عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
تازه‌كردنه‌وه‌ی په‌یمانه‌كه‌ 
1
ئه‌مانه‌ به‌نده‌كانی ئه‌و په‌یمانه‌ن كه‌ یه‌زدان فه‌رمانی به‌ موسا كرد كه‌ له‌گه‌ڵ نه‌وه‌ی ئیسرائیلدا بیبه‌ستێت، له‌ خاكی مۆئاب بێجگه‌ له‌و په‌یمانه‌ی له‌ حۆرێڤ له‌گه‌ڵی به‌ستن.
2
ئینجا موسا هه‌موو ئیسرائیلی بانگكرد و پێی گوتن:
«ئێوه‌ بینیتان یه‌زدان له‌ خاكی میسر له‌به‌رچاوتان چی به‌ فیرعه‌ون و هه‌موو خزمه‌تكاره‌كانی و هه‌موو خاكه‌كه‌ی كرد،
3
ئه‌و تاقیكردنه‌وه‌ مه‌زنانه‌ی چاوه‌كانتان بینییان و نیشانه‌ و په‌رجووه‌ مه‌زنه‌كانی.
4
به‌ڵام یه‌زدان هه‌تا ئه‌مڕۆش دڵێكی[a] پێنه‌داون بۆ ئه‌وه‌ی تێبگه‌ن و چاوێك بۆ ئه‌وه‌ی ببینن و گوێیه‌ك بۆ ئه‌وه‌ی ببیستن.
5
به‌ڵام یه‌زدان ده‌فه‌رموێت: ”چل ساڵ له‌ چۆڵه‌وانیدا ئێوه‌م به‌ڕێوه‌ برد، جله‌كانتان له‌به‌رتان كۆن نه‌بوون و پێڵاوه‌كانتان[b] له‌ پێتان كۆن نه‌بوون،
6
نه‌ نانتان خوارد و نه‌ شه‌رابتان خوارده‌وه‌ و نه‌ مه‌ی، هه‌تا ئێوه‌ بزانن كه‌ من یه‌زدانی په‌روه‌ردگارتانم.“
7
«كاتێكیش هاتنه‌ ئه‌م شوێنه‌ سیحۆنی پاشای حه‌شبۆن و عۆگی پاشای باشان هاتن بۆ جه‌نگ له‌ دژی ئێمه‌، به‌ڵام ئه‌وانمان شكاند و
8
ده‌ستمان به‌سه‌ر خاكه‌كه‌یاندا گرت و به‌ میرات دامانه‌ ڕه‌ئوبێن و گاد و نیوه‌ی هۆزی مه‌نه‌شه‌[c] .
9
«به‌نده‌كانی ئه‌م په‌یمانه‌ بپارێزن و كاری پێ بكه‌ن، هه‌تا له‌ هه‌موو ئه‌وه‌ی ده‌یكه‌ن سه‌ركه‌وتوو بن.
10
ئێوه‌ ئه‌مڕۆ هه‌مووتان به‌ سه‌رۆك هۆز و پیر و كوێخا و هه‌موو پیاوه‌كانی ئیسرائیل له‌به‌رده‌م یه‌زدانی په‌روه‌ردگارتان وه‌ستاون،
11
هه‌روه‌ها ژن و منداڵ و ئه‌و نامۆیانه‌ی كه‌ له‌ناو ئۆردگاكانتانه‌، له‌وه‌ی كه‌ دارتان بۆ ده‌بڕێته‌وه‌ و ئاوتان بۆ له‌ بیر هه‌ڵده‌كێشێت،
12
بۆ ئه‌وه‌ی بچنه‌ ناو په‌یمانی یه‌زدانی په‌روه‌ردگارتان و سوێنده‌كه‌ی كه‌ یه‌زدانی په‌روه‌ردگارتان ئه‌مڕۆ له‌گه‌ڵتانی ده‌به‌ستێت،
13
هه‌تا ئه‌مڕۆ به‌ گه‌لی خۆی داتانبنێت، ئه‌ویش ببێته‌ خوداتان وه‌ك پێی فه‌رموون و وه‌ك سوێندی بۆ ئیبراهیم و ئیسحاق و یاقوبی باوباپیرانتان خوارد.
14
ئه‌م په‌یمان و سوێنده‌ش ته‌نها له‌گه‌ڵ ئێوه‌ی نابه‌ستم،
15
به‌ڵكو له‌گه‌ڵ ئه‌وه‌ی كه‌ لێره‌ ئه‌مڕۆ له‌گه‌ڵماندا له‌به‌رده‌م یه‌زدانی په‌روه‌ردگارمان وه‌ستاوه‌ و ئه‌وه‌ش كه‌ ئه‌مڕۆ لێره‌ له‌گه‌ڵماندا نییه‌.
16
«چونكه‌ ئێوه‌ زانیتان چۆن له‌ خاكی میسر نیشته‌جێ بووین و چۆن هه‌تا ئێره‌ به‌ناو ئه‌و گه‌لانه‌دا تێپه‌ڕین.
17
وێنه‌ قێزه‌ون و بته‌كانی ئه‌وانتان بینی كه‌ له‌ دار و به‌رد و زێڕ و زیون.
