عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
دوو هه‌ڵۆ و دار مێوێك 
1
ئینجا فه‌رمایشتی یه‌زدانم بۆ هات، پێی فه‌رمووم:
2
«ئه‌ی كوڕی مرۆڤ، مه‌ته‌ڵێك و په‌ندێك بۆ بنه‌ماڵه‌ی ئیسرائیل بهێنه‌وه‌ و
3
بڵێ: ”یه‌زدانی باڵاده‌ست ئه‌مه‌ ده‌فه‌رموێت: هه‌ڵۆیه‌كی مه‌زنی باڵ به‌هێزی شاپه‌ڕ درێژی په‌ڕپه‌ڕی ڕه‌نگاوڕه‌نگ هاته‌ لوبنان. له‌سه‌ر لووتكه‌ی دار ئورزێك نیشته‌وه‌،
4
به‌رزترین چڵه‌كه‌شی قرتاند و هێنای بۆ خاكی بازرگانی و له‌ شاری بازرگانه‌كان چاندی.
5
«”هه‌روه‌ها هه‌ندێك تۆوی خاكه‌كه‌ی ئێوه‌ی برد و له‌ زه‌وییه‌كی به‌پیتدا چاندی. بردی و له‌ده‌م ئاوێكی زۆر وه‌ك داری بی چاندی.
6
ڕوا و بوو به‌ دار مێوێكی په‌ل بڵاو و قه‌د كورت، لقه‌كانی به‌ره‌و لای هه‌ڵۆكه‌ سووڕانه‌وه‌، ڕه‌گه‌كه‌شی له‌ژێر خۆیدا بوو، جا بوو به‌ دار مێو و لقی دا و چڵ و چرۆی كرد.
7
«”هه‌ڵۆیه‌كی دیكه‌ هه‌بوو، زل و باڵه‌كانی به‌هێز و په‌ڕی زۆر بوو. ئیتر دار مێوه‌كه‌ له‌و شوێنه‌ی كه‌ تێیدا چێنرابوو ڕه‌گی درێژ كرده‌وه‌ بۆ لای هه‌ڵۆكه‌، لقیشی به‌ره‌و لای ئه‌و هاویشت بۆ ئه‌وه‌ی ئاوی لێ وه‌ربگرێت.
8
ئه‌گه‌رچی له‌ كێڵگه‌یه‌كی باش و له‌ ده‌م ئاوی زۆردا چێنرابوو، هه‌تا لقه‌كانی نه‌شونما بكات و به‌ر بگرێت، ببێته‌ دار مێوێكی بڵاو.“
9
«بڵێ: ”یه‌زدانی باڵاده‌ست ئه‌مه‌ ده‌فه‌رموێت: ئایا سه‌ركه‌وتوو ده‌بێت؟ ئایا له‌ ڕه‌گه‌وه‌ هه‌ڵناكێشرێت و به‌ره‌كه‌ی ناڕنرێت هه‌تا وشك بێت؟ هه‌موو گه‌ڵای لقه‌كانی وشك ده‌بێت پێویست به‌ بازووێكی به‌هێز و خه‌ڵكێكی زۆر ناكات هه‌تا له‌ ڕه‌گه‌وه‌ هه‌ڵیبكێشن.
10
ئه‌گه‌ر بشچێنرێته‌وه‌، ئایا گه‌شه‌ ده‌كات؟ ئایا وه‌ك ئه‌وه‌ی بای ڕۆژهه‌ڵات لێی دابێت به‌ ته‌واوی وشك نابێت؟ له‌و شوێنه‌ی لێی ڕواوه‌ وشك نابێت؟“»
11
ئینجا فه‌رمایشتی یه‌زدانم بۆ هات، پێی فه‌رمووم:
12
«به‌ بنه‌ماڵه‌ی یاخی بڵێ: ”ئایا له‌م په‌نده‌ تێگه‌یشتن؟ بڵێ: پاشای بابل هاته‌ ئۆرشه‌لیم و پاشای یه‌هودا و میره‌كانی برد و له‌گه‌ڵ خۆی ڕاپێچی كردن بۆ بابل.
13
ئینجا له‌ توخمی شاهانه‌ كه‌سێكی هه‌ڵبژارد و په‌یمانێكی له‌گه‌ڵدا به‌ست و سوێندی دا. سه‌ره‌ڕای ئه‌وه‌ش، ڕابه‌رانی خاكه‌كه‌شی ڕاپێچ كرد
14
بۆ ئه‌وه‌ی پاشایه‌تییه‌كه‌ سووك بێت و به‌رز نه‌بێته‌وه‌ و په‌یمانه‌كه‌ی نه‌شكێت و جێگیر بێت.
