عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌ران و ته‌گه‌ له‌ بینینه‌كه‌ 
1
من كه‌ دانیالم، له‌ ساڵی سێیه‌می پاشایه‌تی بێلشه‌سر، له‌پاش ئه‌و بینینه‌ی كه‌ ماوه‌یه‌ك له‌مه‌وپێش بۆم ئاشكرا كرابوو، بینینێكی دیكه‌شم بۆ ئاشكرا كرا.
2
له‌ بینینه‌كه‌مدا سه‌یرم كرد له‌ قه‌ڵای شوشم، ئه‌وه‌ی له‌ هه‌رێمی ئیلامه‌. له‌ بینینه‌كه‌دا له‌لای نۆكه‌ندی ئولای بووم.
3
چاوم هه‌ڵبڕی و بینیم به‌رانێك له‌لای نۆكه‌نده‌كه‌ ڕاوه‌ستاوه‌ و دوو قۆچی هه‌یه‌، هه‌ردوو قۆچه‌كه‌ درێژ بوون، به‌ڵام یه‌كێكیان له‌وه‌ی دیكه‌یان درێژتر بوو، به‌ڵام دواتر سه‌ری ده‌رهێنابوو.
4
بینیم به‌رانه‌كه‌ به‌لای ڕۆژئاوا و باكوور و باشووردا قۆچ ده‌وه‌شێنێت، هیچ گیانله‌به‌رێكیش له‌ ڕووی نه‌وه‌ستایه‌وه‌، هیچ له‌ ده‌ستی ده‌رباز نه‌بوو، ئه‌وه‌ی پێی خۆشبوو كردی و مه‌زن بوو.
5
له‌و كاته‌دا كه‌ ڕامابووم ته‌گه‌یه‌ك[a] له‌ ڕۆژئاواوه‌ به‌سه‌ر زه‌ویدا ده‌هات و پێیه‌كانی به‌ر زه‌وی نه‌ده‌كه‌وت، ته‌گه‌كه‌ شاخێكی به‌رزی هه‌بوو له‌نێوان هه‌ردوو چاوی.
6
چووه‌ لای ئه‌و به‌رانه‌ی كه‌ دوو قۆچی هه‌بوو، ئه‌وه‌ی بینیم له‌لای نۆكه‌نده‌كه‌ وه‌ستابوو، زۆر به‌ تووڕه‌ییه‌وه‌ هێرشی كرده‌ سه‌ری.
7
بینیم گه‌یشته‌ سه‌ر به‌رانه‌كه‌ و به‌ربووه‌ سه‌ری و له‌ به‌رانه‌كه‌ی دا، دوو قۆچه‌كه‌ی شكاند. به‌رانه‌كه‌ هێزی ئه‌وه‌ی نه‌بوو له‌به‌رده‌می ڕابوه‌ستێت، ته‌گه‌كه‌ فڕێیدایه‌ سه‌ر زه‌وی و پێی لێنا، به‌رانه‌كه‌ كه‌سی نه‌بوو له‌ ده‌ستی ده‌ربازی بكات.
8
ئینجا ته‌گه‌كه‌ زۆر خۆی به‌ زل زانی، به‌ڵام كاتێك له‌خۆبایی بوو شاخه‌ گه‌وره‌كه‌ی شكا، له‌ جێی ئه‌و شاخه‌ش چوار شاخی گه‌وره‌تر به‌ره‌و چوار باكه‌ی ئاسمان ده‌رچوون.
9
له‌ یه‌كێك له‌وانه‌وه‌ شاخێكی بچكۆله‌ ده‌ركه‌وت، ڕووه‌و باشوور و ڕۆژهه‌ڵات و خاكه‌ دڵگیره‌كه‌[b] گه‌شه‌ی كرد.
10
زۆر به‌هێز بوو، ته‌نانه‌ت گه‌یشته‌ هێزه‌كانی ئاسمانیش، هه‌ندێك له‌ هێز و ئه‌ستێره‌كانی فڕێدایه‌ خواره‌وه‌ بۆ سه‌ر زه‌وی و پێی لێنان.
11
خۆی به‌ گه‌وره‌ زانی تاوه‌كو خۆی یه‌كسان بكات به‌ خودای سوپاسالاری ئاسمان. قوربانی ڕۆژانه‌ له‌كارخرا و پیرۆزگاكه‌ی وێران كرا.
12
له‌به‌ر یاخیبوون، سوپا پیرۆزه‌كان و پێشكه‌شكردنی قوربانی ڕۆژانه‌ درانه‌ ده‌ستی شاخه‌كه‌. ڕاستی خرایه‌ ژێر پێ، شاخه‌كه‌ش له‌ هه‌موو ئه‌وه‌دا سه‌ركه‌وتوو بوو كه‌ كردی.
13
ئینجا گوێم له‌ فریشته‌یه‌كی پیرۆز بوو قسه‌ی ده‌كرد، فریشته‌یه‌كی پیرۆزی دیكه‌ به‌وی ده‌گوت: «ڕووداوه‌كانی ئه‌م بینینه‌ كه‌ی دێنه‌ دی؟ هه‌تا كه‌ی قوربانی ڕۆژانه‌ له‌كارده‌خه‌ن؟ هه‌تا كه‌ی یاخیبوون به‌رده‌وام ده‌بێت له‌ كاولبوونی پیرۆزگا و پێشێلكردنی سوپا پیرۆزه‌كه‌؟»
14
ئه‌ویش پێی گوتم: «دوو هه‌زار و سێ سه‌د به‌یانی و ئێواره‌، ئینجا پیرۆزگا ده‌گه‌ڕێته‌وه‌ باری پیرۆزی خۆی.»
