عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گه‌یشتنی هه‌واڵی مردنی شاول 
1
ئه‌وه‌ بوو پاش مردنی شاول و گه‌ڕانه‌وه‌ی داود له‌ لێدانی عه‌مالێقییه‌كان، داود دوو ڕۆژ له‌ چیقله‌گ مایه‌وه‌.
2
له‌ ڕۆژی سێیه‌مدا بینی گه‌نجێك له‌ ئۆردوگاكه‌ی شاوله‌وه‌ به‌ جلی دڕاو و سه‌ری تۆزاوییه‌وه‌ هات، كاتێك گه‌یشته‌ لای داود كه‌وته‌ سه‌ر زه‌وی و كڕنۆشی برد.
3
داود لێی پرسی: «له‌كوێوه‌ هاتوویت؟»
ئه‌ویش وه‌ڵامی دایه‌وه‌: «له‌ ئۆردوگای ئیسرائیله‌وه‌ ده‌رباز بووم.»
4
داودیش پێی گوت: «ڕووداوه‌كه‌ چۆن بوو؟ تكایه‌ پێم ڕابگه‌یه‌نه‌.»
ئه‌ویش گوتی:[a] «جه‌نگاوه‌ران له‌ جه‌نگه‌كه‌دا هه‌ڵاتن، زۆربه‌ی جه‌نگاوه‌ران كه‌وتن و مردن، شاول و یۆناتانی كوڕیشی مردن.»
5
داودیش به‌و گه‌نجه‌ی گوت كه‌ هه‌واڵه‌كه‌ی پێی ڕاگه‌یاندبوو: «چۆن زانیت شاول و یۆناتانی كوڕی مردوون؟»
6
گه‌نجه‌كه‌ش پێی گوت: «وا ڕێككه‌وت من له‌ كێوی گلبۆع بووم، بینیم شاول به‌سه‌ر ڕمه‌كه‌یدا ده‌چه‌مایه‌وه‌، گالیسكه‌ و سواره‌كانیش به‌ توندی به‌دوایه‌وه‌ بوون.
7
ئاوڕی له‌دوای خۆی دایه‌وه‌ و منی بینی، بانگی كردم، منیش گوتم: ”ئه‌وه‌تام.“
8
«لێی پرسیم: ”تۆ كێیت؟“
«منیش وه‌ڵامم دایه‌وه‌: ”من عه‌مالێقیم.“
9
«ئینجا پێی گوتم: ”تكایه‌، وه‌ره‌ سه‌رم و بمكوژه‌! له‌ سه‌ره‌مه‌رگدام، به‌ڵام هێشتا ژیانم تێدا ماوه‌.“
10
«منیش چوومه‌ سه‌ری و كوشتم، چونكه‌ زانیم پاش كه‌وتنه‌كه‌ی ناژیێت، ئیتر تاجه‌كه‌ی سه‌ر سه‌ری و بازنه‌كه‌ی كه‌ به‌ قۆڵییه‌وه‌ بوو بردم و ئه‌وانه‌م بۆ لای گه‌وره‌م هێناوه‌.»
11
داود جله‌كانی له‌به‌رخۆی دادڕی، به‌ هه‌مان شێوه‌ هه‌موو ئه‌و پیاوانه‌ی كه‌ له‌گه‌ڵی بوون.
12
لاوانه‌وه‌ و گریان، هه‌تا ئێواره‌ به‌ڕۆژوو بوون، بۆ شاول و یۆناتانی كوڕی و هه‌موو سوپای یه‌زدان و بنه‌ماڵه‌ی ئیسرائیل، چونكه‌ به‌ شمشێر كه‌وتن.
13
ئیتر داود به‌ گه‌نجه‌كه‌ی گوت: «تۆ خه‌ڵكی كوێیت؟»
ئه‌ویش گوتی: «من كوڕی پیاوێكی عه‌مالێقی نامۆم.»
14
داودیش پێی گوت: «چۆن سڵت نه‌كرده‌وه‌ له‌وه‌ی ده‌ستت درێژ بكه‌یت هه‌تا ده‌ستنیشانكراوی یه‌زدان له‌ناو ببه‌یت؟»
15
ئینجا داود یه‌كێك له‌ خزمه‌تكاره‌كانی بانگكرد و گوتی: «وه‌ره‌ پێشه‌وه‌ و بیكوژه‌!» ئه‌ویش لێیدا و مرد.
