عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پۆڵس له‌ مه‌كدۆنیا و یۆنان 
1
دوای نه‌مانی ئاژاوه‌كه‌، پۆڵس قوتابییه‌كانی بانگكرد و وره‌ی به‌رزكردنه‌وه‌، ماڵئاوایی لێكردن و به‌ره‌و مه‌كدۆنیا به‌ڕێكه‌وت.
2
كاتێك به‌و ناوچانه‌دا تێپه‌ڕی، به‌ زۆر وشه‌ وره‌یانی به‌رز كرده‌وه‌، هاته‌ یۆنان،
3
له‌وێ سێ مانگی به‌سه‌ربرد. كه‌ به‌ته‌مابوو به‌ ده‌ریادا بچێته‌ سوریا جوله‌كه‌ پیلانیان بۆی گێڕا، بڕیاری دا به‌ مه‌كدۆنیادا بگه‌ڕێته‌وه‌.
4
ئه‌مانه‌ی له‌گه‌ڵ بوو: له‌ بیریه‌ سوپاترۆسی كوڕی پیڕۆس، له‌ سالۆنیكییان ئه‌ریستارخۆس و سه‌كوندۆس، گایۆس له‌ ده‌ربه‌ و تیمۆساوس، له‌ ئاسیاش تیخیكۆس و تروفیمۆس.
5
ئه‌مانه‌ پێشمان كه‌وتن و له‌ ترۆیاس چاوه‌ڕێیان ده‌كردین.
6
به‌ڵام ئێمه‌ دوای جه‌ژنی فه‌تیره‌، سواری كه‌شتی بووین و فیلیپیمان به‌جێهێشت، پاش گه‌شتی پێنج ڕۆژ گه‌یشتینه‌ به‌نده‌ری ترۆیاس، له‌وێ به‌وانه‌ی دیكه‌ شاد بووینه‌وه‌ و حه‌وت ڕۆژ له‌وێ ماینه‌وه‌.
پۆڵس له‌ ترۆیاس 
7
له‌ یه‌كه‌م ڕۆژی هه‌فته‌دا بۆ نانله‌تكردن كۆبووینه‌وه‌، پۆڵس گفتوگۆی له‌گه‌ڵ ده‌كردن، چونكه‌ به‌ته‌مابوو ڕۆژی دواتر بڕوات، بۆیه‌ هه‌تا نیوه‌ شه‌و قسه‌ی بۆ كردن.
8
ئه‌و ژووره‌ی سه‌ره‌وه‌ كه‌ لێی كۆببووینه‌وه‌ چرای زۆری لێبوو.
9
گه‌نجێك ناوی یوتیخۆس بوو له‌ناو په‌نجه‌ره‌دا دانیشتبوو، خه‌وه‌كوتكێیه‌كی قورس ده‌یبرده‌وه‌، پۆڵس وتارێكی درێژی ده‌دا، جا خه‌وی لێ كه‌وت و له‌ نهۆمی سێیه‌مه‌وه‌ كه‌وته‌ خواره‌وه‌، به‌ مردوویی هه‌ڵگیرایه‌وه‌.
10
پۆڵس هاته‌ خواره‌وه‌ خۆی به‌سه‌ریدا دا و له‌ باوه‌شی گرت، گوتی: «مه‌شێوێن، ژیانی تێدایه‌!»
11
دوایی پۆڵس چووه‌ سه‌ره‌وه‌، نانی له‌تكرد و خواردی، هه‌تا به‌ره‌به‌یان قسه‌ی كرد، پاشان له‌وێ ڕۆیشت.
12
گه‌نجه‌كه‌شیان به‌ زیندووێتی برد و زۆر دڵنه‌وایی كران.
له‌ ترواده‌وه‌ بۆ میلیتۆس 
13
پۆڵس به‌ ڕێگای وشكانی چوو بۆ ئه‌سۆس، ئێمه‌ش به‌ سواری كه‌شتی به‌ره‌و ئه‌وێ به‌ڕێكه‌وتین چونكه‌ بڕیاری دابوو كه‌ له‌وێ چاومان پێی بكه‌وێت.
14
كاتێك له‌ ئه‌سۆس تووشمان بوو، هه‌ڵمانگرت و هاتینه‌ میتیلینی.
15
له‌وێش به‌ ده‌ریادا ڕۆیشتین و بۆ به‌یانی گه‌یشتینه‌ به‌رامبه‌ر خیۆس، بۆ ڕۆژی دواتر گه‌یشتینه‌ سامۆس، ڕۆژی دوای ئه‌وه‌ش هاتینه‌ میلیتۆس.
16
جا پۆڵس بڕیاری دابوو كه‌ ئه‌فه‌سۆس به‌جێبهێڵێت نه‌وه‌ك ماوه‌یه‌ك له‌ ئاسیادا بمێنێته‌وه‌، چونكه‌ په‌له‌ی ده‌كرد، به‌ڵكو بتوانێت له‌ ڕۆژی په‌نجایه‌مین بگاته‌ ئۆرشه‌لیم.
وته‌ی پۆڵس بۆ پیرانی ئه‌فه‌سۆس 
17
پۆڵس له‌ میلیتۆسه‌وه‌ ناردی بۆ ئه‌فه‌سۆس، بانگی پیرانی كڵێسای كرد.
