عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
له‌دایكبوونی موسا 
1
پیاوێك له‌ بنه‌ماڵه‌ی لێڤی كچێكی لێڤی هێنا.
2
ژنه‌كه‌ سكی پڕ بوو و كوڕێكی بوو، كه‌ بینی منداڵه‌كه‌ جوانه‌، سێ مانگ شاردییه‌وه‌.
3
به‌ڵام كاتێك نه‌یتوانی له‌وه‌ زیاتر بیشارێته‌وه‌، سه‌به‌ته‌یه‌كی له‌ زه‌ل دروستكراوی هێنا و به‌ قیڕ و زفت سواخی دا و كوڕه‌كه‌ی له‌ناو دانا، ئینجا له‌ كه‌ناری نیل له‌ناو قامیشه‌ڵان داینا.
4
خوشكی منداڵه‌كه‌ش له‌ دووره‌وه‌ وه‌ستا بۆ ئه‌وه‌ی بزانێت چی لێدێت.
5
كچی فیرعه‌ونیش بۆ خۆشوشتن هاته‌ خواره‌وه‌ بۆ سه‌ر ڕووباری نیل و كه‌نیزه‌كانیشی له‌سه‌ر كه‌ناری نیل هاتوچۆیان ده‌كرد، سه‌به‌ته‌كه‌ی له‌ناو قامیشه‌ڵانه‌كه‌ بینی و كچه‌ خزمه‌تكاره‌كه‌ی نارد هه‌تا بیهێنێت.
6
ئه‌ویش كردییه‌وه‌ و ته‌ماشای منداڵه‌كه‌ی كرد، بینی كوڕێكه‌ و ده‌گریێ، به‌زه‌یی پێدا هاته‌وه‌ و گوتی: «ئه‌مه‌ یه‌كێكه‌ له‌ منداڵی عیبرانییه‌كان.»
7
خوشكی منداڵه‌كه‌ش له‌ كچی فیرعه‌ونی پرسی: «ئایا بچم ژنێكی شیرده‌رت بۆ بانگ بكه‌م له‌ عیبرانییه‌كان بۆ ئه‌وه‌ی شیر بدات به‌ منداڵه‌كه‌؟»
8
كچی فیرعه‌ونیش وه‌ڵامی دایه‌وه‌: «بڕۆ.» كچه‌ عازه‌به‌كه‌ش چوو دایكی منداڵه‌كه‌ی بانگكرد.
9
كچی فیرعه‌ونیش پێی گوت: «ئه‌م منداڵه‌ ببه‌ و شیری بده‌ بۆم، منیش كرێیه‌كه‌ت ده‌ده‌مێ.» ژنه‌ش منداڵه‌كه‌ی برد و شیری دایێ.
10
كاتێك منداڵه‌كه‌ گه‌وره‌ بوو، بۆ كچی فیرعه‌ونی هێنایه‌وه‌، ئیتر بوو به‌ كوڕی ئه‌و و ناوی لێنا «موسا[a] »، گوتی: «چونكه‌ له‌ناو ئاو هه‌ڵمگرتووه‌ته‌وه‌.»
هه‌ڵاتنی موسا به‌ره‌و میدیان 
11
كاتێك موسا گه‌وره‌ بوو، ڕۆژێك له‌ ڕۆژان چووه‌ ده‌ره‌وه‌ بۆ لای براكانی و سه‌یری بارگرانییه‌كانی كرد، بینی پیاوێكی میسری له‌ پیاوێكی عیبرانی ده‌دات، كه‌ له‌ براكانییه‌تی.
12
ئه‌ویش ته‌ماشای ئه‌م لا و ئه‌و لای كرد و بینی كه‌سی لێ نییه‌، ئیتر میسرییه‌كه‌ی كوشت و له‌ناو لم شاردییه‌وه‌.
