عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كاره‌ساتی پێنجه‌م: ده‌ردی مه‌ڕوماڵات 
1
یه‌زدان به‌ موسای فه‌رموو: «بڕۆ لای فیرعه‌ون و پێی بڵێ كه‌ یه‌زدانی په‌روه‌ردگاری عیبرانییه‌كان ئه‌مه‌ ده‌فه‌رموێت: ”ڕێ به‌ گه‌له‌كه‌م بده‌ با بڕۆن بمپه‌رستن.“
2
ئه‌گه‌ر ڕێیان نه‌ده‌یت و به‌رده‌وام نه‌هێڵیت بڕۆن،
3
ئه‌وا یه‌زدان ده‌ردێكی زۆر گران ده‌هێنێته‌ سه‌ر مه‌ڕوماڵاته‌كانت كه‌ له‌ كێڵگه‌ن، بۆ سه‌ر ئه‌سپ و گوێدرێژ و وشتر و گا و مانگا و مه‌ڕ و بزن.
4
به‌ڵام یه‌زدان جیاوازی ده‌كات له‌نێوان مه‌ڕوماڵاتی نه‌وه‌ی ئیسرائیل و مه‌ڕوماڵاتی میسرییه‌كان، هیچ ئاژه‌ڵێكی نه‌وه‌ی ئیسرائیل نامرێت.»
5
یه‌زدان كاتێكی دیاری كرد و فه‌رمووی، «به‌یانی یه‌زدان ئه‌م كاره‌ له‌ زه‌وییه‌كه‌دا ده‌كات.»
6
بۆ به‌یانی یه‌زدان ئه‌م كاره‌ی كرد و هه‌موو مه‌ڕوماڵاتی میسرییه‌كان مردن، به‌ڵام له‌ ئاژه‌ڵی نه‌وه‌ی ئیسرائیل یه‌كێكیشیان نه‌مرد.
7
فیرعه‌ونیش ناردی و بینییان ته‌نانه‌ت یه‌ك ئاژه‌ڵی نه‌وه‌ی ئیسرائیل نه‌مردووه‌، به‌ڵام هێشتا دڵی فیرعه‌ون ڕه‌ق بوو و ڕێی به‌ گه‌له‌كه‌ نه‌دا بڕۆن.
كاره‌ساتی شه‌شه‌م: دومه‌ڵ 
8
ئینجا یه‌زدان به‌ موسا و هارونی فه‌رموو: «به‌ پڕی ده‌سته‌كانتان خوڵه‌مێشی ته‌نوور بۆ خۆتان ببه‌ن و با موسا له‌به‌رچاوی فیرعه‌ون به‌ره‌و ئاسمان به‌بای بكات.
9
ده‌بێته‌ تۆزوبا له‌ هه‌موو خاكی میسر، ده‌بێته‌ دومه‌ڵی كێم ده‌رپه‌ڕیو له‌ هه‌موو خاكی میسر بۆ مرۆڤ و ئاژه‌ڵ.»
10
ئیتر خوڵه‌مێشی ته‌نووریان برد و له‌ به‌رامبه‌ر فیرعه‌ون وه‌ستان، موسا به‌ره‌و ئاسمان به‌بای كرد و بووه‌ دومه‌ڵی كێمی ده‌رپه‌ڕیو له‌ مرۆڤ و له‌ ئاژه‌ڵ.
11
جادووگه‌ره‌كانیش نه‌یانتوانی له‌ به‌رامبه‌ر موسا بوه‌ستن له‌به‌ر دومه‌ڵه‌كان، چونكه‌ دومه‌ڵه‌كان له‌ جادووگه‌ره‌كان و له‌ هه‌موو میسرییه‌كان بوو.
12
به‌ڵام یه‌زدان دڵی فیرعه‌ونی ڕه‌قكرد و گوێی له‌ موسا و هارون نه‌گرت، هه‌روه‌ك یه‌زدان به‌ موسای فه‌رموو.
