عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
هێنانی سندوقی خودا بۆ ئۆرشه‌لیم 
1
دووباره‌ داود هه‌موو پیاوه‌ هه‌ڵبژارده‌كانی ناو ئیسرائیلی كۆكرده‌وه‌، سی هه‌زار كه‌س بوون.
2
ئینجا داود و هه‌موو ئه‌و پیاوانه‌ی له‌گه‌ڵیدا بوون له‌ به‌عله‌ی[a] یه‌هوداوه‌ به‌ڕێكه‌وتن بۆ ئه‌وه‌ی له‌وێوه‌ سندوقی خودا بهێننه‌وه‌، ئه‌و سندوقه‌ كه‌ ناوی لێنراوه‌ «ناوه‌كه‌»، ناوی یه‌زدانی سوپاسالار، ئه‌وه‌ی له‌نێوان كه‌ڕوبه‌كان[b] له‌سه‌ر ته‌خت دانیشتووه‌.
3
سندوقی خودایان له‌ عه‌ره‌بانه‌یه‌كی نوێ باركرد، له‌ ماڵی ئه‌بینادابه‌وه‌ هه‌ڵیانگرت، ئه‌وه‌ی له‌ گرده‌كه‌یه‌. كوڕه‌كانی ئه‌بینادابیش، عوزا و ئه‌حیۆ عه‌ره‌بانه‌ نوێیه‌كه‌یان لێده‌خوڕی و
4
له‌ ماڵی ئه‌بینادابه‌وه‌ له‌گه‌ڵ سندوقی خودا بردیان. ئه‌حیۆ له‌به‌رده‌م سندوقه‌كه‌وه‌ ده‌ڕۆیشت،
5
داود و هه‌موو بنه‌ماڵه‌ی ئیسرائیلیش به‌ هه‌موو توانایانه‌وه‌ له‌به‌رده‌م یه‌زداندا ئاهه‌نگیان ده‌گێڕا، به‌ سروود و قیساره‌ و ساز و ده‌ف و شه‌قشه‌قه‌ و سه‌نج.
6
كاتێك گه‌یشتنه‌ سه‌ر جۆخینه‌كه‌ی[c] ناخون، عوزا ده‌ستی بۆ سندوقی خودا درێژكرد و گرتی، چونكه‌ گایه‌كان سه‌رسمیان دا.
7
ئه‌و ساته‌ تووڕه‌یی یه‌زدان به‌سه‌ر عوزادا جۆشا و خودا له‌وێ له‌سه‌ر هه‌ڵه‌كه‌ی لێیدا و هه‌ر له‌وێ له‌لای سندوقی خودا مرد.
8
داودیش تووڕه‌ بوو، چونكه‌ یه‌زدان به‌ ته‌واوی عوزای له‌ناوبرد، ئه‌و شوێنه‌ش هه‌تا ئه‌مڕۆ به‌ پێرێز عوزا[d] ناوده‌بردرێت.
9
ئه‌و ڕۆژه‌ داود له‌ یه‌زدان ترسا و گوتی: «چۆن سندوقی یه‌زدان له‌لای من بێت؟»
10
له‌به‌ر ئه‌وه‌ داود نه‌یویست سندوقی یه‌زدان بگوازێته‌وه‌ بۆ شاری داود، به‌ڵكو بردییه‌ ماڵی عوبێد ئه‌دۆمی گه‌تی.
11
سێ مانگ سندوقی یه‌زدان له‌ ماڵی عوبێد ئه‌دۆمی گه‌تی مایه‌وه‌، یه‌زدانیش عوبێد ئه‌دۆم و هه‌موو ماڵه‌كه‌ی به‌ره‌كه‌تدار كرد.
12
ئه‌وه‌ بوو به‌ داودی پاشا ڕاگه‌یه‌نرا و گوترا: «به‌هۆی سندوقی خوداوه‌ یه‌زدان ماڵی عوبێد ئه‌دۆم و هه‌رچی هه‌یه‌تی به‌ره‌كه‌تداری كردووه‌.» له‌به‌ر ئه‌وه‌ داود چوو به‌ خۆشییه‌وه‌ سندوقی خودای له‌ ماڵی عوبێد ئه‌دۆمه‌وه‌ هێنا بۆ شاری داود.
13
له‌دوای ئه‌وه‌ی هه‌ڵگرانی سندوقی یه‌زدان شه‌ش هه‌نگاویان هه‌ڵهێنا، گایه‌ك و گوێره‌كه‌یه‌كی قه‌ڵه‌وی سه‌ربڕی.
14
داودیش ئێفۆدێكی كه‌تانی له‌به‌ردا بوو، به‌ هه‌موو هێزییه‌وه‌ له‌به‌رده‌م یه‌زداندا سه‌مای ده‌كرد.
15
هه‌روه‌ها داود و هه‌موو بنه‌ماڵه‌ی ئیسرائیل به‌ هوتاف و به‌ ده‌نگی كه‌ڕه‌ناوه‌ سندوقی یه‌زدانیان سه‌رخست.
16
كاتێك سندوقی یه‌زدان هاته‌ ناو شاری داود، میخه‌لی كچی شاول له‌ په‌نجه‌ره‌كه‌وه‌ سه‌یری كرد و بینی داودی پاشا له‌به‌رده‌م یه‌زدان هه‌ڵده‌به‌زێته‌وه‌ و سه‌ما ده‌كات، له‌ دڵی خۆیدا به‌ سووكی زانی.
