عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
قوڕبه‌سه‌ر فه‌رزدانه‌رانی فه‌رزی به‌دكاری و
ئه‌و تۆماركارانه‌ی سته‌م تۆمار ده‌كه‌ن،
2
بۆ ئه‌وه‌ی ده‌ست بنێن به‌ ڕووی هه‌ژارانه‌وه‌ له‌ دادوه‌ری و
مافی نه‌دارانی گه‌له‌كه‌م بخۆن،
بۆ ئه‌وه‌ی بێوه‌ژنان ببن به‌ ده‌ستكه‌وتیان و
هه‌تیوانیش تاڵان بكه‌ن.
3
له‌ ڕۆژی سزا چی ده‌كه‌ن،
كاتێك ماڵوێرانی له‌ دووره‌وه‌ دێت؟
بۆ لای كێ هه‌ڵدێن بۆ یارمه‌تی و
گه‌نجینه‌تان له‌كوێ به‌جێده‌هێڵن؟
4
بێجگه‌ له‌ چۆكدادان له‌ژێر دیل و
كه‌وتن له‌ژێر كوژراوه‌كان.
له‌گه‌ڵ هه‌موو ئه‌وه‌شدا تووڕه‌ییه‌كه‌ی دانه‌مركایه‌وه‌،
هێشتا ده‌ستی درێژكردووه‌.
حوكمی خودا به‌سه‌ر ئاشور 
5
«قوڕبه‌سه‌ر ئاشور، دارده‌ستی تووڕه‌ییم،
هه‌ڵچوونم گۆچانه‌ به‌ ده‌ستیه‌وه‌.
6
بۆ سه‌ر نه‌ته‌وه‌یه‌كی خوانه‌ناس ده‌ینێرم،
فه‌رمانی پێده‌ده‌م بۆ سه‌ر ئه‌و گه‌له‌ی تووڕه‌ییم لێی ده‌جۆشێت،
تاكو ده‌ستكه‌وتی ده‌ست بكه‌وێت و تاڵان بكات،
هه‌تا بیكات به‌ پێشێلكراو وه‌ك قوڕی كۆڵانان.
7
به‌ڵام ئه‌و وا بیر ناكاته‌وه‌،
دڵی وا لێكیان ناداته‌وه‌،
چونكه‌ له‌ دڵیدایه‌ وێران بكات،
گه‌لانێك ببڕێته‌وه‌ كه‌ كه‌م نین.
8
چونكه‌ ده‌ڵێت: ”ئایا هه‌موو میره‌كانم پاشا نین؟
9
ئایا كه‌لنۆ وه‌ك كه‌ركه‌میش نییه‌؟
یان حه‌مات وه‌ك ئه‌رپاد؟
یان سامیره‌ وه‌ك دیمه‌شق؟
10
وه‌ك چۆن ده‌ستم به‌ شانشینی بته‌كان گه‌یشت و
وێنه‌ی بته‌كانیان زۆرترن له‌وانه‌ی ئۆرشه‌لیم و له‌وانه‌ی سامیره‌.
11
ئایا وه‌ك ئه‌وه‌ی به‌ سامیره‌ و به‌ بته‌كانی ئه‌وم كرد،
وا به‌ ئۆرشه‌لیم و به‌ وێنه‌ی بته‌كانی ناكه‌م؟“»
12
دوای ئه‌وه‌ی په‌روه‌ردگار هه‌موو ئیش و كاره‌كه‌ی له‌ كێوی سییۆن و له‌ ئۆرشه‌لیم ته‌واو ده‌كات، ده‌ڵێت: «سزای به‌روبوومی به‌فیزی دڵی پاشای ئاشور و شانازی لووتبه‌رزییه‌كه‌ی ده‌ده‌م،
13
چونكه‌ ده‌ڵێت:
«”به‌ توانای ده‌ستی خۆم كردم و
به‌ داناییه‌كه‌م، چونكه‌ تێگه‌یشتووم،
سنووری گه‌لانم گواسته‌وه‌ و
گه‌نجینه‌كانی ئه‌وانم تاڵان كرد،
وه‌ك دلێرێك پاشاكانی ئه‌وانم ملكه‌چ كرد،
14
ده‌ستم گه‌یشته‌ سامانی گه‌لان،
وه‌ك چۆن ده‌ست ده‌گاته‌ هێلانه‌؛
وه‌ك كۆكردنه‌وه‌ی هێلكه‌ی به‌جێماو،
هه‌موو زه‌ویم كۆكرده‌وه‌،
كه‌سیش نه‌بوو باڵی لێك بدات
یان ده‌می بكاته‌وه‌ و ورته‌یه‌كی لێ بێت.“»
15
ته‌ور شانازی ده‌كات به‌سه‌ر ئه‌و كه‌سه‌ی پێی ده‌بڕێته‌وه‌،
یان مشار خۆی به‌ زل ده‌زانێت به‌سه‌ر ئه‌و كه‌سه‌ی ده‌یبات و ده‌یهێنێت؟
وه‌ك ئه‌وه‌ی دارده‌ست هه‌ڵگره‌كه‌ی ڕاوه‌شێنێت
وه‌ك ئه‌وه‌ی گۆچان ئه‌و كه‌سه‌ به‌رز بكاته‌وه‌ كه‌ دار نییه‌.
16
له‌به‌ر ئه‌وه‌ یه‌زدان، په‌روه‌ردگاری سوپاسالار
له‌ڕی ده‌نێرێته‌ ناو پاڵه‌وانه‌ به‌هێزه‌كان،
له‌ژێر شكۆمه‌ندییه‌كه‌شی پشكۆیه‌ك داده‌گیرسێنێت
وه‌ك داگیرسانی ئاگر.
