عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
موسا و ئاگرێك له‌ناو ده‌وه‌نێك 
1
موسا بووه‌ شوانی مه‌ڕه‌كانی یه‌ترۆی خه‌زووری، كه‌ كاهینی میدیان بوو. مه‌ڕه‌كانی برده‌ ئه‌وپه‌ڕی ده‌شتوده‌ره‌كه‌ هه‌تا گه‌یشته‌ كێوی خودا، «حۆرێڤ».
2
له‌وێ له‌ناو گڕی ئاگرێك له‌ ده‌وه‌نێك فریشته‌ی یه‌زدانی بۆ ده‌ركه‌وت. كه‌ موسا ته‌ماشای كرد بینی وا ده‌وه‌نه‌كه‌ گڕی گرتووه‌، كه‌چی ده‌وه‌نه‌كه‌ ناسووتێت.
3
موسا گوتی: «لاده‌ده‌م و ته‌ماشای ئه‌و دیمه‌نه‌ مه‌زنه‌ ده‌كه‌م. بۆچی ده‌وه‌نه‌كه‌ ناسووتێت؟»
4
كاتێك یه‌زدان بینی كه‌ موسا لایدا بۆ ئه‌وه‌ی ته‌ماشا بكات، خودا له‌ناو ده‌وه‌نه‌كه‌وه‌ بانگی كرد و فه‌رمووی: «موسا. موسا.»
ئه‌ویش گوتی: «ئه‌وه‌تام.»
5
فه‌رمووی: «نزیكی ئێره‌ مه‌كه‌وه‌. پێڵاوه‌كانت له‌ پێت دابكه‌نه‌، چونكه‌ ئه‌و شوێنه‌ی تۆ له‌سه‌ری وه‌ستاویت خاكێكی پیرۆزه‌.»
6
ئینجا فه‌رمووی: «من خودای باوكتم، خودای ئیبراهیم و خودای ئیسحاق و خودای یاقوبم.» موسا ڕووی خۆی داپۆشی، چونكه‌ ده‌ترسا ته‌ماشای خودا بكات.
7
یه‌زدان فه‌رمووی: «به‌ڕاستی من زه‌لیلی گه‌له‌كه‌مم له‌ میسر بینی، هه‌روه‌ها گوێم له‌ هاواریان بوو له‌به‌ر سه‌ركاره‌كانیان، چونكه‌ به‌ ئازاره‌كانیانم زانی.
8
ئه‌وا هاتمه‌ خواره‌وه‌ بۆ ئه‌وه‌ی فریایان بكه‌وم له‌ ده‌ست میسرییه‌كان و له‌و خاكه‌وه‌ بیانبه‌م بۆ خاكێكی باش و فراوان، بۆ خاكێك شیر و هه‌نگوینی لێ ده‌ڕژێت، بۆ شوێنی كه‌نعانییه‌كان، حیتییه‌كان، ئه‌مورییه‌كان، پریزییه‌كان، حیڤییه‌كان و یه‌بوسییه‌كان.
9
ئێستا هاواری نه‌وه‌ی ئیسرائیل گه‌یشته‌ لام و هه‌روه‌ها ئه‌و چه‌وسانه‌وه‌یه‌م بینی كه‌ میسرییه‌كان ده‌یانچه‌وساندنه‌وه‌.
10
ئێستاش بڕۆ و ده‌تنێرم بۆ لای فیرعه‌ون و گه‌له‌كه‌ی خۆم، نه‌وه‌ی ئیسرائیل له‌ میسر بهێنه‌ ده‌ره‌وه‌.»
11
به‌ڵام موسا به‌ خودای گوت: «من كێم هه‌تا بچمه‌ لای فیرعه‌ون و نه‌وه‌ی ئیسرائیل له‌ میسر بهێنمه‌ ده‌ره‌وه‌؟»
12
ئه‌ویش فه‌رمووی: «من له‌گه‌ڵت ده‌بم، ئه‌مه‌ش ده‌بێته‌ نیشانه‌ بۆت كه‌ من تۆم ناردووه‌، كاتێك گه‌ل له‌ میسره‌وه‌ ده‌رده‌هێنیت، ئێوه‌ له‌سه‌ر ئه‌م كێوه‌ خودا ده‌په‌رستن.»
