عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
یوسف چوو و به‌ فیرعه‌ونی گوت: «باوكم و براكانم، به‌ ڕانه‌ مه‌ڕ و مانگایان و هه‌رچی هه‌یانه‌، له‌ خاكی كه‌نعانه‌وه‌ هاتوون، ئێستا ئه‌وان له‌ خاكی گۆشه‌نن.»
2
له‌نێو براكانی پێنج پیاوی برد و له‌به‌رده‌م فیرعه‌ون ڕای گرتن.
3
فیرعه‌ونیش له‌ براكانی پرسی: «كارتان چییه‌؟»
ئه‌وانیش به‌ فیرعه‌ونیان گوت: «خزمه‌تكارانت شوانی مه‌ڕن، خۆشمان و باوباپیرانیشمان.»
4
هه‌روه‌ها به‌ فیرعه‌ونیان گوت: «بۆ ئاواره‌بوون له‌م خاكه‌ هاتووین، چونكه‌ له‌وه‌ڕگا نه‌ماوه‌ بۆ مه‌ڕه‌كانی خزمه‌تكارانت، له‌به‌ر ئه‌وه‌ی قاتوقڕییه‌كه‌ له‌ خاكی كه‌نعان سه‌خته‌، ئێستاش ڕێگا بده‌ با خزمه‌تكارانت له‌ خاكی گۆشه‌ن نیشته‌جێ بن.»
5
فیرعه‌ون له‌گه‌ڵ یوسف قسه‌ی كرد و پێی گوت: «باوكت و براكانت هاتوون بۆ لای تۆ.
6
خاكی میسر له‌به‌رده‌مته‌، باوكت و براكانت له‌ باشترین خاك نیشته‌جێ بكه‌. با له‌ خاكی گۆشه‌ن نیشته‌جێ بن. ئه‌گه‌ر زانیشت له‌نێویان كه‌سانی به‌ توانا هه‌یه‌، ئه‌وا بیانكه‌ به‌ سه‌ركاری ئه‌و ماڵاته‌ی هی خۆمن.»
7
ئینجا یوسف یاقوبی باوكی هێنایه‌ ژووره‌وه‌ و به‌ فیرعه‌ونی ناساند. یاقوبیش داوای به‌ره‌كه‌تی بۆ فیرعه‌ون كرد.
8
فیرعه‌ونیش به‌ یاقوبی گوت: «ته‌مه‌نت چه‌ند ساڵه‌؟»
9
یاقوبیش به‌ فیرعه‌ونی گوت: «سه‌د و سی ساڵه‌ گه‌ڕۆكم. ته‌مه‌نم كه‌م و سه‌خت بووه‌، هێشتا ته‌مه‌نم ته‌مه‌نی گه‌ڕۆكی باوباپیرانمی تێنه‌په‌ڕاندووه‌.»
10
ئیتر یاقوب داوای به‌ره‌كه‌تی بۆ فیرعه‌ون كرد و له‌لای فیرعه‌ون هاته‌ ده‌ره‌وه‌.
11
ئینجا یوسف باوكی و براكانی خۆی له‌ خاكی میسر نیشته‌جێ كرد، له‌ باشترین زه‌وی له‌ خاكی میسر موڵكی پێدان، له‌ خاكی ڕه‌عمسێس، به‌پێی فه‌رمانی فیرعه‌ون.
12
هه‌روه‌ها یوسف باوكی و براكانی و هه‌موو ماڵی باوكیشی به‌پێی ژماره‌ی منداڵه‌كانیان به‌ نان به‌خێو كرد.
یوسف و برسیێتییه‌كه‌ 
13
له‌ هه‌موو خاكه‌كه‌دا نان نه‌بوو، چونكه‌ قاتوقڕییه‌كه‌ زۆر سه‌خت بوو، خاكی میسر و خاكی كه‌نعان به‌هۆی قاتوقڕییه‌كه‌وه‌ له‌ كه‌ڵك كه‌وتبوون.
14
یوسف هه‌موو ئه‌و زیوه‌ی كۆكرده‌وه‌ كه‌ له‌ خاكی میسر و خاكی كه‌نعاندا هه‌بوون، له‌ جیاتی ئه‌و گه‌نمه‌ی ده‌یانكڕی، یوسفیش زیوه‌كه‌ی هێنایه‌ ماڵی فیرعه‌ون.
15
كاتێك كه‌ زیو له‌ خاكی میسر و له‌ خاكی كه‌نعان نه‌ما، هه‌موو میسرییه‌كان هاتنه‌ لای یوسف و گوتیان: «نانمان بۆ بهێنه‌! بۆچی له‌به‌رده‌مت بمرین له‌به‌ر ئه‌وه‌ی زیو ته‌واو بوو؟»
16
یوسفیش پێی گوتن: «ئاژه‌ڵه‌ ماڵاته‌كانتان بهێنن، منیش له‌ جیاتی ماڵاته‌كانتان نانتان ده‌ده‌مێ، ئه‌گه‌ر زیو ته‌واو بووه‌.»
17
ئینجا ماڵاته‌كانیان بۆ یوسف هێنا، ئه‌ویش نانی پێدان، له‌ جیاتی ئه‌سپ و مه‌ڕ و بزن و چێڵ و گوێدرێژه‌كانیان. ئیتر ئه‌و ساڵه‌ له‌ جیاتی هه‌موو ماڵاته‌كانیان نانی دان.
