عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یاقوب به‌ره‌كه‌تی ئیسحاق وه‌رده‌گرێت 
1
كاتێك ئیسحاق پیر بوو و چاوه‌كانی كز بوون بۆ بینین، عیسۆی كوڕه‌ گه‌وره‌ی خۆی بانگكرد و پێی گوت: «كوڕی خۆم.»
ئه‌ویش وه‌ڵامی دایه‌وه‌: «ئه‌وه‌تام.»
2
ئیسحاق گوتی: «ئه‌وا پیر بووم و ڕۆژی مردنی خۆم نازانم.
3
ئێستاش چه‌كه‌كه‌ت، تیردانه‌كه‌ت و كه‌وانه‌كه‌ت هه‌ڵبگره‌ و بڕۆ بۆ ده‌شتوده‌ر، نێچیرێكم بۆ ڕاو بكه‌.
4
ئه‌و خواردنه‌ی حه‌زم لێیه‌تی بۆم ئاماده‌ بكه‌ و بیهێنه‌ تاكو بیخۆم، بۆ ئه‌وه‌ی به‌ر له‌وه‌ی بمرم داوای به‌ره‌كه‌تت بۆ بكه‌م.»
5
ڕڤقه‌ گوێی لێبوو كاتێك ئیسحاق قسه‌ی له‌گه‌ڵ عیسۆ ده‌كرد. ئینجا عیسۆ چوو بۆ ده‌شتوده‌ر تاكو نێچیرێك ڕاو بكات و بیهێنێته‌وه‌.
6
ڕڤقه‌ له‌گه‌ڵ یاقوبی كوڕی قسه‌ی كرد و گوتی: «وا گوێم له‌ باوكت بوو قسه‌ی له‌گه‌ڵ عیسۆی برات ده‌كرد و گوتی:
7
”نێچیرێكم بۆ بهێنه‌ و خواردنم بۆ ئاماده‌ بكه‌، به‌ر له‌ مردنم ده‌یخۆم و له‌به‌رده‌م یه‌زدان داوای به‌ره‌كه‌تت بۆ ده‌كه‌م.“
8
ئێستاش، كوڕی خۆم، گوێم لێ بگره‌، له‌وه‌ی من فه‌رمانت پێده‌ده‌م:
9
بڕۆ له‌لای مێگه‌له‌كه‌ دوو گیسكی ناسكم بۆ بهێنه‌، هه‌تا لێیان بنێم بۆ باوكت، وه‌ك ئه‌وه‌ی حه‌زی لێیه‌تی.
10
ئینجا بۆ باوكتی ده‌به‌یت و ده‌یخوات، بۆ ئه‌وه‌ی به‌ر له‌ مردنی داوای به‌ره‌كه‌تت بۆ بكات.»
11
یاقوبیش به‌ ڕڤقه‌ی دایكی گوت: «به‌ڵام عیسۆی برام پیاوێكی تووكنه‌ و منیش پیاوێكی كۆسه‌م.
12
ڕه‌نگه‌ باوكم ده‌ستم لێ بدات؟ خۆ له‌به‌رچاوی ده‌بمه‌ فێڵباز و ئیتر نه‌فره‌ت به‌سه‌ر خۆمدا ده‌هێنم، نه‌ك به‌ره‌كه‌ت.»
13
دایكیشی پێی گوت: «كوڕی خۆم، با نه‌فره‌ته‌كه‌ت له‌ من بكه‌وێت. ته‌نها گوێ له‌ من بگره‌ و بڕۆ بیانهێنه‌ بۆم.»
14
ئیتر ئه‌ویش چوو كاریله‌كانی گرت و هێنانی بۆ دایكی. دایكیشی خواردنی دروستكرد، وه‌ك ئه‌وه‌ی باوكی حه‌زی لێ ده‌كرد.
15
ئینجا ڕڤقه‌ جلوبه‌رگه‌ باشه‌كه‌ی عیسۆی كوڕه‌ گه‌وره‌ی هێنا، كه‌ له‌ ماڵه‌وه‌ له‌لای خۆی بوو، له‌به‌ر یاقوبی كوڕه‌ بچووكی كرد.
16
ده‌سته‌كانی و ئه‌و به‌شه‌ی ملی كه‌ لووسه‌ به‌ پێستی گیسكه‌كان دایپۆشی.
17
ئینجا خواردنه‌كه‌ و نانه‌كه‌ی دروستی كردبوون دایه‌ ده‌ست یاقوبی كوڕی.
18
یاقوب هاته‌ لای باوكی و گوتی: «باوكه‌.»
ئه‌ویش گوتی: «ئه‌وه‌تام، تۆ كیێت كوڕم؟»
19
یاقوبیش به‌ باوكی گوت: «من عیسۆی نۆبه‌ره‌تم. ئه‌وه‌ی پێت گوتم كردم. هه‌سته‌، دابنیشه‌ و له‌ ڕاوه‌كه‌م بخۆ، بۆ ئه‌وه‌ی داوای به‌ره‌كه‌تم بۆ بكه‌یت.»