17
ئیتر سندوقی یه‌زدانیان هێنایه‌ ژووره‌وه‌، له‌ناوه‌ڕاستی ئه‌و چادره‌ی داود بۆی دامه‌زراندبوو له‌ شوێنی خۆی دایاننا، داود قوربانی سووتاندن و قوربانی هاوبه‌شی[e] له‌به‌رده‌م یه‌زداندا سه‌رخست.
18
پاش ئه‌وه‌ی داود له‌ پێشكه‌شكردنی قوربانی سووتاندنه‌كان و قوربانییه‌كانی هاوبه‌شی بووه‌وه‌، به‌ ناوی یه‌زدانی سوپاسالاره‌وه‌ داوای به‌ره‌كه‌تی بۆ گه‌ل كرد.
19
هه‌ر یه‌كێك له‌ هه‌موو گه‌ل، واته‌ ته‌واوی ئاماده‌بووانی كۆمه‌ڵی ئیسرائیل، به‌ پیاو و به‌ ئافره‌ته‌وه‌، كولێره‌یه‌ك و نانه‌ خورمایه‌ك و نانه‌ كشمیشێكی به‌سه‌ریاندا دابه‌ش كرد. ئینجا هه‌موو گه‌ل هه‌ریه‌كه‌ و بۆ ماڵی خۆی گه‌ڕایه‌وه‌.
20
داودیش بۆ ئه‌وه‌ی داوای به‌ره‌كه‌ت بۆ ماڵه‌كه‌ی بكات گه‌ڕایه‌وه‌ ماڵه‌وه‌. میخه‌لی كچی شاول چووه‌ پێشوازی داود و گوتی: «ئه‌مڕۆ پاشای ئیسرائیل چه‌ند گه‌وره‌ بوو كه‌ بێ ئه‌وه‌ی خۆی بپۆشێت له‌به‌رده‌م كه‌نیزه‌كانی خزمه‌تكاره‌كانی ده‌ركه‌وت، وه‌ك ناكه‌س به‌چه‌یه‌ك كه‌ خۆی نه‌پۆشێت!»
21
داودیش به‌ میخه‌لی گوت: «ئه‌مه‌ له‌به‌رده‌م یه‌زدان بوو، ئه‌وه‌ی له‌ جێگای باوكت و هه‌موو ماڵه‌كه‌ی هه‌ڵیبژاردم بۆ ئه‌وه‌ی بمكاته‌ فه‌رمانڕه‌وای ئیسرائیلی گه‌لی یه‌زدان. له‌به‌ر ئه‌وه‌ له‌به‌رده‌م یه‌زدان ئاهه‌نگ ده‌گێڕم.
22
له‌وه‌ش زیاتر له‌ پایه‌ی خۆم دێنمه‌ خواره‌وه‌ و خۆم نزم ده‌كه‌مه‌وه‌، به‌ڵام له‌لای ئه‌و كه‌نیزانه‌ی باست كردن، ئه‌وا ڕێزدار ده‌بم.»
23
میخه‌لی كچی شاولیش هه‌تا ئه‌و ڕۆژه‌ی مرد منداڵی نه‌بوو.
  1. a. 6‏:2 به‌عله‌ی قیریه‌ت یه‌عاریمه‌، بڕوانه‌ \+xt یه‌شوع 15‏:9‏\+xt*‏.
  2. b. 6‏:2 له‌نێوان كه‌ڕوبه‌كان: جووتێك په‌یكه‌ری بوونه‌وه‌ری ئاسمانی باڵداره‌، له‌ شێوه‌ی ئاژه‌ڵ و مرۆڤدایه‌، بۆ پارێزگاریكردن له‌ سندوقی په‌یمان دانرابوو، بڕوانه‌ \+xt ده‌رچوون 25‏:22 و عیبرانییه‌كان 9‏:5‏\+xt*‏.
  3. c. 6‏:6 جۆخین یان سه‌رخه‌رمان ئه‌و زه‌وییه‌ ته‌رخانكراوه‌یه‌ كه‌ له‌لایه‌ن وه‌رزێر و جوتیاره‌وه‌ به‌كارهێنراوه‌ بۆ كوتانی دانه‌وێڵه‌ له‌سه‌ری له‌دوای كۆكردنه‌وه‌ی له‌ كێڵگه‌.
  4. d. 6‏:8 واته‌ هه‌ڵكوتانه‌ سه‌ر عوزا.
  5. e. 6‏:17 قوربانی هاوبه‌شی: ئه‌م قوربانییه‌ هاوده‌می قوربانی سووتاندن بوو. ته‌نها یه‌ك كه‌س هه‌ڵده‌ستا به‌ دابینكردنی ئه‌م قوربانییه‌، به‌ڵام له‌گه‌ڵ خه‌ڵكی دیكه‌ به‌شی زۆری ئه‌م قوربانییه‌یان له‌به‌رده‌م خودا ده‌خوارد وه‌ك هێمایه‌ك بۆ پێكه‌وه‌ ژیان. \+xt بڕوانه‌ لێڤییه‌كان 7‏:11‏-15.‏\+xt*‏