13
موساش به‌ خودای گوت: «من وا ده‌چمه‌ لای نه‌وه‌ی ئیسرائیل و پێیان ده‌ڵێم ”خودای باپیرانتان منی بۆ ئێوه‌ ناردووه‌.“ ئه‌گه‌ر پێم بڵێن: ”ناوی چییه‌،“ بڵێم چی؟»
14
خوداش به‌ موسای فه‌رموو: «من هه‌م ئه‌وه‌ی كه‌ هه‌م.» هه‌روه‌ها فه‌رمووی: «ئاوا به‌ نه‌وه‌ی ئیسرائیل ده‌ڵێیت: ”’هه‌م‘ منی بۆ ئێوه‌ ناردووه‌.“»
15
هه‌روه‌ها خودا به‌ موسای فه‌رموو: «ئاوا به‌ نه‌وه‌ی ئیسرائیل ده‌ڵێیت: ”یه‌زدان[a] ، په‌روه‌ردگاری باوكانتان، خودای ئیبراهیم و خودای ئیسحاق و خودای یاقوب منی بۆ ئێوه‌ ناردووه‌.“ هه‌تاهه‌تایه‌ ئه‌مه‌ ناومه‌ و ئه‌مه‌ش دێته‌وه‌ یادتان، نه‌وه‌ دوای نه‌وه‌.
16
«بڕۆ و پیرانی ئیسرائیل كۆبكه‌ره‌وه‌ و پێیان بڵێ: ”یه‌زدان، په‌روه‌ردگاری باوكانتان، خودای ئیبراهیم و ئیسحاق و یاقوب بۆم ده‌ركه‌وت، فه‌رمووی، به‌ڕاستی ئێوه‌ و ئه‌وه‌ی له‌ میسردا به‌سه‌رتان هاتووه‌ به‌سه‌رم كردووه‌ته‌وه‌.
17
هه‌روه‌ها به‌ڵێنم داوه‌، له‌ زه‌لیلی میسر سه‌رتان بخه‌م و بتانبه‌م بۆ خاكی كه‌نعانی و حیتی و ئه‌موری و پریزی و حیڤی و یه‌بوسییه‌كان، بۆ خاكێك شیر و هه‌نگوینی لێ ده‌ڕژێت.“
18
«پیرانی ئیسرائیل گوێ له‌ قسه‌كانت ده‌گرن. ئه‌و كاته‌ تۆ و پیرانی ئیسرائیل ده‌چنه‌ لای پاشای میسر و پێی ده‌ڵێن: ”یه‌زدان، په‌روه‌ردگاری عیبرانییه‌كان به‌سه‌ریكردینه‌وه‌، ئێستاش سێ ڕۆژه‌ڕێ ده‌ڕۆین له‌ ده‌شتوده‌ر قوربانی بۆ یه‌زدانی په‌روه‌ردگارمان سه‌رده‌بڕین.“
19
به‌ڵام ده‌زانم پاشای میسر ناهێڵێت بڕۆن، تاوه‌كو به‌ ده‌ستێكی به‌هێز ناچار نه‌كرێت.
20
ئیتر من ده‌ستم درێژ ده‌كه‌م و به‌ هه‌موو كاره‌ سه‌رسوڕهێنه‌ره‌كانم له‌ میسر ده‌ده‌م كه‌ له‌نێویان ده‌یكه‌م، دوای ئه‌وه‌ ده‌هێڵێت بڕۆن.
21
«ئه‌م گه‌له‌ش له‌به‌رچاوی میسرییه‌كان ڕێزدار ده‌كه‌م، هه‌تا كاتی ڕۆیشتن به‌ ده‌ستبه‌تاڵی نه‌ڕۆن.
22
به‌ڵكو هه‌ر ژنێك له‌ دراوسێكه‌ی یاخود له‌وه‌ی له‌ ماڵه‌كه‌یدا ده‌ژیێت، كه‌لوپه‌لی زیو و كه‌لوپه‌لی زێڕ و جلوبه‌رگ داوا ده‌كات و له‌به‌ر كوڕ و كچه‌كانتانی ده‌كه‌ن و میسرییه‌كان تاڵان ده‌كه‌ن.»
  1. a. 3‏:15 یه‌زدان: له‌ زمانی عیبری به‌ وشه‌ی \+tl یه‌هوا\+tl* هاتووه‌. خودا ئه‌م ناوه‌ی بۆ خۆی به‌كارهێناوه‌، بۆ په‌یمانبه‌ستن له‌گه‌ڵ مرۆڤ.