عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ده‌ستنیشانكردنی پاشای هه‌موو ئیسرائیل 
1
هه‌موو هۆزه‌كانی ئیسرائیل هاتنه‌ حه‌برۆن بۆ لای داود، گوتیان: «ئه‌وه‌تا ئێمه‌ له‌ گۆشت و خوێنی تۆین.
2
له‌ ڕابردوودا كاتێك شاول پاشامان بوو، تۆ ڕابه‌رایه‌تی سوپای ئیسرائیلت ده‌كرد، یه‌زدانیش پێی فه‌رموویت: ”تۆ شوانایه‌تی ئیسرائیلی گه‌له‌كه‌م ده‌كه‌یت و ده‌بیته‌ فه‌رمانڕه‌وایان.“»
3
هه‌روه‌ها هه‌موو پیرانی ئیسرائیل هاتنه‌ حه‌برۆن بۆ لای پاشا، داودی پاشاش له‌به‌رده‌م یه‌زدان له‌ حه‌برۆن په‌یمانی له‌گه‌ڵدا به‌ستن، داودیان به‌ پاشای ئیسرائیل ده‌ستنیشان كرد.
4
داود ته‌مه‌نی سی ساڵ بوو كاتێك بوو به‌ پاشا، چل ساڵ پاشایه‌تی كرد.
5
حه‌وت ساڵ و شه‌ش مانگ له‌ حه‌برۆن پاشایه‌تی یه‌هودای كرد، سی و سێ ساڵیش له‌ ئۆرشه‌لیم پاشایه‌تی هه‌موو ئیسرائیل و یه‌هودای كرد.
داگیركردنی ئۆرشه‌لیم 
6
پاشا و پیاوه‌كانی چوونه‌ ئۆرشه‌لیم بۆ شه‌ڕكردن له‌ دژی یه‌بوسییه‌كانی دانیشتووانی خاكه‌كه‌. ئه‌وانیش به‌ داودیان گوت: «تۆ نایه‌یته‌ ژووره‌وه‌ بۆ ئێره‌، ته‌نانه‌ت نابینا و شه‌له‌كان ڕێگات لێ ده‌گرن.» وا بیریان كرده‌وه‌: «داود ناتوانێت بێت بۆ ئێره‌.»
7
به‌ڵام داود ده‌ستی به‌سه‌ر قه‌ڵای سییۆندا[a] گرت، كه‌ ئێستا به‌ شاری داود ناسراوه‌.
8
جا له‌و ڕۆژه‌دا داود گوتی: «هه‌ركه‌سێك سه‌ربكه‌وێت بۆ به‌زاندنی یه‌بوسییه‌كان، ده‌بێت بگاته‌ كارێزه‌كه‌ و ئه‌و شه‌ل و كوێرانه‌ بكوژێت كه‌ ناحه‌زی داودن[b] .» هه‌ر له‌به‌ر ئه‌وه‌ ده‌ڵێن: «”نابینا و شه‌ل“ نایه‌نه‌ ناو كۆشكه‌كه‌وه‌.»
9
پاشان داود له‌ قه‌ڵاكه‌ نیشته‌جێ بوو، ناوی لێنا شاری داود، چوارده‌وره‌كه‌ی بنیاد نا، له‌ ته‌لانه‌كانه‌وه‌[c] به‌ره‌و ناوه‌وه‌.
10
هه‌روه‌ها داود هه‌تا ده‌هات مه‌زنتر ده‌بوو، یه‌زدانی په‌روه‌ردگاری سوپاسالاریش له‌گه‌ڵی بوو.
11
پاشان حیرامی پاشای هه‌رێمی سور چه‌ند نێردراوێكی بۆ لای داود نارد له‌گه‌ڵ داری ئورز و دارتاش و نه‌قاڕ، كۆشكێكیان بۆ داود دروستكرد.
12
ئینجا داود زانی كه‌ یه‌زدان وه‌ك پاشای ئیسرائیل جێگیری كردووه‌، پاشایه‌تییه‌كه‌شی له‌ پێناوی ئیسرائیلی گه‌له‌كه‌یدا پایه‌دار كردووه‌.
13
هه‌روه‌ها داود پاش ئه‌وه‌ی له‌ حه‌برۆنه‌وه‌ هاته‌ ئۆرشه‌لیم چه‌ند كه‌نیزه‌ و ژنێكی دیكه‌ی هێنا، ئینجا كوڕ و كچی دیكه‌ی داود له‌دایك بوون.
