عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كاره‌ساتی هه‌شته‌م: كولله‌ 
1
یه‌زدان به‌ موسای فه‌رموو: «بڕۆ لای فیرعه‌ون، چونكه‌ من دڵی ئه‌و و دڵی خزمه‌تكارانی ئه‌وم ڕه‌ق كردووه‌، بۆ ئه‌وه‌ی ئه‌م نیشانانه‌م له‌نێویان ئه‌نجام بده‌م.
2
هه‌روه‌ها بۆ ئه‌وه‌ی بۆ منداڵ و نه‌وه‌كانت باسی ئه‌وه‌ بكه‌یت چۆن میسرم كرده‌ گاڵته‌جار به‌و نیشانانه‌ی له‌نێویاندا ئه‌نجامم داوه‌، ئیتر ئێوه‌ ده‌زانن كه‌ من یه‌زدانم.»
3
جا موسا و هارون چوونه‌ لای فیرعه‌ون و پێیان گوت: «یه‌زدانی په‌روه‌ردگاری عیبرانییه‌كان ئه‌مه‌ ده‌فه‌رموێت: ”هه‌تا كه‌ی مل ناده‌یت و له‌به‌رده‌مم ملكه‌چ نابیت؟ ڕێ به‌ گه‌له‌كه‌م بده‌ با بڕۆن و بمپه‌رستن،
4
چونكه‌ ئه‌گه‌ر ڕێ به‌ گه‌له‌كه‌م نه‌ده‌یت، ئه‌وا من به‌یانی كولله‌ ده‌هێنمه‌ سه‌ر خاكه‌كه‌ت.
5
ڕووی زه‌وی داده‌پۆشرێت و ناتوانرێت ته‌ماشای زه‌وی بكرێت، ئه‌وه‌ی له‌ ته‌رزه‌كه‌ بۆتان ماوه‌ته‌وه‌ و ده‌رباز بووه‌ ده‌یخوات، هه‌روه‌ها هه‌موو دارێكیش كه‌ له‌ كێڵگه‌كانتان گه‌شه‌ بكات ده‌یخوات.
6
ماڵه‌كانت و ماڵی هه‌موو خزمه‌تكاره‌كانت و هه‌موو میسرییه‌كان پڕ ده‌كات، ئه‌و شته‌ی كه‌ نه‌ باوك و نه‌ باپیرانت بینیویانه‌، له‌و ڕۆژه‌وه‌ی له‌سه‌ر زه‌وی په‌یدا بوون هه‌تا ئه‌مڕۆ.“» ئینجا ڕووی وه‌رگێڕا و له‌لای فیرعه‌ون هاته‌ ده‌ره‌وه‌.
7
خزمه‌تكارانی فیرعه‌ونیش پێیان گوت: «هه‌تا كه‌ی ئه‌مه‌ ببێته‌ ته‌ڵه‌ بۆمان؟ ڕێ به‌و پیاوانه‌ بده‌ با بڕۆن و یه‌زدانی په‌روه‌ردگاریان بپه‌رستن، ئایا هێشتا نازانیت كه‌ میسر وێران بووه‌؟»
8
ئینجا موسا و هارونیان برده‌وه‌ لای فیرعه‌ون، ئه‌ویش پێی گوتن: «بڕۆن یه‌زدانی په‌روه‌ردگارتان بپه‌رستن، به‌ڵام كێ و كێ ده‌چن؟»
9
موساش وه‌ڵامی دایه‌وه‌: «به‌ گه‌نج و پیرمانه‌وه‌ ده‌چین، به‌ كوڕ و كچ و مه‌ڕوماڵات و ڕه‌شه‌وڵاخمانه‌وه‌ ده‌چین، چونكه‌ پێویسته‌ جه‌ژن بۆ یه‌زدان بگێڕین.»
10
فیرعه‌ونیش پێی گوتن: «یه‌زدان له‌گه‌ڵتان بێت![a] ئه‌گه‌ر بهێڵم له‌گه‌ڵ ژن و منداڵه‌كانتان بڕۆن! دیاره‌ ئێوه‌ نیازتان خراپه‌.
11
نه‌خێر! ته‌نها پیاوان بڕۆن یه‌زدان بپه‌رستن، هه‌روه‌ك خۆتان داواتان كردووه‌.» ئیتر موسا و هارون له‌به‌رده‌م فیرعه‌ون ده‌ركران.
12
یه‌زدان به‌ موسای فه‌رموو: «ده‌ستت بۆ سه‌ر خاكی میسر درێژ بكه‌ بۆ كولله‌، بۆ ئه‌وه‌ی بێته‌ سه‌ر خاكی میسر و هه‌موو سه‌وزایی زه‌وییه‌كه‌ بخوات، ئه‌وه‌ی له‌ ته‌رزه‌كه‌ ماوه‌ته‌وه‌.»
13
ئیتر موسا گۆچانه‌كه‌ی به‌سه‌ر خاكی میسردا درێژكرد، به‌ درێژایی ئه‌و ڕۆژ و شه‌وه‌ یه‌زدان بایه‌كی ڕۆژهه‌ڵاتی هێنا، كاتێك بووه‌ به‌یانی بایه‌كه‌ی ڕۆژهه‌ڵات كولله‌ی هه‌ڵگرت.
14
كولله‌ هاته‌ سه‌ر هه‌موو خاكی میسر و له‌سه‌ر هه‌موو سنووره‌كانی میسر نیشته‌وه‌، ئه‌وه‌نده‌ گران بوو كه‌ له‌وه‌وپێش كولله‌ی وا نه‌بووه‌ و ناشبێت.