16
له‌به‌ر ئه‌وه‌ی داود پێی گوتبوو: «خوێنی خۆت له‌ ملی خۆته‌، چونكه‌ ده‌مت شایه‌تی له‌سه‌ر دایت و گوتت: ”من ده‌ستنیشانكراوی یه‌زدانم كوشت.“»
لاواندنه‌وه‌ی داود بۆ شاول و یۆناتان 
17
داود به‌م لاوانه‌وه‌یه‌ بۆ شاول و یۆناتانی كوڕی لاواندییه‌وه‌ و
18
فه‌رمانی دا كه‌ نه‌وه‌ی یه‌هودا ئه‌م لاواندنه‌وه‌یه‌ی كه‌وان فێر بن. ئه‌وه‌ له‌ په‌ڕتووكی یاشاردا[b] نووسراوه‌:
19
«ئه‌ی ئیسرائیل! ئای چۆن قاره‌مانان كه‌وتن!
شكۆمه‌ندییه‌كه‌ت له‌سه‌ر به‌رزاییه‌كانت كوژراوه‌.
20
«له‌ گه‌ت ڕایمه‌گه‌یه‌نن،
له‌ شه‌قامه‌كانی ئه‌سقه‌لان مژده‌ مه‌ده‌ن،
نه‌وه‌ك كچانی فه‌له‌ستییه‌كان دڵخۆش بن،
نه‌وه‌ك كچانی خه‌ته‌نه‌ نه‌كراوان پێمان خۆش بن.
21
«ئه‌ی چیاكانی گلبۆع،
با شه‌ونم و بارانتان به‌سه‌ره‌وه‌ نه‌بێت،
نه‌ كێڵگه‌كانت پێشكه‌شكراوی دانه‌وێڵه‌،
چونكه‌ له‌وێ قه‌ڵغانی پاڵه‌وانان گڵاو بووه‌،
قه‌ڵغانه‌كه‌ی شاول، بێ چه‌وركردنی به‌ ڕۆن.
22
«له‌ خوێنی كوژراوان و
له‌ جه‌سته‌ی پاڵه‌وانان
كه‌وانه‌كه‌ی یۆناتان نه‌گه‌ڕایه‌وه‌ دواوه‌ و
شمشێره‌كه‌ی شاولیش به‌ به‌تاڵی نه‌گه‌ڕایه‌وه‌.
23
شاول و یۆناتان،
له‌ ژیانیاندا خۆشه‌ویست و شیرین بوون،
له‌ مه‌رگیشدا له‌ یه‌كتر جیا نه‌بوونه‌وه‌.
له‌ هه‌ڵۆ تیژڕه‌وتر و
له‌ شێر به‌هێزتر بوون.
24
«ئه‌ی كچانی ئیسرائیل،
بۆ شاول بگریێن،
ئه‌وه‌ی به‌رگی سوور و نه‌رمی له‌به‌ركردن،
ئه‌وه‌ی خشڵی زێڕی به‌ كراسه‌كانتانه‌وه‌ كرد.
25
«ئای چۆن قاره‌مانان له‌ناو جه‌رگه‌ی جه‌نگدا كه‌وتن!
یۆناتان له‌سه‌ر به‌رزاییه‌كانتدا كوژرا.
26
یۆناتانی برام، دڵم بۆت گوشرا،
زۆر شیرین بوویت له‌لام،
خۆشه‌ویستی تۆ بۆ من
له‌ خۆشه‌ویستی خانمان سه‌یرتر بوو.
27
«ئای چۆن قاره‌مانان كه‌وتن!
چه‌كه‌كانی جه‌نگ له‌ناوچوون!»
  1. a. 1‏:4 ئه‌و گه‌نجه‌ هه‌واڵه‌كه‌ی شێواندووه‌، بۆ ڕاستی ڕووداوه‌كه‌ بڕوانه‌ یه‌كه‌م ساموئێل به‌شی 31.
  2. b. 1‏:18 په‌ڕتووكی یاشار: بڕوانه‌ \+xt یه‌شوع 10‏:13‏\+xt*‏.