عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئیتر به‌سه‌لئێل و ئۆهۆلیئاب و هه‌موو پیاوێكی به‌هره‌مه‌ند كه‌ یه‌زدان دانایی و تێگه‌یشتنی پێدابن هه‌تا بزانن چۆن كار بكه‌ن له‌ هه‌موو كاری خزمه‌تكردنه‌كه‌ له‌ پیرۆزگا، ده‌بێت به‌گوێره‌ی هه‌موو ئه‌وه‌ی یه‌زدان فه‌رمانی پێ كردوون بیكه‌ن.»
2
ئینجا موسا به‌سه‌لئێل و ئۆهۆلیئاب و هه‌موو كه‌سێكی كارامه‌ كه‌ یه‌زدان توانای پێدابوو و خواستی ئه‌وه‌ی هه‌بوو بێت بۆ كاركردن بانگی كردن.
3
هه‌موو ئه‌و پیتاكه‌یان له‌ موسا وه‌رگرت، ئه‌وه‌ی نه‌وه‌ی ئیسرائیل هێنابوویان بۆ كاری خزمه‌تكردن له‌ بنیادنانی پیرۆزگا، ئه‌وانیش به‌ خواستی خۆیان هه‌موو به‌یانییه‌ك به‌خشینیان بۆی ده‌هێنا.
4
ئینجا هه‌موو ئه‌و پیشه‌وه‌ره‌ كارامانه‌ی كه‌ له‌ پیرۆزگادا كاریان ده‌كرد، كاره‌كه‌یان به‌جێهێشت و هاتنه‌ لای موسا
5
و پێیان گوت: «گه‌ل له‌ پێویستی ئه‌و كاره‌ی خزمه‌ت كه‌ یه‌زدان فه‌رمانی به‌ دروستكردنی كردووه‌ زیاتر ده‌هێنن.»
6
ئیتر موسا فه‌رمانی دا و له‌ ئۆردوگاكه‌ بانگه‌واز كرا، گوترا: «با هیچ پیاوێك یان ژنێك ئیتر شت دروستنه‌كه‌ن بۆ پیتاك بۆ پیرۆزگا.» جا گه‌ل له‌ هێنان وه‌ستان،
7
كه‌ره‌سته‌كانیش به‌شی هه‌موو كارێكی كردن بۆ ئه‌وه‌ی بیكه‌ن و زیاتریش بوو.
چادری په‌رستن 
8
هه‌موو به‌هره‌مه‌ندێك له‌وانه‌ی كاریان له‌ دروستكردنی چادره‌كه‌ی په‌رستن ده‌كرد، ده‌ پڵاسیان[a] له‌ كه‌تانی ڕستراو و ڕیسی مۆر و ئه‌رخه‌وانی و سووری ئاڵ دروستكرد، له‌گه‌ڵ وێنه‌ی كه‌ڕوبه‌كان[b] به‌ ده‌ستكردی جۆڵایه‌كی شاره‌زا دروستیان كردن.
9
درێژایی هه‌ر پڵاسێك بیست و هه‌شت باڵ و پانییه‌كه‌ی چوار باڵ بوو،[c] یه‌ك ئه‌ندازه‌ش بۆ هه‌موو پڵاسه‌كان.
10
پێنج پڵاس پێكه‌وه‌ به‌ستران و پێنجه‌كه‌ی دیكه‌ش پێكه‌وه‌ به‌سترانه‌وه‌.
11
ئه‌ڵقه‌شی له‌ ڕیسی مۆر له‌سه‌ر لێواری پڵاسه‌ لاوه‌كییه‌كانی پارچه‌ی یه‌كه‌م دروستكرد، هه‌مان شتی بۆ لێواری پڵاسه‌ لاوه‌كییه‌كانی پارچه‌ی دووه‌م كرد.
12
په‌نجا ئه‌ڵقه‌ی بۆ پڵاسی یه‌كه‌م دروستكرد و په‌نجا ئه‌ڵقه‌ی دیكه‌ش بۆ لای ئه‌و پڵاسه‌ی كه‌ له‌ پارچه‌كه‌ی دووه‌مه‌، ئه‌ڵقه‌كانیش به‌رامبه‌ر یه‌كتری بوون.
