عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كاره‌ساتی ده‌یه‌م: مردنی نۆبه‌ره‌ 
1
یه‌زدان به‌ موسای فه‌رموو: «كاره‌ساتێكی دیكه‌ به‌سه‌ر فیرعه‌ون و میسردا ده‌هێنم، دوای ئه‌مه‌ ڕێتان ده‌دات بڕۆن، كاتێك ڕێتان ده‌دات بڕۆن هه‌مووان لێره‌ به‌ ده‌ركردن ده‌رده‌كات.
2
به‌ گه‌ل بڵێ با هه‌ر پیاوێك یان ژنێك داوای خشڵی زێڕ و زیو له‌ دراوسێ میسرییه‌كه‌ی بكات.»
3
یه‌زدانیش گه‌لی له‌به‌رچاوی میسرییه‌كان ڕێزدار كرد، هه‌روه‌ها كاربه‌ده‌ستانی فیرعه‌ون و گه‌لی میسر به‌ چاوی ڕێزه‌وه‌ سه‌یری موسایان ده‌كرد.
4
موسا گوتی: «یه‌زدان ئه‌مه‌ ده‌فه‌رموێت: ”من له‌ ده‌وروبه‌ری نیوه‌شه‌ودا دێمه‌ ناو میسر.
5
هه‌موو نۆبه‌ره‌یه‌ك له‌ خاكی میسر ده‌مرێت، له‌ نۆبه‌ره‌ی فیرعه‌ونه‌وه‌ كه‌ له‌سه‌ر ته‌خته‌كه‌ی دانیشتووه‌ هه‌تا نۆبه‌ره‌ی ئه‌و كه‌نیزه‌یه‌ی له‌ پشت ده‌ستاڕه‌، نۆبه‌ره‌ی هه‌موو ئاژه‌ڵێكی ماڵیش.
6
هاوارێكی مه‌زنیش له‌ هه‌موو خاكی میسردا ده‌بێت كه‌ وه‌ك ئه‌وه‌ نه‌بووه‌ و جارێكی دیكه‌ش نابێت.
7
به‌ڵام بۆ هه‌موو نه‌وه‌ی ئیسرائیل ته‌نانه‌ت سه‌گیش پێیان ناوه‌ڕێت، نه‌ به‌ خه‌ڵك و نه‌ به‌ ئاژه‌ڵ،“ بۆ ئه‌وه‌ی بزانن یه‌زدان جیاوازی له‌نێوان گه‌لی میسری و ئیسرائیلی ده‌كات.
8
ئیتر هه‌موو خزمه‌تكارانت دێنه‌ لام و كڕنۆشم بۆ ده‌به‌ن و ده‌ڵێن ”بڕۆن، خۆت و هه‌موو ئه‌و گه‌له‌ی له‌دوای تۆن،“ ئیتر له‌پاش ئه‌وه‌ ئێره‌ به‌جێده‌هێڵم و ده‌ڕۆم.» ئینجا موسا به‌ تووڕه‌ییه‌وه‌ له‌لای فیرعه‌ون هاته‌ ده‌ره‌وه‌.
9
یه‌زدان به‌ موسای فه‌رموو: «فیرعه‌ون گوێتان لێ ناگرێت، بۆ ئه‌وه‌ی په‌رجووه‌كانم له‌ خاكی میسردا زیاد بێت.»
10
موسا و هارون هه‌موو ئه‌م په‌رجووانه‌یان له‌به‌رده‌م فیرعه‌ون كرد، به‌ڵام یه‌زدان دڵی فیرعه‌ونی ڕه‌قكرد و ڕێی به‌ نه‌وه‌ی ئیسرائیل نه‌دا له‌ خاكه‌كه‌ی بڕۆن.