عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سروشێك سه‌باره‌ت به‌ میسر 
1
سروشێك سه‌باره‌ت به‌ میسر:
ئه‌وه‌تا یه‌زدان به‌سه‌ر هه‌ورێكی خێراوه‌
به‌ره‌و میسر دێت.
بته‌كانی میسر له‌ ڕووی ئه‌ودا ده‌له‌رزن،
دڵی میسریش له‌ ناخیدا ده‌توێته‌وه‌.
2
«میسرییه‌كان له‌ دژی میسرییه‌كان هانده‌ده‌م،
هه‌ركه‌سه‌ له‌ دژی برای خۆی شه‌ڕ ده‌كات،
هه‌ركه‌سه‌ له‌ دژی هاوڕێی خۆی،
شار له‌ دژی شار و
شانشین له‌ دژی شانشین.
3
میسر ڕۆحی تێدا نامێنێت،
ڕاوێژه‌كه‌ی هه‌ڵده‌لووشم،
داوا له‌ بته‌كان و له‌ نوشته‌كه‌ران ده‌كه‌ن،
له‌ نێوانگره‌كان و له‌ ڕۆح ئاماده‌كاران.
4
میسرییه‌كان ڕاده‌ستی گه‌وره‌یه‌كی دڵڕه‌ق ده‌كه‌م و
پاشایه‌كی توندوتیژ فه‌رمانڕه‌وایه‌تییان ده‌كات،»
یه‌زدان، په‌روه‌ردگاری سوپاسالار ده‌فه‌رموێت.
5
ئاوی نیل وشك ده‌بێت،
ڕووباره‌كه‌ش كاول ده‌بێت و وشك ده‌بێت.
6
نۆكه‌نده‌كان بۆن ده‌كه‌ن،
لقه‌كانی نیل كز ده‌بن و كاول ده‌بن.
قامیش و زه‌ل بۆگه‌ن ده‌بن،
7
سه‌وزایی له‌سه‌ر نیل،
له‌ ڕێژگه‌ی[a] ڕووباره‌كه‌.
هه‌موو ئه‌وه‌ی له‌سه‌ر نیل چانراوه‌
وشك ده‌بێت، هه‌ڵده‌وه‌رێت و نامێنێت.
8
ماسیگره‌كان ئاخ هه‌ڵده‌كێشن و شین ده‌گێڕن،
هه‌موو ئه‌وانه‌ی قولاپ هه‌ڵده‌ده‌نه‌[b] ناو نیله‌وه‌،
ئه‌وانه‌ی تۆڕ له‌سه‌ر ڕووی ئاوه‌كان بڵاو ده‌كه‌نه‌وه‌
وره‌یان نامێنێت.
9
كارگه‌ران له‌ كه‌تانی ئاماده‌كراو بێ ئومێد ده‌بن،
جۆڵاكانیش ڕوو زه‌رد ده‌بن.
10
جۆڵاكانی میسر وردوخاش ده‌بن و
هه‌موو كرێكاره‌كانی خه‌مبار ده‌بن.
11
بێگومان میره‌كانی چۆعه‌ن گێلن:
دانا ڕاوێژكاره‌كانی فیرعه‌ون ڕاوێژه‌كانیان ئاژه‌ڵانه‌یه‌.
چۆن به‌ فیرعه‌ون ده‌ڵێن:
«كوڕی دانایانم من،
كوڕی[c] پاشا دێرینه‌كان»؟
12
كه‌واته‌ كوا داناكانت؟
با پێت بڵێن و با بزانن،
یه‌زدانی سوپاسالار
پلانی چی داناوه‌ له‌ دژی میسر.
13
میرانی چۆعه‌ن گێل بوون،
میرانی مه‌مفیس چه‌واشه‌ كران،
پیاوماقوڵانی هۆزه‌كانی
میسریان گومڕا كرد.
14
یه‌زدان ڕۆحی گێژبوونی تێدا تێكه‌ڵ كردووه‌،
میسریان گومڕا كرد له‌ هه‌موو كرداره‌كانی
وه‌ك گومڕاكردنی سه‌رخۆش له‌ناو ڕشانه‌وه‌كه‌ی.
15
هیچ كارێك نابێت له‌ میسر
كه‌ سه‌ر یان كلك، دار خورما یان زه‌ل، بیكات.
16
له‌و ڕۆژه‌دا میسرییه‌كان وه‌ك ژنیان لێدێت، له‌ ترسان ده‌له‌رزن، كاتێك یه‌زدانی سوپاسالار ده‌ستی لێیان به‌رز ده‌كاته‌وه‌.
