عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئیسحاق و ئه‌بیمه‌له‌خ 
1
ئینجا قاتوقڕی له‌ خاكه‌كه‌ سه‌ریهه‌ڵدا، جیا له‌و قاوتوقڕییه‌ی یه‌كه‌م جار له‌ سه‌رده‌می ئیبراهیم ڕوویدا. ئیسحاقیش چوو بۆ لای ئه‌بیمه‌له‌خی پاشای فه‌له‌ستییه‌كان له‌ گرار.
2
یه‌زدان بۆ ئیسحاق ده‌ركه‌وت و فه‌رمووی: «مه‌چووه‌ میسر، به‌ڵام له‌و خاكه‌ نیشته‌جێ به‌ كه‌ خۆم پێت ده‌ڵێم.
3
بۆ ماوه‌یه‌ك له‌م خاكه‌ بمێنه‌وه‌، خۆم له‌گه‌ڵت ده‌بم و به‌ره‌كه‌تدارت ده‌كه‌م، چونكه‌ هه‌موو ئه‌م خاكانه‌ ده‌ده‌مه‌ خۆت و نه‌وه‌كه‌ت، ئه‌و سوێنده‌ش ده‌چه‌سپێنم كه‌ بۆ ئیبراهیمی باوكتم خواردووه‌.
4
نه‌وه‌شت زۆر ده‌كه‌م، وه‌ك ئه‌ستێره‌كانی ئاسمان، هه‌موو ئه‌م خاكه‌شم داوه‌ته‌ نه‌وه‌كه‌ت، له‌ ڕێگه‌ی نه‌وه‌ی تۆوه‌ هه‌موو نه‌ته‌وه‌كانی سه‌ر زه‌وی به‌ره‌كه‌تدار ده‌بن.
5
له‌به‌ر ئه‌وه‌ی ئیبراهیم گوێڕایه‌ڵی فه‌رمایشته‌كه‌م بوو، داواكاری و فه‌رمان و فه‌رز و فێركردنی منی به‌جێهێنا.»
6
ئیتر ئیسحاق له‌ گرار نیشته‌جێ بوو.
7
پیاوانی ئه‌و شوێنه‌ ده‌رباره‌ی ژنه‌كه‌ی پرسیاریان لێكرد، ئه‌ویش گوتی: «ئه‌و خوشكمه‌.» ئیسحاق ترسا له‌وه‌ی پێیان بڵێت «ژنمه‌،» چونكه‌ گوتی، «نه‌وه‌ك پیاوانی شوێنه‌كه‌ له‌به‌ر ڕڤقه‌ بمكوژن، چونكه‌ جوانه‌.»
8
كاتێك ماوه‌یه‌كی زۆر له‌وێ مایه‌وه‌، ئه‌بیمه‌له‌خی پاشای فه‌له‌ستییه‌كان له‌ په‌نجه‌ره‌كه‌وه‌ سه‌یری خواره‌وه‌ی ده‌كرد، بینی وا ئیسحاق له‌گه‌ڵ ڕڤقه‌ی ژنی خه‌ریكی ده‌ستبازییه‌.
9
ئینجا ئه‌بیمه‌له‌خ به‌دوای ئیسحاقدا ناردی و گوتی: «كه‌واته‌ ئه‌و ژنته‌! ئه‌ی چۆن گوتت: ”ئه‌و خوشكمه‌“؟»
ئیسحاقیش پێی گوت: «چونكه‌ وا بیرم كرده‌وه‌ له‌وانه‌یه‌ به‌هۆی ئه‌وه‌وه‌ بمرم.»
10
ئه‌بیمه‌له‌خیش گوتی: «ئه‌مه‌ چییه‌ به‌ ئێمه‌ت كرد؟ له‌وانه‌یه‌ یه‌كێك له‌م پیاوانه‌ له‌گه‌ڵ ژنه‌كه‌ت بنوستایه‌، ئه‌و كاته‌ ئێمه‌ت تووشی تاوان ده‌كرد.»
