عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پاراستنی موڵك 
1
«كاتێك كه‌سێك گایه‌ك یان به‌رخێك ده‌دزێت، سه‌ری بڕی یان فرۆشتی، ئه‌وا پێنج مانگا له‌ جێی گایه‌كه‌ و چوار مه‌ڕیش له‌ جێی به‌رخه‌كه‌ داده‌ته‌وه‌.
2
«ئه‌گه‌ر دزه‌كه‌ به‌ شه‌و بینرا خه‌ریكی بڕین بوو و لێی درا و مرد، ئه‌وا مافی خوێنی نییه‌،
3
به‌ڵام ئه‌گه‌ر دوای خۆر هه‌ڵاتن بوو ئه‌وا مافی خوێنی هه‌یه‌.
«دزێك ده‌بێت قه‌ره‌بوو بداته‌وه‌، ئه‌گه‌ر نه‌بوونیش بوو ئه‌وا ده‌فرۆشرێت.
4
«ئه‌گه‌ر ئاژه‌ڵه‌ دزراوه‌كه‌ی له‌ ده‌ست گیرا له‌ گایه‌كه‌وه‌ هه‌تا گوێدرێژێك و هه‌تا به‌رخێك و زیندوو بن، ئه‌وا دووان له‌ جێیان ده‌داته‌وه‌.
5
«كاتێك یه‌كێك كێڵگه‌یه‌ك یان ڕه‌زه‌ مێوێك بكات و ماڵاتی خۆی به‌ردا و له‌ناو كێڵگه‌ی یه‌كێكی دیكه‌ له‌وه‌ڕین، ئه‌وا له‌ باشترینی به‌ری كێڵگه‌كه‌ی و له‌ باشترینی به‌ری ڕه‌زه‌مێوه‌كه‌ی قه‌ره‌بوو ده‌داته‌وه‌.
6
«كاتێك ئاگر ده‌رپه‌ڕێت و ده‌وه‌ن بگرێته‌وه‌ و خه‌رمانكراو یان ده‌غڵ یان كێڵگه‌ بسووتێنێت، ئه‌وا ئه‌وه‌ی ئاگره‌كه‌ی كردووه‌ته‌وه‌ ده‌بێت قه‌ره‌بوو بدات.
7
«كاتێك یه‌كێك زیو یان شتومه‌ك له‌لای كه‌سێك داده‌نێت بۆ ئه‌وه‌ی چاوی لێی بێت و له‌ ماڵی ئه‌و كه‌سه‌ دزرا كه‌ ئاماناته‌كه‌ی له‌لایه‌، ئه‌گه‌ر دزه‌كه‌ گیرا ئه‌وا دوو ئه‌وه‌نده‌ قه‌ره‌بوو ده‌داته‌وه‌.
8
به‌ڵام ئه‌گه‌ر دزه‌كه‌ نه‌گیرا ئه‌وا خاوه‌ن ماڵ ده‌هێنرێته‌ به‌رده‌م دادوه‌ره‌كان، هه‌تا بزانرێت ئاخۆ ده‌ستی بۆ موڵكی براده‌ره‌كه‌ی درێژ نه‌كردووه‌.
9
له‌ هه‌موو داوایه‌كی تاوان له‌سه‌ر گا، گوێدرێژ، به‌رخ، جلوبه‌رگ یان هه‌ر شتێكی ونبوو كه‌ بگوترێت: ”ئه‌مه‌ هی منه‌،“ ئه‌وا داوای هه‌ردووكیان ده‌هێنرێته‌ لای دادوه‌ره‌كان، ئه‌وه‌ی دادوه‌ر تاوانباری بكات، ئه‌وا دوو ئه‌وه‌نده‌ قه‌ره‌بوو بۆ نزیكه‌كه‌ی ده‌داته‌وه‌.
10
«كاتێك یه‌كێك گوێدرێژێك یان گایه‌ك یان به‌رخێك یان هه‌ر ئاژه‌ڵێكی بداته‌ دراوسێكه‌ی بۆ ئه‌وه‌ی چاوی لێی بێت، مردار بووه‌وه‌ یان بریندار بوو یان تاڵان كرا و كه‌س نه‌یبینی،
11
ئه‌وا سوێندخواردن به‌ یه‌زدان له‌نێوانیان ده‌بێت، ئاخۆ دراوسێكه‌ ده‌ستی بۆ ماڵی كه‌سه‌كه‌ی دیكه‌ درێژ نه‌كردووه‌، خاوه‌نه‌كه‌شی ده‌بێت ڕازی بێت، ئیتر قه‌ره‌بوو نادات.
12
به‌ڵام ئه‌گه‌ر ئاژه‌ڵه‌كه‌ له‌لای دراوسێكه‌ی دزرا، ئه‌وا قه‌ره‌بووی خاوه‌نه‌كه‌ی ده‌داته‌وه‌.
