عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
قوڕبه‌سه‌ر پێغه‌مبه‌ره‌ درۆزنه‌كان 
1
ئینجا فه‌رمایشتی یه‌زدانم بۆ هات فه‌رمووی:
2
«ئه‌ی كوڕی مرۆڤ، پێشبینی بكه‌ له‌سه‌ر پێغه‌مبه‌ره‌كانی ئیسرائیل، ئه‌وانه‌ی له‌خۆیانه‌وه‌ پێشبینی ده‌كه‌ن: ”گوێ له‌ فه‌رمایشتی یه‌زدان بگرن!
3
یه‌زدانی باڵاده‌ست ئه‌مه‌ ده‌فه‌رموێت: قوڕبه‌سه‌ر ئه‌و پێغه‌مبه‌ره‌ گێلانه‌ی به‌دوای ڕۆحی خۆیان كه‌وتوون و هیچیان نه‌بینیوه‌.
4
ئه‌ی ئیسرائیل، پێغه‌مبه‌ره‌كانتان وه‌ك چه‌قه‌ڵی ناو كه‌لاوه‌یان لێ هاتووه‌.
5
سه‌رنه‌كه‌وتن كه‌لێنی دیوارێك بگرن، شوورایه‌كیشتان بۆ بنه‌ماڵه‌ی ئیسرائیل بنیاد نه‌نایه‌وه‌ بۆ ئه‌وه‌ی له‌ جه‌نگ به‌رگریتان لێ بكات له‌ ڕۆژی یه‌زدان[a] .
6
ئه‌وانه‌ی بینینیان به‌تاڵ و فاڵگرتنه‌وه‌یان درۆ بوو، ده‌ڵێن: ’سروشی یه‌زدانه‌‘ و هه‌رچه‌نده‌ش یه‌زدان ئه‌وانی نه‌ناردووه‌، كه‌چی چاوه‌ڕێی هاتنه‌دی پێشبینییه‌كه‌یان بوون.
7
ئایا بینینی به‌تاڵتان بۆ ئاشكرا كرا و به‌ فاڵگرتنه‌وه‌ی درۆ قسه‌تان نه‌كرد، كه‌ ده‌ڵێن: ’سروشی یه‌زدانه‌،‘ من قسه‌م نه‌كردووه‌؟
8
«”له‌به‌ر ئه‌وه‌ یه‌زدانی باڵاده‌ست ئه‌مه‌ ده‌فه‌رموێت: چونكه‌ به‌ به‌تاڵی قسه‌تان كرد و بینینه‌كانتان درۆ بوون، له‌به‌ر ئه‌وه‌ من له‌ دژی ئێوه‌م. ئه‌وه‌ فه‌رمایشتی یه‌زدانی باڵاده‌سته‌.
9
ده‌ستیشم له‌ دژی ئه‌و پێغه‌مبه‌رانه‌ ده‌بێت كه‌ بینینه‌كانتان درۆ بوون، بینینیان به‌تاڵه‌ و فاڵگرتنه‌وه‌یان درۆیه‌. له‌ناو ئه‌نجومه‌نی گه‌له‌كه‌م نابن و له‌ناو كتێبی بنه‌ماڵه‌ی ئیسرائیل ناویان نانووسرێت و ناچنه‌ ناو خاكی ئیسرائیله‌وه‌. ئیتر ئێوه‌ ده‌زانن كه‌ من یه‌زدانی باڵاده‌ستم.
10
«”له‌به‌ر ئه‌وه‌ی گه‌له‌كه‌ی منیان گومڕا كرد، ده‌ڵێن: ’ئاشتی!‘ ئاشتیش نییه‌، ئه‌و دیواره‌ لاوازه‌ی خه‌ڵكی بنیادی ده‌نێن، ئه‌وان به‌ گه‌چ سواخی ده‌ده‌ن.
11
به‌وانه‌ بڵێ كه‌ به‌ گه‌چ سواخی ده‌ده‌ن: ’ده‌كه‌وێت.‘ بارانێكی به‌خوڕ ده‌بارێت، ئه‌ی ته‌رزه‌ به‌ردینه‌كان ئێوه‌ش ده‌بارن و بایه‌كی به‌هێزیش كه‌لێنی تێده‌كات.
12
ئه‌وه‌تا كه‌ دیواره‌كه‌ ده‌ڕووخێت، ئایا پێتان ناڵێن: ’كوا ئه‌و گه‌چه‌ی پێتان سواخ دابوو؟‘
13
«”له‌به‌ر ئه‌وه‌ یه‌زدانی باڵاده‌ست ئه‌مه‌ ده‌فه‌رموێت: من له‌ تووڕه‌ییمدا به‌ بایه‌كی به‌هێز كه‌لێنی تێده‌كه‌م، له‌ هه‌ڵچوونم بارانی به‌خوڕ و ته‌رزه‌ی به‌ردین ده‌نێرم بۆ له‌ناوبردنی.
