عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ساڵی به‌تاڵكردنه‌وه‌ی قه‌رزه‌كان 
1
له‌ كۆتایی حه‌وت ساڵیش ساڵی به‌تاڵكردنه‌وه‌ی قه‌رزه‌كانه‌.
2
ئه‌مه‌ش چۆنیه‌تی به‌تاڵكردنه‌وه‌یه‌، هه‌موو خاوه‌ن قه‌رزه‌كان پێویسته‌ له‌و قه‌رزه‌ی به‌ نزیكه‌كه‌ی داوه‌ به‌تاڵی بكاته‌وه‌. له‌ نزیكه‌كه‌ی یان براكه‌ی داوا ناكاته‌وه‌، چونكه‌ كاتی یه‌زدان بۆ به‌تاڵكردنه‌وه‌ی قه‌رزه‌كان بانگه‌واز كراوه‌.
3
له‌ بیانی داوا ده‌كرێت، به‌ڵام ئه‌و قه‌رزه‌ی له‌لای براكه‌ت هه‌تبوو، ئه‌وا پێویسته‌ به‌تاڵی بكه‌یته‌وه‌.
4
هه‌رچه‌نده‌ پێویسته‌ له‌نێوتان كه‌س هه‌ژار نه‌بێت، چونكه‌ یه‌زدان به‌ره‌كه‌تدارتان ده‌كات له‌و خاكه‌ی یه‌زدانی په‌روه‌ردگارتان پێتانی ده‌دات هه‌تا وه‌ك میرات ده‌ستی به‌سه‌ردا بگرن،
5
ئه‌گه‌ر گوێڕایه‌ڵی یه‌زدانی په‌روه‌ردگارتان بوون، هه‌تا هه‌موو ئه‌و فه‌رمانانه‌ی من ئه‌مڕۆ فه‌رمانتان پێ ده‌كه‌م، بپارێزن و كاریان پێ بكه‌ن.
6
یه‌زدانی په‌روه‌ردگارتان به‌ره‌كه‌تدارتان ده‌كات وه‌ك به‌ڵێنی پێدان، جا قه‌رز به‌ زۆربه‌ی نه‌ته‌وه‌كان ده‌ده‌ن و ئێوه‌ قه‌رز ناكه‌ن، به‌سه‌ر زۆربه‌ی نه‌ته‌وه‌كاندا ده‌سه‌ڵاتتان ده‌بێت و ئه‌وان به‌سه‌رتانه‌وه‌ ده‌سه‌ڵاتدار نابن.
7
ئه‌گه‌ر هه‌ژارێك له‌نێوتان بوو، یه‌كێك له‌ برایانتان له‌ شارۆچكه‌یه‌كی خاكه‌كه‌تان كه‌ یه‌زدانی په‌روه‌ردگارتان پێتانی ده‌دات، ئه‌وا دڵتان ڕه‌ق مه‌كه‌ن و له‌ ئاست برا هه‌ژاره‌كانتان ده‌ستتان دامه‌خه‌ن،
8
به‌ڵكو ده‌ستتانی بۆ بكه‌نه‌وه‌ و ئه‌وه‌ی پێویستییه‌تی به‌ قه‌رز بیده‌نێ.
9
ئاگاداربن له‌وه‌ی بیرێكی خراپتان له‌ دڵدا بێت و بڵێن، «ئه‌وا ساڵی حه‌وته‌م نزیك بووه‌ته‌وه‌، ساڵی به‌تاڵكردنه‌وه‌ی قه‌رزه‌كانه‌،» ئیتر به‌ خراپی ڕه‌فتار له‌گه‌ڵ هه‌ژار بكه‌ن و نه‌یده‌نێ، جا ئه‌ویش بۆ یه‌زدان هاوار ده‌كات سه‌باره‌ت به‌ ئێوه‌ و ده‌بێته‌ گوناه به‌سه‌رتانه‌وه‌.
10
به‌ دڵفراوانییه‌وه‌ پێی ببه‌خشن و با به‌ نابه‌دڵی نه‌بێت كاتێك ده‌یده‌نێ، چونكه‌ به‌هۆی ئه‌م شته‌وه‌ یه‌زدانی په‌روه‌ردگارتان به‌ره‌كه‌تدارتان ده‌كات له‌ هه‌موو كاره‌كانتان و له‌ هه‌موو ئه‌وه‌ی ده‌ستی بۆ ده‌به‌ن.
11
له‌به‌ر ئه‌وه‌ی هه‌ژار له‌ خاكه‌كه‌دا كۆتایی نایه‌ت، بۆیه‌ من فه‌رمانتان پێده‌ده‌م و ده‌ڵێم: «ده‌ستی یارمه‌تیتان بكه‌نه‌وه‌ بۆ برای نه‌دارتان و بۆ هه‌ژاران له‌ خاكه‌كه‌تان.»