15
به‌ڵام پاشا لێی یاخی بوو به‌وه‌ی نێردراوانی خۆی بۆ میسر نارد بۆ ئه‌وه‌ی ئه‌سپ و سوپایه‌كی گه‌وره‌ی بداتێ. ئایا سه‌ركه‌وتوو ده‌بێت؟ ئایا ئه‌وه‌ی ئه‌مه‌ بكات ده‌رباز ده‌بێت؟ یان ئه‌وه‌ی په‌یمان بشكێنێت ده‌رباز ده‌بێت؟
16
«”یه‌زدانی باڵاده‌ست ده‌فه‌رموێت: به‌ گیانی خۆم، له‌ شوێنی ئه‌و پاشایه‌ی كه‌ كردی به‌ پاشا، ئه‌وه‌ی سووكایه‌تی به‌ سوێنده‌كه‌ی كرد و په‌یمانه‌كه‌ی شكاند، له‌لای ئه‌و له‌ ناوه‌ڕاستی بابل ده‌مرێت.
17
فیرعه‌ونیش به‌ سوپای گه‌وره‌ و خه‌ڵكێكی بێشوماره‌وه‌ ناتوانێ له‌ جه‌نگدا یارمه‌تی بدات، ئه‌و كاته‌ی سه‌نگه‌ر لێ ده‌درێت و قولله‌ بنیاد ده‌نرێت بۆ له‌ناوبردنی خه‌ڵكێكی زۆر.
18
ئه‌وه‌ی سووكایه‌تی به‌ سوێند كرد و په‌یمانی شكاند، ده‌ستی دایه‌ ده‌ست و سه‌ره‌ڕای ئه‌وه‌ش هه‌موو ئه‌مانه‌ی كرد، ده‌رباز نابێت.
19
«”له‌به‌ر ئه‌وه‌ یه‌زدانی باڵاده‌ست ئه‌مه‌ ده‌فه‌رموێت: به‌ گیانی خۆم، سزای ده‌ده‌م له‌به‌ر ئه‌وه‌ی سووكایه‌تی به‌ سوێنده‌كه‌م كرد و په‌یمانه‌كه‌ی منی شكاند.
20
تۆڕی خۆمی بۆ داده‌نێمه‌وه‌، به‌ داوی منه‌وه‌ ده‌بێت و ده‌یهێنمه‌ بابل و له‌سه‌ر ئه‌و ناپاكییه‌ی له‌ منی كرد له‌وێ حوكمی به‌سه‌ردا ده‌سه‌پێنم.
21
هه‌موو له‌شكره‌ ڕاكردووه‌كه‌ی به‌ شمشێر ده‌كوژرێن و ئه‌وانه‌ش كه‌ ده‌مێننه‌وه‌ به‌ره‌و ڕووی هه‌موو بایه‌ك په‌رته‌وازه‌ ده‌بن، جا ئێوه‌ ده‌زانن كه‌ من یه‌زدانم، ئه‌وه‌م فه‌رموو.
22
«”یه‌زدانی باڵاده‌ست ئه‌مه‌ ده‌فه‌رموێت: منیش له‌ لووتكه‌ی دار ئورزێك لقێك ده‌به‌م و ده‌یڕوێنم، چڵێك له‌ چڵه‌كانی لێ ده‌كه‌مه‌وه‌ و له‌سه‌ر كێوێكی به‌رزی سه‌ركه‌ش ده‌یڕوێنم.
23
له‌ چیای به‌رزی ئیسرائیل ده‌یڕوێنم، جا لقی لێ ده‌ڕوێت و به‌ر ده‌گرێت و ده‌بێت به‌ دار ئورزێكی گه‌وره‌، هه‌موو جۆره‌ باڵنده‌یه‌ك له‌ناوی نیشته‌جێ ده‌بێت، هه‌موو باڵدارێك له‌ژێر سێبه‌ری لقه‌كانی نیشته‌جێ ده‌بێت.
24
ئه‌و كاته‌ هه‌موو دره‌خته‌كانی ده‌شتوده‌ر ده‌زانن كه‌ من یه‌زدانم ئه‌وه‌ی داری به‌رز نزم ده‌كاته‌وه‌ و داری نزم به‌رز ده‌كاته‌وه‌، ئه‌وه‌ی سه‌وزه‌كه‌ش وشك ده‌كات و چرۆ به‌ داره‌ وشكه‌كه‌ ده‌كات.
«”من یه‌زدانم، ئه‌وه‌م فه‌رموو، هه‌روه‌ها به‌جێی ده‌هێنم.“»