عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئه‌منۆن و تامار 
1
ئه‌وه‌ بوو پاش ئه‌مانه‌ ئه‌منۆنی كوڕی داود كه‌وته‌ خۆشه‌ویستی تاماری خوشكه‌ جوانه‌كه‌ی ئه‌بشالۆمی كوڕی داود.[a]
2
ئه‌منۆن له‌ تاو تاماری زڕخوشكی نه‌خۆش كه‌وت، له‌به‌ر ئه‌وه‌ی تامار پاكیزه‌ بوو، ئه‌منۆن پێی وابوو كه‌ نه‌یده‌توانی به‌ هیچ شێوه‌یه‌ك ده‌ستی بۆ ببات.
3
ئه‌منۆن هاوڕێیه‌تی ئامۆزایه‌كی ده‌كرد به‌ ناوی یۆنادابی كوڕی شیمه‌عا كه‌ برای داود بوو، یۆناداب پیاوێكی ته‌ڵه‌كه‌باز بوو.
4
له‌ ئه‌منۆنی پرسی: «شازاده‌، بۆچی تۆ ڕۆژ له‌دوای ڕۆژ لاوازتر ده‌بیت؟ ئایا پێم ناڵێیت؟»
ئه‌منۆنیش پێی گوت: «من تاماری خوشكی ئه‌بشالۆمی برام خۆشده‌وێت.»
5
یۆنادابیش پێی گوت: «له‌ناو جێگا پاڵبكه‌وه‌ و خۆت نه‌خۆش بخه‌، ئه‌گه‌ر باوكت بۆ بینینت هات پێی بڵێ: ”با تاماری خوشكم بێته‌ لام و نانم پێبدات، با خواردنه‌كه‌ له‌به‌رچاوم سازبكات، بۆ ئه‌وه‌ی بیبینم و به‌ ده‌ستی ئه‌و نان بخۆم.“»
6
ئینجا ئه‌منۆن پاڵكه‌وت و خۆی نه‌خۆش خست، پاشا هات بۆ بینینی، ئه‌منۆن به‌ پاشای گوت: «تكایه‌ با تاماری خوشكم بێته‌ لام و له‌به‌رچاوم دوو ناسكه‌نان دروستبكات، به‌ ده‌ستی ئه‌و ده‌یخۆم.»
7
داود به‌دوای تاماردا ناردییه‌ ماڵه‌وه‌ و گوتی: «تكایه‌ بڕۆ ماڵی ئه‌منۆنی برات و خواردنێكی بۆ دروستبكه‌.»
8
تاماریش چووه‌ ماڵی ئه‌منۆنی برای، ئه‌و پاڵكه‌وتبوو. ئینجا هه‌ویری برد و شێلای و له‌به‌رچاوی ناسكه‌نانی كرد و برژاندی.
9
ئینجا تاوه‌كه‌ی بۆ به‌رده‌می برد، به‌ڵام ئه‌و ڕازی نه‌بوو بیخوات.
ئه‌منۆن گوتی: «هه‌مووتان بڕۆنه‌ ده‌ره‌وه‌.» ئه‌وانیش هه‌موویان چوونه‌ ده‌ره‌وه‌.
10
ئینجا ئه‌منۆن به‌ تاماری گوت: «خواردنه‌كه‌ بهێنه‌ شوێنی نوستنه‌كه‌م بۆ ئه‌وه‌ی به‌ ده‌ستی تۆ بیخۆم.» تاماریش ناسكه‌نانه‌كه‌ی كه‌ دروستی كردبوو هه‌ڵیگرت و بۆ ئه‌منۆنی برای بردییه‌ ژووره‌وه‌ بۆ شوێنی نوستنه‌كه‌ی.
11
بۆی برده‌ پێشه‌وه‌ تاوه‌كو بیخوات، ئه‌ویش تاماری گرت و پێی گوت: «خوشكه‌كه‌م، وه‌ره‌ له‌گه‌ڵم پاڵبكه‌وه‌.»
12
ئه‌ویش پێی گوت: «نا، برام نا! سه‌رم شۆڕ مه‌كه‌! له‌ ئیسرائیلدا شتی وا ناكرێت! ئه‌م بێ ئابڕووییه‌ مه‌كه‌.
13
ئه‌ی من به‌م ئابڕووچوونه‌وه‌ ڕوو له‌كوێ بكه‌م؟ ئه‌ی تۆ؟ تۆش له‌ناو ئیسرائیلدا وه‌ك گێلێكت لێدێت. ئێستاش تكایه‌ له‌گه‌ڵ پاشا قسه‌ بكه‌، بمداته‌ تۆ، چونكه‌ ئه‌و پێی ناخۆش نییه‌.»