17
میسرییه‌كان له‌ خاكی یه‌هودا ده‌تۆقن، هه‌موو ئه‌وه‌ی به‌بیری بێته‌وه‌ له‌ یه‌هودا ده‌ترسێت، له‌به‌ر ئه‌و پلانه‌ی یه‌زدانی سوپاسالار له‌ دژی دایده‌ڕێژێت.
18
له‌و ڕۆژه‌دا پێنج شار ده‌بێت له‌ خاكی میسردا كه‌ به‌ زمانی كه‌نعانی بدوێن و به‌ یه‌زدانی سوپاسالار سوێند ده‌خۆن، یه‌كێكیان پێی ده‌گوترێت «شاری خۆر»[d] .
19
له‌و ڕۆژه‌دا، له‌ ناوه‌ڕاست خاكی میسردا قوربانگایه‌ك بۆ یه‌زدان ده‌بێت و ستوونێكیش له‌سه‌ر سنووره‌كه‌ی بۆ یه‌زدان.
20
جا ده‌بێته‌ نیشانه‌ و شایه‌تی بۆ یه‌زدانی سوپاسالار له‌ خاكی میسردا، چونكه‌ هاوار بۆ یه‌زدان ده‌كه‌ن له‌ ڕووی زۆردار، ئه‌ویش ڕزگاركه‌ر و پارێزه‌ریان بۆ ده‌نێرێت و ده‌ربازیان ده‌كات.
21
ئینجا یه‌زدان له‌ میسر ناسراو ده‌بێت، له‌و ڕۆژه‌دا میسرییه‌كان یه‌زدان ده‌ناسن و به‌ قوربانی و پێشكه‌شكراوی دانه‌وێڵه‌ ده‌یپه‌رستن و نه‌زر[e] بۆ یه‌زدان ده‌كه‌ن و به‌جێی ده‌هێنن.
22
یه‌زدان له‌ میسر ده‌دات، لێیان ده‌دات و چاكیشیان ده‌كاته‌وه‌، ده‌گه‌ڕێنه‌وه‌ لای یه‌زدان و وه‌ڵامیان ده‌داته‌وه‌ و چاكیان ده‌كاته‌وه‌.
23
له‌و ڕۆژه‌دا شاڕێگایه‌ك له‌ میسره‌وه‌ به‌ره‌و ئاشور ده‌بێت، جا ئاشورییه‌كان دێنه‌ میسر و میسرییه‌كانیش دێنه‌ ئاشور، میسر له‌گه‌ڵ ئاشور پێكه‌وه‌ خزمه‌ت ده‌كه‌ن.
24
له‌و ڕۆژه‌دا ئیسرائیل ده‌بێته‌ یه‌كێك له‌ سێیه‌كه‌، له‌گه‌ڵ میسر و ئاشور، ده‌بنه‌ به‌ره‌كه‌ت له‌ خاكه‌كه‌.
25
ئه‌وه‌ی یه‌زدانی سوپاسالار به‌ره‌كه‌تداریان ده‌كات و ده‌فه‌رموێت: «به‌ره‌كه‌تدار بێت میسری گه‌لی من و ئاشوری ده‌ستكردی من و ئیسرائیلی میراتی من.»
  1. a. 19‏:7 ‏ئه‌و شوێنه‌ی ڕووبار ده‌ڕژێته‌ ناو ده‌ریا.
  2. b. 19‏:8 ده‌هاوێژنه‌.
  3. c. 19‏:11 له‌م ڕسته‌یه‌دا كوڕ به‌ واتای په‌روه‌رده‌ی به‌رده‌ست دێت، نه‌ك په‌یوه‌ندی كوڕ و باوكایه‌تی.
  4. d. 19‏:18 بڕوانه‌ \+xt یه‌رمیا 43‏:13‏\+xt*‏. به‌ یۆنانی هیلیۆپۆلیس، مه‌به‌ست له‌ شاری خۆره‌ له‌ میسر، كه‌ ئێستا پێی ده‌گوترێ (میسری نوێ).
  5. e. 19‏:21 نه‌زر: داوا له‌ خودا ده‌كه‌یت بۆ ئه‌نجامدانی كارێك، كاره‌كه‌ پابه‌ند ده‌كه‌یت به‌ مه‌رجێكه‌وه‌. داوا ده‌كه‌یت ئه‌گه‌ر خودا ئه‌و كاره‌م بۆ ئه‌نجام بدات، ئه‌وا ده‌رئه‌نجام منیش ئه‌و كاره‌ی بۆ ئه‌نجام ده‌ده‌م. بڕوانه‌ \+xt سه‌رژمێری 21‏:2‏\+xt*‏.