عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خه‌ونه‌كانی فیرعه‌ون 
1
ئه‌وه‌ بوو له‌دوای دوو ساڵ، فیرعه‌ون خه‌ونی بینی، كه‌ له‌لای ڕووباری نیل ڕاوه‌ستاوه‌،
2
له‌ ڕووباره‌كه‌وه‌ حه‌وت مانگای ڕوخسار جوان و گۆشتن هاتنه‌ ده‌ره‌وه‌، له‌ مێرگه‌كه‌دا كه‌وتنه‌ له‌وه‌ڕان.
3
له‌دوای ئه‌وان حه‌وت مانگای دیكه‌ له‌ ڕووباره‌كه‌ هاتنه‌ ده‌ره‌وه‌، ڕوخسار ناشیرین و له‌ڕ، له‌لای مانگاكانه‌وه‌ له‌سه‌ر كه‌ناری ڕووباره‌كه‌ ڕاوه‌ستان.
4
ئینجا مانگا ڕوخسار ناشیرین و له‌ڕه‌كان، حه‌وت مانگا ڕوخسار جوان و گۆشتنه‌كانیان خوارد. ئیتر فیرعه‌ون به‌ئاگا هات.
5
له‌دوای ئه‌وه‌ نوسته‌وه‌ و دیسان خه‌ونی بینییه‌وه‌، كه‌ حه‌وت گوڵه‌گه‌نمی قه‌ڵه‌و و جوان له‌ لاسكێكه‌وه‌ ده‌رهاتوون، قه‌ڵه‌و و جوانن.
6
له‌دوای ئه‌مانه‌وه‌ حه‌وت گوڵه‌گه‌نمی باریك و سووتا و به‌ بای ڕۆژهه‌ڵات ڕواون.
7
ئینجا گوڵه‌گه‌نمه‌ باریكه‌كان حه‌وت گوڵه‌گه‌نمه‌ قه‌ڵه‌و و پڕه‌كانیان قووت دا. ئیتر فیرعه‌ون به‌ئاگا هات، زانی كه‌ خه‌ونه‌.
8
ئه‌وه‌ بوو سه‌ر له‌ به‌یانی دڵگران بوو، ئیتر ناردی به‌دوای هه‌موو جادووگه‌رانی میسر و هه‌موو داناكانی. فیرعه‌ون خه‌ونه‌كه‌ی خۆی بۆ گێڕانه‌وه‌، به‌ڵام كه‌سێك له‌نێویان نه‌بوو بۆی لێكبداته‌وه‌.
9
ئینجا سه‌رۆكی ساقییه‌كان قسه‌ی له‌گه‌ڵ فیرعه‌ون كرد و گوتی: «من ئه‌مڕۆ هه‌ڵه‌كانی خۆم دێته‌وه‌ یاد.
10
جارێك فیرعه‌ون له‌ دوو خزمه‌تكاره‌كه‌ی خۆی تووڕه‌ بوو، من و سه‌رۆكی نانه‌واكانی خسته‌ زیندانی ماڵی سه‌رۆكی پاسه‌وانه‌كان.
11
من و ئه‌و له‌ یه‌ك شه‌و خه‌ونمان بینی، خه‌ونی هه‌ریه‌كه‌مان لێكدانه‌وه‌یه‌كی جیاوازی هه‌بوو له‌گه‌ڵ ئه‌وی دیكه‌مان.
12
له‌وێش كوڕێكی عیبرانیمان له‌گه‌ڵ بوو كه‌ خزمه‌تكاری سه‌رۆكی پاسه‌وانه‌كان بوو. بۆ ئه‌ومان گێڕایه‌وه‌، ئه‌ویش هه‌ردوو خه‌ونه‌كه‌ی بۆ لێكداینه‌وه‌، بۆ هه‌ریه‌كه‌مان به‌پێی خه‌ونه‌كه‌ی لێكی دایه‌وه‌.
13
ئیتر ئه‌و چۆنی بۆ لێكداینه‌وه‌ ئاوا ڕوویدا. ئه‌وه‌ بوو من گه‌ڕامه‌وه‌ شوێنه‌كه‌ی خۆم و ئه‌ویش كوژرا.»
14
فیرعه‌ونیش به‌دوای یوسفدا ناردی، ئیتر خێرا له‌ زیندانه‌وه‌ هێنایان. له‌دوای ئه‌وه‌ی تراشی كرد و جله‌كانی گۆڕی، هاته‌ به‌رده‌م فیرعه‌ون.