لێكدانه‌وه‌ی بینینه‌كه‌ 
15
من دانیالم، هێشتا خه‌ریكی سه‌یركردنی بینینه‌كه‌م و هه‌وڵده‌ده‌م كه‌ لێی تێبگه‌م، ئه‌وه‌تا یه‌كێك له‌ شێوه‌ی پیاوێك له‌به‌رده‌مم ڕاوه‌ستاوه‌.
16
گوێم له‌ ده‌نگی مرۆڤێك بوو له‌لای نۆكه‌ندی ئولایه‌وه‌ بانگی كرد و گوتی: «ئه‌ی جبرائیل[c] ، واتای بینینه‌كه‌ له‌م پیاوه‌ بگه‌یه‌نه‌.»
17
ئه‌ویش هاته‌ ئه‌و شوێنه‌ی كه‌ لێی ڕاوه‌ستابووم، كاتێك هات ترسام و به‌سه‌ر ڕوومدا كه‌وتم. پێی گوتم: «ئه‌ی كوڕی مرۆڤ، بزانه‌ كه‌ بینینه‌كه‌ سه‌باره‌ت به‌ سه‌رده‌می كۆتاییه‌.»
18
كاتێك قسه‌ی له‌گه‌ڵم ده‌كرد كه‌وتبوومه‌ خه‌ونێكی قووڵه‌وه‌ و ڕووم ڕووه‌و زه‌وی بوو. ئینجا ده‌ستی لێدام و هه‌ڵیستاندمه‌ سه‌ر پێ.
19
گوتی: «من پێت ده‌ڵێم كه‌ له‌ كاتی تووڕه‌یی چی ڕووده‌دات، چونكه‌ بینینه‌كه‌ سه‌باره‌ت به‌ سه‌رده‌می كۆتایی دیاریكراوه‌.
20
ئه‌و به‌رانه‌ی كه‌ بینیت دوو قۆچی هه‌بوو، ئه‌وه‌ پاشاكانی ماد و فارسه‌.
21
ته‌گه‌كه‌ پاشای یۆنانه‌، ئه‌و قۆچه‌ گه‌وره‌یه‌ش كه‌ له‌نێوان هه‌ردوو چاوی بوو یه‌كه‌مین پاشایه‌.
22
به‌ڵام ئه‌و چوار قۆچه‌ی كه‌ له‌ شوێنی قۆچه‌ شكێنراوه‌كه‌ په‌یدابوون، ئه‌وا چوار پاشایه‌تی له‌ نه‌ته‌وه‌كه‌ی ئه‌وه‌وه‌ په‌یدا ده‌بن، به‌ڵام هه‌مان هێزی ئه‌ویان نابێت.
23
«له‌ دوایین پاشایه‌تییان، كاتێك یاخیبوون له‌ دژی خودا ده‌گاته‌ ئه‌وپه‌ڕی، پاشایه‌كی ڕوو وشك و فێڵباز په‌یدا ده‌بێت.
24
هێزی زۆر ده‌بێت، به‌ڵام نه‌ك به‌ هێزی خۆی، له‌ ڕاده‌به‌ده‌ر وێرانكاری ده‌كات و سه‌ركه‌وتوو ده‌بێت له‌ هه‌رچی بیه‌وێت بیكات. تواناداران و گه‌له‌ پیرۆزه‌كه‌ له‌ناوده‌بات.
25
به‌ ته‌ڵه‌كه‌بازی وا ده‌كات فێڵبازی سه‌ركه‌وتوو بێت، دڵی له‌خۆبایی ده‌بێت. كاتێك له‌ ئاسووده‌ییدا زۆران له‌ناوده‌بات و له‌ دژی میری میران ده‌وه‌ستێته‌وه‌. له‌گه‌ڵ ئه‌وه‌شدا تێكده‌شكێنرێت، به‌ڵام به‌ بێهێزی مرۆڤانه‌.
26
«ئه‌و بینینه‌ی ئێواره‌ و به‌یانی كه‌ به‌ تۆ درا ڕاسته‌، به‌ڵام تۆ بینینه‌كه‌ به‌ نهێنی بهێڵه‌وه‌، چونكه‌ بۆ داهاتووی دووره‌.»
27
من كه‌ دانیالم، بۆ چه‌ند ڕۆژێك بێهێز و لاواز بووم، ئینجا هه‌ستام و ده‌ستم كرده‌وه‌ به‌ كاروباره‌كانی پاشا. واقم وڕمابوو له‌ بینینه‌كه‌، له‌ سه‌رووی تێگه‌یشتنه‌وه‌ بوو.
  1. a. 8‏:5 نێری، سابرێن.
  2. b. 8‏:9 مه‌به‌ستی له‌ خاكی ئیسرائیله‌.
  3. c. 8‏:16 جبرائیل: له‌ زمانی عیبری به‌ واتای پیاوی خودا دێت.