عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سه‌ركه‌وتنه‌كانی داود[a]  
1
ئه‌وه‌ بوو پاش ئه‌مه‌ داود فه‌له‌ستییه‌كانی به‌زاند و زه‌لیلی كردن، مه‌سه‌گ ئه‌ممای له‌ فه‌له‌ستییه‌كان سه‌ند.
2
هه‌روه‌ها داود مۆئابییه‌كانیشی به‌زاند. ئه‌وانی له‌سه‌ر زه‌وی پاڵخست و به‌ گوریس پێوانه‌ی كردن، به‌ پێوانه‌ی دوو گوریس خه‌ڵكه‌كه‌ی كوشت و به‌ پێوانه‌ی گوریسێكیش خه‌ڵكی به‌ زیندوویی هێشته‌وه‌.[b] ئینجا مۆئابییه‌كان هاتنه‌ ژێر ده‌سه‌ڵاتی داود و سه‌رانه‌یان بۆ ده‌هێنا.
3
هه‌روه‌ها داود هه‌ده‌دعه‌زه‌ری كوڕی ڕه‌حۆڤی پاشای چۆڤای به‌زاند، كاتێك چوو بۆ ئه‌وه‌ی تاشه‌به‌رده‌كه‌ی یاده‌وه‌ری له‌ كه‌ناری ڕووباری فورات نۆژه‌ن بكاته‌وه‌.
4
داود هه‌زار گالیسكه‌ و حه‌وت هه‌زار گالیسكه‌سوار و بیست هه‌زار پیاده‌ی به‌ دیل گرت، ئینجا داود جومگه‌ پێی ئه‌سپی گالیسكه‌كانیانی بڕییه‌وه‌ و ته‌نها سه‌د ئه‌سپی گالیسكه‌ی هێشته‌وه‌.
5
كاتێك ئارامییه‌كانی دیمه‌شق بۆ یارمه‌تیدانی هه‌ده‌دعه‌زه‌ری پاشای چۆڤا هاتن، داود بیست و دوو هه‌زار پیاوی له‌ ئارامییه‌كان كوشت.
6
ئیتر داود له‌ شانشینی ئارامییه‌كانی دیمه‌شق سه‌ربازگه‌ی دانا، ئارامییه‌كانیش هاتنه‌ ژێر ده‌سه‌ڵاتی داود و سه‌رانه‌یان بۆ ده‌هێنا. داودیش ڕووی له‌ هه‌ركوێ ده‌كرد، یه‌زدان سه‌ركه‌وتووی ده‌كرد.
7
پاشان داود قه‌ڵغانه‌ زێڕینه‌كانی ئه‌فسه‌ره‌كانی هه‌ده‌دعه‌زه‌ری برد و هێنایه‌ ئۆرشه‌لیم.
8
هه‌روه‌ها داودی پاشا بڕۆنزێكی زۆریشی له‌ ته‌ڤه‌ح و بێرۆته‌ی برد كه‌ شارۆچكه‌ی هه‌ده‌دعه‌زه‌ر بوون.
9
كاتێك تۆعوی پاشای حه‌مات بیستی كه‌ داود هه‌موو سوپاكه‌ی هه‌ده‌دعه‌زه‌ری به‌زاندووه‌،
10
یۆرامی كوڕی نارد بۆ لای داودی پاشا بۆ ئه‌وه‌ی له‌ سه‌لامه‌تی بپرسێت و پیرۆزبایی لێ بكات كه‌ له‌گه‌ڵ هه‌ده‌دعه‌زه‌ر جه‌نگاوه‌ و به‌زاندوویه‌تی، چونكه‌ هه‌ده‌دعه‌زه‌ر له‌ جه‌نگدا بوو له‌ دژی تۆعو. یۆرامیش له‌گه‌ڵ ده‌ستی خۆیدا كه‌لوپه‌لی زێڕ و زیو و بڕۆنزی هێنابوو.
11
هه‌روه‌ها داودی پاشا ئه‌وانه‌شی بۆ یه‌زدان ته‌رخان كرد له‌گه‌ڵ ئه‌و زێڕ و زیوانه‌ی ته‌رخانی كردبوو له‌ هه‌موو ئه‌و نه‌ته‌وانه‌ی ژێرده‌سته‌ی كردبوون:
12
له‌ ئه‌دۆم، مۆئاب، عه‌مۆن، فه‌له‌ستی، عه‌مالێقی و ده‌ستكه‌وته‌كه‌ی هه‌ده‌دعه‌زه‌ری كوڕی ڕه‌حۆڤی پاشای چۆڤا.
13
هه‌روه‌ها داود پاش گه‌ڕانه‌وه‌ی له‌ كوشتنی هه‌ژده‌ هه‌زار ئه‌دۆمی له‌ دۆڵی خوێ[c] ، ناوبانگی بڵاو بووه‌وه‌.
14
له‌ هه‌موو خاكی ئه‌دۆم سه‌ربازگه‌ی دانا و هه‌موو ئه‌دۆمییه‌كان هاتنه‌ ژێر ده‌سه‌ڵاتی داود. داود ڕووی له‌ هه‌ركوێ ده‌كرد، یه‌زدان سه‌ركه‌وتووی ده‌كرد.
كاربه‌ده‌سته‌كانی داود 
15
داود پاشایه‌تی هه‌موو ئیسرائیلی كرد، دادوه‌ری و ڕاستودروستی بۆ هه‌موو گه‌له‌كه‌ی په‌یڕه‌و كرد.
16
یۆئابی كوڕی چه‌رویاش سوپاسالار بوو؛ یه‌هۆشافاتی كوڕی ئه‌حیلودیش تۆماركار بوو؛
17
سادۆقی كوڕی ئه‌حیتوڤ و ئه‌حیمه‌له‌خی كوڕی ئه‌بیاتار كاهین بوون؛ سه‌رایا خامه‌ی نهێنی[d] بوو؛
18
به‌نایای كوڕی یه‌هۆیاداع فه‌رمانده‌ی كریتی و په‌له‌تییه‌كان[e] بوو؛ كوڕه‌كانی داودیش كاهینی پاشا بوون.
  1. a. 8‏:0 بڕوانه‌ \+xt زه‌بووره‌كان 60‏:11‏-12‏\+xt*‏.
  2. b. 8‏:2 داود به‌ هه‌ڕه‌مه‌كی دوو له‌سه‌ر سێی مۆئابییه‌كان كوشت و یه‌ك له‌سه‌ر سێی لێ هێشتنه‌وه‌.
  3. c. 8‏:13 دۆڵی خوێ: ده‌كه‌وێته‌ باشووری ده‌ریای مردوو. بڕوانه‌ زه‌بووره‌كان 60.
  4. d. 8‏:17 ڕازپۆش.
  5. e. 8‏:18 كریتییه‌كان و په‌له‌تییه‌كان دوو له‌شكری ڕاهێنراو بوون له‌سه‌ر مه‌شقی سه‌ربازی.