13
ئه‌گه‌ر بووه‌ نێچیری ئاژه‌ڵ وه‌ك شایه‌تی ده‌یهێنێته‌وه‌، ئیتر قه‌ره‌بووی نێچیر ناداته‌وه‌.
14
«كاتێك كه‌سێك ئاژه‌ڵێك له‌ دراوسێكه‌ی داوا بكات، له‌لای بریندار بێت یان بمرێت و خاوه‌نه‌كه‌ی له‌گه‌ڵی نه‌بێت، ئه‌وا ده‌بێت قه‌ره‌بوو بداته‌وه‌،
15
به‌ڵام ئه‌گه‌ر خاوه‌نه‌كه‌ی له‌گه‌ڵی بوو، ئه‌وا قه‌ره‌بوو ناداته‌وه‌، ئه‌گه‌ر به‌ كرێ بووبێت ئه‌وا كرێیه‌كه‌ی ده‌دات.
به‌رپرسیاریێتی كۆمه‌ڵایه‌تی 
16
«كاتێك پیاوێك كچێكی نیشان نه‌كراو هه‌ڵبخه‌ڵه‌تێنێت و له‌گه‌ڵی جووت بێت، ئه‌وا بۆ خۆی ماره‌ی ده‌كات و ماره‌ییش ده‌دات.
17
ئه‌گه‌ر باوكیشی ڕازی نه‌بوو بیداتێ، ئه‌وا زیوی بۆ ده‌كێشێت وه‌ك ماره‌یی كچ.
18
«ناهێڵیت جادووگه‌ری ئافره‌ت بژیێت.
19
«ئه‌وه‌ی له‌گه‌ڵ ئاژه‌ڵێك جووت بێت ده‌بێت بكوژرێت.
20
«ئه‌وه‌ی قوربانی بۆ هه‌ر خودایه‌كی جیا له‌ یه‌زدان سه‌رببڕێت، ئه‌وا پێویسته‌ قڕ[a] بكرێت.
21
«سته‌م له‌ نامۆ مه‌كه‌ و مه‌یچه‌وسێنه‌وه‌، چونكه‌ خۆشتان له‌ خاكی میسر نامۆ بوون.
22
«هیچ بێوه‌ژن و هه‌تیوێك زه‌لیل مه‌كه‌.
23
ئه‌گه‌ر به‌ هه‌ر شێوه‌یه‌ك زه‌لیلت كردن و ئه‌گه‌ر ته‌نها هاوارێكم بۆ بكه‌ن، ئه‌وا بێگومان گوێ له‌ هاواریان ده‌گرم.
24
تووڕه‌ییم هه‌ڵده‌ستێت و به‌ شمشێر ده‌تانكوژم و ژنه‌كانتان ده‌بنه‌ بێوه‌ژن و منداڵه‌كانتان ده‌بنه‌ هه‌تیو.
25
«ئه‌گه‌ر پاره‌ت به‌ قه‌رز دا به‌ هه‌ر هه‌ژارێك له‌ گه‌له‌كه‌م ئه‌وانه‌ی له‌لاتن، بۆی مه‌به‌ به‌ سووخۆر، سوودی مه‌خه‌ره‌ سه‌ر.
26
ئه‌گه‌ر كه‌وای دراوسێكه‌ت به‌ بارمته‌ گرت، هه‌تا ئاوابوونی خۆر، بۆی ده‌گه‌ڕێنیته‌وه‌،
27
چونكه‌ ئه‌وه‌ تاكه‌ پۆشاكه‌ كه‌ دراوسێكه‌ت هه‌یه‌تی. چی دیكه‌ی هه‌یه‌ بۆ نوستن؟ ئیتر كاتێك هاوارم بۆ ده‌كات، گوێده‌گرم، چونكه‌ من میهره‌بانم.
28
«سووكایه‌تی به‌ خودا مه‌كه‌ و نه‌فره‌ت له‌ هیچ سه‌ركرده‌یه‌كی گه‌له‌كه‌ت مه‌كه‌.
29
«پێشكه‌شكردنی پڕی خه‌رمانه‌كه‌ت و دڵۆپی گوشه‌ره‌كه‌ت دوا مه‌خه‌. نۆبه‌ره‌ی كوڕه‌كانت ده‌ده‌یته‌ من.
30
هه‌مان شت ده‌كه‌یت به‌ گا و به‌رخه‌كانت، حه‌وت ڕۆژ له‌گه‌ڵ دایكی ده‌بێت، به‌ڵام له‌ ڕۆژی هه‌شته‌م ده‌یده‌یته‌ من.
31
«ئێوه‌ ده‌بنه‌ گه‌لێكی پیرۆز بۆ من، بۆیه‌ گۆشتێك له‌ ده‌شتوده‌ر بووبێت به‌ نێچیر مه‌یخۆن، بۆ سه‌گی فڕێبده‌ن.
  1. a. 22‏:20 له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت.