عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سزای ئیسرائیل 
1
ئه‌ی ئیسرائیل، وه‌ك گه‌لان
دڵخۆش و شاد مه‌به‌،
چونكه‌ ناپاكیت له‌ خودای خۆت كرد،
حه‌زت له‌ كرێی له‌شفرۆشی كرد
له‌سه‌ر هه‌موو جۆخینه‌كان[a] .
2
جۆخین و گوشه‌ره‌كانیان به‌شیان ناكات،
شه‌رابی نوێش به‌شیان ناكات.
3
له‌ خاكی یه‌زدان نیشته‌جێ نابن،
به‌ڵكو ئه‌فرایم بۆ میسر ده‌گه‌ڕێته‌وه‌ و
له‌ ئاشوردا خواردنی گڵاو ده‌خۆن.
4
شه‌رابی پێشكه‌شكراو بۆ یه‌زدان ناڕژێنن و
قوربانییه‌كانیان دڵی خۆش ناكه‌ن.
ئه‌و قوربانییانه‌ بۆ ئه‌وان وه‌ك نانی ماته‌مه‌ و
هه‌ركه‌سێك لێی بخوات گڵاو ده‌بێت.
نانه‌كه‌یان بۆ خۆیانه‌ و
ناچێته‌ ناو ماڵی یه‌زدانه‌وه‌.
5
له‌ ڕۆژی دیاریكراودا چی ده‌كه‌ن،
له‌ ڕۆژی جه‌ژنی یه‌زدان؟
6
چونكه‌ ئه‌وه‌تا ئه‌وه‌ی له‌ وێرانی هه‌ڵدێت،
میسر كۆیان ده‌كاته‌وه‌ و
مه‌مفیس له‌ گۆڕیان ده‌نێت.
دڕكوداڵ گه‌نجینه‌ زیوه‌كانیان به‌ میرات ده‌گرێت و
وشترالووك له‌ ماڵه‌كه‌یاندا ده‌بێت.
7
ڕۆژانی لێپرسینه‌وه‌ به‌ڕێوه‌ن،
ڕۆژانی سزا به‌ڕێوه‌ن.
با ئیسرائیل ئه‌مه‌ بزانێت.
له‌به‌ر زۆری تاوانه‌كه‌ت و
زۆری كێشمه‌كێشت،
پێغه‌مبه‌ر به‌ گێل سه‌یر ده‌كه‌یت و
مرۆڤی ڕۆحیش به‌ شێت.
8
پێغه‌مبه‌ره‌كه‌ له‌گه‌ڵ خوداكه‌م چاودێری ئه‌فرایمه‌،
به‌ڵام له‌ هه‌موو ڕێڕه‌وه‌كانی ته‌ڵه‌یان نایه‌وه‌،
كێشمه‌كێشیش له‌ ماڵی خوداكه‌یه‌تی.
9
ئه‌وان نوقوم بوون،
وه‌ك ڕۆژانی گیڤعا گه‌نده‌ڵ بوون،
خودا تاوانه‌كه‌یان ده‌هێنێته‌وه‌ بیری خۆی و
له‌سه‌ر گوناهه‌كانیان سزایان ده‌دات.
10
«ئیسرائیلم دۆزییه‌وه‌
وه‌ك ترێ له‌ چۆڵه‌وانی،
له‌ سه‌ره‌تادا باوباپیرانتانم بینی
وه‌ك نۆبه‌ره‌ی به‌ری دار هه‌نجیرێك.
به‌ڵام ئه‌وان هاتن بۆ به‌عل‌په‌عۆر و
خۆیان بۆ خوداوه‌ندی شه‌رمه‌زاری ته‌رخان كرد،
ئه‌وان وه‌ك ئه‌و خوداوه‌نده‌ی كه‌ خۆشیان ده‌ویست قێزه‌ون بوون.
11
ئه‌فرایمیش شكۆمه‌ندییه‌كه‌ی وه‌ك باڵنده‌ ده‌فڕێت،
نه‌ له‌دایكبوون و نه‌ سكپڕی و نه‌ دروستبوونی كۆرپه‌له‌.
12
ته‌نانه‌ت ئه‌گه‌ر منداڵه‌كانیشیان په‌روه‌رده‌ بكه‌ن،
جه‌رگسووتاویان ده‌كه‌م بۆ ئه‌وه‌ی هیچ مرۆڤێك نه‌بێت.
قوڕبه‌سه‌ریان
كاتێك پشتیان تێده‌كه‌م.
13
ئه‌فرایم ده‌بینم، وه‌ك شاری سوره‌
له‌ له‌وه‌ڕگا ڕواوه‌،
به‌ڵام ئه‌فرایم منداڵه‌كانی
بۆ بكوژ ده‌هێنێته‌ ده‌ره‌وه‌.»
14
ئه‌ی یه‌زدان، بیانده‌رێ،
چییان پێده‌ده‌یت؟
منداڵدانێكی له‌باربرده‌ و
دوو مه‌مكی وشك.
15
«له‌به‌ر هه‌موو خراپه‌كانیان له‌ گلگال
من له‌وێدا قێزم لێیان بووه‌وه‌.
له‌به‌ر كرده‌وه‌ خراپه‌كانیان
له‌ ماڵی خۆم ده‌ریانده‌كه‌م.
ئیتر خۆشم ناوێن،
هه‌موو میره‌كانیان یاخین.
16
ئه‌فرایم هه‌ڵپڕووكاوه‌،
ڕه‌گیان وشك بوو،
به‌ر ناگرن.
ئه‌گه‌ر منداڵیشیان ببێت،
منداڵه‌ خۆشه‌ویسته‌كانی سكیان ده‌مرێنم.»
17
خوداكه‌م ڕه‌تیان ده‌كاته‌وه‌،
چونكه‌ گوێیان لێی نه‌گرت،
له‌به‌ر ئه‌وه‌ له‌نێو نه‌ته‌وه‌كاندا وێڵ ده‌بن.
  1. a. 9‏:1 جۆخین یان سه‌رخه‌رمان ئه‌و زه‌وییه‌ ته‌رخانكراوه‌یه‌ كه‌ له‌لایه‌ن وه‌رزێر و جوتیاره‌وه‌ به‌كارهێنراوه‌ بۆ كوتانی دانه‌وێڵه‌ له‌سه‌ری له‌دوای كۆكردنه‌وه‌ی له‌ كێڵگه‌.