عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گه‌ڕانه‌وه‌ی یاقوب بۆ بێت‌ئێل 
1
ئینجا خودا به‌ یاقوبی فه‌رموو: «هه‌سته‌، سه‌ربكه‌وه‌ به‌ره‌و بێت‌ئێل و له‌وێ نیشته‌جێ به‌، هه‌ر له‌وێش قوربانگایه‌ك بۆ خودا دروستبكه‌، كه‌ بۆت ده‌ركه‌وت له‌ كاتێك تۆ له‌ ده‌ست عیسۆی برات هه‌ڵده‌هاتی.»
2
ئیتر یاقوب به‌ خاووخێزانه‌كه‌ی و هه‌موو ئه‌وانه‌ی له‌گه‌ڵی بوون گوت: «هه‌موو ئه‌و خوداوه‌نده‌ بێگانانه‌ی له‌نێوتانه‌، له‌ خۆتانی جیا بكه‌نه‌وه‌ و خۆتان پاك بكه‌نه‌وه‌، جله‌كانیشتان بگۆڕن.
3
ده‌با هه‌ستین و به‌ره‌و بێت‌ئێل سه‌ربكه‌وین، له‌وێ قوربانگایه‌ك بۆ خودا دروستده‌كه‌م كه‌ له‌ ڕۆژی ته‌نگانه‌مدا به‌ ده‌نگمه‌وه‌ هات و له‌و ڕێگایه‌ی گرتبوومه‌ به‌ر له‌گه‌ڵم بوو.»
4
ئه‌وانیش هه‌رچی خوداوه‌ندی بێگانه‌ هه‌بوو له‌ ده‌ستیان له‌گه‌ڵ گواره‌كانی گوێچكه‌یان دایانه‌ یاقوب، یاقوبیش له‌ژێر دار به‌ڕووه‌كه‌ كه‌ له‌لای شه‌خه‌مه‌ له‌ژێر گڵ شاردییه‌وه‌.
5
ئینجا به‌ڕێكه‌وتن و ترسی خوداش باڵی كێشا به‌سه‌ر شارۆچكه‌كانی ده‌وروبه‌ریان، ئیتر كه‌س دوای كوڕانی یاقوب نه‌كه‌وت.
6
یاقوب خۆی و هه‌موو ئه‌و خه‌ڵكه‌ی له‌گه‌ڵی بوو هاتنه‌ لوز كه‌ بێت‌ئێله‌ له‌ خاكی كه‌نعان.
7
له‌وێ قوربانگایه‌كی بنیاد نا، شوێنه‌كه‌شی ناونا ئێل بێت‌ئێل[a] ، چونكه‌ له‌و شوێنه‌دا خودای بۆ ده‌ركه‌وت، له‌ كاتی هه‌ڵاتنی له‌ ده‌ست براكه‌ی.
8
ده‌ڤۆرای دایه‌نی ڕڤقه‌ مرد، له‌ژێر دار به‌ڕووه‌كه‌ی خوار بێت‌ئێل نێژرا. ئه‌و شوێنه‌ش ناونرا ئه‌لۆن باكوت.
9
كاتێك له‌ په‌دان ئارام گه‌ڕایه‌وه‌، دیسان خودا بۆ یاقوب ده‌ركه‌وت و به‌ره‌كه‌تداری كرد.
10
خودا پێی فه‌رموو: «ناوت یاقوبه‌، به‌ڵام له‌ ئێستا به‌دواوه‌ به‌ یاقوب ناو نابرێیت، به‌ڵكو ناوت ده‌بێته‌ ئیسرائیل.» ئیتر ناوی لێنا ئیسرائیل.
11
ئینجا خودا پێی فه‌رموو: «من خودای هه‌ره‌ به‌ توانام، به‌ردار به‌ و زۆر به‌. نه‌ته‌وه‌یه‌ك و كۆمه‌ڵێك نه‌ته‌وه‌ له‌ تۆوه‌ ده‌بن، پاشایانیش له‌ پشتی تۆوه‌ ده‌رده‌چن.
12
ئه‌و خاكه‌ش كه‌ دام به‌ ئیبراهیم و ئیسحاق، هه‌روه‌ها ده‌یده‌مه‌ تۆ و نه‌وه‌كه‌ت له‌دوای خۆت.»
13
ئیتر خودا له‌و شوێنه‌ی قسه‌ی له‌گه‌ڵ كرد له‌سه‌ری به‌رزبووه‌وه‌.