15
ڕووی هه‌موو خاكه‌كه‌ی داپۆشی و خاكه‌كه‌ تاریك بوو، هه‌موو سه‌وزاییه‌كی زه‌وی و هه‌موو به‌روبوومی داره‌كان كه‌ ته‌رزه‌ لێی نه‌دابوو خواردی، هیچ سه‌وزایی له‌ خاكی میسر نه‌هێشته‌وه‌، به‌ دار و ڕووه‌كی كێڵگه‌وه‌.
16
فیرعه‌ون به‌ خێرایی بانگی موسا و هارونی كرد و گوتی: «گوناهم سه‌باره‌ت به‌ یه‌زدانی په‌روه‌ردگارتان و سه‌باره‌ت به‌ ئێوه‌ش كرد.
17
ئێستاش ته‌نها ئه‌م جاره‌ له‌م گوناهه‌م خۆشبن، له‌ یه‌زدانی په‌روه‌ردگارتان بپاڕێنه‌وه‌ با ته‌نها ئه‌م كاره‌ساته‌ كوشنده‌یه‌م له‌سه‌ر لابدات.»
18
موساش له‌لای فیرعه‌ون هاته‌ ده‌ره‌وه‌ و له‌ یه‌زدان پاڕایه‌وه‌.
19
یه‌زدانیش بایه‌كی ڕۆژئاوایی زۆر به‌هێزی وه‌رگێڕا و كولله‌كه‌ی هه‌ڵگرت و فڕێیدایه‌ ناو ده‌ریای سوور[b] و یه‌ك كولله‌ نه‌ما له‌ هه‌موو خاكی میسردا.
20
به‌ڵام یه‌زدان دڵی فیرعه‌ونی ڕه‌قكرد و ڕێی نه‌دا به‌ نه‌وه‌ی ئیسرائیل بڕۆن.
كاره‌ساتی نۆیه‌م: تاریكی 
21
ئینجا یه‌زدان به‌ موسای فه‌رموو: «ده‌ستت بۆ ئاسمان درێژ بكه‌ با تاریكی باڵ به‌سه‌ر خاكی میسردا بكێشێت، كه‌ چاو چاو نه‌بینێت.»
22
ئیتر موسا ده‌ستی بۆ ئاسمان درێژكرد و تاریكاییه‌كی سه‌خت بۆ ماوه‌ی سێ ڕۆژ باڵی به‌سه‌ر خاكی میسردا كێشا.
23
بۆ ماوه‌ی سێ ڕۆژ كه‌س كه‌سی نه‌بینی و كه‌س له‌ شوێنی خۆی هه‌ڵنه‌ستا، به‌ڵام هه‌موو نه‌وه‌ی ئیسرائیل له‌ نشینگه‌كانیان ڕووناكییان هه‌بوو.
24
ئینجا فیرعه‌ون بانگی موسای كرد و گوتی: «بڕۆن یه‌زدان بپه‌رستن، ته‌نها مه‌ڕوماڵات و ڕه‌شه‌وڵاخه‌كانتان بمێنێت، هه‌روه‌ها ژن و منداڵه‌كانیشتان با له‌گه‌ڵتان بڕۆن.»
25
به‌ڵام موساش گوتی: «پێویسته‌ ڕێگامان پێبده‌یت بۆ ئه‌وه‌ی قوربانی و قوربانی سووتاندن پێشكه‌ش بكه‌ین بۆ یه‌زدانی په‌روه‌ردگارمان.
26
به‌ڵكو مه‌ڕوماڵاتیشمان له‌گه‌ڵمان ده‌ڕۆن ته‌نها سمێكیش به‌جێنامێنێت، چونكه‌ له‌وان هه‌ڵده‌گرین بۆ په‌رستنی یه‌زدانی په‌روه‌ردگارمان، ئێمه‌ نازانین به‌ چی یه‌زدان بپه‌رستین، هه‌تا نه‌گه‌ینه‌ ئه‌وێ.»
27
به‌ڵام یه‌زدان دڵی فیرعه‌ونی ڕه‌قكرد و ڕێی نه‌دا بڕۆن.
28
فیرعه‌ونیش پێی گوت: «له‌لام بڕۆ، ئاگاداری خۆت به‌ نه‌یه‌یته‌وه‌ به‌رچاوم، چونكه‌ ئه‌و ڕۆژه‌ی ڕووم ببینیت ده‌مریت.»
29
موساش وه‌ڵامی دایه‌وه‌: «هه‌روه‌ك گوتت! جارێكی دیكه‌ ناتبینمه‌وه‌.»
  1. a. 10‏:10 فیرعه‌ون نایه‌وێت ڕێیان بدات بڕۆن، به‌ڵام به‌ گاڵته‌ پێكردنه‌وه‌ قسه‌ ده‌كات.
  2. b. 10‏:19 له‌ زمانی عیبری به‌ واتای ده‌ریای سوف دێت، كه‌ ده‌كه‌وێته‌ سه‌رووی باكووری كه‌نداوی سوێسی ئه‌مڕۆ، به‌ڵام له‌ ده‌قی یۆنانی په‌یمانی نوێ هه‌ر به‌ ده‌ریای سوور نووسراوه‌. بڕوانه‌ \+xt عیبرانییه‌كان 11‏:29‏\+xt*‏.