عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
تاقیكردنه‌وه‌ی ئیبراهیم 
1
له‌دوای ماوه‌یه‌ك خودا ئیبراهیمی تاقیكرده‌وه‌. پێی فه‌رموو: «ئیبراهیم!»
ئه‌ویش گوتی: «ئه‌وه‌تام.»
2
ئینجا خودا فه‌رمووی: «كوڕه‌كه‌ت، تاقانه‌كه‌ت، ئه‌وه‌ی كه‌ خۆشت ده‌وێت، ئیسحاق، بیبه‌ و بڕۆ خاكی مۆریا. له‌وێ بیكه‌ قوربانی سووتاندن، له‌سه‌ر یه‌كێك له‌ كێوه‌كان كه‌ خۆم پێت ده‌ڵێم.»
3
بۆ به‌یانی ئیبراهیم زوو له‌ خه‌و هه‌ستا و گوێدرێژه‌كه‌ی كورتان كرد. له‌گه‌ڵ خۆیدا دووان له‌ خزمه‌تكاره‌كانی و ئیسحاقی كوڕی برد، داریشی بڕی بۆ قوربانی سووتاندن. ئینجا هه‌ستا و به‌ره‌و ئه‌و شوێنه‌ چوو كه‌ خودا پێی فه‌رمووبوو.
4
له‌ ڕۆژی سێیه‌م ئیبراهیم چاوی هه‌ڵبڕی و له‌ دووره‌وه‌ شوێنه‌كه‌ی به‌دی كرد.
5
ئیتر ئیبراهیم به‌ دوو خزمه‌تكاره‌كه‌ی گوت: «ئێوه‌ لێره‌ له‌گه‌ڵ گوێدرێژه‌كه‌ دانیشن، من و كوڕه‌كه‌ش هه‌تا ئه‌وێ ده‌چین، كڕنۆش ده‌به‌ین و ده‌گه‌ڕێینه‌وه‌ لاتان.»
6
ئیبراهیم داری قوربانی سووتاندنه‌كه‌ی هه‌ڵگرت و خستییه‌ سه‌ر پشتی ئیسحاقی كوڕی، خۆشی ئاگر و چه‌قۆكه‌ی هه‌ڵگرت، هه‌ردووكیان پێكه‌وه‌ ڕۆیشتن.
7
ئیسحاق به‌ ئیبراهیمی باوكی گوت: «باوكه‌!»
ئه‌ویش وه‌ڵامی دایه‌وه‌: «ها كوڕم؟»
ئیسحاق گوتی: «ئه‌وه‌تا ئاگره‌كه‌ و داری سووتاندنه‌كه‌، ئه‌ی كوا به‌رخه‌كه‌ كه‌ بۆ قوربانی سووتاندنه‌كه‌یه‌؟»
8
ئیبراهیم وه‌ڵامی دایه‌وه‌: «خودا بۆ خۆی به‌رخێك بۆ قوربانی سووتاندنه‌كه‌ دابین ده‌كات، كوڕم.» ئیتر هه‌ردووكیان پێكه‌وه‌ ڕۆیشتن.
9
كاتێك گه‌یشتنه‌ ئه‌و شوێنه‌ی خودا پێی فه‌رمووبوو، ئیبراهیم قوربانگایه‌كی دروستكرد و داره‌كانی له‌سه‌ر ڕێكخست، ئیسحاقی كوڕی به‌سته‌وه‌ و خستییه‌ سه‌ر قوربانگاكه‌ له‌سه‌ر داره‌كان.
10
ئیتر ئیبراهیم ده‌ستی درێژكرد و چه‌قۆكه‌ی هه‌ڵگرت هه‌تا كوڕه‌كه‌ی خۆی سه‌رببڕێت.
11
به‌ڵام فریشته‌ی یه‌زدان له‌ ئاسمانه‌وه‌ بانگی كرد و گوتی: «ئیبراهیم! ئیبراهیم!»