ئازادكردنی خزمه‌تكار 
12
ئه‌گه‌ر برایه‌ك یان خوشكێكی عیبرانیت پێ فرۆشرا و شه‌ش ساڵ خزمه‌تی كردیت، ئه‌وا له‌ ساڵی حه‌وته‌م له‌لای خۆت ئازادی ده‌كه‌یت.
13
كاتێك ئازادیشی ده‌كه‌یت، به‌ ده‌ستبه‌تاڵی ئازادی ناكه‌یت.
14
به‌ڵكو به‌ دڵفراوانییه‌وه‌ له‌ مێگه‌له‌كه‌ت و جۆخینه‌كه‌ت[a] و گوشه‌ره‌كه‌تی[b] پێده‌ده‌یت، به‌و شێوه‌یه‌ی یه‌زدانی په‌روه‌ردگارت به‌ره‌كه‌تداری كردوویت، پێی ده‌ده‌یت.
15
له‌ یادت بێت تۆش له‌ خاكی میسر كۆیله‌ بوویت، جا یه‌زدانی په‌روه‌ردگارت تۆی كڕییه‌وه‌، بۆیه‌ من ئه‌مڕۆ فه‌رمانی ئه‌مه‌ت پێ ده‌كه‌م.
16
به‌ڵام ئه‌گه‌ر گوتی، «واز له‌ تۆ ناهێنم،» چونكه‌ خۆت و ماڵه‌كه‌تی خۆشده‌وێت، له‌به‌ر ئه‌وه‌ی له‌لای تۆ له‌ خۆشیدا بووه‌،
17
ئه‌وا درێشه‌ ببه‌ و له‌لای ده‌رگاكه‌ گوێی كون بكه‌، جا بۆ هه‌تاهه‌تایه‌ ده‌بێته‌ كۆیله‌ت، ئاواش بۆ كاره‌كه‌ره‌كه‌ت ده‌كه‌یت.
18
به‌ لاته‌وه‌ گران نه‌بێت خزمه‌تكاره‌كه‌ت ئازاد بكه‌یت، چونكه‌ شه‌ش ساڵ خزمه‌تی كردوویت، دوو هێنده‌ی كرێگرته‌یه‌ك، جا یه‌زدانی په‌روه‌ردگارت به‌ره‌كه‌تدارت ده‌كات له‌ هه‌موو ئه‌وه‌ی كه‌ ده‌یكه‌یت.
نۆبه‌ره‌ ئاژه‌ڵه‌كان 
19
هه‌موو نۆبه‌ره‌یه‌كی نێرینه‌ی مانگا و مه‌ڕه‌كانت بۆ یه‌زدانی په‌روه‌ردگارت ته‌رخان ده‌كه‌یت، كار به‌ نۆبه‌ره‌ی مانگاكه‌ت مه‌كه‌ و خوری نۆبه‌ره‌ی مه‌ڕه‌كانت مه‌بڕه‌وه‌.
20
ساڵ به‌ ساڵ له‌به‌رده‌م یه‌زدانی په‌روه‌ردگارت ده‌یخۆیت له‌و شوێنه‌ی یه‌زدان هه‌ڵیده‌بژێرێت، خۆت و ماڵه‌كه‌ت.
21
به‌ڵام ئه‌گه‌ر ئاژه‌ڵێك كه‌موكوڕییه‌كی تێدابێت، وه‌ك شه‌لی یان كوێری، هه‌ر كه‌موكوڕییه‌كی خراپ، ئه‌وا بۆ یه‌زدانی په‌روه‌ردگارت سه‌ری مه‌بڕه‌،
22
له‌ شارۆچكه‌ی خۆتدا ده‌یخۆیت، كه‌سی گڵاو و پاك به‌پێی ڕێوڕه‌سم وه‌ك یه‌ك، وه‌ك چۆن مامز و ئاسك ده‌خۆن.
23
به‌ڵام خوێنه‌كه‌ی نه‌خۆیت، وه‌ك ئاو ده‌یڕێژیته‌ سه‌ر زه‌وی.
  1. a. 15‏:14 جۆخین یان سه‌رخه‌رمان ئه‌و زه‌وییه‌ ته‌رخانكراوه‌یه‌ كه‌ له‌لایه‌ن وه‌رزێر و جوتیاره‌وه‌ به‌كارهێنراوه‌ بۆ كوتانی دانه‌وێڵه‌ له‌سه‌ری له‌دوای كۆكردنه‌وه‌ی له‌ كێڵگه‌.
  2. b. 15‏:14 گوشه‌ره‌كه‌تی: به‌رهه‌مه‌كه‌ی ئاوی ترێیه‌، بڕوانه‌ \+xt سه‌رژمێری 18‏:27‏\+xt*‏.