18
كه‌ ئه‌و ساڵه‌ ته‌واو بوو، بۆ ساڵی دووه‌م هاتنه‌وه‌ بۆ لای و پێیان گوت: «له‌ گه‌وره‌مانی ناشارینه‌وه‌ زیوه‌كانمان ته‌واو بوون، ماڵاته‌كانیشمان له‌لای گه‌وره‌مانه‌، ئیتر هیچ له‌پێش گه‌وره‌مان نه‌ماوه‌ ته‌نها له‌شمان و زه‌وییه‌كه‌مان نه‌بێت.
19
بۆچی له‌پێش چاوت بمرین، خۆمان و زه‌وییه‌كه‌شمان؟ به‌ نان خۆمان و زه‌وییه‌كه‌مان بكڕه‌، ئیتر خۆمان و زه‌وییه‌كه‌شمان ده‌بینه‌ كۆیله‌ی فیرعه‌ون. تۆویشمان بده‌رێ بۆ ئه‌وه‌ی بژین و نه‌مرین، با زه‌وییه‌كه‌شمان نه‌بێته‌ چۆڵه‌وانی.»
20
یوسفیش هه‌موو خاكی میسری بۆ فیرعه‌ون كڕی، چونكه‌ هه‌رچی میسری هه‌بوو كێڵگه‌كه‌ی خۆی فرۆشت، له‌به‌ر ئه‌وه‌ی قاتوقڕییه‌كه‌ زۆر سه‌خت بوو له‌سه‌ریان. ئیتر خاكه‌كه‌ بووه‌ هی فیرعه‌ون.
21
یوسف خه‌ڵكه‌كه‌شی له‌م سه‌ری میسره‌وه‌ هه‌تا ئه‌و سه‌ری به‌ كۆیله‌ كرد.
22
ته‌نها زه‌وی كاهینه‌كانی نه‌كڕی، چونكه‌ كاهینه‌كان له‌لایه‌ن فیرعه‌ونه‌وه‌ به‌شه‌ خۆراكیان هه‌بوو، ئیتر به‌شه‌ خۆراكه‌كه‌ی خۆیان ده‌خوارد كه‌ فیرعه‌ون ده‌یدانێ. له‌به‌ر ئه‌وه‌ زه‌وییه‌كه‌ی خۆیان نه‌فرۆشت.
23
ئینجا یوسف به‌ خه‌ڵكه‌كه‌ی گوت: «وا ئه‌مڕۆ خۆتان و زه‌وییه‌كه‌تانم بۆ فیرعه‌ون كڕی، ئه‌وه‌ش تۆوه‌ بۆ ئێوه‌ هه‌تا له‌ زه‌وی بیچێنن.
24
به‌ڵام كاتێك له‌ خه‌رماناندا پێنج یه‌كی خه‌رمانه‌كه‌تان ده‌ده‌نه‌ فیرعه‌ون، چوار به‌شه‌كه‌ی دیكه‌ بۆ خۆتان ده‌بێت، بۆ بنه‌تۆ[a] و بۆ خۆراكی خۆتان و ئه‌وانه‌ی له‌ ماڵه‌كانتانن و بۆ خۆراكی منداڵه‌كانتان.»
25
ئه‌وانیش گوتیان: «تۆ ئێمه‌ت به‌ زیندوویی هێشته‌وه‌، خۆزگه‌ گه‌وره‌كه‌مان لێمان ڕازی بووایه‌ و ببینه‌ كۆیله‌ی فیرعه‌ون.»
26
ئیتر یوسف ئه‌مه‌ی له‌سه‌ر خاكی میسر كرده‌ یاسا، هه‌تا ئه‌مڕۆش، پێنج یه‌كی به‌رهه‌می كشتوكاڵ بۆ فیرعه‌ونه‌، ته‌نها زه‌وی كاهینه‌كان نه‌بێت كه‌ نه‌بووه‌ هی فیرعه‌ون.
27
نه‌وه‌ی ئیسرائیل له‌ خاكی میسر له‌ ناوچه‌ی گۆشه‌ن نیشته‌جێ بوو، له‌وێ بوونه‌ خاوه‌ن موڵك و گه‌شه‌یان كرد، زۆریش زیادیان كرد.
28
یاقوب حه‌ڤده‌ ساڵ له‌ خاكی میسر ژیانی برده‌ سه‌ر. هه‌موو ته‌مه‌نی یاقوب بووه‌ سه‌د و چل و حه‌وت ساڵ.
29
كاتێك ڕۆژانی ئیسرائیل نزیك بووه‌وه‌ له‌ مردن، یوسفی كوڕی بانگكرد و پێی گوت: «ئه‌گه‌ر جێی ڕه‌زامه‌ندیتم ئه‌وا ده‌ستت بخه‌ره‌ ژێر ڕانمه‌وه‌ و چاكه‌ و وه‌فاداریم له‌گه‌ڵ بكه‌، له‌ میسر مه‌منێژه‌،
30
به‌ڵكو كاتێك له‌گه‌ڵ باوباپیرانم ڕاده‌كشێم، له‌ میسره‌وه‌ هه‌ڵمبگره‌ و له‌ گۆڕستانی ئه‌واندا بمنێژه‌.»
ئه‌میش گوتی: «من به‌پێی قسه‌كه‌ی تۆ ده‌كه‌م.»
31
ئه‌ویش پێی گوت: «سوێندم بۆ بخۆ.» یوسفیش سوێندی بۆ خوارد. ئیسرائیلیش له‌سه‌ر قه‌ره‌وێڵه‌كه‌ی كڕنۆشی برد.
  1. a. 47‏:24 واته‌ تۆوی چاندن.