14
ئه‌مه‌ش ناوی ئه‌و منداڵانه‌یه‌تی كه‌ له‌ ئۆرشه‌لیم له‌دایك بوون: شه‌موع، شۆڤاڤ، ناتان، سلێمان،
15
ئیڤحار، ئه‌لیشوع، نه‌فه‌گ، یافیع،
16
ئه‌لیشاماع، ئه‌لیاداع و ئه‌لیفه‌له‌ت.
به‌زاندنی فه‌له‌ستییه‌كان 
17
كاتێك فه‌له‌ستییه‌كان بیستیانه‌وه‌ كه‌ داود به‌ پاشای ئیسرائیل ده‌ستنیشانكراوه‌، هه‌موو فه‌له‌ستییه‌كان بۆ گه‌ڕان به‌دوای داود سه‌ركه‌وتن، به‌ڵام كاتێك داود ئه‌مه‌ی بیسته‌وه‌ دابه‌زی بۆ ناو قه‌ڵاكه‌.
18
فه‌له‌ستییه‌كان هاتبوون و له‌ دۆڵی ڕفایم بڵاو ببوونه‌وه‌.
19
داودیش پرسیاری له‌ یه‌زدان كرد و گوتی: «ئایا بچم بۆ په‌لاماردانی فه‌له‌ستییه‌كان؟ ئایا ده‌یانده‌یته‌ ده‌ستم؟»
یه‌زدانیش به‌ داودی فه‌رموو: «بڕۆ، چونكه‌ بێگومان ده‌یانده‌مه‌ ده‌ستت.»
20
داود چوو بۆ به‌عل‌پراچیم و له‌وێ ئه‌وانی به‌زاند، گوتی: «یه‌زدان دڕی به‌ دوژمنه‌كانم دا، وه‌ك دڕپێدادانی ئاو.» له‌به‌ر ئه‌وه‌ ئه‌و شوێنه‌ به‌ به‌عل‌پراچیم ناو برا.[d]
21
هه‌روه‌ها فه‌له‌ستییه‌كان له‌وێدا بته‌كانیان به‌جێهێشت، داود و پیاوه‌كانیشی لایان بردن.
22
ئینجا دووباره‌ فه‌له‌ستییه‌كان سه‌ركه‌وتنه‌وه‌ و له‌ دۆڵی ڕفایم بڵاو بوونه‌وه‌.
23
داودیش پرسیاری له‌ یه‌زدان كرد، ئه‌ویش فه‌رمووی: «سه‌رمه‌كه‌وه‌، به‌ڵكو بسووڕێوه‌ بۆ پشتیان و به‌رامبه‌ر به‌ دار به‌لسه‌مه‌كان په‌لاماریان بده‌.
24
كاتێك له‌سه‌ر دار به‌لسه‌مه‌كانه‌وه‌ گوێت له‌ ده‌نگی پێ بوو، له‌و كاته‌دا وریابه‌، چونكه‌ یه‌زدان بۆ لێدانی ئۆردوگای فه‌له‌ستییه‌كان له‌پێشته‌وه‌ ڕۆیشتووه‌.»
25
داودیش هه‌روه‌ك یه‌زدان فه‌رمانی پێ كرد ئاوای كرد، له‌ گبعۆنه‌وه‌ هه‌تا گه‌زه‌ر له‌ فه‌له‌ستییه‌كانی دا.
  1. a. 5‏:7 مه‌به‌ستی له‌ شاری ئۆرشه‌لیم (قودس). هه‌روه‌ها ناوی دیكه‌شی هه‌یه‌: سییۆن، زایۆن.
  2. b. 5‏:8 بڕوانه‌ \+xt یه‌كه‌م پوخته‌ی مێژوو 11‏:6‏\+xt*‏.
  3. c. 5‏:9 ته‌لان: به‌رازاییه‌كانیان له‌ شێوه‌ی پایه‌ ڕێكخستووه‌، بۆ پاڵپشتی كۆشكی پاشا سوودی لێ وه‌رگیراوه‌.
  4. d. 5‏:20 به‌عل‌پراچیم: له‌ عیبری به‌ واتای ئه‌و خوداوه‌نده‌ی دڕپێده‌دات.