عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گه‌ڕاندنه‌وه‌ی كێڵگه‌كه‌ی شونه‌مییه‌كه‌ 
1
ئه‌لیشه‌ع به‌و ژنه‌ی گوتبوو كه‌ كوڕه‌كه‌ی بۆ زیندوو كردبووه‌وه‌: «له‌گه‌ڵ خێزانه‌كه‌تان بڕۆن و له‌ هه‌ركوێیه‌ك ده‌توانن ماوه‌یه‌ك بمێننه‌وه‌، چونكه‌ یه‌زدان ڕایگه‌یاندووه‌ قاتوقڕی بێته‌ سه‌ر ئه‌م خاكه‌، حه‌وت ساڵ درێژه‌ ده‌كێشێت.»
2
ژنه‌كه‌ش گوێڕایه‌ڵی قسه‌ی پیاوه‌كه‌ی خودا بوو. خۆی و خێزانه‌كه‌ی ڕۆیشتن و حه‌وت ساڵ له‌ خاكی فه‌له‌ستییه‌كان مانه‌وه‌.
3
له‌ كۆتایی حه‌وت ساڵه‌كه‌ ژنه‌كه‌ له‌ خاكی فه‌له‌ستییه‌كان گه‌ڕایه‌وه‌، هانای بۆ پاشا برد بۆ به‌ده‌ستهێنانه‌وه‌ی ماڵ و كێڵگه‌كه‌ی.
4
پاشاش قسه‌ی له‌گه‌ڵ گێحه‌زی خزمه‌تكاری پیاوه‌كه‌ی خودا ده‌كرد، پێی ده‌گوت: «باسی هه‌موو ئه‌و كاره‌ گه‌ورانه‌م بۆ بكه‌ كه‌ ئه‌لیشه‌ع ئه‌نجامی دا.»
5
له‌و كاته‌ی گێحه‌زی باسی ئه‌وه‌ی بۆ پاشا ده‌كرد كه‌ چۆن ئه‌لیشه‌ع مردووی زیندوو كردووه‌ته‌وه‌، ئه‌و ژنه‌ی كه‌ ئه‌لیشه‌ع كوڕه‌كه‌ی بۆ زیندوو كردبووه‌وه‌ له‌به‌ر ماڵه‌كه‌ی و كێڵگه‌كه‌ی هاواری بۆ پاشا هێنا.
گێحه‌زیش گوتی: «پاشای گه‌وره‌م، ئه‌وه‌ ژنه‌كه‌یه‌، ئه‌وه‌ش كوڕه‌كه‌یه‌تی كه‌ ئه‌لیشه‌ع زیندووی كرده‌وه‌.»
6
پاشاش ده‌رباره‌ی ئه‌وه‌ له‌ ژنه‌كه‌ی پرسی، ئه‌ویش ئه‌وه‌ی بۆ گێڕایه‌وه‌.
ئینجا پاشا كاربه‌ده‌ستێكی له‌گه‌ڵ نارد و گوتی: «هه‌موو ئه‌وه‌ی هی ئه‌وه‌ بۆی بگه‌ڕێنه‌وه‌، له‌گه‌ڵ داهاتی كێڵگه‌كه‌ی له‌و ڕۆژه‌وه‌ی كه‌ زه‌وییه‌كه‌ی به‌جێهێشتووه‌ هه‌تا ئێستا.»
كوشتنی حه‌زائێل له‌لایه‌ن به‌ن‌هه‌ده‌ده‌وه‌ 
7
ئه‌لیشه‌ع هاته‌ دیمه‌شق، به‌ن‌هه‌ده‌دی پاشای ئارامیش نه‌خۆش بوو، كاتێك پێی ڕاگه‌یه‌نرا «پیاوه‌كه‌ی خودا هاتووه‌ته‌ ئێره‌.»