ئه‌ویش وه‌ڵامی دایه‌وه‌: «ئه‌وه‌تام.»
12
پێی گوت: «ده‌ست بۆ كوڕه‌كه‌ مه‌به‌ و هیچی لێ مه‌كه‌. ئێستا زانیم تۆ له‌ خودا ده‌ترسیت، چونكه‌ له‌ پێناوی من ده‌ستت به‌ كوڕه‌ تاقانه‌كه‌ته‌وه‌ نه‌گرت.»
13
ئیبراهیم چاوی هه‌ڵبڕی و بینی وا به‌رانێك له‌دوایه‌وه‌ له‌ناو ده‌وه‌نه‌كه‌ به‌ هه‌ردوو قۆچی گیربووه‌. ئیبراهیم چوو و به‌رانه‌كه‌ی گرت و سه‌ری خست، وه‌ك قوربانی سووتاندن له‌ جیاتی كوڕه‌كه‌ی.
14
ئیتر ئیبراهیم ئه‌و شوێنه‌ی ناونا، «یه‌زدان دابینی ده‌كات». هه‌تا ئه‌مڕۆش ده‌گوترێت، «له‌سه‌ر كێوی یه‌زدان، دابین ده‌كرێت.»
15
فریشته‌كه‌ی یه‌زدان جارێكی دیكه‌ له‌ ئاسمانه‌وه‌ ئیبراهیمی بانگكرد و
16
گوتی: «یه‌زدان ده‌فه‌رموێت سوێندبێت به‌ خۆم، له‌به‌ر ئه‌وه‌ی تۆ ئه‌مه‌ت كرد و ده‌ستت به‌ كوڕه‌ تاقانه‌كه‌ته‌وه‌ نه‌گرت،
17
بێگومان به‌ره‌كه‌تدارت ده‌كه‌م و نه‌وه‌كه‌ت وه‌ك ژماره‌ی ئه‌ستێره‌كانی ئاسمان و وه‌ك لمی سه‌ر كه‌ناری ده‌ریا زۆر ده‌كه‌م. نه‌وه‌ت ده‌بێته‌ میراتگری ده‌رگای دوژمنه‌كانی.
18
له‌ ڕێگه‌ی نه‌وه‌ی تۆشه‌وه‌ هه‌موو نه‌ته‌وه‌كانی سه‌ر زه‌وی به‌ره‌كه‌تدار ده‌بن، چونكه‌ تۆ گوێڕایه‌ڵی فه‌رمایشته‌كه‌ی من بوویت.»
19
ئینجا ئیبراهیم گه‌ڕایه‌وه‌ لای دوو خزمه‌تكاره‌كه‌ی. ئیتر هه‌ستان و پێكه‌وه‌ چوونه‌ بیری شابه‌ع. ئیبراهیم له‌لای بیری شابه‌ع نیشته‌جێ بوو.
كوڕانی ناحۆر 
20
دوای ماوه‌یه‌ك به‌ ئیبراهیم گوترا: «وا میلكه‌ی براژنیشت چه‌ند كوڕێكی بۆ ناحۆری برات بووه‌،
21
عوچ كه‌ نۆبه‌ره‌كه‌یه‌تی و بووزی برای، هه‌روه‌ها قه‌موئێلیش كه‌ باوكی ئارامه‌.
22
هه‌روه‌ها كه‌سه‌د و حه‌زۆ و پیلداش و یدلاف و بتوئێل.»
23
بتوئێلیش ڕڤقه‌ی بوو. ئه‌م هه‌شته‌ له‌ میلكه‌ بوون بۆ ناحۆری برای ئیبراهیم.
24
كه‌نیزه‌كه‌شی كه‌ ناوی ڕه‌ئوومه‌ بوو، ئه‌ویش ته‌ڤه‌ح و گه‌حه‌م و ته‌حه‌ش و مه‌عكای بوو.