15
فیرعه‌ون به‌ یوسفی گوت: «خه‌ونێكم بینیوه‌ و كه‌س نییه‌ لێكی بداته‌وه‌. به‌ڵام ده‌رباره‌ی تۆ بیستوومه‌ كه‌ خه‌ون ده‌بیستیت هه‌تا لێكی بده‌یته‌وه‌.»
16
یوسف وه‌ڵامی فیرعه‌ونی دایه‌وه‌: «هی من نییه‌، به‌ڵكو خودایه‌ كه‌ وه‌ڵامی دڵنیاكه‌ره‌وه‌ ده‌داته‌ فیرعه‌ون.»
17
ئینجا فیرعه‌ون به‌ یوسفی گوت: «له‌ خه‌ونمدا له‌سه‌ر كه‌ناری ڕووباری نیل ڕاوه‌ستابووم،
18
بینیم له‌ ڕووباره‌كه‌وه‌ حه‌وت مانگای گۆشتن و ڕوخسار جوان هاتنه‌ ده‌ره‌وه‌، له‌ مێرگه‌كه‌دا كه‌وتنه‌ له‌وه‌ڕان.
19
له‌دوای ئه‌وان حه‌وت مانگای دیكه‌ هاتنه‌ ده‌ره‌وه‌، ڕوخسار زۆر ناشیرین و له‌ڕولاواز بوون. له‌ هه‌موو خاكی میسر ناشیرینی وه‌ك ئه‌وانم نه‌بینیبوو.
20
ئینجا مانگا له‌ڕ و ڕوخسار ناشیرنه‌كان، حه‌وت مانگا قه‌ڵه‌وه‌كه‌ی یه‌كه‌م جاریان خوارد.
21
چوونه‌ ناو ورگیانه‌وه‌، به‌ڵام پێیانه‌وه‌ دیار نه‌بوو كه‌ ئه‌وانه‌ چوونه‌ته‌ ورگیانه‌وه‌، به‌ڵكو هه‌روه‌ك یه‌كه‌م جار ڕوخساریان ناشیرین بوو. ئیتر به‌ئاگا هاتم.
22
«دیسان له‌ خه‌ونمدا بینیم حه‌وت گوڵه‌گه‌نمی پڕ و جوان له‌ لاسكێكه‌وه‌ ده‌رهاتوون.
23
له‌دوای ئه‌وان حه‌وت گوڵه‌گه‌نمی وشك و باریك و سووتا و به‌ بای ڕۆژهه‌ڵات ڕواون.
24
گوڵه‌گه‌نمه‌ باریكه‌كان حه‌وت گوڵه‌گه‌نمه‌ جوانه‌كه‌یان قووت دا. ئه‌مه‌م به‌ جادووگه‌ره‌كان گوت، به‌ڵام كه‌س نه‌بوو بۆم لێكبداته‌وه‌.»
25
یوسفیش به‌ فیرعه‌ونی گوت: «خه‌ونه‌كانی فیرعه‌ون یه‌كه‌ و له‌ یه‌ك ده‌چن. ئه‌وه‌ی خودا خه‌ریكه‌ ده‌یكات به‌ فیرعه‌ونی ڕاگه‌یاند.
26
حه‌وت مانگا جوانه‌كه‌ حه‌وت ساڵن. حه‌وت گوڵه‌گه‌نمه‌ جوانه‌كه‌ش هه‌ر حه‌وت ساڵن. یه‌ك خه‌ونه‌.
27
حه‌وت مانگا له‌ڕ و ناشیرنه‌كان به‌دوایاندا هاتنه‌ ده‌ره‌وه‌ ئه‌وه‌ حه‌وت ساڵن. حه‌وت گوڵه‌گه‌نمه‌ باریك و سووتاوه‌كه‌ به‌ بای ڕۆژهه‌ڵات، ده‌بنه‌ حه‌وت ساڵی قاتوقڕی.
28
«ئه‌مه‌ش ئه‌وه‌یه‌ كه‌ به‌ فیرعه‌ونم گوت، ئه‌وه‌ی خودا خه‌ریكه‌ ده‌یكات به‌ فیرعه‌ونی نیشان دا:
29
حه‌وت ساڵ دێت تێروته‌سه‌لییه‌كی مه‌زن له‌ هه‌موو خاكی میسر ده‌بێت.
