عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
چوار گیانله‌به‌ری گه‌وره‌ له‌ خه‌وندا 
1
له‌ ساڵی یه‌كه‌می بێلشه‌سری پاشای بابل، كاتێك دانیال له‌سه‌ر جێگاكه‌ی ڕاكشابوو خه‌ونێكی بینی و چه‌ند بینینێك به‌ مێشكیدا هات، ئینجا پوخته‌ی خه‌ونه‌كه‌ی نووسییه‌وه‌.
2
دانیال گوتی: «له‌ بینینه‌كه‌مدا له‌ شه‌و ته‌ماشام ده‌كرد چوار باكه‌ی ئاسمان ده‌ریای گه‌وره‌یان هه‌ژاند.
3
له‌ ده‌ریاكه‌وه‌ چوار گیانله‌به‌ری گه‌وره‌ هاتنه‌ ده‌ره‌وه‌، هه‌ریه‌كه‌یان له‌وه‌ی دیكه‌ جیاواز بوو.
4
«یه‌كه‌میان وه‌ك شێر بوو و دوو باڵی هه‌ڵۆ ئاسای هه‌بوو. ته‌ماشام كرد هه‌تا باڵه‌كانی لێكرایه‌وه‌ و له‌سه‌ر زه‌وی ھه‌ڵستێنرا، وه‌ك مرۆڤ له‌سه‌ر دوو پێ ڕاوه‌ستابوو، دڵی مرۆڤی پێدرا.
5
«هه‌ر له‌و كاته‌دا گیانله‌به‌ری دووه‌م له‌ شێوه‌ی ورچ له‌سه‌ر یه‌ك لا به‌رزبووه‌وه‌، سێ په‌راسوو له‌نێو ددانه‌كانی بوو، پێی گوترا: ”هه‌سته‌ و گۆشتی زۆر بخۆ!“
6
«پاش ئه‌مه‌ ته‌ماشام كرد یه‌كێكی دیكه‌ وه‌ك پڵنگ وابوو، له‌سه‌ر پشتی چوار باڵی باڵنده‌ی هه‌بوو. گیانله‌به‌ره‌كه‌ چوار سه‌ری هه‌بوو، ده‌سه‌ڵاتی حوكمدانی پێدرابوو.
7
«پاش ئه‌مه‌ له‌ بینینی شه‌ودا ته‌ماشام كرد گیانله‌به‌ری چواره‌م ترسناك و تۆقێنه‌ر و زۆر به‌هێز بوو. ددانی ئاسنین و گه‌وره‌ی هه‌بوو، نێچیره‌كانی خوارد و تێكی شكاندن و پاشماوه‌كه‌ی به‌ پێیه‌كانی پانكرده‌وه‌. ئه‌و له‌ هه‌موو گیانله‌به‌ره‌كانی پێش خۆی جیاوازتر بوو، ده‌ شاخی[a] هه‌بوو.
8
«له‌ شاخه‌كان ڕامابووم، شاخێكی دیكه‌ی بچووك له‌نێوانیانه‌وه‌ ده‌رهات و سێ شاخه‌كه‌ی پێش خۆی هه‌ڵته‌كاند. ئه‌م شاخه‌ چاوی وه‌ك چاوی مرۆڤی تێدابوو، له‌گه‌ڵ ده‌مێك كه‌ به‌ فیزه‌وه‌ قسه‌ی ده‌كرد.
9
«كاتێك ته‌ماشام ده‌كرد
«ته‌خته‌كان دانران و
خودای جاویدانی[b] دانیشت،
جله‌كانی وه‌ك به‌فر سپی بوون و
مووی سه‌ریشی وه‌ك خوری بێگه‌رد وابوو.
ته‌خته‌كه‌شی بڵێسه‌ی ئاگری بوو،
چه‌رخه‌كانیشی ئاگری داگیرساو بوو.
10
ڕووبارێكی ئاگرین تێده‌په‌ڕی،
له‌به‌رده‌میه‌وه‌ ده‌ڕۆیشت.
