عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خودا ئاوی لافاو به‌سه‌ر زه‌ویدا ده‌هێنێت 
1
كاتێك مرۆڤ ده‌ستیان به‌ زیادبوون كرد له‌سه‌ر ڕووی زه‌وی و كچیان بوو،
2
كوڕانی خودا بینییان كچانی مرۆڤ جوانن. جا له‌ هه‌موو ئه‌وانه‌ی هه‌ڵیانبژاردن ژنیان هێنا.
3
ئینجا یه‌زدان فه‌رمووی: «ڕۆحی من هه‌تاسه‌ر ململانێ له‌گه‌ڵ مرۆڤ ناكات، چونكه‌ مه‌رگدارن؛ ڕۆژانی ژیانیان ده‌بێته‌ سه‌د و بیست ساڵ.»
4
له‌و ڕۆژانه‌دا له‌سه‌ر زه‌وی نه‌فیلیم[a] هه‌بوون. له‌دوای ئه‌وه‌ی كوڕانی خودا چوونه‌ لای كچانی مرۆڤ منداڵیان لێیان بوو، منداڵه‌كان بوونه‌ ئه‌و پاڵه‌وانانه‌ی كه‌ له‌ كۆنه‌وه‌ ناوبانگیان هه‌یه‌.
5
یه‌زدان بینی كه‌ خراپه‌كاری مرۆڤ له‌سه‌ر زه‌وی زۆر بووه‌، هه‌روه‌ها هه‌موو بیروبۆچوونه‌كانی دڵیشی به‌ درێژایی ڕۆژ ته‌نها له‌لای خراپه‌یه‌.
6
یه‌زدان خه‌فه‌تبار بوو كه‌ مرۆڤی له‌سه‌ر زه‌وی دروستكردبوو، هه‌روه‌ها دڵگرانیش بوو.
7
ئیتر یه‌زدان فه‌رمووی: «مرۆڤ ده‌سڕمه‌وه‌، ئه‌وه‌ی له‌سه‌ر ڕووی زه‌وی دروستم كرد، مرۆڤ و ئاژه‌ڵ و بوونه‌وه‌ری خشۆك و باڵنده‌ی ئاسمان، چونكه‌ خه‌فه‌ت ده‌خۆم له‌وانه‌ی كه‌ دروستم كردوون.»
8
به‌ڵام نوح له‌به‌رچاوی یه‌زدان ڕه‌زامه‌ندی به‌ده‌ستهێنابوو.
9
ئه‌مانه‌ش نه‌وه‌كانی نوحن.
نوح پیاوچاك و بێ كه‌موكوڕی نێو خه‌ڵكانی سه‌رده‌می خۆی بوو، دۆستی خودا بوو.
10
نوح سێ كوڕی بوو: سام و حام و یافه‌ت.
11
زه‌ویش له‌به‌رده‌م خودا گه‌نده‌ڵ بوو و پڕیش بوو له‌ توندوتیژی.
12
خودا بینی زه‌وی چه‌ند گه‌نده‌ڵ بووه‌، چونكه‌ هه‌موو مرۆڤێك ژیانی خۆی له‌سه‌ر زه‌وی گه‌نده‌ڵ كردبوو.
13
ئیتر خودا به‌ نوحی فه‌رموو: «من كۆتایی به‌ بوونی هه‌موو ئاده‌میزاد ده‌هێنم، چونكه‌ به‌هۆی ئه‌وانه‌وه‌ زه‌وی پڕ بووه‌ له‌ توندوتیژی. وا له‌گه‌ڵ زه‌وی له‌ناویان ده‌به‌م.
14
كه‌شتییه‌ك بۆ خۆت له‌ ته‌خته‌ی دار سه‌روو دروستبكه‌، كه‌شتییه‌كه‌ بكه‌ لانه‌ و به‌ قیڕ دیوی ناوه‌وه‌ و ده‌ره‌وه‌ی سواخ بده‌.
15
ئاواش دروستی ده‌كه‌یت: سێ سه‌د باڵ درێژی كه‌شتییه‌كه‌ بێت، په‌نجا باڵ پانی بێت، سی باڵیش به‌رزی بێت.[b]
16
به‌ ئه‌ندازه‌ی باڵێك[c] بۆشایی له‌سه‌ر كه‌شتییه‌كه‌ بانێكی بۆ دروستده‌كه‌یت، كه‌شتییه‌كه‌ ته‌واو ده‌كه‌یت. ده‌رگای كه‌شتییه‌كه‌ش له‌ته‌نیشته‌وه‌ داده‌نێیت. كه‌شتییه‌كه‌ ده‌كه‌یته‌ سێ نهۆم، خواره‌وه‌ و ناوه‌ڕاست و سه‌ره‌وه‌.
17
من وا ئاوی لافاو به‌سه‌ر زه‌ویدا ده‌هێنم، بۆ له‌ناوبردنی هه‌موو ژیانێك له‌ژێر ئاسمان، هه‌روه‌ها هه‌موو زینده‌وه‌رێك كه‌ هه‌ناسه‌ی ژیانی تێدایه‌. هه‌رچییه‌ك له‌سه‌ر زه‌وییه‌ له‌ناوده‌چێت.
18
به‌ڵام من په‌یمانی خۆم له‌گه‌ڵ تۆ ده‌چه‌سپێنم. تۆ ده‌چیته‌ ناو كه‌شتییه‌كه‌وه‌، خۆت و كوڕه‌كانت و ژنه‌كه‌ت و بووكه‌كانیشت له‌گه‌ڵت.
19
له‌ هه‌موو بوونه‌وه‌رێكی زیندوو، نێر و مێ، جووتێك له‌گه‌ڵ خۆت ده‌هێنیته‌ ناو كه‌شتییه‌كه‌وه‌، بۆ هێشتنه‌وه‌یان به‌ زیندووێتی.
20
جووتێك له‌ هه‌موو جۆرێك له‌ جۆره‌كانی باڵنده‌ و له‌ جۆره‌كانی ئاژه‌ڵ و له‌ جۆره‌كانی بوونه‌وه‌ره‌ خشۆكه‌كانی زه‌وی دێنه‌ لات، بۆ هێشتنه‌وه‌یان به‌ زیندووێتی.
21
تۆش بۆ خۆت هه‌ر خۆراكێك كه‌ ده‌بێت بخورێت بیبه‌ و له‌لای خۆت كۆی بكه‌ره‌وه‌، تاكو بۆ خۆت و بۆ ئه‌وان ببێته‌ خوارده‌مه‌نی.»
22
جا نوح هه‌موو ئه‌وه‌ی خودا فه‌رمانی پێ كردبوو، ئه‌نجامی دا.
  1. a. 6‏:4 \+tl نه‌فیلیم\+tl* وشه‌یه‌كی عیبرییه‌، به‌ واتای مرۆڤی زه‌به‌لاح دێت.
  2. b. 6‏:15 درێژی كه‌شتییه‌كه‌ نزیكه‌ی 140 مه‌تر، پانییه‌كه‌ی 23 و به‌رزییه‌كه‌ی 14 مه‌تر بوو.
  3. c. 6‏:16 باڵێك: نزیكه‌ی نێو مه‌تر.