عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
جلوبه‌رگی كاهینیێتی 
1
له‌ ڕیسی مۆر و ئه‌رخه‌وانی و سووری ئاڵ جلوبه‌رگی چنراویان دروستكرد بۆ خزمه‌ت له‌ پیرۆزگا، جلوبه‌رگه‌ پیرۆزه‌كه‌شیان بۆ هارون دروستكرد، هه‌روه‌ك یه‌زدان فه‌رمانی به‌ موسا كرد.
ئێفۆده‌كه‌ 
2
ئێفۆده‌كه‌یان له‌ زێڕ و ڕیسی مۆر و ئه‌رخه‌وانی و سووری ئاڵ و كه‌تانی ڕستراو دروستكرد.
3
پارچه‌ زێڕیشیان كوتی هه‌تا باریكیان كرده‌وه‌ و وه‌ك داو بڕییان بۆ ئه‌وه‌ی له‌ناو ڕیسی مۆر و ئه‌رخه‌وانی و سووری ئاڵ و كه‌تانی ناسك به‌ ده‌ستكردی داهێنه‌ر به‌كاریبهێنن.
4
دوو شانی له‌ یه‌ك به‌ستراویشیان بۆ دروستكرد، به‌ هه‌ردوو لایه‌وه‌ به‌سترابوون.
5
پشتبه‌ستی ئێفۆده‌كه‌ كه‌ له‌سه‌ریه‌تی، له‌ هه‌مان پارچه‌ و هه‌مان ده‌ستكرد بوو، له‌ زێڕ و ڕیسی مۆر و ئه‌رخه‌وانی و سووری ئاڵ و كه‌تانی ڕستراو بوو، هه‌روه‌ك یه‌زدان فه‌رمانی به‌ موسا كرد.
6
دوو به‌ردی عاشقبه‌ندیشیان چه‌سپ كرد، ده‌وردراو به‌ چوارچێوه‌ی زێڕین، نه‌خشێنراو وه‌ك نه‌خشی ئه‌نگوستیله‌ به‌پێی ناوی كوڕه‌كانی ئیسرائیل.
7
دوو به‌رده‌كه‌شی خسته‌ سه‌ر دوو شانی ئێفۆده‌كه‌، دوو به‌ردی یادگاری بۆ نه‌وه‌ی ئیسرائیل، هه‌روه‌ك یه‌زدان فه‌رمانی به‌ موسا كرد.
به‌رسینه‌كه‌ 
8
به‌رسینه‌كه‌شی وه‌ك ده‌ستكردی ئێفۆده‌كه‌ به‌ ده‌ستی وه‌ستای كارامه‌ دروستكرد، له‌ زێڕ و ڕیسی مۆر و ئه‌رخه‌وانی و سووری ئاڵ و كه‌تانی ڕستراو.
9
به‌رسینه‌كه‌یان چوارگۆشه‌ و دووبه‌ر دروستكرد، درێژییه‌كه‌ی بستێك[a] و پانییه‌كه‌ی بستێك.
10
به‌ چوار ڕیز به‌رد ڕازاندیانه‌وه‌، له‌ ڕیزی یه‌كه‌م یاقووت[b] له‌گه‌ڵ یاقووتی زه‌رد و زمروودی سه‌وز؛
11
ڕیزی دووه‌م به‌رده‌ پیرۆزه‌ و یاقووتی شین و زمروود؛
12
ڕیزی سێیه‌م یاقووتی زه‌عفه‌رانی و كریستاڵی هه‌ورین و جه‌مشت؛
13
ڕیزی چواره‌میش زه‌به‌رجه‌د و به‌ردی عاشقبه‌ند و یه‌شب. به‌ چوارچێوه‌ی زێڕینیش ڕازاندبوویه‌وه‌.
14
به‌رده‌كانیش دوازده‌ بوون وه‌ك ناوی كوڕه‌كانی ئیسرائیل به‌پێی ناوه‌كانیان، وه‌ك نه‌خشی ئه‌نگوستیله‌ هه‌ریه‌كه‌ به‌پێی ناوه‌كه‌ی بوو بۆ دوازده‌ هۆز.
15
بۆ به‌رسینه‌كه‌ش زنجیره‌ی هۆنراوه‌ی له‌ زێڕی بێگه‌رد دروستكرد، وه‌ك گوریس.