به‌ هه‌زاران هه‌زار خزمه‌تیان ده‌كرد و
به‌ ده‌یان هه‌زار ده‌یان هه‌زار له‌به‌رده‌میدا ڕاوه‌ستابوون.
ئینجا دادگا دانیشت و
كتێبه‌كان كرانه‌وه‌.
11
«له‌و كاته‌دا به‌رده‌وام بووم له‌ سه‌رنجدان له‌به‌ر قسه‌ به‌ فیزه‌كان كه‌ شاخه‌كه‌ ده‌یكرد. ته‌ماشام ده‌كرد هه‌تا گیانله‌به‌ره‌كه‌ كوژرا و كه‌لاكه‌كه‌ی له‌ناوچوو، فڕێدرایه‌ ناو ئاگره‌ داگیرساوه‌كه‌.
12
گیانله‌به‌ره‌كانی دیكه‌ش ده‌سه‌ڵاتیان لێسه‌نرایه‌وه‌، به‌ڵام بۆ ماوه‌یه‌ك ته‌مه‌ن درێژییان پێدرا.
13
«له‌ بینینه‌كه‌ی شه‌ودا ته‌ماشام كرد، له‌گه‌ڵ هه‌وری ئاسماندا یه‌كێكی وه‌ك كوڕی مرۆڤ بوو هات، گه‌یشته‌ لای خودای جاویدانی و بردیانه‌ به‌رده‌می.
14
ئینجا ده‌سه‌ڵات و شكۆ و پاشایه‌تی پێدرا، بۆ ئه‌وه‌ی هه‌موو گه‌لان و نه‌ته‌وه‌كان و خه‌ڵكی هه‌موو زمانه‌كان بیپه‌رستن. ده‌سه‌ڵاته‌كه‌ی ده‌سه‌ڵاتێكی هه‌تاهه‌تاییه‌ كه‌ به‌سه‌رناچێت، پاشایه‌تییه‌كه‌ی له‌ناو ناچێت.
لێكدانه‌وه‌ی خه‌ونه‌كه‌ 
15
«به‌ڵام من، كه‌ دانیالم ڕۆحم له‌ ناخمدا واقی وڕما بوو و ئه‌و بینینانه‌ی به‌ مێشكمدا هات منیان ترساند.
16
جا له‌ یه‌كێك له‌ ڕاوه‌ستاوه‌كان نزیك بوومه‌وه‌ و له‌ هه‌موو ئه‌مه‌دا داوای لێكدانه‌وه‌م لێكرد.
«ئه‌ویش لێكدانه‌وه‌ی خه‌ونه‌كه‌ی پێ گوتم:
17
”ئه‌و چوار گیانله‌به‌ره‌ گه‌وره‌یه‌ چوار پاشان كه‌ له‌سه‌ر زه‌وی په‌یدا ده‌بن.
18
به‌ڵام گه‌لی پیرۆزی خودای هه‌ره‌به‌رز پاشایه‌تییه‌كه‌ به‌ده‌ستده‌هێنن و بۆ هه‌تاهه‌تایه‌ خاوه‌نداریێتی ده‌كه‌ن. به‌ڵێ، بۆ هه‌تاهه‌تایه‌.“
19
«ئینجا ویستم لێكدانه‌وه‌ی گیانله‌به‌ره‌كه‌ی چواره‌م بزانم كه‌ له‌گه‌ڵ هه‌موویان جیاواز بوو، زۆر ترسناك بوو، ددانه‌كانی له‌ ئاسن بوون و سمه‌كانی له‌ بڕۆنز، نێچیره‌كانی خوارد و تێكیشكاندن و پاشماوه‌كه‌ی به‌ پێیه‌كانی پانكرده‌وه‌.
20
هه‌روه‌ها ویستم له‌باره‌ی ئه‌و ده‌ شاخه‌ی سه‌ری و ئه‌و شاخه‌ی تریش بزانم كه‌ له‌ كاتی ده‌ركه‌وتنی سێ له‌ شاخه‌كانی دیكه‌ له‌به‌رده‌می كه‌وتنه‌ خواره‌وه‌، ئه‌و شاخه‌ چاوی هه‌بوو، ده‌مێكیش كه‌ به‌ فیزه‌وه‌ قسه‌ی ده‌كرد و دیمه‌نه‌كه‌ی له‌ شاخه‌كانی دیكه‌ زه‌به‌لاحتر بوو.