11
ئیتر ئه‌بیمه‌له‌خ فه‌رمانی به‌ هه‌موو خه‌ڵكه‌كه‌ كرد و گوتی: «هه‌ركه‌سێك ده‌ست ببات بۆ ئه‌م پیاوه‌ یان ژنه‌كه‌ی بێگومان ده‌كوژرێت.»
12
ئیسحاق له‌و زه‌وییه‌دا كشتوكاڵی كرد، هه‌ر ئه‌و ساڵه‌ سه‌د ئه‌وه‌نده‌ی ده‌ست كه‌وت، یه‌زدانیش به‌ره‌كه‌تداری كرد.
13
ئیتر پیاوه‌ ده‌وڵه‌مه‌ند بوو، سامانه‌كه‌ی زیادی ده‌كرد، هه‌تا وای لێهات زۆر ده‌وڵه‌مه‌ند بوو.
14
ئینجا بووه‌ خاوه‌ن مه‌ڕ و مانگا و خزمه‌تكارێكی زۆریش، فه‌له‌ستییه‌كانیش به‌غیلییان پێ برد.
15
هه‌موو ئه‌و بیرانه‌ش كه‌ خزمه‌تكاره‌كانی باوكی له‌ سه‌رده‌می ئیبراهیمی باوكی هه‌ڵیانكه‌ندبوو، فه‌له‌ستییه‌كان به‌ خۆڵ پڕیان كردبووه‌وه‌ و دایانخستبوو.
16
ئینجا ئه‌بیمه‌له‌خ به‌ ئیسحاقی گوت: «له‌لای ئێمه‌ بڕۆ، چونكه‌ زۆر له‌ ئێمه‌ به‌هێزتر بوویت.»
17
ئیتر ئیسحاق له‌وێ ڕۆیشت و له‌ دۆڵی گرار چادری هه‌ڵدا، له‌وێ نیشته‌جێ بوو.
18
ئیسحاق جارێكی دیكه‌ ئه‌و بیرانه‌ی هه‌ڵدایه‌وه‌ كه‌ له‌ سه‌رده‌می ئیبراهیمی باوكی هه‌ڵكه‌نرابوون و فه‌له‌ستییه‌كان دوای مردنی ئیبراهیم دایانخستبوو، هه‌ر هه‌مان ناویشی لێنان كه‌ باوكی لێینابوون.
19
خزمه‌تكاره‌كانی ئیسحاق له‌ دۆڵه‌كه‌ كه‌وتنه‌ هه‌ڵكه‌ندن و كارێزێكی ئاوی سازگاریان له‌وێ دۆزییه‌وه‌.
20
به‌ڵام شوانه‌كانی گرار له‌گه‌ڵ شوانه‌كانی ئیسحاق بوو به‌ ناكۆكییان و گوتیان: «ئاوه‌كه‌ هی ئێمه‌یه‌.» ئیتر بیره‌كه‌ی ناونا «عێسه‌ق»، چونكه‌ له‌سه‌ری كردیانه‌ ناكۆكی.
21
ئینجا بیرێكی دیكه‌یان هه‌ڵكه‌ند، به‌ڵام دیسان له‌سه‌ر ئه‌مه‌ش بوو به‌ ناكۆكییان، له‌به‌ر ئه‌وه‌ ناوی له‌مه‌ش نا سیتنا.
22
ئیتر له‌وێ گواستییه‌وه‌ و بیرێكی دیكه‌ی هه‌ڵكه‌ند، ناكۆك نه‌بوون له‌سه‌ری، ناوی له‌مه‌ نا ڕه‌حۆبۆت، گوتی: «چونكه‌ ئێستا یه‌زدان بۆی فراوان كردین، له‌ زه‌وییه‌كه‌دا به‌ به‌روبووم ده‌بین.»