13
بۆ ڕۆژی دووه‌م چووه‌ ده‌ره‌وه‌ و بینی دوو پیاوی عیبرانی شه‌ڕ ده‌كه‌ن. له‌ خه‌تاباره‌كه‌ی پرسی: «بۆچی له‌ هاوه‌ڵه‌كه‌ت ده‌ده‌یت؟»
14
ئه‌ویش گوتی: «كێ تۆی كردووه‌ به‌ گه‌وره‌ و دادوه‌ر به‌سه‌رمانه‌وه‌؟ ئایا ده‌ته‌وێ بمكوژیت هه‌روه‌ك میسرییه‌كه‌ت كوشت؟» جا موسا ترسا و گوتی: «بێگومان ئه‌م كاره‌ زانراوه‌!»
15
كاتێك فیرعه‌ون گوێی له‌مه‌ بوو، هه‌وڵی دا موسا بكوژێت، به‌ڵام موسا له‌ ده‌ست فیرعه‌ون هه‌ڵات و له‌ خاكی میدیان جێگیر بوو، له‌لای بیرێك دانیشت.
16
كاهینی میدیانیش حه‌وت كچی هه‌بوو، هاتن و ئاویان هه‌ڵكێشا، ئاخوڕه‌كانیان پڕكرد بۆ ئاودانی مه‌ڕه‌كانی باوكیان.
17
له‌و كاته‌دا شوان هاتن و ده‌ریانكردن، به‌ڵام موسا هه‌ستا و فریایان كه‌وت و مه‌ڕه‌كانی ئاودان.
18
كچه‌كانیش هاتنه‌ لای ڕه‌عوئێلی[b] باوكیان، ئه‌ویش لێی پرسین: «بۆچی ئه‌مڕۆ زوو هاتنه‌وه‌؟»
19
ئه‌وانیش وه‌ڵامیان دایه‌وه‌: «پیاوێكی میسری فریامان كه‌وت له‌ ده‌ست شوانه‌كان، هه‌روه‌ها ئاوی بۆ كێشاین و مه‌ڕه‌كانیشی ئاو دا.»
20
ئه‌ویش به‌ كچه‌كانی گوت: «ئه‌ی له‌كوێیه‌؟ بۆ پیاوه‌كه‌تان به‌جێهێشت؟ بانگهێشتی بكه‌ن با نان بخوات.»
21
موسا ڕازی بوو له‌گه‌ڵ ئه‌و پیاوه‌ بمێنێته‌وه‌. ئه‌ویش چیپۆره‌ی كچی دایه‌ موسا.
22
چیپۆره‌ش كوڕێكی بوو، موساش ناوی لێنا گێرشۆم، چونكه‌ گوتی: «نامۆ بووم له‌ خاكی بێگانه‌.»
23
ئه‌وه‌ بوو له‌و ماوه‌ درێژه‌، پاشای میسر مرد. نه‌وه‌ی ئیسرائیلیش ئاهیان هه‌ڵكێشا له‌ ده‌ست كۆیلایه‌تی و هاواریان كرد بۆ یارمه‌تی، گریانه‌كه‌یان به‌هۆی كۆیلایه‌تییه‌وه‌ بۆ خودا به‌رزبووه‌وه‌.
24
خوداش گوێی له‌ ناڵه‌یان بوو، خودا په‌یمانه‌كه‌ی خۆی له‌یاد بوو له‌گه‌ڵ ئیبراهیم[c] و ئیسحاق و یاقوب.
25
ئیتر خودا ڕوانییه‌ نه‌وه‌ی ئیسرائیل و بایه‌خی پێدان.
  1. a. 2‏:10 عیبری: \+tl مۆشێ\+tl*.
  2. b. 2‏:18 له‌وه‌ ده‌چێت كه‌ ڕه‌عوئێل نازناوی كاهینی میدیان بێت و خۆی ناوی یه‌ترۆیه‌ كه‌ دواتر ده‌بێته‌ خه‌زووری موسا. \+xt بڕوانه‌ 3‏:1 و 18‏:1‏\+xt*.
  3. c. 2‏:24 بڕوانه‌ \+xt په‌یدابوون 15‏:1‏-16‏\+xt*‏.