كاره‌ساتی حه‌وته‌م: ته‌رزه‌ 
13
یه‌زدان به‌ موسای فه‌رموو: «به‌یانی زوو هه‌سته‌ و له‌ به‌رامبه‌ر فیرعه‌ون بوه‌سته‌ و پێی بڵێ: ”یه‌زدانی په‌روه‌ردگاری عیبرانییه‌كان ئه‌مه‌ ده‌فه‌رموێت: ڕێ به‌ گه‌له‌كه‌م بده‌ بچن بمپه‌رستن.
14
ئه‌گینا ئه‌م جاره‌ هه‌موو گورزه‌كانم بۆ دڵت و بۆ سه‌ر خزمه‌تكاره‌كانت و بۆ سه‌ر گه‌له‌كه‌ت ده‌نێرم، بۆ ئه‌وه‌ی بزانیت له‌ هه‌موو زه‌وی هیچ كه‌سێك وه‌ك من نییه‌.
15
ده‌متوانی ده‌ستم درێژ بكه‌م و خۆت و گه‌له‌كه‌ت تووشی ده‌رد بكه‌م و له‌سه‌ر ڕووی زه‌وی بتانسڕمه‌وه‌.
16
به‌ڵام له‌به‌ر ئه‌وه‌ تۆم هێشتووه‌ته‌وه‌ بۆ ئه‌وه‌ی توانای خۆمت پیشان بده‌م تاكو له‌ هه‌موو زه‌ویدا ناوم ڕابگه‌یه‌نرێت.
17
تۆ هێشتا خۆت به‌ زل ده‌زانیت له‌سه‌ر گه‌له‌كه‌م و ڕێیان ناده‌یت بڕۆن.
18
له‌به‌ر ئه‌وه‌ به‌یانی ئه‌م كاته‌ ته‌رزه‌یه‌كی زۆر مه‌زن ده‌بارێنم كه‌ له‌ میسر هاوتای نه‌بووبێت، له‌ ڕۆژی دامه‌زراندنییه‌وه‌ هه‌تا ئێستا.
19
ئێستاش بنێره‌ و مه‌ڕوماڵاته‌كه‌ت و هه‌موو ئه‌و شتانه‌ی كه‌ هه‌ته‌ و له‌ كێڵگه‌یه‌ بیانپارێزه‌، هه‌موو خه‌ڵك و ئاژه‌ڵێك كه‌ له‌ كێڵگه‌ ده‌مێننه‌وه‌ ئه‌گه‌ر له‌ ماڵه‌وه‌ كۆنه‌كرێنه‌وه‌ ئه‌وا ته‌رزه‌كه‌ به‌ سه‌ریان ده‌كه‌وێت و ده‌مرن.“»
20
ئیتر ده‌ستوپێوه‌نده‌كانی فیرعه‌ون، ئه‌وانه‌ی كه‌ له‌ فه‌رمایشتی یه‌زدان ترسان، به‌ كۆیله‌ و ئاژه‌ڵه‌ ماڵییه‌كانیانه‌وه‌ به‌ره‌و ماڵه‌كان هه‌ڵاتن.
21
به‌ڵام ئه‌وه‌ی فه‌رمایشتی یه‌زدانی پشتگوێ خست، ئه‌وا خزمه‌تكاران و ئاژه‌ڵه‌ ماڵییه‌كه‌ی له‌ كێڵگه‌ به‌جێهێشت.
22
ئینجا یه‌زدان به‌ موسای فه‌رموو: «ده‌ستت به‌ره‌و ئاسمان درێژ بكه‌ و له‌ هه‌موو خاكی میسر ته‌رزه‌ به‌سه‌ر خه‌ڵك و ئاژه‌ڵ و هه‌موو شتێكدا ده‌بارێت كه‌ له‌ كێڵگه‌كانی خاكی میسر گه‌شه‌ ده‌كات.»