20
ئیسحاقیش به‌ كوڕه‌كه‌ی گوت: «ئه‌وه‌ چۆن وا خێرا په‌یدات كرد، كوڕی خۆم؟»
ئه‌ویش گوتی: «یه‌زدانی په‌روه‌ردگارت بۆی هێنام.»
21
ئینجا ئیسحاق به‌ یاقوبی گوت: «وه‌ره‌ پێشه‌وه‌ با ده‌ستت لێ بده‌م، كوڕی خۆم، بۆ ئه‌وه‌ی بزانم ئایا تۆ عیسۆی كوڕی منیت یان نا.»
22
یاقوبیش له‌ ئیسحاقی باوكی چووه‌ پێشه‌وه‌، ئه‌ویش ده‌ستی لێدا و گوتی: «ده‌نگه‌كه‌ ده‌نگی یاقوبه‌، به‌ڵام ده‌سته‌كان ده‌ستی عیسۆن.»
23
ئیتر نه‌یناسییه‌وه‌، چونكه‌ ده‌سته‌كانی وه‌ك ده‌سته‌كانی عیسۆی برای تووكن بوون، ئه‌ویش داوای به‌ره‌كه‌تی بۆ كرد.
24
پێی گوت: «ئایا تۆ عیسۆی كوڕی منی؟»
ئه‌ویش گوتی: «منم.»
25
ئینجا گوتی: «بیهێنه‌ پێشم با له‌ ڕاوی كوڕه‌كه‌م بخۆم، بۆ ئه‌وه‌ی داوای به‌ره‌كه‌تت بۆ بكه‌م.»
ئیتر یاقوب هێنایه‌ پێشی و خواردی، شه‌رابی بۆ هێنا و خواردیه‌وه‌.
26
ئیسحاقی باوكی پێی گوت: «وه‌ره‌ پێشه‌وه‌ و ماچم بكه‌، كوڕی خۆم.»
27
ئه‌ویش چووه‌ پێشه‌وه‌ و ماچی كرد. ئیتر ئیسحاق بۆنی جله‌كانی كرد، داوای به‌ره‌كه‌تی بۆ كرد و گوتی:
«بڕوانه‌، بۆنی كوڕه‌كه‌م
وه‌ك بۆنی ده‌شتوده‌ره‌
كه‌ یه‌زدان به‌ره‌كه‌تداری كردووه‌.
28
با خودا له‌ شه‌ونمی ئاسمان و
له‌ چه‌وری زه‌ویت بداتێ،
هه‌روه‌ها دانه‌وێڵه‌ی زۆر و شه‌رابی نوێ.
29
با گه‌لان ببنه‌ خزمه‌تكارت،
نه‌ته‌وه‌كانیش كڕنۆشت بۆ ببه‌ن.
ببه‌ به‌ سه‌روه‌ری براكانت،
كوڕانی دایكت كڕنۆشت بۆ ببه‌ن.
با نه‌فره‌ت لێكه‌رانت نه‌فره‌ت لێكراو بن و
ئه‌وانه‌ی داوای به‌ره‌كه‌تت بۆ ده‌كه‌ن به‌ره‌كه‌تدار ده‌بن.»
30
پاش ئه‌وه‌ی ئیسحاق له‌ داواكردنی به‌ره‌كه‌ت بووه‌وه‌ بۆ یاقوب، یاقوب له‌لای ئیسحاقی باوكی چووه‌ ده‌ره‌وه‌، عیسۆی برای له‌ ڕاوه‌كه‌ی هاته‌وه‌.
31
ئه‌ویش خواردنی ئاماده‌ كرد و بۆ باوكی برده‌ ژووره‌وه‌، به‌ باوكی گوت: «باوكه‌، هه‌سته‌ له‌ ڕاوی كوڕه‌كه‌ت بخۆ، تاكو داوای به‌ره‌كه‌تم بۆ بكه‌یت.»
32
ئیسحاقی باوكیشی پێی گوت: «تۆ كێیت؟»
ئه‌ویش گوتی: «من كوڕه‌ نۆبه‌ره‌كه‌ی خۆتم، عیسۆ.»
33
ئیتر ئیسحاق له‌رزینێكی زۆر توند له‌رزی و گوتی: «ئه‌ی كێ بوو ئه‌وه‌ی كه‌ نێچیرێكی ڕاوكردبوو و بۆی هێنام؟ منیش له‌ هه‌موویم خوارد، پێش ئه‌وه‌ی تۆ بێیت داوای به‌ره‌كه‌تیشم بۆ كرد، هه‌روه‌ها به‌ره‌كه‌تداریش ده‌بێت.»
34
عیسۆ كه‌ قسه‌كانی باوكی بیست هاواری كرد، هاوارێكی به‌رز و زۆر خه‌مبار، به‌ باوكی گوت: «باوكه‌، ده‌ داوای به‌ره‌كه‌ت بۆ منیش بكه‌!»
