عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گه‌ڕانه‌وه‌ی ئه‌بشالۆم بۆ ئۆرشه‌لیم 
1
یۆئابی كوڕی چه‌رویا زانی كه‌ دڵی پاشا ئاره‌زووی بینینی ئه‌بشالۆمی ده‌كرد.
2
له‌به‌ر ئه‌وه‌ یۆئاب كه‌سێكی نارده‌ ته‌قۆعه‌ و له‌وێوه‌ ژنێكی دانای هێنا و پێی گوت: «تكایه‌ خۆت وه‌ك ماته‌مدار نیشان بده‌، جلی ماته‌م له‌به‌ر بكه‌ و بۆن له‌ خۆت مه‌ده‌، به‌ڵكو وه‌ك ژنێك ده‌ربكه‌وه‌ كه‌ ماوه‌یه‌كی درێژه‌ ماته‌مداره‌،
3
بڕۆ ژووره‌وه‌ بۆ لای پاشا و ئه‌م قسه‌یه‌ی پێ بڵێ.» جا یۆئاب قسه‌كه‌ی خسته‌ سه‌ر زاری.
4
كاتێك ژنه‌ ته‌قۆعییه‌كه‌ چوو بۆ لای پاشا، خۆی خسته‌ سه‌ر زه‌وی و كڕنۆشی برد، گوتی: «ئه‌ی پاشا، ڕزگارم بكه‌!»
5
پاشاش پێی گوت: «چیت ده‌وێ؟»
ئه‌ویش گوتی: «من بێوه‌ژنم و پیاوه‌كه‌م مردووه‌،
6
كاره‌كه‌ره‌كه‌ت دوو كوڕی هه‌بوو كه‌ له‌ كێڵگه‌دا به‌ شه‌ڕ هاتن و كه‌س نه‌بوو لێكیان بكاته‌وه‌، یه‌كێكیان له‌وی دیكه‌یانی دا و كوشتی.
7
ئه‌وه‌تا هه‌موو خێڵه‌كه‌ له‌ كاره‌كه‌ره‌كه‌ت هه‌ستاون و ده‌ڵێن: ”ئه‌وه‌مان ڕاده‌ست بكه‌ كه‌ براكه‌ی خۆی كوشتووه‌، بۆ ئه‌وه‌ی له‌ جیاتی گیانی براكه‌ی كه‌ كوشتوویه‌تی بیكوژینه‌وه‌، هه‌روه‌ها میراتگره‌كه‌ له‌ناو ببه‌ین.“ ئه‌و پشكۆیه‌م ده‌كوژێننه‌وه‌ كه‌ ماوه‌ته‌وه‌، ناو و پاشماوه‌ی پیاوه‌كه‌م له‌سه‌ر ڕووی زه‌وی ناهێڵنه‌وه‌.»
8
پاشاش به‌ ژنه‌كه‌ی گوت: «بگه‌ڕێوه‌ ماڵه‌كه‌ت و من بڕیارێك له‌باره‌ی تۆوه‌ ده‌رده‌كه‌م.»
9
ژنه‌ ته‌قۆعییه‌كه‌ش به‌ پاشای گوت: «ئه‌ی پاشای گه‌وره‌م، با تاوانه‌كه‌ له‌ ئه‌ستۆی خۆم و ماڵی باوكم بێت، پاشا و ته‌خته‌كه‌ی پاك و بێتاوان بن.»
10
پاشاش گوتی: «ئه‌گه‌ر كه‌سێك قسه‌ی له‌گه‌ڵ كردیت، بیهێنه‌ لام بۆ ئه‌وه‌ی دیسان بێزارت نه‌كات.»
11
ژنه‌كه‌ش گوتی: «ئه‌ی پاشا، تكایه‌ ناوی یه‌زدانی خوداكه‌ت بهێنه‌، هه‌تا خوێنگری تۆڵه‌سێنه‌ر زۆر نه‌بن بۆ كوشتنه‌وه‌ و كوڕه‌كه‌م نه‌فه‌وتێت.»
ئه‌ویش گوتی: «به‌ یه‌زدانی زیندوو، تاڵه‌ مووێكی كوڕه‌كه‌ت ناكه‌وێته‌ سه‌ر زه‌وی.»
12
ئینجا ژنه‌كه‌ش گوتی: «تكایه‌ با كاره‌كه‌ره‌كه‌ت قسه‌یه‌كی دیكه‌ بۆ پاشای گه‌وره‌ی بكات.»