13
په‌نجا فاقی[d] زێڕیشی دروستكرد. به‌ فاقه‌كان پڵاسه‌كانی هه‌ریه‌كه‌ و له‌وه‌ی ته‌نیشتی به‌سته‌وه‌، ئیتر چادری په‌رستن بووه‌ یه‌ك پارچه‌.
14
هه‌روه‌ها ڕه‌شماڵێكی له‌ یازده‌ پڵاس له‌ مووی بزن دروستكرد و سه‌ری چادری په‌رستنی پێ گرت.
15
درێژایی هه‌ر پڵاسێك سی باڵ[e] و پانی چوار باڵ[f] بوو، یه‌ك ئه‌ندازه‌ش بۆ هه‌ر یازده‌ پڵاسه‌كه‌.
16
پێنجی له‌ پڵاسه‌كان پێكه‌وه‌ به‌سته‌وه‌ و شه‌شه‌كه‌ی دیكه‌ش پێكه‌وه‌.
17
په‌نجا ئه‌ڵقه‌ی له‌سه‌ر لێواری پڵاسی كۆتایی پارچه‌ی یه‌كه‌م دروستكرد، په‌نجا ئه‌ڵقه‌ش له‌سه‌ر لێواری پڵاسی كۆتایی پارچه‌ی دووه‌م.
18
په‌نجا فاقی بڕۆنزیشی دروستكرد بۆ به‌یه‌كه‌وه‌ به‌ستنه‌وه‌ی چادره‌كه‌ هه‌تا ببێته‌ یه‌ك پارچه‌.
19
پۆشه‌رێكیشی له‌ پێستی به‌رانی ڕه‌نگكراو به‌ ڕه‌نگی سوور بۆ چادره‌كه‌ دروستكرد، پۆشه‌رێكیش له‌ پێستی مانگای ده‌ریا له‌ سه‌ره‌وه‌.
20
چوارچێوه‌شی[g] له‌ داری ئه‌كاسیا به‌ ستوونی بۆ چادره‌كه‌ی په‌رستن دروستكرد.
21
درێژایی هه‌ر چوارچێوه‌یه‌ك ده‌ باڵ و پانی باڵ و نیوێك بوو.[h]
22
دوو زمانه‌شی بۆ هه‌ر چوارچێوه‌یه‌ك دروستكرد بۆ جووتكردنی له‌گه‌ڵ چوارچێوه‌كه‌ی ته‌نیشتی، بۆ هه‌ریه‌ك له‌ چوارچێوه‌كانی چادره‌كه‌ی په‌رستن ئاوای كرد.
23
چوارچێوه‌كانی چادره‌كه‌ی په‌رستنیش، بیستیانی له‌لای باشوور دروستكرد،
24
چل بنكه‌ی زیویشی له‌ژێر بیست چوارچێوه‌كه‌ دروستكرد، دوو بنكه‌ له‌ژێر هه‌ر چوارچێوه‌یه‌ك بۆ دوو پێچكه‌كه‌ی.
25
بیست چوارچێوه‌ی بۆ لای باكووری چادره‌كه‌ی په‌رستن دروستكرد.
26
چل بنكه‌ی زیویشی هه‌بوو، دوو بنكه‌ له‌ژێر چوارچێوه‌یه‌ك و دوو بنكه‌ له‌ژێر چوارچێوه‌یه‌كی دیكه‌.
27
بۆ پشتی چادره‌كه‌ی په‌رستنیش به‌ره‌و ڕۆژئاوا شه‌ش چوارچێوه‌،
28
دوو چوارچێوه‌شی بۆ گۆشه‌كانی دواوه‌ی چادره‌كه‌ی په‌رستن دروستكرد.
29
له‌ خواره‌وه‌ جووت بوون و هه‌تا سه‌ره‌وه‌ یه‌ك بوون، هه‌تا بازنه‌كه‌ی سه‌ره‌وه‌، بۆ هه‌ردوو گۆشه‌كه‌ ئاوای كرد.