14
یاقوبیش له‌و شوێنه‌ی كه‌ خودا قسه‌ی له‌گه‌ڵ كردبوو، ستوونێكی به‌ردینی ڕاگیر كرد و شه‌رابی پێشكه‌شكراوی به‌سه‌ردا ڕشت و زه‌یتی به‌سه‌ردا كرد.
15
یاقوب ئه‌و شوێنه‌ی ناونا بێت‌ئێل كه‌ تێیدا خودا قسه‌ی له‌گه‌ڵدا كرد.
مردنی ڕاحێل و ئیسحاق 
16
ئینجا له‌ بێت‌ئێله‌وه‌ به‌ڕێكه‌وتن. كاتێك ماوه‌یه‌كی كه‌میان مابوو بگه‌نه‌ ئه‌فرات، ڕاحێل كه‌وته‌ سه‌ر منداڵبوون، منداڵبوونێكی دژوار.
17
ئه‌وه‌ بوو له‌ كاتی منداڵبوونه‌كه‌ی، مامانه‌كه‌ پێی گوت: «مه‌ترسه‌، چونكه‌ ئه‌مه‌ش كوڕێكی دیكه‌ته‌.»
18
ئه‌وه‌ بوو له‌گه‌ڵ دواهه‌ناسه‌ی، له‌به‌ر ئه‌وه‌ی ده‌مرد، كوڕه‌كه‌ی ناونا به‌ن‌ئۆنی[b] . به‌ڵام باوكی ناوی لێنا بنیامین[c] .
19
ئیتر ڕاحێل مرد و له‌ ڕێی ئه‌فرات نێژرا كه‌ بێت‌له‌حمه‌.
20
یاقوب ستوونێكی له‌سه‌ر گۆڕه‌كه‌ی ڕاگیر كرد، كه‌ هه‌تا ئه‌مڕۆش ئه‌وه‌ ستوونی گۆڕه‌كه‌ی ڕاحێله‌.
21
ئیسرائیل به‌ڕێكه‌وته‌وه‌ و چادره‌كه‌ی له‌ پشت مگده‌ل عێده‌ره‌وه‌ هه‌ڵدا.
22
كاتێك ئیسرائیل له‌و ناوچه‌یه‌دا ده‌ژیا، ڕه‌ئوبێن چوو له‌گه‌ڵ بیلهه‌ی كه‌نیزه‌ی باوكی نوست. ئه‌مه‌ش به‌رگوێی ئیسرائیل كه‌وته‌وه‌.
یاقوب دوازده‌ كوڕی هه‌بوو:
23
كوڕه‌كانی لێئه‌:
ڕه‌ئوبێن، نۆبه‌ره‌كه‌ی یاقوب.
شیمۆن، لێڤی، یه‌هودا، یه‌ساخار و زه‌بولون.
24
كوڕه‌كانی ڕاحێل:
یوسف و بنیامین
25
كوڕه‌كانی بیلهه‌ی كه‌نیزه‌ی ڕاحێل:
دان و نه‌فتالی.
26
كوڕه‌كانی زیلپه‌ی كه‌نیزه‌ی لێئه‌:
گاد و ئاشێر.
ئه‌مانه‌ كوڕه‌كانی یاقوبن، كه‌ له‌ په‌دان ئارام له‌دایك بوون.
27
یاقوب هاته‌ مه‌مرێ بۆ لای ئیسحاقی باوكی له‌ نزیك قیریه‌ت ئه‌ربه‌ع، كه‌ حه‌برۆنه‌، كه‌ له‌وێ ئیبراهیم و ئیسحاق ئاواره‌ بوون.
28
ته‌مه‌نی ئیسحاق سه‌د و هه‌شتا ساڵ بوو.
29
ئینجا دواهه‌ناسه‌ی دا و مرد، چووه‌وه‌ پاڵ گه‌له‌كه‌ی خۆی، به‌ پیری و تێر له‌ ژیان خواردوو. هه‌ردوو كوڕه‌كه‌ی خۆی، عیسۆ و یاقوب، ناشتیان.
  1. a. 35‏:7 ئێل بێت‌ئێل: واته‌ خودای بێت‌ئێل، یان خودای ماڵی خودا.
  2. b. 35‏:18 به‌ن‌ئۆنی: واته‌ كوڕی ناخۆشیم.
  3. c. 35‏:18 بنیامین: واته‌ كوڕی ده‌سته‌ڕاستم.