عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
په‌یمانی خه‌ته‌نه‌كردن 
1
كاتێك ئه‌برام ته‌مه‌نی نه‌وه‌د و نۆ ساڵ بوو، یه‌زدان بۆ ئه‌برام ده‌ركه‌وت و پێی فه‌رموو: «من خودای هه‌ره‌ به‌ توانام. دۆستایه‌تی من بكه‌ و بێ كه‌موكوڕی به‌.
2
په‌یمانی خۆم له‌نێوان خۆم و تۆدا ده‌به‌ستم و زۆر زۆرت ده‌كه‌م.»
3
ئه‌برام خۆی به‌ زه‌ویدا دا، خوداش پێی فه‌رموو:
4
«له‌لایه‌نی منه‌وه‌، ئه‌مه‌ش په‌یمانه‌كه‌مه‌ له‌گه‌ڵ تۆ، تۆ ده‌بیته‌ باوكی چه‌ندین نه‌ته‌وه‌.
5
ئیتر له‌مه‌ودواش ناوت به‌ ئه‌برام ناهێنرێت، به‌ڵكو ناوت ده‌بێته‌ ئیبراهیم، چونكه‌ من تۆم كرد به‌ باوكی چه‌ندین نه‌ته‌وه‌.
6
زۆر زۆریش به‌ردارت ده‌كه‌م، پێم داویت ببیته‌ چه‌ندین نه‌ته‌وه‌ و چه‌ندین پاشات لێ بكه‌وێته‌وه‌.
7
په‌یمانی خۆم ده‌چه‌سپێنم له‌نێوان خۆم و تۆ و نه‌وه‌ی دوای خۆت له‌ نه‌وه‌كانیان، په‌یمانێكی هه‌تاهه‌تایی، كه‌ ببمه‌ خودای تۆ و نه‌وه‌ی دوای خۆت.
8
ئه‌و خاكه‌ی كۆچی تێدا ده‌كه‌یت، ده‌یده‌مه‌ تۆ و نه‌وه‌كه‌ت له‌دوای خۆت، هه‌موو خاكی كه‌نعان، موڵكێكی هه‌تاهه‌تایی، منیش ده‌بمه‌ خودایان.»
9
ئینجا خودا به‌ ئیبراهیمی فه‌رموو: «تۆش په‌یمانه‌كه‌م به‌جێده‌هێنیت، خۆت و نه‌وه‌ی دوای خۆت، له‌ نه‌وه‌كانیان.
10
ئه‌مه‌ش په‌یمانه‌كه‌مه‌ كه‌ به‌جێی ده‌هێنن له‌نێوان من و ئێوه‌ و نه‌وه‌ی دوای خۆت، هه‌موو نێرینه‌یه‌كتان خه‌ته‌نه‌ ده‌كه‌ن.
11
خۆتان خه‌ته‌نه‌ ده‌كه‌ن، ئه‌مه‌ش ده‌بێته‌ نیشانه‌ی په‌یمانه‌كه‌ی نێوان من و ئێوه‌.
12
هه‌موو نێرینه‌یه‌كی هه‌شت ڕۆژه‌ش له‌ ئێوه‌ ده‌بێت خه‌ته‌نه‌ بكرێت، له‌ نه‌وه‌كانتان، ئه‌وه‌ی له‌ ماڵه‌كه‌ت له‌دایك بووه‌، یان ئه‌وه‌ی به‌ زیو له‌ بیانی كڕاوه‌ و نه‌وه‌ی خۆت نییه‌.
13
ده‌بێت ئه‌وه‌ی له‌ ماڵه‌كه‌ت له‌دایك بووه‌ یان به‌ زیو كڕاوه‌ به‌ ته‌واوی خه‌ته‌نه‌ بكرێت، جا په‌یمانه‌كه‌م له‌ ئێوه‌دا په‌یمانێكی هه‌تاهه‌تایی ده‌بێت.
