عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سه‌ری ساڵ و جه‌ژنی په‌سخه‌ 
1
یه‌زدان له‌ خاكی میسر به‌ موسا و هارونی فه‌رموو:
2
«ئه‌م مانگه‌ بۆتان ده‌بێته‌ سه‌ری مانگه‌كان، بۆ ئێوه‌ یه‌كه‌می مانگه‌كانی ساڵه‌.
3
له‌گه‌ڵ هه‌موو كۆمه‌ڵی ئیسرائیل بدوێن و بڵێن، له‌ ده‌ی ئه‌م مانگه‌ با هه‌ر پیاوێك له‌بری بنه‌ماڵه‌كه‌ی به‌رخێك ببات، به‌رخێك بۆ هه‌ر ماڵێك.
4
ئه‌گه‌ر ماڵێك بچووك بوو و توانای خواردنی به‌رخێكی نه‌بوو، ئه‌وا ئه‌و له‌گه‌ڵ نزیكترین دراوسێی ماڵه‌كه‌ی به‌گوێره‌ی ژماره‌ی كه‌سه‌كان، هه‌ریه‌كه‌ و به‌گوێره‌ی خواردنی له‌ به‌رخه‌كه‌ حیسابی بۆ ده‌كرێت.
5
ده‌بێت ئاژه‌ڵێكی ساغ، نێر، یه‌ك ساڵه‌ دانێن بۆ خۆتان، له‌ به‌رخ یان له‌ گیسك هه‌ڵیانده‌بژێرن.
6
له‌ژێر پارێزگاریتان ده‌مێنێت هه‌تا ڕۆژی چوارده‌ی ئه‌م مانگه‌، ئینجا هه‌موو كۆڕی كۆمه‌ڵی ئیسرائیل له‌ كاتی خۆرئاوابوون سه‌ری ده‌بڕن.
7
له‌ خوێنه‌كه‌ش هه‌ڵده‌گرن و له‌ هه‌ردوو لای ده‌رگاكان و سه‌ری ده‌رگاكانی ئه‌و ماڵانه‌شی ده‌ده‌ن كه‌ تێیدا ده‌یخۆن.
8
گۆشته‌كه‌ش له‌و شه‌وه‌دا به‌ ئاگر ده‌برژێنرێت و له‌گه‌ڵ نانی فه‌تیره‌ و گیای تاڵ ده‌یخۆن.
9
نه‌كه‌ن به‌ خاوی یان لێنراو به‌ ئاو بیخۆن، به‌ڵكو به‌ ئاگر برژاو بێت، سه‌ری و پێی و هه‌ناوی.
10
لێشی مه‌هیڵنه‌وه‌ بۆ به‌یانی، ئه‌وه‌ی لێی ده‌مێنێته‌وه‌ هه‌تا به‌یانی، به‌ ئاگر بیسووتێنن.
11
ئاواش ده‌یخۆن، ناوقه‌دتان به‌سترا بێت و پێڵاوه‌كانتان له‌ پێتان بێت و گۆچانه‌كانتان له‌ ده‌ستتان بێت، به‌ په‌له‌ ده‌یخۆن، په‌سخه‌یه‌[a] بۆ یه‌زدان.
12
«من ئه‌مشه‌و به‌ خاكی میسردا تێده‌په‌ڕم و هه‌موو نۆبه‌ره‌یه‌ك له‌ خاكی میسر ده‌كوژم، له‌ مرۆڤه‌وه‌ هه‌تا ئاژه‌ڵ، حوكمیش به‌سه‌ر هه‌موو خوداوه‌نده‌كانی میسردا ده‌ده‌م، من یه‌زدانم.
13
خوێنه‌كه‌ش بۆتان ده‌بێته‌ نیشانه‌ له‌سه‌ر ئه‌و ماڵانه‌ی ئێوه‌ تێیدان، كاتێك خوێنه‌كه‌ ده‌بینم، به‌سه‌رتاندا تێده‌په‌ڕم. ئیتر كاره‌ساتی له‌ناوچوون ئێوه‌ ناگرێته‌وه‌ كاتێك خاكی میسر تووش ده‌كه‌م.
14
«ئه‌و ڕۆژه‌ش ده‌بێته‌ یادگاری بۆتان و ده‌یكه‌نه‌ جه‌ژن بۆ یه‌زدان، فه‌رزێكی هه‌تاهه‌تاییه‌ و نه‌وه‌ دوای نه‌وه‌ به‌رده‌وام ده‌بێت.
15
حه‌وت ڕۆژ نانی فه‌تیره‌[b] ده‌خۆن. له‌ ڕۆژی یه‌كه‌مه‌وه‌ هه‌ویرترش[c] له‌ ماڵه‌كانتان ناهێڵن، چونكه‌ هه‌ر یه‌كێك شتێكی به‌ هه‌ویرترش بخوات له‌ ڕۆژی یه‌كه‌مه‌وه‌ هه‌تا ڕۆژی حه‌وته‌م، ئه‌وا ئه‌و كه‌سه‌ له‌ ئیسرائیل داده‌بڕدرێت.
16
له‌ ڕۆژی یه‌كه‌م كۆبوونه‌وه‌ی پیرۆزبوون[d] ببه‌ستن، هه‌روه‌ها له‌ ڕۆژی حه‌وته‌میش. هیچ كارێك له‌و ڕۆژانه‌دا مه‌كه‌ن، ته‌نها خواردن ئاماده‌كردن نه‌بێت، بۆ هه‌ركه‌سێك ده‌یخوات. ته‌نها ئه‌وه‌ ده‌كه‌ن.
17
«ئه‌م جه‌ژنی فه‌تیره‌ش بگێڕن، چونكه‌ له‌ هه‌مان ئه‌م ڕۆژه‌دا له‌شكره‌كانتانم له‌ خاكی میسر ده‌رهێنا. نه‌وه‌ دوای نه‌وه‌ ئه‌م جه‌ژنه‌ بگێڕن و وه‌ك فه‌رزێكی هه‌تاهه‌تایی به‌رده‌وام بێت.
18
له‌ چوارده‌ی مانگی یه‌كدا، له‌ ئێواره‌ نانی فه‌تیره‌ بخۆن هه‌تا ئێواره‌ی ڕۆژی بیست و یه‌كی مانگ.
19
حه‌وت ڕۆژ نابێت هه‌ویرترش له‌ ماڵه‌كانتان هه‌بێت، چونكه‌ هه‌ر یه‌كێك شتێكی به‌ هه‌ویرترش بخوات، ئه‌وا ئه‌و كه‌سه‌ له‌ كۆمه‌ڵی ئیسرائیل داده‌بڕدرێت، ئه‌وانه‌ی نامۆن و ئه‌وانه‌ی هاوڵاتیشن.
20
شتی به‌ هه‌ویرترش مه‌خۆن، ده‌بێت له‌ هه‌موو نشینگه‌كانتان نانی فه‌تیره‌ بخۆن.»
21
ئینجا موسا هه‌موو پیرانی ئیسرائیلی بانگكرد و پێی گوتن: «بڕۆن بۆ خۆتان مه‌ڕوماڵات ببه‌ن، به‌گوێره‌ی هۆزه‌كانتان به‌رخی په‌سخه‌ سه‌رببڕن.
22
ده‌سكێك زوفا هه‌ڵبگرن و له‌و خوێنه‌ی وه‌ربده‌ن كه‌ له‌ ته‌شتدایه‌ و سه‌ره‌وه‌ی ده‌رگا و هه‌ردوو لایه‌كه‌ی پێ خوێناوی بكه‌ن، ئێوه‌ش هه‌تا به‌یانی كه‌ستان له‌ ده‌رگای ماڵه‌كه‌ی ناچێته‌ ده‌ره‌وه‌.
23
یه‌زدان تێده‌په‌ڕێت بۆ ئه‌وه‌ی له‌ میسرییه‌كان بدات، كاتێك خوێنه‌كه‌ ده‌بینێت كه‌ له‌سه‌ر ده‌رگا و هه‌ردوو لایه‌كه‌ی دراوه‌ ئیتر یه‌زدان به‌سه‌ر ده‌رگاكه‌ تێده‌په‌ڕێت و ناهێڵێت له‌ناوبه‌ر بێته‌ ماڵه‌كانتان بۆ لێدانتان.
24
«ئه‌م ڕێوه‌ڕه‌سمه‌ بۆ هه‌تاهه‌تایه‌ وه‌ك فه‌رزێك بۆ خۆتان و نه‌وه‌كانتان به‌جێده‌هێنن.
25
ئه‌وه‌ ده‌بێت كاتێك دێنه‌ ناو ئه‌و خاكه‌ی یه‌زدان ده‌تانداتێ هه‌روه‌ك فه‌رمووی، ئه‌م خزمه‌ته‌ ده‌پارێزن.
