عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
پێی فه‌رمووم: «ئه‌ی كوڕی مرۆڤ، ئه‌وه‌ی له‌پێشته‌ بیخۆ، ئه‌م تۆماره‌ پێچراوه‌یه‌ بخۆ و بڕۆ له‌گه‌ڵ بنه‌ماڵه‌ی ئیسرائیل قسه‌ بكه‌.»
2
منیش ده‌مم كرده‌وه‌ و ئه‌و تۆماره‌ی ده‌رخواردم دا.
3
پێی فه‌رمووم: «ئه‌ی كوڕی مرۆڤ، بیخۆ و هه‌ناوت پڕ بكه‌ له‌و تۆماره‌ی كه‌ دامه‌ تۆ.» منیش خواردم و له‌ ده‌مم وه‌ك هه‌نگوین شیرین بوو.
4
پێی فه‌رمووم: «ئه‌ی كوڕی مرۆڤ، بڕۆ بۆ لای بنه‌ماڵه‌ی ئیسرائیل و به‌ فه‌رمووده‌كانی من له‌گه‌ڵیان بدوێ.
5
بۆ لای گه‌لێكی قسه‌ ئاڵۆز و زمان گران نه‌نێردراویت، به‌ڵكو بۆ لای بنه‌ماڵه‌ی ئیسرائیل،
6
نه‌ك بۆ لای چه‌ند گه‌لێك كه‌ زمانیان قورس و قسه‌یان ئاڵۆز بێت كه‌ له‌ گفتوگۆیان تێنه‌گه‌یت، چونكه‌ ئه‌گه‌ر تۆم بۆ لای ئه‌وانه‌ بناردایه‌ گوێیان لێ ده‌گرتیت.
7
به‌ڵام بنه‌ماڵه‌ی ئیسرائیل نایانه‌وێت گوێت لێ بگرن، چونكه‌ نایانه‌وێت گوێ له‌ من بگرن، له‌به‌ر ئه‌وه‌ی هه‌موو بنه‌ماڵه‌ی ئیسرائیل كه‌لله‌ڕه‌ق و دڵڕه‌قن.
8
له‌به‌ر ئه‌وه‌ من ڕووی تۆم وه‌ك ڕووی ئه‌وان چیڕ كردووه‌ و كه‌لله‌ی تۆ وه‌ك كه‌لله‌ ڕه‌قی ئه‌وان.
9
ناوچه‌وانی تۆم وه‌ك ئه‌ڵماس لێكردووه‌، له‌ به‌رده‌ئه‌ستێ ڕه‌قتر، جا لێیان مه‌ترسه‌ و مه‌تۆقه‌، هه‌رچه‌نده‌ بنه‌ماڵه‌یه‌كی یاخین.»
10
ئینجا پێی فه‌رمووم: «ئه‌ی كوڕی مرۆڤ، هه‌موو ئه‌و قسه‌یه‌ی پێتی ده‌ڵێم، له‌ دڵتدا هه‌ڵیبگره‌ و به‌ گوێت بیبیسته‌.
11
بۆ لای ڕاپێچكراوه‌كان بڕۆ، بۆ لای هاونیشتیمانیانت و قسه‌یان له‌گه‌ڵ بكه‌. گوێ بگرن یان نه‌گرن، پێیان بڵێ: ”یه‌زدانی باڵاده‌ست ئه‌مه‌ ده‌فه‌رموێت.“»
12
ڕۆحی خودا هه‌ڵیگرتم، كاتێك شكۆمه‌ندی یه‌زدان له‌و شوێنه‌ به‌رز ده‌بووه‌وه‌ كه‌ تێیدا ڕاوه‌ستابوو له‌ پشتمه‌وه‌ گرمه‌یه‌ك به‌رزبووه‌وه‌.
13
ئه‌مه‌ش ده‌نگی باڵی گیانله‌به‌ره‌كان بوو كه‌ هه‌ریه‌كه‌ و به‌وه‌ی ته‌نیشتی ده‌كه‌وت، هه‌روه‌ها ده‌نگی چه‌رخه‌كان، ده‌نگی گرمه‌یه‌كی گه‌وره‌ بوون.
14
جا ڕۆحی خودا هه‌ڵیگرتم و منی برد. هێزی یه‌زدانیش ناچاری كردم، منیش به‌ ڕۆحێكی تاڵ و تووڕه‌ییه‌وه‌ ڕۆیشتم.
15
ئیتر هاتمه‌ لای ئه‌و ڕاپێچكراوانه‌ی له‌ تێل‌ئاڤیڤ له‌لای نۆكه‌ندی كه‌ڤار نیشته‌جێ بوون. حه‌وت ڕۆژ به‌ سه‌رسوڕماوی له‌وێ نیشته‌جێ بووم.