18
كاتێك هاتنه‌ لای پێی گوتن: «ئێوه‌ ده‌زانن له‌ یه‌كه‌م ڕۆژه‌وه‌ كه‌ پێم خسته‌ ناو ئاسیا، به‌ درێژایی كاته‌كه‌ چۆن بووم له‌گه‌ڵتان،
19
له‌ كاتێكدا كه‌ به‌ پیلانی جوله‌كه‌ به‌رهه‌ڵستكاره‌كان تووشی تاقیكردنه‌وه‌ی سه‌خت بووم، به‌وپه‌ڕی بێفیزی و فرمێسكه‌وه‌ خزمه‌تی عیسای خاوه‌ن شكۆم ده‌كرد.
20
هیچم له‌و شتانه‌ دوانه‌خستووه‌ كه‌ سوودبه‌خشن و بۆم ڕاگه‌یاندوون، به‌ ئاشكرا و ماڵه‌وماڵ فێرم كردوون.
21
شایه‌تی ئه‌وه‌م داوه‌ لای جوله‌كه‌ و یۆنانییه‌كان كه‌ ده‌بێت تۆبه‌ بكه‌ن و بۆ لای خودا بگه‌ڕێنه‌وه‌ و باوه‌ڕ به‌ عیسای خاوه‌ن شكۆمان بهێنن.
22
«ئه‌وه‌تا ئێستا وا به‌ ڕۆحی پیرۆز به‌ستراوم، ده‌چمه‌ ئۆرشه‌لیم و نازانم چیم به‌سه‌ردێت.
23
ته‌نها ڕۆحی پیرۆز له‌ هه‌موو شارێك شایه‌تیم بۆ ده‌دات كه‌ گرتن و ناخۆشی چاوه‌ڕێم ده‌كات.
24
به‌ڵام هیچ به‌هایه‌كم بۆ ژیانی خۆم دانه‌ناوه‌، ته‌نها ئامانجم ئه‌وه‌یه‌، ئه‌و پێشبركێیه‌ ته‌واو بكه‌م و ئه‌و ئه‌ركه‌ به‌جێبگه‌یه‌نم كه‌ عیسای خاوه‌ن شكۆ به‌ منی سپارد، ئه‌ویش ئه‌ركی شایه‌تیدانه‌ بۆ مزگێنی نیعمه‌تی خودا.
25
«ئێستا ده‌زانم هیچكام له‌ ئێوه‌ ئیتر نامبیننه‌وه‌ كه‌ به‌ ناوتاندا ده‌گه‌ڕام و پاشایه‌تی خودام ڕاده‌گه‌یاند.
26
هه‌ر بۆیه‌ ئه‌مڕۆ شایه‌تیتان بۆ ده‌ده‌م، كه‌ له‌ خوێنی هه‌مووان بێتاوانم،
27
چونكه‌ له‌ ڕاگه‌یاندنی ته‌واوی خواستی خودا بۆتان دوانه‌كه‌وتم.
28
ئاگاتان له‌ خۆتان و له‌ هه‌موو مێگه‌له‌كه‌ بێت، ئه‌وه‌ی ڕۆحی پیرۆز ئێوه‌ی كردووه‌ به‌ چاودێر به‌سه‌ریانه‌وه‌، تاكو شوانایه‌تی كڵێسای خودا بكه‌ن، ئه‌وه‌ی به‌ خوێنی خۆی[a] كڕیویه‌تی.
29
ده‌زانم پاش ڕۆیشتنم گورگی ڕفێنه‌ر دێنه‌ ناوتان، به‌زه‌ییان به‌ مێگه‌له‌كه‌ نایه‌ته‌وه‌.
30
هه‌روه‌ها له‌نێو خۆتاندا خه‌ڵكانێك په‌یدا ده‌بن، باسی شتی خوار ده‌كه‌ن، تاكو قوتابییه‌كان به‌لای خۆیاندا ڕابكێشن.
31
بۆیه‌ ئێشك بگرن، له‌ بیرتان بێت بۆ ماوه‌ی سێ ساڵ شه‌و و ڕۆژ به‌ فرمێسكه‌وه‌ نه‌وه‌ستاوم له‌ ئاگاداركردنه‌وه‌ی هه‌ر یه‌كێكتان.
32
«ئێستاش به‌ خودا و وشه‌ی نیعمه‌ته‌كه‌یتان ده‌سپێرم، كه‌ توانای هه‌یه‌ بنیادتان بنێت و له‌گه‌ڵ هه‌موو ئه‌وانه‌ی پیرۆزكراون میراتتان پێ ببه‌خشێت.
33
چاوم له‌ زێڕ و زیو و جلی كه‌س نه‌بوو.
34
خۆتان ده‌زانن پێویستی خۆم و یاوه‌رانم، ئه‌م ده‌ستانه‌ دابینیان كردووه‌.
35
هه‌موو شتێكم پیشانتاندا كه‌ پێویسته‌ ئاوا ڕه‌نج بده‌ن بۆ یارمه‌تیدانی لاوازان، وشه‌كانی عیسای خاوه‌ن شكۆتان له‌یاد بێت كه‌ خۆی فه‌رمووی: ”به‌خشین له‌ وه‌رگرتن به‌خته‌وه‌ریتره‌.“»
36
كاتێك پۆڵس قسه‌كانی ته‌واو كرد، له‌گه‌ڵ هه‌موویان چۆكی دادا و نوێژی كرد.
37
هه‌مووان زۆر گریان، باوه‌شیان كردبوو به‌ پۆڵسدا و ماچیان ده‌كرد،
38
به‌و قسه‌ی كردی خه‌مبار بوون كه‌ گوتی جارێكی دیكه‌ ڕووی نابیننه‌وه‌. ئینجا تاكو لای كه‌شتییه‌كه‌ له‌گه‌ڵی ڕۆیشتن.
  1. a. 20‏:28 خوێنی مه‌سیح.