8
پاشا به‌ حه‌زائێلی گوت: «دیارییه‌ك له‌گه‌ڵ ده‌ستت ببه‌ و به‌ره‌وپیری پیاوه‌كه‌ی خودا بڕۆ، له‌ ڕێگه‌ی ئه‌وه‌وه‌ پرسیار له‌ یه‌زدان بكه‌، بزانه‌ ئایا له‌م نه‌خۆشییه‌م چاك ده‌بمه‌وه‌؟»
9
حه‌زائێلیش له‌گه‌ڵ خۆی باری چل وشتری له‌ هه‌موو به‌روبوومه‌ باشه‌كانی دیمه‌شق به‌ دیاری برد و چووه‌ پێشوازی ئه‌لیشه‌ع. چوو له‌به‌رده‌می ڕاوه‌ستا، گوتی: «كوڕه‌كه‌ت، به‌ن‌هه‌ده‌دی پاشای ئارام، منی بۆ لای تۆ ناردووه‌ و ده‌ڵێت: ”ئایا له‌م نه‌خۆشییه‌م چاك ده‌بمه‌وه‌؟“»
10
ئه‌لیشه‌ع وه‌ڵامی دایه‌وه‌: «بڕۆ و پێی بڵێ: ”به‌ دڵنیاییه‌وه‌ چاك ده‌بیته‌وه‌.“ به‌ڵام یه‌زدان پیشانی داوم كه‌ ده‌مرێت!»
11
چاوی تێبڕی هه‌تا حه‌زائێل شه‌رم دایگرت، ئینجا پیاوه‌كه‌ی خودا ده‌ستی به‌ گریان كرد.
12
حه‌زائێل پرسیاری كرد: «گه‌وره‌م بۆچی ده‌گریێت؟»
ئه‌لیشه‌ع وه‌ڵامی دایه‌وه‌: «چونكه‌ زانیم چ خراپه‌یه‌ك به‌سه‌ر نه‌وه‌ی ئیسرائیلدا ده‌هێنیت. ئاگر له‌ قه‌ڵاكانیان به‌رده‌ده‌یت، گه‌نجه‌كانیان به‌ شمشێر ده‌كوژیت، منداڵه‌كانیان وردوخاش ده‌كه‌یت، ورگی سكپڕه‌كانشیان ده‌دڕێنیت.»
13
حه‌زائێلیش گوتی: «گه‌وره‌م، سه‌گێكی وه‌ك من چۆن ده‌توانێ كاری وا گه‌وره‌ بكات؟»
ئه‌لیشه‌عیش وه‌ڵامی دایه‌وه‌: «یه‌زدان پیشانی دام كه‌ تۆ ده‌بیته‌ پاشای ئارام.»
14
پاشان حه‌زائێل له‌لای ئه‌لیشه‌ع ڕۆیشت و گه‌ڕایه‌وه‌ لای گه‌وره‌كه‌ی. كاتێك به‌ن‌هه‌ده‌د لێی پرسی: «ئه‌لیشه‌ع چی پێ گوتی؟» حه‌زائێل وه‌ڵامی دایه‌وه‌: «پێی گوتم، به‌ دڵنیاییه‌وه‌ چاك ده‌بیته‌وه‌.»
15
به‌ڵام له‌ ڕۆژی پاشتر، جاجمه‌كه‌ی برد و له‌ ئاوی هه‌ڵكێشا، به‌سه‌ر ده‌موچاوی پاشای دادا، پاشا مرد. ئیتر حه‌زائێل له‌ جێی ئه‌و بوو به‌ پاشا.
پاشایه‌تی یه‌هۆرام له‌ یه‌هودا 
16
له‌ ساڵی پێنجه‌می یۆرامی كوڕی ئه‌حاڤی پاشای ئیسرائیل و یه‌هۆشافاتی پاشای یه‌هودا، یه‌هۆرامی كوڕی یه‌هۆشافات بوو به‌ پاشای یه‌هودا.
17
ته‌مه‌نی سی و دوو ساڵ بوو كاتێك بوو به‌ پاشا، هه‌شت ساڵ له‌ ئۆرشه‌لیم پاشایه‌تی كرد.
18
هه‌مان ڕێچكه‌ی پاشاكانی ئیسرائیل و بنه‌ماڵه‌ی ئه‌حاڤی گرته‌به‌ر، چونكه‌ كچه‌كه‌ی ئه‌حاڤ ژنی بوو. له‌به‌رچاوی یه‌زدان خراپه‌كاری كرد.