30
به‌ڵام به‌دوای ئه‌ودا حه‌وت ساڵی قاتوقڕی دێت كه‌ هه‌موو ئه‌و تێروته‌سه‌لییه‌ له‌بیر ده‌باته‌وه‌ كه‌ له‌ خاكی میسر بووه‌. قاتوقڕی خاكه‌كه‌ ده‌فه‌وتێنێت.
31
ئیتر به‌و تێروته‌سه‌لییه‌ی له‌ خاكه‌كه‌دا بووه‌ نازانرێت، له‌به‌ر ئه‌و قاتوقڕییه‌ی به‌دوایدا دێت، چونكه‌ زۆر گران ده‌بێت.
32
سه‌باره‌ت به‌وه‌ش كه‌ خه‌ونه‌كه‌ دوو جار بۆ فیرعه‌ون دووباره‌ كراوه‌ته‌وه‌ له‌به‌ر ئه‌وه‌یه‌ كه‌ ئه‌و كاره‌ له‌لای خوداوه‌ بڕیار دراوه‌، خوداش خێرایه‌ له‌ ئه‌نجامدانی.
33
«ئێستاش با فیرعه‌ون پیاوێكی وردبین و دانا ببینێت و له‌سه‌ر خاكی میسر داینێت.
34
با فیرعه‌ون چه‌ند سه‌رپه‌رشتیارێك له‌سه‌ر زه‌وی دابنێت بۆ وه‌رگرتنی پێنج یه‌كی دانه‌وێڵه‌ی خاكی میسر له‌ هه‌ر حه‌وت ساڵی تێروته‌سه‌لییه‌كه‌.
35
ئیتر هه‌موو خواردنی ئه‌م ساڵه‌ باشانه‌ی كه‌ دێت كۆده‌كه‌نه‌وه‌، له‌ژێر ده‌ستی فیرعه‌ون گه‌نم له‌ ئه‌مبار بكه‌ن، بۆ خواردن له‌ شارۆچكه‌كان ده‌پارێزرێت.
36
ئه‌م خۆراكه‌ ده‌بێته‌ ئازووقه‌ی خاكه‌كه‌ بۆ ئه‌و حه‌وت ساڵه‌ قاتوقڕییه‌ی كه‌ له‌ خاكی میسردا ده‌بێت، ئیتر خاكه‌كه‌ به‌ قاتوقڕی له‌ناو ناچێت.»
37
ئه‌م قسانه‌ له‌به‌رچاوی فیرعه‌ون باش بوو، هه‌روه‌ها له‌به‌رچاوی هه‌موو ده‌ستوپێوه‌نده‌كه‌ی.
38
فیرعه‌ون به‌ ده‌ستوپێوه‌نده‌كه‌ی گوت: «ئایا كه‌سێكی وه‌ك ئه‌م پیاوه‌مان ده‌ست ده‌كه‌وێت كه‌ ڕۆحی خودای تێدابێت؟»
39
ئینجا فیرعه‌ون به‌ یوسفی گوت: «له‌دوای ئه‌وه‌ی خودا هه‌موو ئه‌مانه‌ی بۆت ئاشكرا كرد، ئیتر كوا له‌ تۆ وردبینتر و داناتر.
40
تۆ له‌سه‌ر ماڵه‌كه‌ی من ده‌بیت، هه‌موو گه‌له‌كه‌شم له‌ ده‌می تۆوه‌ ڕاسپارده‌ وه‌رده‌گرن، ته‌نها له‌ ته‌ختی پاشایه‌تی له‌ تۆ گه‌وره‌تر ده‌بم.»
یوسف وه‌ك لێپرسراوی خاكی میسر 
41
ئیتر فیرعه‌ون به‌ یوسفی گوت: «ئه‌وا تۆم كرده‌ لێپرسراوی هه‌موو خاكی میسر.»
42
ئینجا فیرعه‌ون ئه‌نگوستیله‌كه‌ی ده‌ستی خۆی داكه‌ند و له‌ ده‌ستی یوسفی كرد، هه‌روه‌ها جلوبه‌رگی كه‌تانی ناسكی له‌به‌ری كرد و ته‌وقێكی زێڕیشی له‌ ملی كرد.
43
پاشان سواری دووه‌م گالیسكه‌ی خۆی كرد و له‌پێشیه‌وه‌ بانگه‌وازیان كرد: «به‌ چۆكدا بێن!» ئیتر كردییه‌ لێپرسراوی هه‌موو خاكی میسر.