ئه‌ویش گوتی: «قسه‌ بكه‌.»
13
ژنه‌كه‌ش گوتی: «ئه‌ی بۆچی بیرت له‌ كارێكی وا كردووه‌ته‌وه‌ له‌ دژی گه‌لی خودا؟ كه‌ پاشا ئه‌مه‌ ده‌ڵێت خۆی تاوانبار ده‌كات، له‌به‌ر ئه‌وه‌ی پاشا كوڕه‌ دوورخراوه‌كه‌ی خۆی نه‌گه‌ڕاندووه‌ته‌وه‌!
14
وه‌ك ئاوێكی ڕژاو له‌سه‌ر زه‌وی كه‌ كۆناكرێنه‌وه‌، بێگومان ده‌مرین. به‌ڵام خودا گیان ناكێشێت، به‌ڵكو چه‌ند ڕێگایه‌ك داده‌ڕژێت هه‌تا ئه‌وه‌ی لێی دوورخراوه‌ته‌وه‌ به‌ دوورخراوه‌یی نه‌مێنێته‌وه‌.
15
«ئێستاش من هاتم هه‌تا له‌و باره‌یه‌وه‌ قسه‌ له‌گه‌ڵ پاشای گه‌وره‌م بكه‌م، چونكه‌ گه‌ل منیان ترساند. كاره‌كه‌ره‌كه‌ت گوتی: ”قسه‌ له‌گه‌ڵ پاشا ده‌كه‌م، به‌ڵكو پاشا به‌ گوێی كاره‌كه‌ره‌كه‌ی بكات.
16
له‌وانه‌یه‌ پاشا گوێ بگرێت بۆ ئه‌وه‌ی كاره‌كه‌ره‌كه‌ی له‌ ده‌ست ئه‌و پیاوه‌ ده‌رباز بكات كه‌ ده‌یه‌وێت خۆم و كوڕه‌كه‌م پێكه‌وه‌ له‌ میراتی خودا بسڕێته‌وه‌.“
17
«هه‌روه‌ها كاره‌كه‌ره‌كه‌ت ده‌ڵێت: ”به‌ڵكو وته‌ی پاشای گه‌وره‌م دڵنه‌وایی بێت بۆم، چونكه‌ پاشای گه‌وره‌م وه‌ك فریشته‌ی خودایه‌ له‌ تێگه‌یشتنی چاكه‌ و خراپه‌، با یه‌زدانی په‌روه‌ردگارت له‌گه‌ڵت بێت.“»
18
پاشا وه‌ڵامی دایه‌وه‌ و به‌ ژنه‌كه‌ی گوت: «شتێكت لێ ده‌پرسم، لێم مه‌شاره‌وه‌.»
ژنه‌كه‌ش گوتی: «تكایه‌، با پاشای گه‌وره‌م بفه‌رموێت.»
19
ئه‌وسا پاشا گوتی: «ئایا له‌ هه‌موو ئه‌مانه‌دا ده‌ستی یۆئاب له‌گه‌ڵتدایه‌؟»
ژنه‌كه‌ش وه‌ڵامی دایه‌وه‌ و گوتی: «پاشای گه‌وره‌م، به‌ گیانی تۆ هیچ كه‌س ناتوانێت نه‌ به‌لای ڕاست و نه‌ به‌لای چه‌پدا لابدات له‌ هه‌موو ئه‌و شتانه‌ی كه‌ پاشای گه‌وره‌م فه‌رموویه‌تی، چونكه‌ یۆئابی خزمه‌تكارت فه‌رمانی پێ كردم و هه‌ر ئه‌و هه‌موو ئه‌م قسانه‌ی خسته‌ سه‌ر زاری كاره‌كه‌ره‌كه‌ته‌وه‌.
20
یۆئابی خزمه‌تكارت ئه‌م كاره‌ی كرد بۆ ئه‌وه‌ی دۆخه‌كه‌ بگۆڕێت. دانایی گه‌وره‌م وه‌ك دانایی فریشته‌ی خودایه‌ هه‌تا هه‌موو ئه‌و شتانه‌ش بزانێت كه‌ له‌ خاكه‌كه‌ هه‌یه‌.»
21
ئیتر پاشا به‌ یۆئابی گوت: «ئێستا من بڕیارم دا و بڕۆ ئه‌و كوڕه‌ گه‌نجه‌، ئه‌بشالۆم بهێنه‌ره‌وه‌.»
