عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ده‌ ڕاسپارده‌كه‌ 
1
خودا هه‌موو ئه‌م فه‌رمایشتانه‌ی به‌ گه‌ل فه‌رموو:
2
«من یه‌زدانی په‌روه‌ردگارتانم كه‌ له‌ خاكی میسره‌وه‌ ده‌رمهێنان، له‌ خاكی كۆیلایه‌تییه‌وه‌.
3
«هیچ كه‌سێكتان خودای دیكه‌ی بێجگه‌ له‌ منتان نه‌بێت.
4
«په‌یكه‌ر[a] بۆ خۆتان دروستمه‌كه‌ن، نه‌ له‌ هیچ شێوه‌یه‌كی ئه‌وانه‌ی له‌ ئاسمانن له‌ سه‌ره‌وه‌، نه‌ ئه‌وانه‌ی له‌سه‌ر زه‌وین له‌ خواره‌وه‌، نه‌ ئه‌وانه‌ی له‌ناو ئاون له‌ژێر زه‌وییه‌وه‌.
5
كڕنۆشیان بۆ مه‌به‌ن و مه‌یانپه‌رستن، چونكه‌ منی یه‌زدانی په‌روه‌ردگارتان خودایه‌كی ئیره‌دارم[b] ، له‌ جیاتی گوناهی باوكان سزای منداڵان ده‌ده‌م، هه‌تا نه‌وه‌ی سێیه‌م و چواره‌می ناحه‌زه‌كانم،
6
به‌ڵام خۆشه‌ویستی نه‌گۆڕ بۆ هه‌زاران له‌ خۆشه‌ویستانم ده‌رده‌خه‌م، ئه‌وانه‌ی گوێڕایه‌ڵی ڕاسپارده‌كانم ده‌بن.
7
«ناوی یه‌زدانی په‌روه‌ردگارتان بۆ شتی پووچ مه‌هێنن[c] ، چونكه‌ ئه‌و كه‌سانه‌ له‌لای یه‌زدان ئه‌ستۆ پاك نابن كه‌ بۆ شتی پوچه‌ڵ ناوی ده‌هێنن.
8
«ڕۆژی شه‌ممه‌تان[d] له‌ یاد بێت، تاكو به‌ پیرۆزی ڕایبگرن.
9
شه‌ش ڕۆژ ئیش ده‌كه‌ن و هه‌موو كاره‌كه‌تان ده‌كه‌ن،
10
به‌ڵام ڕۆژی حه‌وته‌م شه‌ممه‌یه‌ بۆ یه‌زدانی په‌روه‌ردگارتان، هیچ كارێك مه‌كه‌ن. خۆتان و كوڕ و كچ و خزمه‌تكار و كاره‌كه‌ر و ئاژه‌ڵه‌كانتان و ئه‌و نامۆیه‌ی له‌ناو ده‌روازه‌ی شاره‌كه‌تانه‌ هیچ كارێك مه‌كه‌ن،
11
چونكه‌ یه‌زدان له‌ شه‌ش ڕۆژدا ئاسمان و زه‌وی و ده‌ریا و هه‌موو ئه‌و شتانه‌ی تێیاندایه‌ دروستی كردن، به‌ڵام له‌ ڕۆژی حه‌وته‌م پشووی دا، له‌به‌ر ئه‌مه‌ یه‌زدان ڕۆژی شه‌ممه‌ی به‌ره‌كه‌تدار و پیرۆز كرد.
12
«ڕێزی دایك و باوكتان بگرن، بۆ ئه‌وه‌ی ته‌مه‌ن درێژ بن له‌و خاكه‌ی یه‌زدانی په‌روه‌ردگارتان پێتان ده‌دات.
13
«مه‌كوژن[e] .
14
«داوێنپیسی مه‌كه‌ن.
15
«دزی مه‌كه‌ن.
16
«به‌ درۆ شایه‌تی له‌سه‌ر كه‌س مه‌ده‌ن.
17
«چاو مه‌بڕنه‌ ژنی كه‌س. چاو مه‌بڕنه‌ ماڵ و خزمه‌تكار و كاره‌كه‌ر و گا و مانگا و گوێدرێژی هیچ كه‌سێك و هه‌ر شتێك كه‌ هی كه‌سێكی دیكه‌ بێت.»
18
كاتێك هه‌موو گه‌ل بروسك و كێوه‌كه‌یان بینی دووكه‌ڵی ده‌كرد، گوێیان له‌ هه‌وره‌تریشقه‌ و ده‌نگی كه‌ڕه‌نا بوو، له‌رزین و له‌ دووره‌وه‌ وه‌ستان.