16
دوو چوارچێوه‌ی زێڕین و دوو ئه‌ڵقه‌ی زێڕینیشیان دروستكرد، ئه‌ڵقه‌كانیان له‌سه‌ر هه‌ردوو لای به‌رسینه‌كه‌ دانا.
17
دوو زنجیره‌ زێڕینه‌كه‌شیان خسته‌ ناو دوو ئه‌ڵقه‌كه‌ی سه‌ر هه‌ردوو لای به‌رسینه‌كه‌.
18
هه‌ردوو سه‌ره‌كه‌ی دیكه‌ی دوو زنجیره‌كه‌شیان خسته‌ ناو دوو چوارچێوه‌كه‌ و له‌سه‌ر شانه‌كانی ئێفۆده‌كه‌یان دانا بۆ پێشه‌وه‌ی.
19
دوو ئه‌ڵقه‌ی زێڕینیشیان دروستكرد و له‌سه‌ر هه‌ردوو لای به‌رسینه‌كه‌یان دانا، له‌سه‌ر لێواره‌كه‌ی كه‌ به‌ دیوی ئێفۆده‌كه‌یه‌ بۆ ژووره‌وه‌.
20
دوو ئه‌ڵقه‌ی زێڕینیشیان دروستكرد و له‌سه‌ر هه‌ردوو شانی ئێفۆده‌كه‌ دایاننان، له‌ خواره‌وه‌ به‌ دیوی ڕووه‌كه‌ی، له‌ نزیك به‌یه‌كبه‌ستنه‌وه‌كه‌ی له‌ سه‌رووی پشتبه‌ستی ئێفۆده‌كه‌.
21
به‌رسینه‌كه‌شیان به‌ دوو ئه‌ڵقه‌كه‌یه‌وه‌ له‌ دوو ئه‌ڵقه‌ی ئێفۆده‌كه‌ به‌ست، به‌ داوێك له‌ ڕیسی مۆر، بۆ ئه‌وه‌ی له‌سه‌ر پشتبه‌ستی ئێفۆده‌كه‌ بێت تاوه‌كو به‌رسینه‌كه‌ش له‌ ئێفۆده‌كه‌ نه‌كرێته‌وه‌، هه‌روه‌ك یه‌زدان فه‌رمانی به‌ موسا كرد.
جلوبه‌رگی دیكه‌ی كاهینیێتی 
22
كه‌وای ئێفۆده‌كه‌ش ده‌ستكردی چنراو بوو، هه‌موویان له‌ ڕیسی مۆر دروستكرد.
23
كونی سه‌ریشی له‌ناوه‌ڕاستی كه‌واكه‌دا ده‌بێت وه‌ك كونی یه‌خه‌ی كراس، به‌نێكیش به‌ ده‌وروپشتی كونه‌كه‌دا بۆ ئه‌وه‌ی نه‌دڕێت.
24
له‌سه‌ر دامێنی كه‌واكه‌ش گوڵینگی مۆر و ئه‌رخه‌وانی و سووری ئاڵ و كه‌تانی ڕستراویان دروستكرد،
25
زه‌نگوڵه‌شیان له‌ زێڕی بێگه‌رد دروستكرد. زه‌نگوڵه‌كانیان خسته‌ نێوان گوڵینگه‌كانی سه‌ر دامێنی كه‌واكه‌.
26
له‌نێو هه‌ردوو گوڵینگێك زه‌نگوڵه‌یه‌ك له‌سه‌ر دامێنی كه‌واكه‌ به‌ ده‌وریدا بوو كه‌ بۆ خزمه‌تكردن له‌به‌ر ده‌كرێت، هه‌روه‌ك یه‌زدان فه‌رمانی به‌ موسا كرد.
27
هه‌روه‌ها كراسیان له‌ كه‌تانی ناسك بۆ هارون و كوڕه‌كانی دروستكرد، به‌ ده‌ستكردی چنراو.
28
مێزه‌ره‌كه‌ش له‌ كه‌تانی ناسك بوو، گوڵینگه‌كانی سه‌رپێچه‌كانیش له‌ كه‌تان ناسك، ده‌رپێكانیشیان له‌ كه‌تانی ناسكی ڕستراو بوون.
29
كه‌مه‌ربه‌نده‌كه‌ش له‌ كه‌تانی ڕستراو و ڕیسی مۆر و ئه‌رخه‌وانی و سووری ئاڵ به‌ ده‌ستكردی جۆڵا چنرابوو، هه‌روه‌ك یه‌زدان فه‌رمانی به‌ موسا كرد.