14
به‌ڵام ئه‌منۆن نه‌یویست گوێی لێ بگرێت و به‌سه‌ریدا زاڵ بوو، سه‌ری شۆڕكرد و لاقه‌ی كرد.
15
پاشان ئه‌منۆن زۆر ڕقی لێی بووه‌وه‌، ته‌نانه‌ت ئه‌و ڕقه‌ی كه‌ ڕقی لێی بووه‌وه‌ زۆرتر بوو له‌و خۆشه‌ویستییه‌ی كه‌ خۆشی ده‌ویست. ئینجا ئه‌منۆن پێی گوت: «هه‌سته‌ و بڕۆ!»
16
ئه‌ویش پێی گوت: «نه‌خێر! ئه‌گه‌ر ده‌رمبكه‌یت خراپه‌یه‌كی گه‌وره‌تره‌ له‌وه‌ی كه‌ پێت كردم.»
به‌ڵام ئه‌منۆن نه‌یویست گوێی لێ بگرێت.
17
خزمه‌تكاره‌ تایبه‌ته‌كه‌ی بانگكرد و گوتی: «ئه‌مه‌ ده‌ربكه‌ و ده‌رگاكه‌ له‌دوایه‌وه‌ دابخه‌.»
18
خزمه‌تكاره‌كه‌ش ده‌ریكرد و ده‌رگاكه‌ی له‌دوایه‌وه‌ داخست. تاماریش كه‌وایه‌كی درێژی ڕه‌نگاوڕه‌نگی له‌به‌ردا بوو، چونكه‌ كچه‌ پاكیزه‌كانی پاشا جلی ئاوایان له‌به‌ر ده‌كرد.
19
تامار خۆڵه‌مێشی به‌سه‌ر سه‌ری خۆیدا كرد، جله‌ ڕه‌نگاوڕه‌نگه‌كه‌ی له‌به‌رخۆی دادڕی. ده‌ستی به‌سه‌رییه‌وه‌ گرت و به‌ ڕێگادا ده‌ڕۆیشت، به‌ ده‌نگی به‌رز ده‌گریا.
20
ئه‌بشالۆمی برای پێی گوت: «ئه‌منۆنی زڕبرات له‌گه‌ڵت بوو؟ خوشكم، ئێستاش بێده‌نگ به‌، ئه‌و زڕبراته‌ و ئه‌م كاره‌ له‌ دڵ مه‌گره‌.» ئیتر تامار به‌ په‌رێشانی له‌ ماڵی ئه‌بشالۆمی برای مایه‌وه‌ و ژیا.
21
كاتێك داودی پاشا ئه‌م هه‌موو شتانه‌ی بیسته‌وه‌، زۆر تووڕه‌ بوو.
22
ئه‌بشالۆمیش نه‌ به‌ چاك و نه‌ به‌ خراپ قسه‌ی له‌گه‌ڵ ئه‌منۆنی زڕبرای نه‌كرد، له‌به‌ر ئه‌وه‌ی سه‌ری تاماری خوشكی شۆڕكرد، زۆر ڕقی له‌ ئه‌منۆن بووه‌وه‌.
كوشتنی ئه‌منۆن له‌لایه‌ن ئه‌بشالۆمه‌وه‌ 
23
دوو ساڵ دوای ئه‌وه‌، ئه‌بشالۆم هه‌موو كوڕه‌كانی پاشای بانگهێشت كرد، كاتێك خزمه‌تكاره‌كانی له‌ به‌عل‌حاچۆر ئه‌وه‌ی نزیك ئه‌فرایمه‌ مه‌ڕه‌كانی ئه‌ویان ده‌بڕییه‌وه‌.
24
ئینجا ئه‌بشالۆم چوو بۆ لای پاشا و گوتی: «ئێستا به‌نده‌كه‌ت مه‌ڕه‌كانی ده‌بڕێته‌وه‌، تكایه‌ پاشا و كاربه‌ده‌سته‌كانی با له‌گه‌ڵ به‌نده‌كه‌ت بێن.»
25
پاشاش به‌ ئه‌بشالۆمی گوت: «نه‌خێر كوڕم، با هه‌موومان نه‌بین و بارگرانی نه‌خه‌ینه‌ سه‌رت.» جا ئه‌بشالۆم زۆری لێكرد، به‌ڵام ئه‌و نه‌یویست بچێت، به‌ڵكو داوای به‌ره‌كه‌تی بۆ كرد.
26
ئه‌بشالۆمیش گوتی: «ئه‌گه‌ر نا، تكایه‌ با ئه‌منۆنی برام له‌گه‌ڵمان بێت.»
پاشاش لێی پرسی: «بۆچی له‌گه‌ڵت بێت؟»
27
به‌ڵام ئه‌بشالۆم زۆری لێكرد و ئه‌ویش ئه‌منۆن و هه‌موو كوڕه‌كانی پاشای له‌گه‌ڵ نارد.