35
به‌ڵام ئیسحاق گوتی: «ئاخر براكه‌ت به‌ فێڵبازی هات و به‌ره‌كه‌تی تۆی برد.»
36
عیسۆ گوتی: «ئایا له‌ جێی خۆیدا نییه‌ كه‌ ناونراوه‌ ”یاقوب“[a] ؟ ئه‌وه‌ دوو جاره‌ فێڵم لێ ده‌كات، نۆبه‌رایه‌تییه‌كه‌ی منی برد، وا ئێستاش به‌ره‌كه‌ته‌كه‌ی منی برد.» ئینجا گوتی: «ئه‌ی هیچ به‌ره‌كه‌تێكت بۆ من نه‌هێشتووه‌ته‌وه‌؟»
37
ئیسحاق وه‌ڵامی دایه‌وه‌ و به‌ عیسۆی گوت: «وا ئه‌وم كردووه‌ به‌ سه‌روه‌ری تۆ و هه‌موو كه‌سوكاریشیم داوه‌تێ بۆ ئه‌وه‌ی ببنه‌ خزمه‌تكاری ئه‌و، به‌ دانه‌وێڵه‌ و شه‌رابی نوێ پشتگیریم كردووه‌. ئیتر بۆ تۆ چی بكه‌م، كوڕم؟»
38
عیسۆش به‌ باوكی گوت: «ئایا ته‌نها یه‌ك به‌ره‌كه‌تت هه‌یه‌؟ هه‌روه‌ها بۆ منیش داوای به‌ره‌كه‌ت بكه‌ باوكه‌.» ئیتر عیسۆ ده‌نگی هه‌ڵبڕی و گریا.
39
ئیسحاقی باوكی وه‌ڵامی دایه‌وه‌:
«نشینگه‌كه‌ت دوور له‌ ده‌وڵه‌مه‌ندی زه‌وییه‌وه‌ ده‌بێت،
دوور له‌ شه‌ونمی ئاسمان له‌ سه‌ره‌وه‌.
40
له‌سه‌ر شمشێره‌كه‌ت ده‌ژیت و
ده‌بیته‌ خزمه‌تكاری براكه‌ت.
به‌ڵام كاتێك سه‌ركێش بوویت،
نیره‌كه‌ی[b] ده‌شكێنیت كه‌ به‌ ملته‌وه‌یه‌.»
ڕاكردنی یاقوب بۆ لای لابان 
41
ئیتر عیسۆ ڕقی له‌ یاقوب هه‌ڵگرت، به‌هۆی ئه‌و به‌ره‌كه‌تدارییه‌ی كه‌ باوكی داوای به‌ره‌كه‌تی بۆ كردبوو. عیسۆ له‌ دڵی خۆیدا گوتی: «ڕۆژانی پرسه‌ی باوكم نزیكه‌، ئینجا یاقوبی برام ده‌كوژم.»
42
ڕڤقه‌ش له‌م قسانه‌ی عیسۆی كوڕه‌ گه‌وره‌ی ئاگادار كرایه‌وه‌، ئیتر ناردی به‌دوای یاقوبی كوڕه‌ بچووكیدا و پێی گوت: «عیسۆی برات وا دڵخۆشی خۆی به‌وه‌ ده‌داته‌وه‌ كه‌ تۆ ده‌كوژێت.
43
ئێستاش كوڕی خۆم، گوێ له‌ قسه‌ی من بگره‌ و ڕابكه‌ بۆ لای لابانی برام له‌ حه‌ڕان.
44
بۆ ماوه‌یه‌ك له‌لای ئه‌و بمێنه‌وه‌ هه‌تا ڕقی براكه‌ت هێور ده‌بێته‌وه‌.
45
كاتێكیش تووڕه‌یی براكه‌ت به‌رامبه‌ر به‌ تۆ هێور ده‌بێته‌وه‌ و ئه‌وه‌ی له‌بیر كرد كه‌ پێت كردووه‌، ئه‌وا ده‌نێرم و له‌وێ ده‌تهێنمه‌وه‌. ئیتر بۆ به‌ یه‌ك ڕۆژ هه‌ردووكتانم له‌كیس بچێت؟»
46
ئینجا ڕڤقه‌ به‌ ئیسحاقی گوت: «له‌به‌ر كچانی حیتییه‌كان له‌ ژیانی خۆم بێزارم، خۆ ئه‌گه‌ر یاقوبیش ژنێكی وه‌ك ئه‌مانه‌ له‌ كچانی حیتییه‌كانی ئه‌م خاكه‌ بهێنێت، ئیتر ژیانم بۆ چییه‌؟»
  1. a. 27‏:36 یاقوب واته‌ پاژنه‌ ده‌گرێت، واتایه‌كی مه‌جازییه‌ واتا هه‌ڵده‌خه‌ڵه‌تێنێت. \+xt بڕوانه‌ 25‏:26‏\+xt*.
  2. b. 27‏:40 مه‌به‌ستی له‌ بارگرانییه‌.