30
پلێتی تاجه‌گوڵینه‌ پیرۆزه‌كه‌شیان له‌ زێڕی بێگه‌رد دروستكرد و وه‌ك نه‌خشی ئه‌نگوستیله‌ له‌سه‌ری هه‌ڵیانكه‌ند: «پیرۆزی بۆ یه‌زدان.»
31
هه‌روه‌ها خستیانه‌ سه‌ر داوێكی مۆر بۆ ئه‌وه‌ی له‌سه‌ر مێزه‌ره‌كه‌ دابنرێت، هه‌روه‌ك یه‌زدان فه‌رمانی به‌ موسا كرد.
موسا ته‌ماشای چادره‌كه‌ی په‌رستن ده‌كات 
32
ئیتر هه‌موو كاری چادری په‌رستن كه‌ چادری چاوپێكه‌وتنه‌ ته‌واو بوو، نه‌وه‌ی ئیسرائیل به‌و شێوه‌یه‌یان كرد كه‌ یه‌زدان فه‌رمانی به‌ موسا كردبوو.
33
ئینجا چادره‌كه‌ی په‌رستنیان هێنایه‌ لای موسا، چادره‌كه‌ و هه‌موو كه‌لوپه‌له‌كانی و فاق و چوارچێوه‌ و كاریته‌ و كۆڵه‌كه‌ و بنكه‌كانی؛
34
پۆشه‌ره‌كه‌ش كه‌ له‌ پێستی به‌رانی ڕه‌نگكراو به‌ ڕه‌نگی سوور و پۆشه‌ره‌كه‌ی له‌ پێستی مانگای ده‌ریا و په‌رده‌كه‌ی شوێنی هه‌ره‌پیرۆز؛
35
سندوقی په‌یمان و داره‌كانی و قه‌پاغی كه‌فاره‌ت؛
36
مێزه‌كه‌ و هه‌موو قاپوقاچاغه‌كانی و نانی ته‌رخانكراو بۆ خودا؛
37
چرادانه‌كه‌ش كه‌ له‌ زێڕی بێگه‌رد بوو له‌گه‌ڵ چراكانی، چراكانی كه‌ له‌سه‌ری بوون و هه‌موو قاپوقاچاغه‌كانی و زه‌یت بۆ ڕووناكی؛
38
قوربانگا زێڕینه‌كه‌ و زه‌یتی ده‌ستنیشانكردن و بخووری بۆنخۆش و په‌رده‌ی ده‌روازه‌ی چادره‌كه‌؛
39
قوربانگا بڕۆنزییه‌كه‌ و كه‌تیبه‌ بڕۆنزییه‌كه‌ی، دوو داره‌كه‌ی و هه‌موو قاپوقاچاغه‌كه‌ی و حه‌وزه‌كه‌ و ژێره‌كه‌ی؛
40
په‌رده‌كانی حه‌وشه‌ و كۆڵه‌كه‌ و بنكه‌كانی و په‌رده‌ی ده‌روازه‌ی حه‌وشه‌كه‌ و گوریس و سنگه‌كانی و هه‌موو كه‌لوپه‌لی خزمه‌تی چادری په‌رستن كه‌ چادری چاوپێكه‌وتنه‌؛
41
جلوبه‌رگه‌ چنراوه‌كانی خزمه‌تكردن له‌ پیرۆزگا، جلوبه‌رگه‌ پیرۆزه‌كه‌ی هارونی كاهین و جلوبه‌رگی كوڕه‌كانی بۆ كاهینیێتی.
42
وه‌ك هه‌موو ئه‌وه‌ی یه‌زدان فه‌رمانی به‌ موسا كرد، نه‌وه‌ی ئیسرائیل ئاوا هه‌موو كاره‌كه‌یان كرد.
43
موسا ته‌ماشای هه‌موو كاره‌كه‌ی كرد و بینی وا وه‌ك ئه‌وه‌ی یه‌زدان فه‌رمانی دا ئاوایان كردووه‌، ئیتر موسا داوای به‌ره‌كه‌تی بۆ كردن.
  1. a. 39‏:9 بستێك: نزیكه‌ی 22 سه‌نتیمه‌تر.
  2. b. 39‏:10 یاقووت: گه‌وهه‌ری سووری تێر.