26
ئیتر كاتێك منداڵانتان پێتان ده‌ڵێن: ”ئه‌م خزمه‌ته‌ چییه‌ بۆ ئێوه‌؟“
27
ئێوه‌ش ده‌ڵێن: ”ئه‌وه‌ قوربانی په‌سخه‌یه‌ بۆ یه‌زدان، كه‌ له‌ میسر به‌سه‌ر ماڵه‌كانی نه‌وه‌ی ئیسرائیلدا تێپه‌ڕی، كاتێك له‌ میسرییه‌كانی دا و ماڵه‌كانی ئێمه‌ی پاراست.“» ئیتر گه‌ل دانه‌وین و كڕنۆشیان برد.
28
نه‌وه‌ی ئیسرائیل چوون و به‌م جۆره‌یان كرد، وه‌ك ئه‌وه‌ی یه‌زدان فه‌رمانی به‌ موسا و هارون كرد.
29
ئه‌وه‌ بوو له‌ نیوه‌ی شه‌ودا یه‌زدان له‌ هه‌موو نۆبه‌ره‌یه‌كی خاكی میسری دا، له‌ نۆبه‌ره‌ی فیرعه‌ونه‌وه‌ كه‌ له‌سه‌ر ته‌خت دانیشتووه‌ هه‌تا نۆبه‌ره‌ی ئه‌و دیله‌ی له‌ به‌ندیخانه‌یه‌ و هه‌موو نۆبه‌ره‌كانی مه‌ڕوماڵاتیش.
30
فیرعه‌ون شه‌و هه‌ستا، خۆی و هه‌موو خزمه‌تكاره‌كانی و هه‌موو میسرییه‌كان، هاوارێكی مه‌زن له‌ میسر په‌یدا بوو، چونكه‌ هیچ ماڵێك نه‌بوو مردووی نه‌بێت.
ده‌رچوون 
31
به‌و شه‌وه‌ فیرعه‌ون موسا و هارونی بانگكرد و گوتی: «هه‌ستن! له‌نێو گه‌له‌كه‌م بڕۆنه‌ ده‌ره‌وه‌، ئێوه‌ و هه‌موو نه‌وه‌ی ئیسرائیل، بڕۆن یه‌زدان بپه‌رستن وه‌ك خۆتان داواتان كرد.
32
مه‌ڕوماڵات و گاڕانه‌كه‌شتان ببه‌ن وه‌ك گوتتان، بڕۆن و هه‌روه‌ها بۆ منیش داوای به‌ره‌كه‌ت بكه‌ن.»
33
میسرییه‌كانیش زۆریان له‌ گه‌له‌كه‌ كرد هه‌تا په‌له‌ بكه‌ن له‌ ڕۆیشتنیان له‌ خاكه‌كه‌، چونكه‌ گوتیان: «ئه‌گینا ئێمه‌ هه‌موومان ده‌مرین.»
34
گه‌لیش هه‌ویره‌كانیان هه‌ڵگرت پێش ئه‌وه‌ی هه‌ویرترشی تێ بكه‌ن، ته‌شته‌ هه‌ویره‌ شێلراوه‌كانیان له‌ جله‌كانیان پێچایه‌وه‌ و له‌سه‌ر شانیان دانا.
35
هه‌روه‌ها نه‌وه‌ی ئیسرائیل به‌م جۆره‌یان كرد وه‌ك ئه‌وه‌ی موسا گوتی، داوای خشڵی زیو و خشڵی زێڕ و جلوبه‌رگیان له‌ میسرییه‌كان كرد.
36
یه‌زدانیش گه‌لی له‌به‌رچاوی میسرییه‌كان ڕێزدار كرد، ئیتر ئه‌وه‌ی داوایان كردبوو پێیان دان و به‌م شێوه‌یه‌ میسرییه‌كانیان تاڵان كرد.
37
نه‌وه‌ی ئیسرائیل له‌ ڕه‌عمسێسه‌وه‌ كۆچیان كرد به‌ره‌و سوكۆت، نزیكه‌ی شه‌ش سه‌د هه‌زار پیاده‌ی پیاو بێجگه‌ له‌ ئافره‌ت و منداڵ.
38
هه‌روه‌ها كۆمه‌ڵێكی زۆر له‌گه‌ڵیان سه‌ركه‌وت له‌گه‌ڵ ئاژه‌ڵێكی زۆریش، مه‌ڕوماڵات و گاوگۆتاڵ.
39
ئه‌و هه‌ویره‌ی له‌ میسره‌وه‌ هێنابوویان كردیانه‌ كولێره‌ی فه‌تیره‌، چونكه‌ بێ هه‌ویرترش بوو، له‌به‌ر ئه‌وه‌ی له‌ میسر ده‌ركران و نه‌یانتوانی دوا بكه‌ون، هه‌روه‌ها خواردنیان بۆ خۆیان دروستنه‌كردبوو.
