عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئه‌ی گه‌وره‌كان، له‌گه‌ڵ كۆیله‌كان دادپه‌روه‌ر و یه‌كسان بن، بزانن ئێوه‌ش گه‌وره‌تان هه‌یه‌ له‌ ئاسمان.
هاندان بۆ نوێژكردن 
2
په‌یوه‌ست بن به‌ نوێژكردنه‌وه‌، به‌ سوپاسه‌وه‌ شه‌واره‌ی لێ بگرن.
3
بۆ ئێمه‌ش نوێژ بكه‌ن كه‌ خودا ده‌رگایه‌كمان بۆ بكاته‌وه‌ بۆ په‌یامه‌كه‌، بۆ ئه‌وه‌ی نهێنی مه‌سیح ڕابگه‌ێنین، له‌به‌ر ئه‌مه‌ش گیراوم،
4
تاكو ئاشكرای بكه‌م وه‌ك پێویسته‌ بدوێم.
5
به‌ دانایی له‌گه‌ڵ ئه‌وانه‌ی ده‌ره‌وه‌ ڕه‌فتار بكه‌ن، كات بقۆزنه‌وه‌.
6
قسه‌تان هه‌رده‌م پڕبێت له‌ نیعمه‌ت، به‌ خوێ سوێر كرابێت، تاكو بزانن چۆن پێویسته‌ وه‌ڵامی هه‌ركه‌سێك بده‌نه‌وه‌.
سڵاوی كۆتایی 
7
تیخیكۆس هه‌موو هه‌واڵێكی منتان ده‌داتێ، برایه‌كی خۆشه‌ویست و خزمه‌تكارێكی دڵسۆز كه‌ به‌هۆی یه‌كبوونمان له‌گه‌ڵ مه‌سیحی باڵاده‌ست شان به‌ شانی ئێمه‌ خزمه‌تی مه‌سیح ده‌كات.
8
به‌ تایبه‌تی بۆ ئه‌مه‌ ناردمه‌ لاتان، تاكو هه‌واڵی ئێمه‌ بزانن و وره‌تان به‌رز بكاته‌وه‌،
9
له‌گه‌ڵ ئۆنسیمۆسی برای خۆشه‌ویست و دڵسۆز، ئه‌وه‌ی له‌ خۆتانه‌، ئه‌وان هه‌واڵی هه‌موو شتێكی ئێره‌تان ده‌ده‌نێ.
10
ئه‌ریستارخۆسی هاوڕێی به‌ندیێتیم سڵاوتان لێده‌كات، مه‌رقۆسی ئامۆزای به‌رناباسیش. ده‌رباره‌ی ئه‌و ڕاسپارده‌تان وه‌رگرتووه‌. ئه‌گه‌ر هاته‌ لاتان پێشوازیی لێ بكه‌ن.
11
هه‌روه‌ها عیسا كه‌ به‌ یوستۆس ناوده‌بردرێت، ئه‌ویش سڵاوی بۆتان هه‌یه‌. ته‌نها ئه‌مانه‌ له‌نێوان هاوكارانم بۆ شانشینی خودا له‌ جوله‌كه‌كانن[a] ، ئه‌وانه‌ی بوونه‌ هانده‌رم.
12
ئه‌په‌فراسی به‌نده‌ی عیسای مه‌سیح، ئه‌ویش له‌ خۆتانه‌ و سڵاوتان لێده‌كات، هه‌رده‌م له‌ نوێژه‌كانیدا له‌ پێناوتاندا تێده‌كۆشێت، تاكو له‌ ته‌واویدا بچه‌سپێن و ته‌واو دڵنیا بن له‌ هه‌موو خواستی خودا.
13
شایه‌تیی بۆ ده‌ده‌م كه‌ زۆر ماندوو ده‌بێت بۆ ئێوه‌ و ئه‌وانه‌ی له‌ شاره‌كانی لاودیكییان و هیراپۆلیسن.
14
لۆقای پزیشكی خۆشه‌ویست و دیماس سڵاوتان لێده‌كه‌ن.
15
سڵاو بكه‌ن له‌ خوشكان و برایانی لاودیكییا و نیمفاس[b] و ئه‌و كڵێسایه‌ی له‌ ماڵه‌كه‌یه‌تی.
16
كاتێك ئه‌م نامه‌یه‌تان بۆ خوێنرایه‌وه‌، وابكه‌ن له‌ كڵێسای لاودیكییه‌كانیش بخوێنرێته‌وه‌، ئه‌وه‌ی هی لاودیكییاشه‌ ئێوه‌ بیخوێننه‌وه‌.
17
به‌ ئه‌رخیپۆس بڵێن: «سه‌یری ئه‌و خزمه‌ته‌ بكه‌ كه‌ له‌ مه‌سیحی باڵاده‌سته‌وه‌ وه‌رتگرتووه‌، تاكو ته‌واوی بكه‌یت.»
18
من پۆڵسم، سڵاوه‌كه‌ ده‌ستخه‌تی خۆمه‌. یادی كۆته‌كانم بكه‌ن. نیعمه‌ت له‌گه‌ڵتان بێت.
  1. a. 4‏:11 یۆنانی: خه‌ته‌نه‌كراوان.
  2. b. 4‏:15 ئافره‌تێكی خزمه‌تكار بووه‌.