44
ئینجا فیرعه‌ون به‌ یوسفی گوت: «من فیرعه‌ونم، به‌ڵام به‌بێ قسه‌ی تۆ كه‌س له‌ هه‌موو خاكی میسر، نه‌ ده‌ستی و نه‌ پێی به‌رز ناكاته‌وه‌.»
45
فیرعه‌ون ناوی له‌ یوسف نا سافنه‌ت په‌عنێح، هه‌روه‌ها ئاسنه‌تی كچی پۆتی‌فه‌ره‌عی كاهینی ئۆنی كچی پێدا هه‌تا ببێته‌ ژنی. ئیتر یوسف چووه‌ ده‌ره‌وه‌ بۆ سه‌ر خاكی میسر.
46
ته‌مه‌نی یوسف سی ساڵ بوو كاتێك ده‌ستی به‌ خزمه‌تی فیرعه‌ونی پاشای میسر كرد. یوسف له‌لای فیرعه‌ون چووه‌ ده‌ره‌وه‌ و به‌ هه‌موو خاكی میسردا تێپه‌ڕی.
47
له‌ حه‌وت ساڵی تێروته‌سه‌لییه‌كه‌دا زه‌وی به‌ پڕی به‌روبوومی دا.
48
یوسف هه‌موو خۆراكی ئه‌و حه‌وت ساڵه‌ی كۆكرده‌وه‌ كه‌ له‌ خاكی میسردا بوو، له‌ هه‌موو شارێكدا خۆراكی دانا، خۆراكی ئه‌و كێڵگانه‌ش كه‌ له‌ ده‌وروبه‌ری شاره‌كه‌ بوون.
49
یوسف وه‌ك لمی ده‌ریا گه‌نمی كۆكرده‌وه‌، ئه‌وه‌نده‌ زۆر ئیتر وازی له‌ ژماردنیان هێنا، چونكه‌ له‌ ژماردن نه‌ده‌هاتن.
50
پێش هاتنی ساڵانی قاتوقڕییه‌كه‌، یوسف له‌ ئاسنه‌تی كچی پۆتی‌فه‌ره‌عی كاهینی ئۆن دوو كوڕی بوو.
51
یوسف كوڕه‌ نۆبه‌ره‌كه‌ی ناونا مه‌نه‌شه‌[a] و گوتی: «چونكه‌ خودا هه‌موو ماندووبوونم و هه‌موو ماڵی باوكمی له‌بیر بردمه‌وه‌.»
52
دووه‌میشیانی ناونا ئه‌فرایم[b] ، گوتی «چونكه‌ خودا له‌ خاكی زه‌لیلیمدا به‌رداری كردم.»
53
ئه‌و حه‌وت ساڵه‌ تێروته‌سه‌لییه‌ی له‌ خاكی میسردا بوو كۆتایی هات.
54
ئینجا حه‌وت ساڵی قاتوقڕییه‌كه‌ ده‌ستی پێكرد، وه‌ك یوسف گوتبووی. قاتوقڕی له‌ هه‌موو زه‌ویدا بوو، به‌ڵام له‌ هه‌موو خاكی میسردا نان هه‌بوو.
55
كاتێك قاتوقڕییه‌كه‌ كاریگه‌ری له‌ هه‌موو میسر كرد، خه‌ڵكه‌كه‌ هاواریان بۆ فیرعه‌ون برد بۆ نان. فیرعه‌ونیش به‌ هه‌موو میسرییه‌كانی گوت: «بڕۆنه‌ لای یوسف، ئه‌وه‌ی ئه‌و پێتان ده‌ڵێت بیكه‌ن.»
56
قاتوقڕییه‌كه‌ ته‌واوی ڕووی خاكه‌كه‌ی گرته‌وه‌، ئینجا یوسف هه‌موو ئه‌مباره‌كانی كرده‌وه‌ و به‌ میسرییه‌كانی فرۆشت. قاتوقڕییه‌كه‌ له‌ خاكی میسردا توندتر بوو.
57
هه‌موو زه‌ویش هاتن بۆ میسر هه‌تا گه‌نم له‌ یوسف بكڕن، چونكه‌ قاتوقڕییه‌كه‌ له‌ هه‌موو زه‌ویدا توند بوو.
  1. a. 41‏:51 وشه‌ی \+tl مه‌نه‌شه‌\+tl* له‌ ڕووی ده‌نگه‌وه‌ له‌ وشه‌ی (له‌بیربردنه‌وه‌)ی عیبری نزیكه‌.
  2. b. 41‏:52 به‌ واتای دیسان به‌رهه‌مداره‌