عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
دینه‌ و شه‌خه‌مییه‌كان 
1
دینه‌ی كچی یاقوب كه‌ له‌ لێئه‌ بوو، چووه‌ ده‌ره‌وه‌ بۆ دیده‌نی كچانی ئه‌و ناوه‌.
2
كاتێك كه‌ شه‌خه‌می كوڕی حه‌مۆری حیڤی، كه‌ میری ئه‌و ناوه‌ بوو، چاوی پێی كه‌وت، گرتی و لاقه‌ی كرد.
3
دڵیشی چووه‌ سه‌ر دینه‌ی كچی یاقوب، ئه‌و كچه‌ی خۆشویست و به‌ نه‌رمی قسه‌ی له‌گه‌ڵ كرد.
4
شه‌خه‌م له‌گه‌ڵ حه‌مۆری باوكی قسه‌ی كرد و پێی گوت: «ئه‌م كچه‌م بۆ بخوازه‌ ببێته‌ ژنم.»
5
یاقوب بیستی كه‌ داوێنی دینه‌ی كچی پیسكراوه‌، له‌و كاته‌دا كوڕه‌كانی له‌گه‌ڵ مه‌ڕوماڵاته‌كه‌ی له‌ ده‌شتوده‌ر بوون. ئیتر یاقوبیش هه‌تا هاتنه‌وه‌ ده‌نگی نه‌كرد.
6
حه‌مۆری باوكی شه‌خه‌م چووه‌ ده‌ره‌وه‌ بۆ لای یاقوب بۆ ئه‌وه‌ی قسه‌ی له‌گه‌ڵ بكات.
7
كوڕه‌كانی یاقوب كه‌ بیستیان، له‌ ده‌شتوده‌ر هاتنه‌وه‌، هه‌ستیان كرد كه‌ ده‌ستدرێژییان كراوه‌ته‌ سه‌ر و زۆر تووڕه‌ بوون، چونكه‌ شه‌خه‌م به‌ لاقه‌كردنی كچی یاقوب كارێكی ئابڕووبه‌رانه‌ی له‌گه‌ڵ ئیسرائیل[a] كرد، ئه‌مه‌ش كارێكی نه‌شیاو بوو.
8
به‌ڵام حه‌مۆر قسه‌ی له‌گه‌ڵ كردن و گوتی: «شه‌خه‌می كوڕم دڵی به‌ كچه‌كه‌تانه‌وه‌یه‌، بیده‌نێ ببێته‌ ژنی.
9
ژن و ژنخوازیمان له‌گه‌ڵ بكه‌ن، كچه‌كانی خۆتانمان بده‌نێ و كچه‌كانی ئێمه‌ بۆ خۆتان ببه‌ن.
10
له‌ناومان نیشته‌جێ بن، زه‌وییه‌كه‌ش له‌به‌رده‌متانه‌، تێیدا نیشته‌جێ بن و كڕین و فرۆشتنی تێدا بكه‌ن، موڵكتان تێیدا هه‌بێت.»
11
ئینجا شه‌خه‌م به‌ باوك و براكانی دینه‌ی گوت: «لێم ڕازی بن، ئه‌وه‌ی پێم ده‌ڵێن ده‌یده‌م.
12
ماره‌یی و دیاری زۆر له‌سه‌رم زیاد بكه‌ن، ئه‌وه‌ی داوای ده‌كه‌ن ده‌یده‌م، ته‌نها كچه‌كه‌م بده‌نێ ببێته‌ ژنم.»
13
كوڕانی یاقوب به‌ فێڵبازی وه‌ڵامی شه‌خه‌م و حه‌مۆری باوكیان دایه‌وه‌ و قسه‌یان كرد، چونكه‌ داوێنی دینه‌ی خوشكیان پیسكرابوو.
14
پێیان گوتن: «ئێمه‌ ناتوانین كاری وا بكه‌ین، خوشكه‌كه‌ی خۆمان بده‌ینه‌ پیاوێكی خه‌ته‌نه‌ نه‌كراو، چونكه‌ بۆ ئێمه‌ ڕیسواییه‌.
15
به‌ڵام به‌مه‌ له‌گه‌ڵتان ڕێك ده‌كه‌وین، ئه‌گه‌ر وه‌ك ئێمه‌تان لێبێت، ئه‌وه‌ش به‌ خه‌ته‌نه‌كردنی هه‌موو نێرینه‌كانتان.
16
ئیتر كچی خۆمان ده‌ده‌ینه‌ ئێوه‌ و كچی ئێوه‌ش ده‌به‌ین. له‌نێویشتان نیشته‌جێ ده‌بین و پێكه‌وه‌ ده‌بینه‌ یه‌ك گه‌ل.
17
به‌ڵام ئه‌گه‌ر ئێوه‌ به‌ قسه‌شتان نه‌كردین و خۆتان خه‌ته‌نه‌ نه‌كرد، ئه‌وه‌ كچه‌كه‌ی خۆمان ده‌به‌ین و ده‌ڕۆین.»