22
یۆئابیش كه‌وته‌ سه‌ر زه‌وی و كڕنۆشی برد و داوای به‌ره‌كه‌تی بۆ پاشای كرد، یۆئاب گوتی: «ئه‌ی پاشای گه‌وره‌م، ئه‌مڕۆ خزمه‌تكاره‌كه‌ت ده‌زانێت كه‌ له‌لای تۆ په‌سه‌نده‌، چونكه‌ پاشا به‌ قسه‌ی خزمه‌تكاری خۆی كرد.»
23
ئینجا یۆئاب هه‌ستا و چوو بۆ گه‌شوور و ئه‌بشالۆمی هێنایه‌وه‌ ئۆرشه‌لیم.
24
به‌ڵام پاشاش گوتی: «با بچێته‌ ماڵه‌كه‌ی خۆی و ڕووم نه‌بینێت.» له‌به‌ر ئه‌وه‌ ئه‌بشالۆم چووه‌ ماڵه‌كه‌ی خۆی و ڕووی پاشای نه‌بینی.
25
له‌ هه‌موو ئیسرائیلدا له‌ قۆزی كه‌س نه‌بوو وه‌ك ئه‌بشالۆم به‌ شانوباڵیدا هه‌ڵبدرێت، له‌ بنی پێیه‌وه‌ هه‌تا ته‌پڵی سه‌ری بێ كه‌موكوڕی بوو.
26
له‌ كۆتایی هه‌موو ساڵێك سه‌ری ده‌تاشی، چونكه‌ سه‌ری قورس ده‌بوو، كێشی مووی سه‌ری به‌پێی كێشی پاشایه‌تی دوو سه‌د شاقل[a] ده‌بوو.
27
هه‌روه‌ها ئه‌بشالۆم سێ كوڕ و كچێكی بوو، ناوی كچه‌كه‌ش تامار بوو، بووه‌ ئافره‌تێكی زۆر جوان.
28
جا ئه‌بشالۆم دوو ساڵ له‌ ئۆرشه‌لیم مایه‌وه‌ و ڕووی پاشای نه‌بینی.
29
له‌به‌ر ئه‌وه‌ ئه‌بشالۆم به‌دوای یۆئابدا ناردی تاكو بینێرێته‌ لای پاشا، به‌ڵام ئه‌و نه‌یویست بێته‌ لای. دووباره‌ به‌دوایدا ناردییه‌وه‌، به‌ڵام ئه‌و نه‌یویست بێت.
30
له‌به‌ر ئه‌وه‌ به‌ خزمه‌تكاره‌كانی گوت: «ته‌ماشا بكه‌ن، كێڵگه‌كه‌ی یۆئاب له‌ته‌نیشت ئه‌وه‌ی منه‌وه‌یه‌ و جۆ له‌وێ هه‌یه‌. بڕۆن و ئاگری تێبه‌رده‌ن.» ئینجا خزمه‌تكاره‌كانی ئه‌بشالۆم ئاگریان له‌ كێڵگه‌كه‌ به‌ردا.
31
ئیتر یۆئاب هه‌ستا و چوو بۆ لای ئه‌بشالۆم بۆ ماڵه‌وه‌ و پێی گوت: «بۆچی خزمه‌تكاره‌كانت ئاگریان له‌ كێڵگه‌كه‌ی من به‌ردا؟»
32
ئه‌بشالۆمیش به‌ یۆئابی گوت: «من به‌دوای تۆدا ناردم و گوتم: ”وه‌ره‌ ئێره‌، هه‌تا بتنێرمه‌ لای پاشا و بڵێیت، ’من بۆچی له‌ گه‌شووره‌وه‌ هاتمه‌وه‌؟ بۆ من چاكتر بوو له‌وێ بمێنمه‌وه‌!‘“ ئێستاش ده‌مه‌وێت چاوم به‌ پاشا بكه‌وێت، ئه‌گه‌ر تاوانێكی تێمدا به‌دیی كرد، با بمكوژێت.»
33
ئیتر یۆئاب چوو بۆ لای پاشا و پێی ڕاگه‌یاند. ئه‌ویش ئه‌بشالۆمی بانگكرد و هاته‌ لای پاشا، له‌به‌رده‌م ئه‌ودا كڕنۆشی برد و سه‌ری خسته‌ سه‌ر زه‌وی، پاشاش ئه‌بشالۆمی ماچكرد.
  1. a. 14‏:26 دوو سه‌د شاقل: نزیكه‌ی 2,3 كیلۆگرام.