40
مانه‌وه‌ی نه‌وه‌ی ئیسرائیلیش كه‌ له‌ میسردا نیشته‌جێ بوون چوار سه‌د و سی ساڵ بوو.
41
ئه‌وه‌ بوو له‌ كۆتایی چوار سه‌د و سی ساڵه‌كه‌، له‌ هه‌مان ئه‌و ڕۆژه‌دا، هه‌موو له‌شكری یه‌زدان له‌ خاكی میسر چوونه‌ ده‌ره‌وه‌.
42
له‌به‌ر ئه‌وه‌ی ئه‌و شه‌وه‌ یه‌زدان ئێشكی گرت بۆ ده‌رهێنانی گه‌لی ئیسرائیل له‌ خاكی میسر، له‌م شه‌وه‌ هه‌موو نه‌وه‌ی ئیسرائیل وه‌ك ڕێزلێنانێك بۆ یه‌زدان ئێشك ده‌گرن بۆ نه‌وه‌كانیان.
فه‌رزی په‌سخه‌ 
43
یه‌زدان به‌ موسا و هارونی فه‌رموو: «ئه‌مه‌ فه‌رزی په‌سخه‌یه‌:
«هیچ بیانییه‌ك لێی ناخوات.
44
هه‌ر كۆیله‌یه‌كی پیاوی به‌ زیو كڕاو دوای ئه‌وه‌ی خه‌ته‌نه‌ ده‌كرێت ئینجا لێی ده‌خوات.
45
به‌ڵام نیشته‌جێی كاتی و كرێگرته‌ لێی ناخۆن.
46
«له‌ یه‌ك ماڵدا له‌ گۆشته‌كه‌ ده‌خورێت و له‌ ماڵه‌كه‌ ناچێته‌ ده‌ره‌وه‌، هیچ ئێسكێكی لێ ناشكێنرێت.
47
هه‌موو كۆمه‌ڵی ئیسرائیل پێویسته‌ یادی بكه‌نه‌وه‌.
48
«ئه‌گه‌ر نامۆیه‌ك له‌نێوتاندا بژیێت و بیه‌وێت په‌سخه‌ بۆ یه‌زدان بكات، پێویسته‌ هه‌موو نێرینه‌یه‌كی ماڵه‌كه‌ی خه‌ته‌نه‌ بكرێت. ئینجا وه‌ك له‌دایكبووێكی خاكه‌كه‌ی لێدێت، به‌ڵام خه‌ته‌نه‌ نه‌كراو لێی ناخوات.
49
یه‌ك یاسا په‌یڕه‌و ده‌كرێت بۆ هاوڵاتی و بۆ ئه‌و نامۆیه‌ی كه‌ له‌نێوتان ده‌ژیێت.»
50
ئیتر هه‌موو نه‌وه‌ی ئیسرائیل به‌م جۆره‌یان كرد وه‌ك ئه‌وه‌ی یه‌زدان فه‌رمانی به‌ موسا و هارون كرد.
51
ئه‌وه‌ بوو له‌ هه‌مان ئه‌و ڕۆژه‌دا یه‌زدان نه‌وه‌ی ئیسرائیلی له‌سه‌ر شێوه‌ی له‌شكره‌كانیان له‌ خاكی میسر هێنایه‌ ده‌ره‌وه‌.
  1. a. 12‏:11 په‌سخه‌: عیبری \+tl په‌سه‌ح\+tl*، واته‌ تێپه‌ڕبوون یاخود لێخۆشبوون.
  2. b. 12‏:15 هه‌موو نانێكه‌ كه‌ هیچ جۆره‌ هه‌ویرترشێكی تێنه‌كرێت.
  3. c. 12‏:15 هه‌ویرترش: له‌ جیاتی خومره‌ بۆ هه‌وێن به‌كارهاتووه‌.
  4. d. 12‏:16 بیرۆكه‌ی بنه‌ڕه‌تی سه‌رجه‌م جه‌ژنه‌كان ده‌گه‌ڕێته‌وه‌ بۆ دوو بنه‌مای سه‌ره‌كی: (1) یادكردنه‌وه‌ی كار و چاكه‌ مه‌زنه‌كانی خودا به‌رامبه‌ر به‌ گه‌له‌كه‌ی؛ (2) خۆته‌رخانكردن له‌م ڕۆژانه‌دا ته‌نها بۆ ستایش و په‌رستنی خودا و فێربوون.