لێدرا،
گوێ بگرن.
4
چونكه‌ یه‌زدان ئه‌مه‌م پێ ده‌فه‌رموێت:
«هێمن ده‌بم و له‌ نشینگه‌ی خۆمه‌وه‌ ته‌ماشا ده‌كه‌م
وه‌ك گه‌رمایه‌كی ڕوون له‌ به‌ر هه‌تاودا،
وه‌ك هه‌وری خوناو له‌ گه‌رمای دروێنه‌دا.»
5
چونكه‌ پێش ترێ ڕنین له‌ كاتی ته‌واو چرۆكردن و
كاتێك گوڵه‌كان ده‌بن به‌ په‌سیره‌ی گه‌ییو،
چڵه‌كان به‌ داس ده‌بڕێته‌وه‌ و
لقه‌كان لێ ده‌كاته‌وه‌ و فڕێیان ده‌دات.
6
پێكه‌وه‌ به‌جێده‌هێڵدرێن بۆ بازه‌كانی چیا و
بۆ گیانله‌به‌ره‌ كێوییه‌كانی زه‌وی،
بازه‌كان هاوینیان پێ به‌سه‌رده‌به‌ن و
هه‌موو گیانله‌به‌ره‌ كێوییه‌كانی زه‌ویش زستانیان پێ به‌سه‌رده‌به‌ن.
7
له‌و ڕۆژه‌دا دیاری پێشكه‌ش به‌ یه‌زدانی سوپاسالار ده‌كرێت،
له‌ گه‌لێكی باڵا به‌رز و كۆسه‌،
گه‌لێكی ترسناك، دوور و نزیك،
نه‌ته‌وه‌یه‌كی بێگانه‌ و پێشێلكار،
ئه‌وه‌ی ڕووباره‌كان دڕیانداوه‌ به‌ زه‌وییه‌كه‌ی،
بۆ شوێنی ناوی یه‌زدانی سوپاسالار له‌ كێوی سییۆن.