عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سه‌ركه‌وتن دوای گه‌ڕانه‌وه‌ بۆ لای یه‌زدان 
1
«كاتێك هه‌موو ئه‌م به‌ره‌كه‌ت و نه‌فره‌ته‌ی كه‌ خستوومه‌ته‌ به‌رده‌متان به‌سه‌رتان دێت، یه‌زدانی په‌روه‌ردگارتان له‌نێو هه‌موو ئه‌و نه‌ته‌وانه‌ی بۆ لایان ده‌رتانده‌كات، ئینجا به‌خۆتاندا ده‌چنه‌وه‌.
2
ئه‌و كاته‌ خۆتان و منداڵه‌كانتان پڕ به‌ دڵ و له‌ ناختانه‌وه‌ ده‌گه‌ڕێنه‌وه‌ لای یه‌زدانی په‌روه‌ردگارتان و گوێڕایه‌ڵی ده‌بن، به‌گوێره‌ی هه‌موو ئه‌وه‌ی من ئه‌مڕۆ فه‌رمانتان پێ ده‌كه‌م.
3
ئه‌وا یه‌زدانی په‌روه‌ردگارتان له‌ ڕاپێچكراوی ده‌تانگه‌ڕێنێته‌وه‌[a] و به‌زه‌یی پێتاندا دێته‌وه‌، دووباره‌ كۆتان ده‌كاته‌وه‌ له‌نێو هه‌موو ئه‌و گه‌لانه‌ی یه‌زدانی په‌روه‌ردگارتان به‌ناویاندا په‌رشوبڵاوی كردنه‌وه‌.
4
ئه‌گه‌ر بۆ ئه‌وپه‌ڕی ئاسمان په‌رشوبڵاو كرابنه‌وه‌، ئه‌وا یه‌زدانی په‌روه‌ردگارتان له‌وێوه‌ كۆتان ده‌كاته‌وه‌ و له‌وێوه‌ ده‌تانگه‌ڕێنێته‌وه‌ و
5
یه‌زدانی په‌روه‌ردگارتان ده‌تانهێنێته‌ ئه‌و خاكه‌ی كه‌ باوباپیرانتان خاوه‌نی بوون، جا ئێوه‌ ده‌ستی به‌سه‌ردا ده‌گرن و سه‌ركه‌وتووتان ده‌كات و له‌ باوباپیرانتان زۆرترتان ده‌كات.
6
یه‌زدانی په‌روه‌ردگارتان دڵی خۆتان و دڵی نه‌وه‌كه‌تان خه‌ته‌نه‌ ده‌كات، تاكو یه‌زدانی په‌روه‌ردگارتان پڕ به‌ دڵ و له‌ ناختانه‌وه‌ خۆشبوێت بۆ ئه‌وه‌ی بژین.
7
هه‌روه‌ها یه‌زدانی په‌روه‌ردگارتان هه‌موو ئه‌م نه‌فره‌تانه‌ ده‌خاته‌ سه‌ر دوژمنه‌كانتان و ئه‌وانه‌ی ڕقیان لێتانه‌ و ده‌تانچه‌وسێننه‌وه‌،
8
به‌ڵام ئێوه‌ ده‌گه‌ڕێنه‌وه‌ و گوێڕایه‌ڵی یه‌زدان ده‌بن و كار به‌ هه‌موو فه‌رمانه‌كانی ده‌كه‌ن كه‌ من ئه‌مڕۆ فه‌رمانتان پێ ده‌كه‌م.
9
ئینجا یه‌زدانی په‌روه‌ردگارتان له‌ هه‌موو كاره‌كانی ده‌ستتان سه‌روه‌ت و سامانتان زۆر ده‌كات، له‌ به‌ری سك و ئاژه‌ڵی ماڵی و به‌روبوومی خاك، چونكه‌ یه‌زدان سه‌رله‌نوێ پێتان دڵخۆش ده‌بێت و سه‌ركه‌وتووتان ده‌كات، وه‌ك به‌ باوباپیرانتان دڵخۆش بوو،
10
ئه‌گه‌ر گوێڕایه‌ڵی یه‌زدانی په‌روه‌ردگارتان بوون، فه‌رمان و فه‌رزه‌كانی به‌جێبهێنن كه‌ له‌م په‌ڕتووكی ته‌وراته‌دا نووسراون، ئه‌گه‌ر پڕ به‌ دڵتان و له‌ ناختانه‌وه‌ بۆ یه‌زدانی په‌روه‌ردگارتان گه‌ڕانه‌وه‌.