19
له‌گه‌ڵ ئه‌وه‌ش، یه‌زدان نه‌یده‌ویست یه‌هودا له‌ناوببات، له‌به‌ر داودی به‌نده‌ی خۆی. له‌به‌ر ئه‌وه‌ی به‌ڵێنی به‌ داود دابوو كه‌ بۆ هه‌تاهه‌تایه‌ چرایه‌ك ده‌داته‌ خۆی و نه‌وه‌كانی.
20
له‌ سه‌رده‌می پاشایه‌تی یه‌هۆرام، ئه‌دۆم له‌ یه‌هودا یاخی بوو، پاشایه‌كیان بۆ خۆیان دانا.
21
ئیتر یه‌هۆرام به‌ هه‌موو گالیسكه‌كانییه‌وه‌ په‌ڕییه‌وه‌ چاعیر. له‌وێ ئه‌دۆمییه‌كان ئابڵوقه‌یان دان، به‌ڵام شه‌و خۆی و سه‌ركرده‌ی گالیسكه‌كانی هه‌ستان و ئابڵوقه‌كه‌یان شكاند و ده‌رباز بوون، له‌شكره‌كه‌ش هه‌ڵاتن و گه‌ڕانه‌وه‌ چادره‌كانیان.
22
هه‌تا ئێستاش ئه‌دۆم له‌ یه‌هودا یاخییه‌. هه‌ر له‌و كاته‌دا لیڤناش یاخی بوو.
23
ڕووداوه‌كانی دیكه‌ی پاشایه‌تی یه‌هۆرام و هه‌موو كاره‌كانی كه‌ كردی له‌ په‌ڕتووكی كاروباری ڕۆژانه‌ی پاشاكانی ئیسرائیل تۆمار كراون.
24
یه‌هۆرام له‌گه‌ڵ باوباپیرانی سه‌ری نایه‌وه‌، له‌ شاری داود له‌گه‌ڵ باوباپیرانی نێژرا. ئیتر ئه‌حه‌زیای كوڕی له‌دوای خۆی بوو به‌ پاشا.
پاشایه‌تی ئه‌حه‌زیا 
25
له‌ ساڵی دوازده‌یه‌مینی یۆرامی كوڕی ئه‌حاڤی پاشای ئیسرائیل، ئه‌حه‌زیای كوڕی یه‌هۆرام بوو به‌ پاشای یه‌هودا.
26
ئه‌حه‌زیا گه‌نجێكی بیست و دوو ساڵان بوو كه‌ بوو به‌ پاشا، یه‌ك ساڵ له‌ ئۆرشه‌لیم پاشایه‌تی كرد. دایكی ناوی عه‌ته‌لیای كچه‌زای عۆمری پاشای ئیسرائیل بوو.
27
هه‌مان ڕێچكه‌ی بنه‌ماڵه‌ی ئه‌حاڤی گرته‌به‌ر، هه‌روه‌ك بنه‌ماڵه‌ی ئه‌حاڤ له‌به‌رچاوی یه‌زدان خراپه‌كاری كرد، چونكه‌ زاوای ماڵی ئه‌حاڤ بوو.
28
ئه‌حه‌زیا له‌گه‌ڵ یۆرامی كوڕی ئه‌حاڤ چووه‌ جه‌نگ له‌ دژی حه‌زائێلی پاشای ئارام له‌ ڕامۆتی گلعاد، ئارامییه‌كان یۆرامیان پێكا.
29
ئیتر یۆرام پاشا گه‌ڕایه‌وه‌ هه‌تا له‌ یه‌زره‌عیل له‌و برینانه‌ی چاك بێته‌وه‌ كه‌ ئارامییه‌كان له‌ ڕامۆت له‌ كاتی شه‌ڕكردنی له‌ دژی حه‌زائێلی پاشای ئارام پێكابوویان.
له‌دوای ئه‌وه‌ ئه‌حه‌زیای كوڕی یه‌هۆرامی پاشای یه‌هوداش چوو بۆ یه‌زره‌عیل هه‌تا چاوی به‌ یۆرامی كوڕی ئه‌حاڤ بكه‌وێت، چونكه‌ نه‌خۆش بوو.