23
ئینجا له‌وێوه‌ بۆ بیری شابه‌ع چوو.
24
جا له‌و شه‌وه‌دا یه‌زدان بۆی ده‌ركه‌وت و فه‌رمووی: «من خودای ئیبراهیمی باوكتم. مه‌ترسه‌، چونكه‌ له‌گه‌ڵتم. به‌ره‌كه‌تدارت ده‌كه‌م و نه‌وه‌ت زۆر ده‌كه‌م، له‌به‌ر ئیبراهیمی به‌نده‌م.»
25
ئیتر ئیسحاق له‌وێ قوربانگایه‌كی بنیاد نا، به‌ ناوی یه‌زدانه‌وه‌ نزای كرد. له‌وێ چادره‌كه‌ی هه‌ڵدا، خزمه‌تكاره‌كانیشی له‌وێ بیرێكیان هه‌ڵكه‌ند.
26
هه‌ر له‌و كاته‌دا ئه‌بیمه‌له‌خ له‌گه‌ڵ ئه‌حوزه‌تی ڕاوێژكاری و فیكۆلی فه‌رمانده‌ی گشتی له‌ گراره‌وه‌ هاتنه‌ لای.
27
ئیسحاقیش لێی پرسین: «بۆچی هاتوونه‌ته‌ لام، كه‌ خۆتان ڕقتان لێم بووه‌وه‌ و له‌لای خۆتان ده‌رتانكردم؟»
28
ئه‌وانیش گوتیان: «ئێمه‌ به‌ ته‌واوی بینیمان كه‌ یه‌زدان له‌گه‌ڵ تۆ بوو، ئیتر گوتمان: ”با له‌نێوانمان سوێند هه‌بێت،“ له‌نێوان ئێمه‌ و تۆ. با په‌یمانت له‌گه‌ڵ ببه‌ستین،
29
كه‌ خراپه‌مان له‌گه‌ڵ نه‌كه‌یت، وه‌ك چۆن ئێمه‌ ده‌ستمان بۆت نه‌برد، به‌ڵام له‌ چاكه‌ به‌ولاوه‌ هیچی دیكه‌مان له‌گه‌ڵ نه‌كردیت، به‌ سه‌لامه‌تی به‌ڕێمان كردیت. ئێستاش تۆ به‌ره‌كه‌تداری یه‌زدانیت.»
30
ئینجا ئیسحاق خوانی بۆ ساز كردن، ئیتر خواردیان و خواردیانه‌وه‌.
31
بۆ سبه‌ی به‌یانی زوو له‌ خه‌و هه‌ستان و هه‌ریه‌كه‌ و سوێندی بۆ ئه‌وی دیكه‌یان خوارد. ئینجا ئیسحاق به‌ڕێی كردن، ئه‌وانیش به‌ سه‌لامه‌تی له‌لای ڕۆیشتن.
32
ئه‌وه‌ بوو هه‌ر له‌و ڕۆژه‌دا خزمه‌تكاره‌كانی ئیسحاق هاتن و ده‌رباره‌ی ئه‌و بیره‌ی كه‌ هه‌ڵیانكه‌ندبوو پێیان ڕاگه‌یاند، پێیان گوت: «ئاومان دۆزییه‌وه‌.»
33
ئه‌ویش ناوی لێنا شیبعا، له‌به‌ر ئه‌وه‌یه‌ هه‌تا ئه‌مڕۆش ناوی شارۆچكه‌كه‌ بیری شابه‌عه‌.
34
عیسۆ ته‌مه‌نی بووه‌ چل ساڵ و ژنی هێنا، یه‌هودیتی كچی بئێریی حیتی و باسمه‌تی كچی ئێلۆنی حیتی.
35
بۆ ئیسحاق و ڕڤقه‌ بوونه‌ مایه‌ی خه‌م و خه‌فه‌ت.