عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
یه‌زدان به‌ موسای فه‌رموو:
2
«به‌ نه‌وه‌ی ئیسرائیل بڵێ: ”با بگه‌ڕێنه‌وه‌ و به‌رامبه‌ر پی‌هه‌حیرۆت چادر هه‌ڵبده‌ن، له‌نێوان مگدۆل و ده‌ریا. له‌لای ده‌ریاوه‌ چادر هه‌ڵبده‌ن، به‌رامبه‌ر به‌ به‌عل‌چیفۆن.
3
فیرعه‌ون ده‌رباره‌ی نه‌وه‌ی ئیسرائیل ده‌ڵێت: ’سه‌رلێشێواون له‌ خاكه‌كه‌، له‌نێوان ده‌ریا و چۆڵه‌وانی گیریان خواردووه‌.‘
4
دڵی فیرعه‌ونیش ڕه‌ق ده‌كه‌م بۆ ئه‌وه‌ی به‌دوایان بكه‌وێت. به‌ڵام بۆ فیرعه‌ون و هه‌موو سوپاكه‌ی شكۆمه‌ند ده‌بم، میسرییه‌كانیش ده‌زانن كه‌ من یه‌زدانم.“» ئیتر به‌م جۆره‌یان كرد.
5
كاتێك به‌ پاشای میسر ڕاگه‌یه‌نرا كه‌ گه‌له‌كه‌ له‌ ده‌ستی هه‌ڵاتن، دڵی فیرعه‌ون و خزمه‌تكارانی سه‌باره‌ت به‌ گه‌لی ئیسرائیل گۆڕا، گوتیان «ئه‌مه‌ چی بوو كردمان، كه‌ ڕێمان دا نه‌وه‌ی ئیسرائیل بڕۆن له‌ خزمه‌تكردنمان؟»
6
ئیتر گالیسكه‌كه‌ی پێ ئاماده‌كردن و سوپایه‌كه‌شی له‌گه‌ڵ خۆی برد،
7
شه‌ش سه‌د گالیسكه‌ی هه‌ڵبژێردراو و هه‌موو گالیسكه‌كانی میسر و هه‌موو ئه‌فسه‌ره‌ سواربووه‌كانیانی برد.
8
یه‌زدان دڵی فیرعه‌ونی پاشای میسری ڕه‌قكرد، ئیتر به‌دوای نه‌وه‌ی ئیسرائیل كه‌وت، نه‌وه‌ی ئیسرائیلیش ئازایانه‌ به‌ره‌و پێش ده‌چوون.
9
میسرییه‌كان دوایان كه‌وتن. هه‌موو ئه‌سپ و گالیسكه‌كانی فیرعه‌ون و سواره‌كانی و سوپاكه‌ی دوایان كه‌وتن و پێیان گه‌یشتن، كاتێك له‌لای ده‌ریا چادریان هه‌ڵدابوو، له‌لای پی‌هه‌حیرۆت به‌رامبه‌ر به‌عل‌چیفۆن.
10
كاتێك فیرعه‌ون نزیك بووه‌وه‌، نه‌وه‌ی ئیسرائیل چاویان هه‌ڵبڕی و بینییان میسرییه‌كان به‌دوایانه‌وه‌ن، زۆر ترسان و نه‌وه‌ی ئیسرائیل هاواریان بۆ یه‌زدان كرد.
11
به‌ موسایان گوت: «ئایا له‌به‌ر ئه‌وه‌ی له‌ میسر گۆڕ نییه‌ بۆ مردن وا ئێمه‌ت هێنایه‌ چۆڵه‌وانی؟ ئه‌مه‌ چی بوو پێت كردین هه‌تا وامان لێ بكه‌یت له‌ میسر بێنه‌ ده‌ره‌وه‌؟
12
ئه‌مه‌ ئه‌و قسه‌یه‌ نییه‌ كه‌ له‌ میسر پێمان گوتی: ”لێمانگه‌ڕێ با خزمه‌تی میسرییه‌كان بكه‌ین،“ چونكه‌ بۆ ئێمه‌ باشتره‌ خزمه‌تی میسرییه‌كان بكه‌ین وه‌ك له‌وه‌ی له‌ چۆڵه‌وانی بمرین؟»
13
موساش وه‌ڵامی گه‌لی دایه‌وه‌: «مه‌ترسن، چه‌سپاو بن و بڕواننه‌ ڕزگاریی یه‌زدان كه‌ ئه‌مڕۆ بۆ ئێوه‌ی ده‌كات، چونكه‌ وه‌ك ئه‌وه‌ی ئه‌مڕۆ میسرییه‌كانتان بینی، ئیتر هه‌تاهه‌تایه‌ نایانبیننه‌وه‌.
14
یه‌زدان بۆتان ده‌جه‌نگێت و ئێوه‌ش بێده‌نگ ده‌بن.»
15
یه‌زدان به‌ موسای فه‌رموو: «چییه‌ هاوارم بۆ ده‌كه‌یت؟ به‌ نه‌وه‌ی ئیسرائیل بڵێ با كۆچ بكه‌ن.
16
تۆش گۆچانه‌كه‌ت به‌رز بكه‌ره‌وه‌ و ده‌ستت بۆ سه‌ر ده‌ریاكه‌ درێژ بكه‌ و لێكی بكه‌ره‌وه‌، ئیتر نه‌وه‌ی ئیسرائیل ده‌چنه‌ ناوه‌ڕاستی ده‌ریاكه‌ بۆ سه‌ر وشكانی ژێره‌وه‌ی.