23
ئیتر موسا گۆچانه‌كه‌ی به‌ره‌و ئاسمان درێژكرد، یه‌زدانیش هه‌وره‌تریشقه‌ی لێدا و ئاگر به‌ره‌و زه‌وی هات، یه‌زدان ته‌رزه‌ی بارانده‌ سه‌ر خاكی میسر.
24
بووه‌ ته‌رزه‌ و ئاگریش له‌ناو ته‌رزه‌كه‌ بریسكه‌ی ده‌دایه‌وه‌. ته‌رزه‌كه‌ ئه‌وه‌نده‌ مه‌زن بوو كه‌ له‌ هه‌موو خاكی میسر وه‌ك ئه‌وه‌ نه‌بووه‌، له‌و كاته‌وه‌ی بوونه‌ته‌ نه‌ته‌وه‌.
25
ته‌رزه‌ له‌ هه‌موو خاكی میسری دا، له‌ هه‌موو ئه‌وه‌ی له‌ كێڵگه‌دا بوو له‌ مرۆڤه‌وه‌ هه‌تا ئاژه‌ڵ، ته‌رزه‌ هه‌موو سه‌وزایی و ڕووه‌كی كێڵگه‌ی كوتایه‌وه‌ و هه‌موو داری كێڵگه‌شی شكاند.
26
ته‌نها له‌ خاكی گۆشه‌ن كه‌ نه‌وه‌ی ئیسرائیلی لێبوو، ته‌رزه‌ نه‌بوو.
27
فیرعه‌ون ناردی و بانگی موسا و هارونی كرد، پێی گوتن: «ئه‌م جاره‌ گوناهم كرد، یه‌زدان ڕاستودروسته‌ و من و گه‌له‌كه‌م تاوانبارین.
28
له‌ یه‌زدان بپاڕێنه‌وه‌، چونكه‌ له‌ هه‌وره‌تریشقه‌ و ته‌رزه‌ تێر بووین، منیش ڕێتان ده‌ده‌م بڕۆن، ئیتر ڕاناگیرێن.»
29
موساش وه‌ڵامی دایه‌وه‌: «به‌ چوونه‌ده‌ره‌وه‌م له‌ شاره‌كه‌ ده‌ستم به‌ره‌و یه‌زدان به‌رز ده‌كه‌مه‌وه‌ و نزا ده‌كه‌م، ئیتر هه‌وره‌تریشقه‌ ده‌وه‌ستێت و ته‌رزه‌ نابێت، بۆ ئه‌وه‌ی بزانیت زه‌وی هی یه‌زدانه‌.
30
به‌ڵام سه‌باره‌ت به‌ خۆت و خزمه‌تكاره‌كانت، من ده‌زانم هێشتا له‌ یه‌زدانی په‌روه‌ردگار نه‌ترساون.»
31
كه‌تان و جۆ تووشی ئافات هاتن، چونكه‌ جۆ له‌ گوڵكردن و كه‌تانیش له‌ تۆوكردن بوو.
32
به‌ڵام گه‌نم و ماش تووشی ئافات نه‌بوون چونكه‌ دره‌نگ پێده‌گه‌ن.
33
موسا فیرعه‌ونی به‌جێهێشت و له‌ شاره‌كه‌ش ڕۆیشت، ده‌ستی به‌ره‌و یه‌زدان به‌رز كرده‌وه‌ و نزای كرد، ئیتر هه‌وره‌تریشقه‌ و ته‌رزه‌ وه‌ستان و باران نه‌بارییه‌ سه‌ر زه‌وی.
34
كاتێك فیرعه‌ون بینی باران و ته‌رزه‌ و هه‌وره‌تریشقه‌ وه‌ستاوه‌، گه‌ڕایه‌وه‌ سه‌ر گوناه و خۆی و خزمه‌تكارانی دڵیان ڕه‌قكرد.
35
ئیتر دڵی فیرعه‌ون ڕه‌ق بوو و ڕێی به‌ نه‌وه‌ی ئیسرائیل نه‌دا بڕۆن، هه‌روه‌ك یه‌زدان له‌ ڕێگه‌ی موساوه‌ فه‌رمووی.