دانانی حزقیێل به‌ چاودێر 
16
دوای حه‌وت ڕۆژه‌كه‌ فه‌رمایشتی یه‌زدانم بۆ هات، پێی فه‌رمووم:
17
«ئه‌ی كوڕی مرۆڤ، من تۆم كردووه‌ به‌ چاودێر به‌سه‌ر بنه‌ماڵه‌ی ئیسرائیله‌وه‌، جا وشه‌كه‌ له‌ ده‌می منه‌وه‌ ببیسته‌ و له‌لایه‌ن منه‌وه‌ ئاگاداریان بكه‌ره‌وه‌.
18
كاتێك به‌ به‌دكار ده‌ڵێم: ”سزاكه‌ت مردنه‌“ و تۆش ئاگادارت نه‌كرده‌وه‌ و قسه‌ت نه‌كرد وه‌ك ئاگاداركردنه‌وه‌ بۆ به‌دكار له‌ ڕێگا خراپه‌كانی بۆ ئه‌وه‌ی به‌ زیندوویی بمێنێته‌وه‌، ئه‌و به‌دكاره‌ به‌ تاوانی خۆیه‌وه‌ ده‌مرێت، به‌ڵام خوێنه‌كه‌ی ده‌خه‌مه‌ ئه‌ستۆی تۆ.
19
به‌ڵام ئه‌گه‌ر تۆ به‌دكاره‌كه‌ ئاگادار بكه‌یته‌وه‌ و له‌ به‌دكاری خۆی و له‌ ڕێگا خراپه‌كه‌ی نه‌گه‌ڕێته‌وه‌، ئه‌وا به‌ تاوانی خۆیه‌وه‌ ده‌مرێت، به‌ڵام تۆ خۆتت ڕزگار كردووه‌.
20
«ئه‌گه‌ر كه‌سی ڕاستودروستیش له‌ ڕاستودروستی خۆی بگه‌ڕێته‌وه‌ و تاوان بكات، كۆسپ ده‌خه‌مه‌ ڕێگای و ده‌مرێت. له‌به‌ر ئه‌وه‌ی ئاگادارت نه‌كرده‌وه‌ گوناهه‌كه‌ی ده‌بێته‌ هۆی مردنی و ئه‌و ڕاستودروستییه‌ی كه‌ كردوویه‌تی له‌یاد ده‌كرێت، خوێنه‌كه‌شی ده‌خه‌مه‌ ئه‌ستۆی تۆ.
21
به‌ڵام ئه‌گه‌ر تۆ كه‌سی ڕاستودروسته‌كه‌ت ئاگادار كرده‌وه‌ له‌وه‌ی ڕاستودروسته‌كه‌ گوناه بكات و گوناهی نه‌كرد، ئه‌وا ده‌ژیێت، چونكه‌ ئاگادار كرایه‌وه‌ و تۆش خۆتت ڕزگار كردووه‌.»
22
له‌وێ هێزی یه‌زدان هاته‌ سه‌رم، ئه‌ویش پێی فه‌رمووم: «هه‌سته‌ بڕۆ ده‌شتاییه‌كه‌، له‌وێ قسه‌ت له‌گه‌ڵ ده‌كه‌م.»
23
منیش هه‌ستام و چوومه‌ ده‌ره‌وه‌ به‌ره‌و ده‌شتاییه‌كه‌. ئه‌وه‌تا شكۆمه‌ندی یه‌زدان له‌وێ وه‌ستاوه‌ وه‌ك ئه‌و شكۆمه‌ندییه‌ی له‌سه‌ر نۆكه‌ندی كه‌ڤار بینیم، ئیتر به‌سه‌ر ڕوومدا كه‌وتم.
24
ئینجا ڕۆحی خودا هاته‌ ناومه‌وه‌ و هه‌ڵیستاندمه‌ سه‌ر پێیه‌كانم، قسه‌ی له‌گه‌ڵ كردم و پێی فه‌رمووم: «بڕۆ و له‌ناو ماڵه‌كه‌ت ده‌رگا له‌سه‌ر خۆت دابخه‌.
25
تۆ ئه‌ی كوڕی مرۆڤ، به‌ گوریس ده‌تبه‌ستنه‌وه‌ و كۆت ده‌كرێیت، بۆ ئه‌وه‌ی نه‌توانیت بچیته‌ ناویان.
26
منیش زمانت به‌ مه‌ڵاشووته‌وه‌ ده‌نووسێنم و لاڵ ده‌بیت، بۆیان نابیت به‌ پیاوێكی سه‌رزه‌نشتكار، چونكه‌ بنه‌ماڵه‌یه‌كی یاخین.
27
به‌ڵام كاتێك قسه‌ت له‌گه‌ڵ ده‌كه‌م ده‌مت ده‌كه‌مه‌وه‌ و پێیان ده‌ڵێیت: ”یه‌زدانی باڵاده‌ست ئه‌مه‌ ده‌فه‌رموێت.“ ئه‌وه‌ی گوێ ده‌گرێت با گوێ بگرێت و ئه‌وه‌ی گوێ ناگرێت با گوێ نه‌گرێت، چونكه‌ بنه‌ماڵه‌یه‌كی یاخین.