17
ئه‌وه‌تا منیش دڵی میسرییه‌كان ڕه‌ق ده‌كه‌م، ئه‌وانیش به‌دوایاندا دێن، منیش شكۆمه‌ند ده‌بم بۆ فیرعه‌ون و بۆ هه‌موو سوپاكه‌ی و گالیسكه‌ و سواره‌كانی.
18
میسرییه‌كانیش ده‌زانن كه‌ من یه‌زدانم، كاتێك شكۆمه‌ند ده‌بم بۆ فیرعه‌ون و گالیسكه‌ و سواره‌كانی.»
19
ئینجا فریشته‌كه‌ی خودا كه‌ له‌پێش سوپای ئیسرائیلییه‌كانه‌وه‌ ده‌ڕۆیشت شوێنه‌كه‌ی گواسته‌وه‌ و له‌ دوایانه‌وه‌ ڕۆیشت، ستوونه‌ هه‌وره‌كه‌ش له‌پێشیانه‌وه‌ گواستییه‌وه‌ و له‌ دواوه‌یان وه‌ستا.
20
هاته‌ نێوان له‌شكری میسرییه‌كان و سوپای ئیسرائیلییه‌كان، ئیتر هه‌وره‌كه‌ به‌ درێژایی شه‌و تاریكی بۆ لایه‌ك هێنا و ڕووناكی بۆ لایه‌كی دیكه‌. بۆیه‌ به‌ درێژایی شه‌و هیچیان نزیكی یه‌كتر نه‌بوونه‌وه‌.
21
موساش ده‌ستی بۆ سه‌ر ده‌ریاكه‌ درێژكرد، یه‌زدان به‌ درێژایی شه‌و به‌ بایه‌كی ڕۆژهه‌ڵاتی توند ده‌ریاكه‌ی ڕاماڵی، ده‌ریاكه‌ی كرده‌ زه‌وی وشك و ئاوه‌كه‌ شه‌ق بوو.
22
ئیتر نه‌وه‌ی ئیسرائیل چوونه‌ ناو ده‌ریاكه‌ بۆ سه‌ر وشكانی ژێره‌وه‌ی، ئاو بووه‌ دیوار بۆیان له‌ ڕاست و چه‌پیانه‌وه‌.
23
میسرییه‌كانیش دوایان كه‌وتن، هه‌موو ئه‌سپه‌كانی فیرعه‌ون و گالیسكه‌ و سواره‌كانی له‌ دوایان هاتنه‌ ناوه‌ندی ده‌ریاكه‌.
24
ئه‌وه‌ بوو له‌ چاوه‌ڕوانی به‌ره‌به‌یان، یه‌زدان له‌ ستوونی ئاگر و هه‌وره‌وه‌ به‌ره‌و خوار ته‌ماشای له‌شكری میسرییه‌كانی كرد و سه‌ری له‌ له‌شكری میسرییه‌كان شێواند.
25
چه‌رخه‌ی گالیسكه‌كانیانی لێك ترازاند له‌به‌ر ئه‌وه‌ به‌ قورسی لێیانده‌خوڕی. میسرییه‌كان گوتیان: «با له‌به‌رده‌م نه‌وه‌ی ئیسرائیل هه‌ڵبێین، چونكه‌ یه‌زدان بۆیان ده‌جه‌نگێت له‌ دژی میسرییه‌كان.»
26
یه‌زدان به‌ موسای فه‌رموو: «ده‌ستت بۆ سه‌ر ده‌ریا درێژ بكه‌ و ئاوه‌كه‌ بۆ سه‌ر میسرییه‌كان و گالیسكه‌ و سواره‌كان ده‌گه‌ڕێته‌وه‌.»
27
موساش ده‌ستی بۆ سه‌ر ده‌ریاكه‌ درێژكرد و ده‌مه‌و به‌یان ده‌ریاكه‌ گه‌ڕایه‌وه‌ باری جاران، میسرییه‌كانیش لێی هه‌ڵده‌هاتن، یه‌زدان میسرییه‌كانی داته‌كانده‌ ناو ده‌ریاكه‌.
28
ئیتر ئاوه‌كه‌ گه‌ڕایه‌وه‌ سه‌ر گالیسكه‌ و سواره‌كانی و هه‌موو سوپاكه‌ی فیرعه‌ون و دایپۆشین. ئه‌وانه‌ی به‌دوایاندا هاتبوونه‌ ناو ده‌ریاكه‌، كه‌سیان لێ نه‌ما.
29
به‌ڵام نه‌وه‌ی ئیسرائیلیش به‌سه‌ر وشكانیدا ڕۆیشتن به‌ناو ده‌ریاكه‌دا و ئاویش دیوار بوو بۆیان له‌ ڕاست و چه‌پیانه‌وه‌.
30
یه‌زدان له‌و ڕۆژه‌دا ئیسرائیلی له‌ ده‌ستی میسرییه‌كان ڕزگار كرد، ئیسرائیلیش میسرییه‌كانیان بینی له‌ كه‌ناری ده‌ریاكه‌ مردوون.
31
ئیسرائیل ئه‌و كاره‌ مه‌زنه‌ی بینی كه‌ یه‌زدان له‌ دژی میسرییه‌كان به‌كاریهێنا، ئیتر گه‌ل له‌ یه‌زدان ترسان و باوه‌ڕیان به‌ یه‌زدان و به‌ موسای به‌نده‌ی هێنا.