21
ته‌ماشام ده‌كرد و ئه‌و شاخه‌ له‌ دژی گه‌له‌ پیرۆزه‌كه‌ ده‌جه‌نگا و ئه‌وانی به‌زاند،
22
هه‌تا خودای جاویدانی هات و حوكمی ده‌ركرد له‌ به‌رژه‌وه‌ندی گه‌له‌ پیرۆزه‌كه‌ی خودای هه‌ره‌به‌رز، كاتی هات بۆ ئه‌وه‌ی خاوه‌نداریێتی پاشایه‌تییه‌كه‌ بكه‌ن.
23
«ئه‌ویش به‌م جۆره‌ی گوت: ”گیانله‌به‌ری چواره‌م پاشایه‌تییه‌كی چواره‌م ده‌بێت له‌سه‌ر زه‌وی، جیاواز له‌ سه‌رجه‌م پاشایه‌تییه‌كان، ئینجا هه‌موو زه‌وی ده‌خوات و پێی لێ ده‌نێت و تێكی ده‌شكێنێت.
24
ده‌ شاخه‌كه‌ش ده‌ پاشان كه‌ له‌م پاشایه‌تییه‌دا هه‌ڵده‌ستن. یه‌كێكی دیكه‌ له‌دوای ئه‌وان هه‌ڵده‌ستێت له‌وانی پێش خۆی جیاواز ده‌بێت و سێ پاشا زه‌لیل ده‌كات.
25
له‌ دژی خودای هه‌ره‌به‌رز قسه‌ ده‌كات و پیرۆزه‌كانی سه‌ركوت ده‌كات و هه‌وڵ ده‌دات كاتی جه‌ژنه‌كان و فه‌رزه‌كانی ته‌ورات بگۆڕێت. گه‌له‌ پیرۆزه‌كه‌ بۆ سێ ساڵ و نیو[c] ده‌درێنه‌ ده‌ستی ئه‌و.
26
«”جا دادگا داده‌نیشێت و ده‌سه‌ڵاته‌كه‌ی لێ داده‌ماڵن بۆ ئه‌وه‌ی به‌ ته‌واوی كۆتایی پێ بێت و له‌ناوبچێت.
27
پاشایه‌تییه‌كه‌ و ده‌سه‌ڵات و گه‌وره‌یی پاشایه‌تییه‌كه‌ له‌ژێر هه‌موو ئاسماندا ده‌درێته‌ گه‌له‌ پیرۆزه‌كه‌، گه‌لی خودای هه‌ره‌به‌رز. پاشایه‌تییه‌كه‌ی پاشایه‌تی هه‌تاهه‌تاییه‌ و هه‌موو ده‌سه‌ڵاتداران ده‌یپه‌رستن و گوێڕایه‌ڵی ده‌بن.“
28
«هه‌تا ئێره‌ كۆتایی بابه‌ته‌كه‌یه‌. من دانیالم، بیركردنه‌وه‌كانم زۆر منیان ترساند و ڕه‌نگم گۆڕا، به‌ڵام بابه‌ته‌كه‌م له‌ دڵی خۆمدا هه‌ڵگرت.»
  1. a. 7‏:7 شاخ: له‌ زمان و كه‌لتوری عیبریدا شاخ هێمای توانایه‌، لێره‌ و له‌ 24‏:8. \+xt بڕوانه‌ دانیال 7‏:7‏-8 و ئاشكراكردن 5‏:6 و 12‏:3.‏\+xt*‏
  2. b. 7‏:9 عیبری: دێرینی ڕۆژان. مه‌به‌ستی له‌ خودای ئه‌زه‌لییه‌، ناوێكی تایبه‌ته‌ بۆ خودا كه‌ له‌ ئه‌زه‌له‌وه‌ هه‌یه‌.
  3. c. 7‏:25 عیبری: كاتێك و دوو كاتێك و نیو كات.