28
ئه‌بشالۆمیش فه‌رمانی به‌ خزمه‌تكاره‌كانی كرد، گوتی: «ئاگاداربن! كاتێك كه‌ ئه‌منۆن به‌ شه‌راب مه‌ست بوو، پێتان ده‌ڵێم: ”له‌ ئه‌منۆن بده‌ن،“ بیكوژن و مه‌ترسن. ئه‌ی من خۆم فه‌رمانم پێ نه‌كردوون؟ له‌به‌ر ئه‌وه‌ به‌هێزبن و ئازابن.»
29
ئیتر خزمه‌تكاره‌كانی ئه‌بشالۆم ئه‌وه‌یان به‌ ئه‌منۆن كرد كه‌ ئه‌بشالۆم فه‌رمانی پێ كردبوون، هه‌موو كوڕه‌كانی پاشا هه‌ستان، هه‌ریه‌كه‌ و سواری هێستره‌كه‌ی خۆی بوو و هه‌ڵات.
30
له‌ كاتێكدا ئه‌وان به‌ڕێوه‌ بوون، هه‌واڵ گه‌یشته‌ داود و گوترا: «ئه‌بشالۆم هه‌موو كوڕه‌كانی پاشای كوشتووه‌ و كه‌سیانی نه‌هێشتووه‌ته‌وه‌.»
31
پاشا هه‌ستا و جله‌كانی له‌به‌رخۆی دادڕی و له‌سه‌ر زه‌وی پاڵكه‌وت، هه‌موو خزمه‌تكاره‌كانیشی به‌ جلی دڕاوه‌وه‌ له‌لای پاشا ڕاوه‌ستا بوون.
32
به‌ڵام یۆنادابی كوڕی شیمه‌عای برای داود گوتی: «با گه‌وره‌م وانه‌زانێت كه‌ هه‌موو شازاده‌ لاوه‌كانیان كوشتووه‌، به‌ڵكو ته‌نها ئه‌منۆن كوژراوه‌، چونكه‌ له‌و ڕۆژه‌وه‌ی كه‌ لاقه‌ی تاماری خوشكی كرد، ئه‌بشالۆم ئه‌و بڕیاره‌ی دا.
33
ئێستاش با پاشای گه‌وره‌م شتێكی وا نه‌خاته‌ دڵییه‌وه‌ و بڵێت هه‌موو كوڕه‌كانی پاشا كوژراون. به‌ڵكو به‌ ته‌نها ئه‌منۆن كوژراوه‌.»
34
ئه‌بشالۆم پێشتر هه‌ڵاتبوو.
خزمه‌تكاره‌ ئێشكگره‌كه‌ چاوی هه‌ڵبڕی و بینی خه‌ڵكێكی زۆر له‌ لاشانی كێوه‌كه‌ به‌ ڕێگاوه‌ بوون. ئێشكگره‌كه‌ چوو بۆ لای پاشا و پێی گوت: «خه‌ڵكێك ده‌بینم له‌ بێت‌حۆرۆنه‌وه‌ به‌ لاشانی كێوه‌كه‌دا دێن.»
35
ئینجا یۆناداب به‌ پاشای گوت: «ئه‌وه‌تا شازاده‌كان هاتن و خزمه‌تكاره‌كه‌ت چی گوت، به‌و جۆره‌ بوو.»
36
هه‌ر دوای ئه‌وه‌ی له‌ قسه‌كردن بووه‌وه‌ شازاده‌كان هاتن و به‌ گریانه‌وه‌ ده‌نگیان هه‌ڵبڕی، هه‌روه‌ها پاشا و هه‌موو خزمه‌تكاره‌كانیش گریانێكی زۆر به‌كوڵ گریان.
37
ئه‌بشالۆمیش هه‌ڵات و چوو بۆ لای ته‌لمه‌ی كوڕی عه‌میهودی پاشای گه‌شوور، داودیش هه‌موو ئه‌و ڕۆژانه‌ بۆ كوڕه‌كه‌ی لاواندییه‌وه‌.
38
دوای ئه‌وه‌ی ئه‌بشالۆم هه‌ڵات و چوو بۆ گه‌شوور سێ ساڵ له‌وێدا مایه‌وه‌.
39
داودی پاشا خه‌می كوژرانی ئه‌منۆنی له‌ دڵ دامركایه‌وه‌، ئاره‌زووی كرد بچێته‌ لای ئه‌بشالۆم.
  1. a. 13‏:1 ئه‌منۆن له‌ ئه‌حینۆعه‌م و تاماری له‌ مه‌عكا هه‌ردووكیان منداڵی داود بوون. بڕوانه‌ به‌شی 3‏:2‏، 3.