14
ئه‌و دیواره‌ ده‌ڕووخێنم كه‌ به‌ گه‌چ سواختان داوه‌، له‌گه‌ڵ زه‌وی ته‌ختی ده‌كه‌م، بناغه‌كانی ده‌رده‌كه‌ون. كاتێك دیواره‌كه‌ ده‌كه‌وێت، ئێوه‌ش له‌ناویدا ده‌فه‌وتێن، ئیتر ئێوه‌ ده‌زانن كه‌ من یه‌زدانم.
15
جا تووڕه‌یی خۆم ده‌ڕێژم به‌سه‌ر دیواره‌كه‌ و ئه‌وانه‌ی به‌ گه‌چ سواخی ده‌ده‌ن، پێتان ده‌ڵێم: ’دیواره‌كه‌ و ئه‌وانه‌ش كه‌ به‌ گه‌چ سواخیان داوه‌ نه‌ماون،
16
ئه‌و پێغه‌مبه‌رانه‌ی ئیسرائیل كه‌ پێشبینییان بۆ ئۆرشه‌لیم كرد و بینینی ئاشتییان ڕاگه‌یاند، هیچ ئاشتیش نه‌بوو. ئه‌وه‌ فه‌رمایشتی یه‌زدانی باڵاده‌سته‌.‘“
17
«ئێستاش، ئه‌ی كوڕی مرۆڤ، ڕووت له‌ كچانی گه‌له‌كه‌ت بكه‌، ئه‌وانه‌ی له‌ خۆیانه‌وه‌ پێشبینی ده‌كه‌ن، پێشبینی له‌سه‌ر ئه‌وان بكه‌ و
18
بڵێ: ”یه‌زدانی باڵاده‌ست ئه‌مه‌ ده‌فه‌رموێت: قوڕبه‌سه‌ر ئه‌و ژنانه‌ی نوشته‌ له‌ شێوه‌ی بازووبه‌ند ده‌دورن بۆ مه‌چه‌كیان، نوشته‌ له‌ شێوه‌ی سه‌رپۆش بۆ هه‌موو سه‌رێك دروستده‌كه‌ن، بۆ ڕاوكردنی گیانه‌كان. ئایا ئێوه‌ دڵ و ده‌روونی گه‌له‌كه‌م ڕاو ده‌كه‌ن و خۆتان به‌ زیندووی ده‌هێڵنه‌وه‌؟
19
ئێوه‌ له‌لای گه‌له‌كه‌م له‌به‌ر مشتێك جۆ و هه‌ندێك له‌ته‌ نان گڵاوم ده‌كه‌ن. به‌ درۆكردنتان بۆ گه‌له‌كه‌م كه‌ گوێ له‌ درۆ ده‌گرن، ئێوه‌ ئه‌و كه‌سانه‌ی كه‌ شایسته‌ی مردن نه‌بوون كوشتووتانن و ئه‌وانه‌ی شایشته‌ی ژیان نه‌بوون به‌ زیندوویی هێشتووتتانه‌وه‌.
20
«”له‌به‌ر ئه‌وه‌ یه‌زدانی باڵاده‌ست ئه‌مه‌ ده‌فه‌رموێت: من له‌ دژی نوشته‌كانی ئێوه‌م كه‌ له‌سه‌ر شێوه‌ی بازووبه‌نده‌، كه‌ وه‌ك باڵنده‌ مرۆڤی پێ ڕاو ده‌كه‌ن، له‌سه‌ر بازووتان ده‌یدڕێنم و ئه‌و مرۆڤانه‌ی وه‌ك باڵنده‌ ڕاویان ده‌كه‌ن به‌ڕه‌ڵایان ده‌كه‌م.
21
سه‌رپۆشه‌كانتان ده‌دڕێنم و فریای گه‌له‌كه‌م ده‌كه‌وم له‌ ده‌ستتان، له‌مه‌ودوا له‌ناو ده‌ستتان نابن بۆ ڕاوكردنیان، ئیتر ئێوه‌ ده‌زانن كه‌ من یه‌زدانم.
22
له‌به‌ر ئه‌وه‌ی به‌ درۆ دڵی ڕاستودروستتان خه‌مبار كرد كه‌ من خه‌مبارم نه‌كردبوو، هه‌روه‌ها خراپه‌كارتان هاندا هه‌تا له‌ ڕێگا خراپه‌كانی نه‌گه‌ڕێته‌وه‌ بۆ ئه‌وه‌ی بژیێت،
23
هه‌ر بۆیه‌ له‌مه‌ودوا بینینی به‌تاڵیان بۆ ئاشكرا ناكرێت و چیتر فاڵ ناگرنه‌وه‌، فریای گه‌له‌كه‌ی خۆم ده‌كه‌وم له‌ ده‌ستتان، ئیتر ئێوه‌ ده‌زانن كه‌ من یه‌زدانم.“»
  1. a. 13‏:5 ڕۆژی سزادانی گوناهباران و ڕزگاركردنی گه‌لی خودا.