14
هه‌ر نێرینه‌یه‌كی خه‌ته‌نه‌ نه‌كراویش، كه‌ خه‌ته‌نه‌ نه‌كرابێت، ئه‌وه‌ له‌ نه‌ته‌وه‌كه‌ی داده‌بڕێت، چونكه‌ په‌یمانی منی شكاندووه‌.»
15
هه‌روه‌ها خودا به‌ ئیبراهیمی فه‌رموو: «سارای ژنیشت، ئیتر به‌ سارای ناوی مه‌هێنه‌، به‌ڵكو ناوی ده‌بێته‌ سارا.
16
به‌ره‌كه‌تداری ده‌كه‌م و له‌وه‌وه‌ كوڕێكت پێ ده‌به‌خشم. به‌ره‌كه‌تداری ده‌كه‌م و چه‌ندین نه‌ته‌وه‌ و چه‌ندین پاشای نه‌ته‌وه‌كان له‌وه‌وه‌ ده‌بن.»
17
ئیبراهیم به‌سه‌ر ڕوویدا كه‌وت و پێكه‌نی، له‌ دڵی خۆیدا گوتی: «ئایا پیاوێكی سه‌د ساڵه‌ منداڵی ده‌بێت؟ ئایا سارا له‌ ته‌مه‌نی نه‌وه‌د ساڵیدا منداڵی ده‌بێت؟»
18
ئیبراهیم به‌ خودای گوت: «خۆزگه‌ ئیسماعیل له‌به‌رده‌م به‌ره‌كه‌تی تۆدا ژیان به‌سه‌رببات.»
19
خوداش فه‌رمووی: «به‌ڵێ، به‌ڵام له‌ سارای ژنت كوڕێكت ده‌بێت، ناوی ده‌نێیت ئیسحاق. په‌یمانی خۆمی له‌گه‌ڵدا ده‌چه‌سپێنم، په‌یمانێكی هه‌تاهه‌تایی بۆ نه‌وه‌كه‌ی دوای خۆی.
20
بۆ ئیسماعیلیش، گوێم لێت بوو، بێگومان به‌ره‌كه‌تداری ده‌كه‌م، به‌رداری ده‌كه‌م و زۆر زۆری ده‌كه‌م. ده‌بێته‌ باوكی دوازده‌ سه‌رۆك، ده‌یكه‌مه‌ نه‌ته‌وه‌یه‌كی مه‌زن.
21
به‌ڵام په‌یمانه‌كه‌م له‌گه‌ڵ ئیسحاقدا ده‌چه‌سپێنم، كه‌ ساڵێكی دیكه‌ ئه‌م كاته‌ سارا بۆ تۆی ده‌بێت.»
22
كاتێك خودا له‌ قسه‌كانی بووه‌وه‌ له‌گه‌ڵ ئیبراهیم، له‌لای ڕۆیشت و به‌رزبووه‌وه‌.
23
له‌ هه‌مان ڕۆژدا ئیبراهیم، ئیسماعیلی كوڕی و هه‌موو ئه‌وانه‌ی له‌ ماڵه‌كه‌یدا له‌دایك ببوون یان به‌ زیوی خۆی كڕابوون، هه‌موو نێرینه‌كانی ماڵه‌كه‌ی خۆی هێنا و خه‌ته‌نه‌ی كردن، وه‌ك چۆن خودا پێی فه‌رموو بوو.
24
ئیبراهیم ته‌مه‌نی نه‌وه‌د و نۆ ساڵ بوو كاتێك خه‌ته‌نه‌ كرا،
25
ئیسماعیلی كوڕیشی ته‌مه‌نی سێزده‌ ساڵان بوو كاتێك خه‌ته‌نه‌ كرا.
26
له‌ هه‌مان ڕۆژدا ئیبراهیم و ئیسماعیلی كوڕی خه‌ته‌نه‌ كران.
27
هه‌موو پیاوه‌كانی ماڵه‌كه‌ی، ئه‌وانه‌ی له‌ ماڵه‌كه‌ی له‌دایك ببوون و ئه‌وانه‌ی له‌ بیانی به‌ زیو كڕدرابوون له‌گه‌ڵ ئه‌ودا خه‌ته‌نه‌ كران.