عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
داود و مه‌فیبۆشه‌ت 
1
داود پرسی: «ئایا كه‌سێك هه‌یه‌ له‌ بنه‌ماڵه‌ی شاول هێشتا له‌ ژیاندا مابێت، بۆ ئه‌وه‌ی له‌ پێناوی یۆناتاندا چاكه‌یه‌كی له‌گه‌ڵدا بكه‌م؟»
2
به‌نده‌یه‌كی ماڵی شاول هه‌بوو ناوی چیڤا بوو، بانگیان كرد بۆ لای داود، ئیتر پاشا پێی گوت: «تۆ چیڤایت؟»
ئه‌ویش گوتی: «به‌ڵێ، منی خزمه‌تكاری تۆم.»
3
پاشاش گوتی: «ئایا كه‌سێك نییه‌ له‌ بنه‌ماڵه‌ی شاول هێشتا مابێت، بۆ ئه‌وه‌ی چاكه‌ی خودای له‌گه‌ڵدا بكه‌م؟»
چیڤاش به‌ پاشای گوت: «كوڕێكی یۆناتان هه‌یه‌ كه‌ هه‌ردوو قاچی شه‌له‌.»
4
پاشاش پێی گوت: «له‌كوێیه‌؟»
چیڤاش به‌ پاشای گوت: «له‌ ماڵی ماكیری كوڕی عه‌میێله‌ له‌ لۆده‌ڤار.»
5
ئینجا داودی پاشا ناردی و له‌ ماڵی ماكیری كوڕی عه‌میێله‌وه‌ له‌ لۆده‌ڤار هێنایه‌وه‌.
6
كاتێك مه‌فیبۆشه‌تی كوڕی یۆناتانی كوڕی شاول هات بۆ لای داود، به‌ ڕوودا كه‌وت و كڕنۆشی برد.
داودیش گوتی: «مه‌فیبۆشه‌ت؟»
ئه‌ویش وه‌ڵامی دایه‌وه‌: «به‌ڵێ، ئه‌مه‌تا خزمه‌تكاره‌كه‌ت.»
7
داودیش پێی گوت: «مه‌ترسه‌، چونكه‌ به‌ دڵنیاییه‌وه‌ له‌ پێناوی یۆناتانی باوكت چاكه‌ت له‌گه‌ڵدا ده‌كه‌م و هه‌موو زه‌وییه‌كانی شاولی باپیرت بۆ ده‌گه‌ڕێنمه‌وه‌، تۆش هه‌میشه‌ له‌سه‌ر خوانه‌كه‌ی من نان ده‌خۆیت.»
8
مه‌فیبۆشه‌تیش كڕنۆشی برد و گوتی: «به‌نده‌كه‌ی تۆ چییه‌ هه‌تا ئاوڕ له‌ سه‌گێكی تۆپیوی وه‌ك من بده‌یته‌وه‌؟»
9
ئیتر پاشا چیڤای به‌نده‌ی شاولی بانگكرد و پێی گوت: «هه‌موو ئه‌وه‌ی هی شاول و بنه‌ماڵه‌كه‌ی بوو، به‌ كوڕه‌زای گه‌وره‌كه‌تم داوه‌.
10
خۆت و كوڕ و خزمه‌تكاره‌كانت له‌ زه‌وییه‌كه‌ی كار ده‌كه‌ن و به‌روبوومه‌كه‌ی ده‌هێنن هه‌تا نان بۆ كوڕه‌زای گه‌وره‌كه‌ت دابین بكرێت بۆ خواردن. مه‌فیبۆشه‌تی كوڕه‌زای گه‌وره‌كه‌شت هه‌میشه‌ له‌سه‌ر خوانه‌كه‌م نان ده‌خوات.» چیڤا پازده‌ كوڕ و بیست خزمه‌تكاری هه‌بوو.
11
چیڤاش به‌ پاشای گوت: «به‌پێی هه‌موو ئه‌وه‌ی پاشای گه‌وره‌م فه‌رمان به‌ خزمه‌تكاره‌كه‌ی ده‌كات، خزمه‌تكاره‌كه‌ت به‌و جۆره‌ ده‌كات.» ئیتر مه‌فیبۆشه‌ت وه‌ك شازاده‌یه‌ك له‌سه‌ر خوانه‌كه‌ی داود نانی ده‌خوارد.
12
مه‌فیبۆشه‌ت كوڕێكی بچووكی هه‌بوو ناوی میكا بوو. هه‌روه‌ها هه‌موو ئه‌وانه‌ی له‌ ماڵی چیڤادا ده‌ژیان خزمه‌تكاری مه‌فیبۆشه‌ت بوون.
13
مه‌فیبۆشه‌ت له‌ ئۆرشه‌لیم نیشته‌جێ بوو، چونكه‌ هه‌میشه‌ له‌سه‌ر خوانی پاشا نانی ده‌خوارد و هه‌ردوو قاچیشی شه‌ل بوون.