عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
په‌یمانی خودا له‌گه‌ڵ ئه‌برام 
1
له‌دوای ئه‌م ڕووداوانه‌، له‌ بینینێكدا[a] فه‌رمایشتی یه‌زدان بۆ ئه‌برام هات، فه‌رمووی:
«مه‌ترسه‌ ئه‌ی ئه‌برام،
من قه‌ڵغانم بۆت،
پاداشتت زۆر گه‌وره‌یه‌.»
2
به‌ڵام ئه‌برام گوتی: «ئه‌ی یه‌زدانی باڵاده‌ست، چیم ده‌ده‌یتێ كه‌ من هه‌روا وه‌جاخكوێر بم و میراتگری ماڵم ئه‌لیعه‌زه‌ری دیمه‌شقییه‌؟»
3
هه‌روه‌ها ئه‌برام گوتی: «هیچ وه‌جاخێكت نه‌داومه‌تێ، ئه‌وه‌ی له‌ ماڵه‌كه‌م له‌دایك بووه‌ وا ده‌بێته‌ میراتگرم.»[b]
4
له‌و كاته‌دا فه‌رمایشتی یه‌زدانی بۆ هات، فه‌رمووی: «ئه‌مه‌ نابێته‌ میراتگرت، به‌ڵكو ئه‌وه‌ی له‌ پشتی تۆوه‌ دێت ئه‌و ده‌بێته‌ میراتگرت.»
5
ئینجا بردییه‌ ده‌ره‌وه‌ و فه‌رمووی: «سه‌یری ئاسمان بكه‌ و ئه‌ستێره‌كان بژمێره‌، ئه‌گه‌ر ده‌توانیت بیانژمێریت.» هه‌روه‌ها پێی فه‌رموو: «نه‌وه‌كه‌ت ئاوا ده‌بێت.»
6
جا ئه‌برام باوه‌ڕی به‌ یه‌زدان هێنا، ئه‌ویش ئه‌مه‌ی به‌ ڕاستودروستی بۆ دانا.
7
هه‌روه‌ها یه‌زدان پێی فه‌رموو: «من یه‌زدانم، ئه‌وه‌ی له‌ ئووری كلدانییه‌كانه‌وه‌ تۆی هێنایه‌ ده‌ره‌وه‌، هه‌تا ئه‌م زه‌وییه‌ت به‌ میرات پێ ببه‌خشێت.»
8
به‌ڵام ئه‌برام گوتی: «ئه‌ی یه‌زدانی باڵاده‌ست، چۆن بزانم كه‌ من ده‌بمه‌ میراتگری؟»
9
یه‌زدانیش پێی فه‌رموو: «گوێره‌كه‌یه‌كی مێینه‌ی سێ ساڵه‌[c] و بزنێكی سێ ساڵه‌ و به‌رانێكی سێ ساڵه‌ و قومرییه‌ك و كۆترێكم بۆ بهێنه‌.»
10
ئه‌مانه‌ی هه‌موو بۆ هێنا و له‌ ناوه‌ڕاسته‌وه‌ له‌تی كردن، له‌تی هه‌ریه‌كه‌شیانی به‌رامبه‌ر ئه‌وی دیكه‌ دانا، به‌ڵام باڵنده‌كانی له‌ت نه‌كرد.
11
ئینجا سیساركه‌ كه‌چه‌ڵه‌كان بۆ سه‌ر كه‌لاكه‌كان هاتنه‌ خواره‌وه‌، به‌ڵام ئه‌برام دووری خستنه‌وه‌.
12
كه‌ خۆریش به‌ره‌و ئاوابوون ده‌چوو، ئه‌برام كه‌وته‌ خه‌وێكی قووڵه‌وه‌، له‌ناكاو تاریكییه‌كی ترسناك و سه‌ختی به‌سه‌رهات.
13
ئینجا یه‌زدان به‌ ئه‌برامی فه‌رموو: «به‌ دڵنیاییه‌وه‌ بزانه‌ كه‌ نه‌وه‌كانت له‌ خاكێك نامۆ ده‌بن كه‌ هی خۆیان نییه‌، ده‌بنه‌ كۆیله‌یان و چوار سه‌د ساڵ ده‌یانچه‌وسێننه‌وه‌.
14
به‌ڵام سزای ئه‌و نه‌ته‌وه‌یه‌ش ده‌ده‌م، كه‌ ئه‌وان وه‌ك كۆیله‌ خزمه‌تیان ده‌كه‌ن. له‌دوای ئه‌وه‌ به‌ ده‌ستكه‌وتێكی زۆره‌وه‌ دێنه‌ ده‌ره‌وه‌.
15
به‌ڵام تۆ به‌ سه‌لامه‌تی ده‌چیته‌ لای باوباپیرانت و له‌ ته‌مه‌نێكی باشی پیریدا ده‌نێژرێیت.
16
له‌ نه‌وه‌ی چواره‌میشدا، نه‌وه‌كانت ده‌گه‌ڕێنه‌وه‌ ئێره‌، چونكه‌ هێشتا تاوانی ئه‌مورییه‌كان نه‌گه‌یشتووه‌ته‌ ئه‌ندازه‌ی ته‌واوی خۆی.»
17
ئینجا كاتێك خۆر ئاوابوو و تاریكی داهات، له‌ناكاو ته‌نوورێكی پڕ دووكه‌ڵ و مه‌شخه‌ڵێكی داگیرساو ده‌ركه‌وت و له‌نێوان پارچه‌كاندا تێپه‌ڕی.
18
له‌و ڕۆژه‌دا یه‌زدان په‌یمانێكی له‌گه‌ڵ ئه‌برامدا به‌ست و پێی فه‌رموو: «ئه‌م خاكه‌ ده‌ده‌مه‌ نه‌وه‌كانی تۆ، له‌ ڕووباری میسره‌وه‌ هه‌تا ڕووباره‌ گه‌وره‌كه‌، ڕووباری فورات،
19
خاكی قێنی و قه‌نیزی، قه‌دمۆنی،
20
حیتی، پریزی، ڕفائی،
21
ئه‌موری، كه‌نعانی، گرگاشی و یه‌بوسییه‌كان.»
  1. a. 15‏:1 ‏بینین: خودا له‌ ڕێی پیشاندانی دیمه‌نێكه‌وه‌ په‌یامێك ده‌گه‌یه‌نێته‌ ئه‌و مرۆڤه‌ی بییه‌وێت.
  2. b. 15‏:3 ده‌بێته‌ میراتگرم: به‌پێی یاسایه‌ك له‌و سه‌رده‌مه‌ هاوڕێیه‌ك یان كۆیله‌یه‌ك كه‌ خزمه‌تی پیاوێكی وه‌جاخكوێری ده‌كرد ئه‌وا ده‌یتوانی ببێته‌ میراتگری.
  3. c. 15‏:9 مه‌به‌ست له‌ (گوێره‌كه‌یه‌كی مێینه‌ی سێ ساڵه‌)، پێش ته‌مه‌نی به‌ كه‌ڵ هاتن.