18
نه‌وه‌ك له‌نێوتاندا پیاوێك یان ئافره‌تێك یان هۆزێك یان خێڵێك هه‌بێت كه‌ ئه‌مڕۆ دڵی له‌سه‌ر یه‌زدانی په‌روه‌ردگارمان لاچووبێت، بۆ ئه‌وه‌ی بچێت و خوداوه‌نده‌كانی ئه‌و نه‌ته‌وانه‌ بپه‌رستێت، نه‌وه‌ك له‌نێوتان ڕه‌گێك هه‌بێت ژه‌هراوی و زه‌قنه‌بووت بگرێت.
19
«كاتێك ئه‌م جۆره‌ كه‌سه‌ گوێی له‌ سوێندی ئه‌م په‌یمانه‌ ده‌بێت، له‌ دڵیدا داوای به‌ره‌كه‌ت بۆ خۆی ده‌كات و ده‌ڵێت: ”من سه‌لامه‌ت ده‌بم، ته‌نانه‌ت به‌ كه‌لله‌ڕه‌قی خۆشم هه‌ڵسوكه‌وت بكه‌م،“ ئه‌مه‌ زه‌وی ته‌ڕ و وشك له‌ناوده‌بات.
20
یه‌زدان هه‌رگیز ڕازی نابێت لێی خۆشبێت، به‌ڵكو ئه‌و كاته‌ تووڕه‌یی و دڵگه‌رمی یه‌زدان به‌سه‌ر ئه‌و پیاوه‌ هه‌ڵده‌چێت، هه‌موو ئه‌و نه‌فره‌تانه‌ی له‌م په‌ڕتووكه‌دا نووسراون دێنه‌ سه‌ری، یه‌زدان ناوی له‌ژێر ئاسماندا ده‌سڕێته‌وه‌.
21
یه‌زدان له‌ هه‌موو هۆزه‌كانی ئیسرائیل ئه‌و بۆ لێقه‌ومان جیا ده‌كاته‌وه‌، به‌پێی هه‌موو نه‌فره‌ته‌كانی په‌یمانه‌كه‌ كه‌ له‌م په‌ڕتووكی ته‌وراته‌دا نووسراون.
22
«جا دوا نه‌وه‌ له‌ منداڵه‌كانتان كه‌ له‌دوای ئێوه‌ دێن و هه‌روه‌ها ئه‌و بیانییانه‌ی له‌ خاكێكی دووره‌وه‌ دێن، ئه‌و گورزوه‌شاندن و نه‌خۆشییانه‌ ده‌بینن كه‌ یه‌زدان تووشی كردوون.
23
هه‌موو زه‌وییه‌كه‌ به‌ گۆگرد و خوێ ده‌سووتێنێت، نه‌ ده‌چێنرێت و نه‌ ده‌ڕوێت و نه‌ هیچ گیایه‌كی لێ ده‌رده‌كه‌وێت، وه‌ك سه‌ره‌وژێركردنی سه‌دۆم و عه‌مۆرا و ئه‌دما و چه‌بۆئیم كه‌ یه‌زدان به‌ تووڕه‌یی و هه‌ڵچوونی خۆی سه‌ره‌وژێری كردن.
24
جا هه‌موو نه‌ته‌وه‌كان ده‌ڵێن: ”بۆچی یه‌زدان وای به‌م خاكه‌ كرد، جۆشانی ئه‌م تووڕه‌ییه‌ به‌تینه‌ بۆچی؟“
25
«وه‌ڵامه‌كه‌یان ئه‌مه‌یه‌: ”چونكه‌ وازیان له‌ په‌یمانی یه‌زدانی په‌روه‌ردگاری باوباپیرانیان هێنا، كه‌ له‌گه‌ڵی به‌ستن كاتێك له‌ خاكی میسر ده‌ریهێنان.
26
چوون خوداوه‌ندی دیكه‌یان په‌رست و كڕنۆشیان بۆ برد، كه‌ نه‌ ناسیبوویان و نه‌ خوداش پێیدابوون.
27
له‌به‌ر ئه‌وه‌ تووڕه‌یی یه‌زدان به‌سه‌ر ئه‌م خاكه‌دا جۆشا، هه‌تا هه‌موو ئه‌و نه‌فره‌تانه‌ی له‌م په‌ڕتووكی فێركردنه‌دا نووسراون به‌سه‌ریدا هێنای.
28
یه‌زدان له‌ خاكه‌كه‌یاندا به‌ تووڕه‌یی و زه‌بر و ڕقێكی زۆره‌وه‌ ڕیشه‌كێشی كردن و وه‌ك ئه‌مڕۆ فڕێیدانه‌ خاكێكی دیكه‌.“
29
«نهێنییه‌كان بۆ یه‌زدانی په‌روه‌ردگارمانه‌ و ئه‌و شتانه‌ی كه‌ خودا بۆی ئاشكرا كردین بۆ ئێمه‌ و نه‌وه‌كانمانه‌ هه‌تاهه‌تایه‌، هه‌تا كار به‌ هه‌موو وشه‌كانی ئه‌م فێركردنه‌ بكه‌ین.
  1. a. 29‏:4 به‌پێی كه‌لتوری عیبرانییه‌كان دڵ لێپرسراوه‌ له‌ بیركردنه‌وه‌.
  2. b. 29‏:5 عیبری: \+tl نه‌عه‌ل\+tl*.
  3. c. 29‏:8 هۆزی مه‌نه‌شه‌ دابه‌ش ببوون بۆ سه‌ر دوو به‌ش، هه‌ریه‌كه‌یان كه‌وتبووه‌ لایه‌كی ڕووباری ئوردونه‌وه‌.