17
ڕووناكی ئیسرائیل[a] ده‌بێت به‌ ئاگر و
پیرۆزه‌كه‌شی به‌ گڕ،
ده‌یسووتێنێت و ده‌یخوات چقڵ و دڕكه‌كه‌ی
له‌ یه‌ك ڕۆژدا.
18
چڕی دارستان و باخه‌كانی به‌ ته‌واوی له‌ناوده‌بات،
گیان و له‌ش پێكه‌وه‌
وه‌ك توانه‌وه‌ی نه‌خۆش ده‌بێت.
19
پاشماوه‌ی داری دارستانه‌كانی ئه‌وه‌نده‌ كه‌م ده‌بن
منداڵێك ده‌توانێت بیانژمێرێت.
پاشماوه‌ی ئیسرائیل 
20
له‌و ڕۆژه‌دا، پاشماوه‌ی ئیسرائیل و
ده‌ربازبووه‌كانی بنه‌ماڵه‌ی یاقوب،
چیتر پشت نابه‌ستن
به‌وانه‌ی لێیان ده‌ده‌ن،
به‌ڵكو به‌ڕاستی به‌ یه‌زدان و
به‌ خودا پیرۆزه‌كه‌ی ئیسرائیل پشت ده‌به‌ستن.
21
پاشماوه‌ ده‌گه‌ڕێته‌وه‌، پاشماوه‌ی یاقوب
بۆ لای خودای توانادار.
22
چونكه‌ ئه‌ی ئیسرائیل، ئه‌گه‌ر گه‌لت به‌قه‌د لمی ده‌ریا بێت،
ته‌نها پاشماوه‌ی لێ ده‌گه‌ڕێته‌وه‌.
بڕیاری قڕبوون دراوه‌،
لافاوی ڕاستودروستییه‌.
23
یه‌زدانی په‌روه‌ردگاری سوپاسالار
بڕیاری وێرانكردنی هه‌موو خاكه‌كه‌ جێبه‌جێ ده‌كات.
24
به‌ڵام یه‌زدان، په‌روه‌ردگاری سوپاسالار ئه‌مه‌ ده‌فه‌رموێت:
«ئه‌ی گه‌لی من كه‌ له‌ سییۆن دانیشتووی،
له‌ ئاشور مه‌ترسه‌
كه‌ به‌ دارده‌ست لێت ده‌دات و
گۆچانه‌كه‌ی لێت به‌رز ده‌كاته‌وه‌ له‌سه‌ر شێوازی میسرییه‌كان.
25
چونكه‌ به‌م زووانه‌ هه‌ڵچوونم له‌سه‌ر ئێوه‌ نامێنێت و
تووڕه‌ییم بۆ له‌ناوچوونی ئه‌وان ده‌بێت.»
26
یه‌زدانی سوپاسالار به‌ قامچی لێی ده‌دات
وه‌ك لێدانه‌كه‌ی میدیان له‌لای تاشه‌به‌ردی عۆرێڤ و
گۆچانه‌كه‌ی به‌سه‌ر ده‌ریاوه‌یه‌
له‌سه‌ر شێوازی میسرییه‌كان به‌رزی ده‌كاته‌وه‌.
27
جا له‌و ڕۆژه‌دا،
باری له‌سه‌ر شانت لاده‌چێت و
نیری[b] له‌سه‌ر ملت،
له‌به‌ر قه‌ڵه‌وبوونت نیر ده‌ته‌قێت.
28
گه‌یشته‌[c] عه‌ییات،
له‌ میگرۆن په‌ڕییه‌وه‌،
له‌ میخماس كه‌لوپه‌له‌كانی خۆی دانا.
29
ئه‌وان له‌ ده‌ربه‌نده‌كه‌ ده‌په‌ڕنه‌وه‌ و ده‌ڵێن:
«گه‌ڤه‌ع شوێنی شه‌و مانه‌وه‌یه‌.»
ڕامه‌ داچڵه‌كی،
گیڤعای شاول هه‌ڵات.
30
ئه‌ی دانیشتووانی شاری گه‌لیم، به‌ ده‌نگی خۆت بحیلێنه‌!
ئه‌ی له‌یشا، گوێ بگره‌!
داماوه‌ عه‌ناتۆت.
31
مه‌دمێنا ڕایكردووه‌،
خه‌ڵكی گێڤیم په‌ناگیر بوون.
32
ئه‌مڕۆ له‌ نۆڤ ده‌وه‌ستن،
به‌ ڕاوه‌شاندنی ده‌ست هه‌ڕه‌شه‌ ده‌كه‌ن
له‌ كێوه‌كه‌ی شاری سییۆن،
له‌ گرده‌كه‌ی ئۆرشه‌لیم.
33
ئه‌وه‌تا یه‌زدان، په‌روه‌ردگاری سوپاسالار
به‌ هێزێكی تۆقێنه‌ر لق ده‌بڕێته‌وه‌.
باڵا به‌رزه‌كان ده‌بڕدرێنه‌وه‌،
لووتبه‌رزه‌كان نزم ده‌كرێن.
34
چڕی دارستانه‌كان به‌ ته‌ور ده‌بڕێته‌وه‌،
لوبنانیش به‌رامبه‌ر به‌ خودای توانادار ده‌كه‌وێت.
  1. a. 10‏:17 نازناوه‌ بۆ خودای ئیسرائیل.
  2. b. 10‏:27 مه‌به‌ستی له‌ بارگرانییه‌.
  3. c. 10‏:28 مه‌به‌ستی له‌ هاتنی سوپای ئاشوره‌ بۆ شارۆچكه‌كانی باكووری یه‌هودا.