دانانی ژیان و مردن 
11
«ئه‌م فه‌رمانه‌ی من ئه‌مڕۆ فه‌رمانتان پێ ده‌كه‌م، له‌سه‌رتان قورس نییه‌ و لێتانه‌وه‌ دوور نییه‌.
12
له‌ ئاسمان نییه‌ هه‌تا بڵێن: ”كێ بۆمان سه‌رده‌كه‌وێته‌ ئاسمان و بۆمان ده‌هێنێت و به‌ گوێمانیدا ده‌دات هه‌تا كاری پێ بكه‌ین؟“
13
هه‌روه‌ها له‌ پشتی ده‌ریا نییه‌ هه‌تا بڵێن: ”كێ بۆمان له‌ ده‌ریا ده‌په‌ڕێته‌وه‌ و بۆمان ده‌هێنێت و به‌ گوێمانیدا ده‌دات هه‌تا كاری پێ بكه‌ین؟“
14
به‌ڵكو په‌یامه‌كه‌ زۆر لێتان نزیكه‌، له‌سه‌ر زمانتانه‌ و له‌ دڵتاندایه‌، هه‌تا كاری پێ بكه‌ن.
15
«بڕوانن، من ئه‌مڕۆ ژیان و چاكه‌، مردن و خراپه‌م خستووه‌ته‌ به‌رده‌متان،
16
له‌به‌ر ئه‌وه‌ی من ئه‌مڕۆ فه‌رمانم پێكردن كه‌ یه‌زدانی په‌روه‌ردگارتان خۆشبوێت و ڕێگاكانی بگرنه‌به‌ر و فه‌رمان و فه‌رزه‌كانی به‌جێبهێنن و یاساكانی په‌یڕه‌و بكه‌ن، بۆ ئه‌وه‌ی ئێوه‌ بژین و گه‌شه‌ بكه‌ن و یه‌زدانی په‌روه‌ردگارتان له‌و خاكه‌ی ئێوه‌ ده‌چنه‌ ناوی هه‌تا ده‌ستی به‌سه‌ردا بگرن، به‌ره‌كه‌تدارتان بكات.
17
«به‌ڵام ئه‌گه‌ر دڵتان لاچوو و گوێتان نه‌گرت، به‌ڵكو گومڕا بوون و بۆ خودای دیكه‌ كڕنۆشتان برد و خزمه‌تتان كردن،
18
ئه‌وا من ئه‌مڕۆ پێتان ڕاده‌گه‌یه‌نم كه‌ ئێوه‌ بێگومان له‌ناوده‌چن، ته‌مه‌ن درێژ نابن له‌سه‌ر ئه‌و خاكه‌ی له‌ ڕووباری ئوردون بۆی ده‌په‌ڕنه‌وه‌ هه‌تا بچنه‌ ناوی و ده‌ستی به‌سه‌ردا بگرن.
19
«من ئه‌مڕۆ ئاسمان و زه‌ویتان لێ ده‌كه‌مه‌ شایه‌ت، كه‌ من ژیان و مردن، به‌ره‌كه‌ت و نه‌فره‌تم له‌به‌رده‌متان داناوه‌، جا ژیان هه‌ڵبژێرن هه‌تا خۆتان و نه‌وه‌كانتان بژین.
20
یه‌زدانی په‌روه‌ردگارتان خۆشده‌وێت و گوێ له‌ ده‌نگی ده‌گرن و ده‌ستی پێوه‌ ده‌گرن. له‌به‌ر ئه‌وه‌ی ئه‌و ژیانتانه‌ و درێژه‌ به‌ ته‌مه‌نتان ده‌دات هه‌تا له‌و خاكه‌ نیشته‌جێ بن كه‌ یه‌زدان بۆ باوباپیرانتان ئیبراهیم و ئیسحاق و یاقوب سوێندی خوارد كه‌ بیانداتێ.»
  1. a. 30‏:3 گه‌ڕاندنه‌وه‌ له‌ ڕاپێچكراوی هێمایه‌ك بووه‌ بۆ نوێكردنه‌وه‌ی به‌خته‌وه‌ری.