30
ئینجا هه‌شت چوارچێوه‌ بوون و بنكه‌ زیوه‌كانیشیان شازده‌، هه‌ر دوو بنكه‌ له‌ژێر چوارچێوه‌یه‌ك.
31
پێنج كاریته‌شی له‌ داری ئه‌كاسیا بۆ چوارچێوه‌كانی لایه‌كی چادره‌كه‌ی په‌رستن دروستكرد،
32
پێنج كاریته‌ش بۆ چوارچێوه‌كانی لایه‌كه‌ی دیكه‌ی چادره‌كه‌ی په‌رستن، پێنج كاریته‌ش بۆ چوارچێوه‌كانی لای دواوه‌ی چادره‌كه‌ی په‌رستن له‌لای ڕۆژئاوا.
33
كاریته‌كه‌ی ناوه‌ڕاستیشی وا دروستكرد به‌نێو چوارچێوه‌كاندا تێبپه‌ڕێت، له‌م سه‌ره‌وه‌ بۆ ئه‌و سه‌ر.
34
چوارچێوه‌كانیشی به‌ زێڕ ڕووكه‌ش كرد و بازنه‌كانیشی كه‌ كاریته‌كانی ده‌چنه‌ ناو له‌ زێڕ دروستی كرد، كاریته‌كانیشی به‌ زێڕ ڕووكه‌ش كرد.
35
په‌رده‌یه‌كیشی له‌ ڕیسی مۆر و ئه‌رخه‌وانی و سووری ئاڵ و كه‌تانی ڕستراو دروستكرد، به‌ ده‌ستكردی جۆڵایه‌كی شاره‌زاش وێنه‌ی كه‌ڕوبه‌كانی له‌سه‌ر دروستكرد.
36
چوار كۆڵه‌كه‌شی له‌ داری ئه‌كاسیا دروستكرد و به‌ زێڕ ڕووكه‌شی كردن، قولاپه‌كانیشیان له‌ زێڕ بوون. چوار بنكه‌ی زیویشی بۆ داڕشتن.
37
په‌رده‌ی ده‌روازه‌شی بۆ ده‌رگای چادره‌كه‌ له‌ ڕیسی مۆر و ئه‌رخه‌وانی و سووری ئاڵ و كه‌تانی ڕستراو دروستكرد، چنراو به‌ ده‌ستكردی جۆڵایه‌ك،
38
پێنج كۆڵه‌كه‌كه‌ی و قولاپه‌كانیشیان، سه‌ره‌كانی و ئه‌ڵقه‌كانیشی به‌ زێڕ ڕووكه‌ش كرد، پێنج بنكه‌كه‌شی له‌ بڕۆنز بوون.
  1. a. 36‏:8 ئه‌و پارچه‌ ڕستراوانه‌ی كه‌ ڕه‌شماڵ یان چادری پێ دروستده‌كرێ.
  2. b. 36‏:8 كه‌ڕوب: بوونه‌وه‌رێكی ئاسمانی باڵداره‌ له‌ شێوه‌ی مرۆڤ و ئاژه‌ڵ، بڕوانه‌ 25‏:18 و \+xt عیبرانییه‌كان 9‏:5‏\+xt*‏.
  3. c. 36‏:9 پڵاس: بڕوانه‌ 26‏:2. درێژایی نزیكه‌ی 12,5 مه‌تر و پانییه‌كه‌ی 1,8 مه‌تر.
  4. d. 36‏:13 فاق: گیره‌.
  5. e. 36‏:15 سی باڵ: نزیكه‌ی 13,5 مه‌تر.
  6. f. 36‏:15 چوار باڵ: نزیكه‌ی 1,8 مه‌تر.
  7. g. 36‏:20 چوارچێوه‌كان: بۆ ڕاگرتنی.
  8. h. 36‏:21 هه‌ر چوارچێوه‌یه‌ك: درێژییه‌كه‌ی نزیكه‌ی 4,5 مه‌تر و پانییه‌كه‌ی 70 سانتیمه‌تر. \+xt بڕوانه‌ 26‏:16‏\+xt*.