18
قسه‌كانیان به‌لای حه‌مۆر و به‌لای شه‌خه‌می كوڕی حه‌مۆره‌وه‌ باش بوو.
19
كوڕه‌ لاوه‌كه‌ له‌ ئه‌نجامدانی كاره‌كه‌ دوا نه‌كه‌وت، چونكه‌ به‌ كچه‌كه‌ی یاقوب دڵشاد بوو، له‌ ماڵی باوكیشی له‌ هه‌موویان ڕێزدارتر بوو.
20
ئیتر حه‌مۆر و شه‌خه‌می كوڕی هاتنه‌ به‌ر ده‌روازه‌ی شاره‌كه‌یان و قسه‌یان بۆ خه‌ڵكی شاره‌كه‌ی خۆیان كرد، گوتیان:
21
«ئه‌م پیاوانه‌ ئاشتیخوازن له‌گه‌ڵمان، با له‌ خاكمان نیشته‌جێ بن و كڕین و فرۆشتنی تێدا بكه‌ن، زه‌وییه‌كی پانوبه‌رین له‌به‌رده‌میانه‌. كچیان ببنه‌ ژنمان و كچی خۆمانیان ده‌ده‌ینێ.
22
به‌ڵام ئه‌م پیاوانه‌ به‌مه‌ له‌گه‌ڵمان ڕێك ده‌كه‌ون كه‌ له‌گه‌ڵمان نیشته‌جێ بن و ببینه‌ یه‌ك گه‌ل، ئه‌ویش خه‌ته‌نه‌كردنی هه‌موو نێرینه‌كانمانه‌، هه‌روه‌ك چۆن خۆیان خه‌ته‌نه‌كراون.
23
ئایا ماڵات و ماڵ و هه‌موو ئاژه‌ڵه‌كانیان بۆ خۆمان نابن ئه‌گه‌ر له‌گه‌ڵیان ڕێك بكه‌وین و له‌نێومان نیشته‌جێ بن؟»
24
هه‌موو ئه‌وانه‌ی له‌ ده‌روازه‌ی شاره‌كه‌ی هاتنه‌ ده‌ره‌وه‌ به‌ گوێی حه‌مۆر و شه‌خه‌می كوڕیان كرد. ئیتر هه‌موو نێرینه‌یه‌ك له‌ شاره‌كه‌ خه‌ته‌نه‌ كرا.
25
ئه‌وه‌ بوو له‌ ڕۆژی سێیه‌م، كه‌ ئه‌وان هێشتا ئازاریان مابوو، هه‌ردوو كوڕه‌كه‌ی یاقوب، شیمۆن و لێڤی، دوو براكه‌ی دینه‌، ده‌ستیان دایه‌ شمشێره‌كانیان و به‌بێ ئه‌وه‌ی چاوه‌ڕوانكراو بێت هێرشیان كرده‌ سه‌ر شاره‌كه‌ و هه‌رچی نێرینه‌ هه‌بوو كوشتیان.
26
به‌ شمشێره‌كه‌یان حه‌مۆر و شه‌خه‌می كوڕیان كوشت. دینه‌ی خوشكیشیان له‌ ماڵی شه‌خه‌م هه‌ڵگرت و ڕۆیشتن.
27
ئیتر كوڕانی یاقوب هاتنه‌ سه‌ر كوژراوه‌كان و شاره‌كه‌یان تاڵان كرد، چونكه‌ داوێنی خوشكه‌كه‌یانیان پیس كردبوو.
28
هه‌رچی مه‌ڕ و مانگا و گوێدرێژیان هه‌بوو له‌گه‌ڵ هه‌موو ئه‌و شتانه‌ی له‌ شار و ده‌شتوده‌ر هه‌یانبوو، هه‌موویان برد.
29
هه‌رچی سامانیان هه‌بوو به‌ تاڵان بردیان، تێكڕای ژن و منداڵیان ڕاپێچ كرد، هه‌رچیش له‌ ماڵه‌كان بوو بردیان.
30
ئینجا یاقوب به‌ شیمۆن و لێڤی گوت: «ئێوه‌ گۆبه‌ندتان كردم به‌وه‌ی كه‌ منتان كرده‌ ناحه‌ز له‌لای خه‌ڵكی ئه‌م خاكه‌، كه‌نعانییه‌كان و پریزییه‌كان. ئێمه‌ ژماره‌یه‌كی كه‌مین، ئه‌گه‌ر گه‌له‌كۆمه‌م لێ بكه‌ن و لێم بده‌ن، خۆم و ماڵه‌كه‌م له‌ناوده‌چین.»
31
به‌ڵام ئه‌وان گوتیان: «ئه‌ی ده‌بێت خوشكه‌كه‌مان وه‌ك له‌شفرۆشێك هه‌ڵسوكه‌وتی له‌گه‌ڵ بكرێ؟»
  1. a. 34‏:7 ئیسرائیل: بۆ یه‌كه‌م جار ئه‌م ناوه‌ نوێیه‌ له‌ یاقوب نرا (بڕوانه‌ 32‏:28) دواجار گوێزرایه‌وه‌ بۆ نه‌وه‌كانی یاقوب.