19
به‌ موساشیان گوت: «تۆ له‌گه‌ڵمان بدوێ و گوێ ده‌گرین. با خودا له‌گه‌ڵمان نه‌دوێت، نه‌وه‌ك بمرین.»
20
موساش به‌ گه‌لی گوت: «مه‌ترسن، چونكه‌ خودا هاتووه‌ بۆ ئه‌وه‌ی تاقیتان بكاته‌وه‌، تاكو ترسی ئه‌وتان له‌به‌رچاو بێت و گوناه نه‌كه‌ن.»
21
گه‌ل له‌ دووره‌وه‌ وه‌ستان و موساش له‌ ته‌مه‌ چڕه‌كه‌ نزیك بووه‌وه‌، ئه‌وه‌ی خودا له‌وێ بوو.
په‌یكه‌ر و قوربانگا 
22
یه‌زدان به‌ موسای فه‌رموو: «ئاوا به‌ نه‌وه‌ی ئیسرائیل ده‌ڵێیت: ”ئێوه‌ بینیتان كه‌ له‌ ئاسمانه‌وه‌ له‌گه‌ڵتان دوام.
23
هیچ خوداوه‌ندێك دروستمه‌كه‌ن له‌ته‌نیشت من بێت، بتی زیو و بتی زێڕ بۆ خۆتان دروستمه‌كه‌ن.
24
«”به‌ خۆڵ قوربانگام بۆ دروستده‌كه‌یت و قوربانی سووتاندنه‌كان و قوربانییه‌كانی هاوبه‌شیت[f] له‌ مه‌ڕ و بزن و گاگه‌له‌كه‌ت له‌سه‌ری سه‌رده‌بڕیت، له‌ هه‌موو ئه‌و شوێنانه‌ وا ده‌كه‌م ناوم بێته‌وه‌ یاد، دێمه‌ لات و به‌ره‌كه‌تدارت ده‌كه‌م.
25
ئه‌گه‌ر به‌ به‌رد قوربانگات بۆ دروستكردم، با به‌رده‌كان تاشراو نه‌بن، چونكه‌ هه‌ر قه‌ڵه‌م و چه‌كوشێكی بخه‌یته‌ سه‌ر ئه‌وا گڵاوی ده‌كه‌یت.
26
به‌ په‌یژه‌ سه‌رمه‌كه‌وه‌ سه‌ر قوربانگاكه‌م نه‌وه‌ك ڕووتیت له‌سه‌ری ده‌ربكه‌وێت.“
  1. a. 20‏:4 تاشینی په‌یكه‌ر، به‌ مه‌به‌ستی په‌رستن وه‌ك بت، بڕوانه‌ به‌شی 32.
  2. b. 20‏:5 به‌ واتای حه‌سوود دێت، ئه‌مه‌ش به‌ مه‌به‌ستێكی باش هاتووه‌، چونكه‌ خودا نایه‌وێت هیچ خودایه‌كی دیكه‌ بپه‌رسترێت.
  3. c. 20‏:7 به‌كارهێنانی ناوی خودا به‌ كه‌مته‌رخه‌می، بۆ نموونه‌ هه‌ر به‌ سه‌رزاره‌كی بگوترێت: به‌خوا، وه‌ڵڵا.
  4. d. 20‏:8 ڕۆژی پشوودان. \+xt بڕوانه‌ 16‏:23‏\+xt*.
  5. e. 20‏:13 مه‌كوژن: مه‌به‌ست به‌ ئه‌نقه‌ست یان به‌ تووڕه‌یی. بڕوانه‌ به‌شی 21‏:12‏-17 و دواوتار 4‏:41‏-42.
  6. f. 20‏:24 قوربانی هاوبه‌شی: ئه‌م قوربانییه‌ هاوده‌می قوربانی سووتاندن بوو. ته‌نها یه‌ك كه‌س هه‌ڵده‌ستا به‌ دابینكردنی ئه‌م قوربانییه‌، به‌ڵام له‌گه‌ڵ خه‌ڵكی دیكه‌ به‌شی زۆری ئه‌م قوربانییه‌یان له‌به‌رده‌م خودا ده‌خوارد وه‌ك هێمایه‌ك بۆ پێكه‌وه‌ ژیان. بڕوانه‌\+xt لێڤییه‌كان 7‏:11‏-15.‏\+xt*‏