عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
سه‌رئاوخستنی ته‌ورێك 
1
ئه‌ندامانی كۆمه‌ڵی پێغه‌مبه‌ران به‌ ئه‌لیشه‌عیان گوت: «ببینه‌، ئه‌و شوێنه‌ی تێیدا له‌گه‌ڵ تۆ كۆبووینه‌ته‌وه‌ بۆ ئێمه‌ ته‌نگه‌.
2
ڕێبده‌ با بچینه‌ ڕووباری ئوردون، با هه‌ریه‌كه‌ و كاریته‌یه‌ك بهێنین. هه‌روه‌ها با شوێنێك دروستبكه‌ین تێیدا كۆببینه‌وه‌.»
ئه‌ویش گوتی: «بڕۆن.»
3
یه‌كێكیان گوتی: «ڕازی به‌ و له‌گه‌ڵ خزمه‌تكاره‌كانت وه‌ره‌.» ئه‌لیشه‌عیش گوتی: «دێم.»
4
ئینجا له‌گه‌ڵیان ڕۆیشت.
گه‌یشتنه‌ ڕووباری ئوردون ده‌ستیان به‌ داربڕینه‌وه‌ كرد.
5
ئه‌وه‌ بوو كاتێك یه‌كێكیان كاریته‌ی ده‌بڕییه‌وه‌، سه‌ری ته‌وره‌كه‌ی كه‌وته‌ ناو ئاوه‌كه‌، هاواری كرد: «ئای گه‌وره‌م، ئه‌وه‌ ئه‌مانه‌ته‌!»
6
پیاوه‌كه‌ی خوداش گوتی: «كه‌وته‌ كوێ؟» ئه‌ویش شوێنه‌كه‌ی پیشان دا، ئه‌لیشه‌ع چڵه‌ دارێكی لێكرده‌وه‌ و فڕێیدایه‌ ئه‌وێ، سه‌ری ته‌وره‌كه‌ی سه‌ر ئاو خست.
7
ئینجا گوتی: «هه‌ڵیگره‌وه‌.» ئه‌ویش ده‌ستی درێژكرد و هه‌ڵیگرته‌وه‌.
كوێركردنی له‌شكری پاشای ئارام 
8
پاشای ئارام له‌ دژی ئیسرائیل ده‌جه‌نگا. دوای ڕاوێژكردن له‌گه‌ڵ ئه‌فسه‌ره‌كانی، شوێنی ئۆردوگاكه‌ی دیاری كرد.
9
ئینجا پیاوه‌كه‌ی خودا ناردی بۆ لای پاشای ئیسرائیل و گوتی: «ئاگات له‌ خۆت بێت و له‌و شوێنه‌وه‌ نه‌په‌ڕیته‌وه‌، چونكه‌ ئارامییه‌كان له‌وێ دابه‌زیون.»
10
پاشای ئیسرائیلیش ناردی بۆ پشكنینی ئه‌و شوێنه‌ی كه‌ پیاوه‌كه‌ی خودا لێی ئاگاداری كرده‌وه‌. هۆشدارییه‌كانی ئه‌لیشه‌ع بۆ پاشا به‌رده‌وام بوون، ئیتر پاشا له‌و شوێنانه‌ به‌ وریاییه‌وه‌ ده‌جوڵایه‌وه‌.
11
پاشای ئارام له‌مه‌ هه‌ڵچوو، ئه‌فسه‌ره‌كانی بانگكرد و لێی پرسین: «پێم بڵێن! كێ له‌ ئێمه‌ له‌گه‌ڵ پاشای ئیسرائیله‌؟»
12
یه‌كێك له‌ ئه‌فسه‌ره‌كانی وه‌ڵامی دایه‌وه‌: «كه‌سمان پاشای گه‌وره‌م، به‌ڵكو ئه‌لیشه‌ع، ئه‌و پێغه‌مبه‌ره‌ی كه‌ له‌ ئیسرائیله‌، ئه‌وه‌ كه‌ ته‌نانه‌ت ئه‌و قسانه‌ش كه‌ له‌ ژووری نوستنه‌كه‌شت ده‌یكه‌یت پاشای ئیسرائیلی لێ ئاگادار ده‌كاته‌وه‌.»
13
ئه‌ویش گوتی: «بڕۆن و بزانن له‌كوێیه‌، هه‌تا بنێرم و بیگرن.» ئینجا هه‌واڵیان نارد: «ئه‌و له‌ دوسانه‌.»
14
پاشا ئه‌سپ و گالیسكه‌ و له‌شكرێكی گه‌وره‌ی بۆ ئه‌وێ نارد. به‌ شه‌و هاتن و شاره‌كه‌یان گه‌مارۆ دا.
15
به‌یانی زوو كاتێك خزمه‌تكاری پیاوه‌كه‌ی خودا له‌ خه‌و هه‌ستا و چووه‌ ده‌ره‌وه‌، بینی سوپایه‌ك به‌ ئه‌سپ و گالیسكه‌وه‌ شاره‌كه‌یان گه‌مارۆ داوه‌. خزمه‌تكاره‌كه‌ی له‌ ئه‌لیشه‌عی پرسی: «ئای گه‌وره‌م، چی بكه‌ین؟»
16
ئه‌لیشه‌ع وه‌ڵامی دایه‌وه‌: «مه‌ترسه‌، چونكه‌ ئه‌وانه‌ی له‌گه‌ڵ ئێمه‌ن زۆرترن له‌وانه‌ی له‌گه‌ڵ ئه‌وانن.»
17
ئینجا ئه‌لیشه‌ع نزای كرد و گوتی: «ئه‌ی یه‌زدان، چاوی بكه‌ره‌وه‌ با ببینێت.» یه‌زدانیش چاوی خزمه‌تكاره‌كه‌ی كرده‌وه‌ و بینی وا چیاكه‌ پڕه‌ له‌ ئه‌سپ و گالیسكه‌ی ئاگرین له‌ چوارده‌وری ئه‌لیشه‌ع.
18
كاتێك دوژمن به‌ره‌و لای هاتنه‌ پێش، ئه‌لیشه‌ع له‌ یه‌زدان پاڕایه‌وه‌ و گوتی: «له‌و گه‌لانه‌ بده‌ و كوێریان بكه‌.» هه‌روه‌ك چۆن ئه‌لیشه‌ع پاڕایه‌وه‌، ئه‌ویش لێیدان و كوێری كردن.
19
ئه‌لیشه‌ع پێی گوتن: «نه‌ ئه‌مه‌ ڕێگاكه‌یه‌ و نه‌ ئه‌مه‌ش شاره‌كه‌یه‌. به‌دوام بكه‌ون، ده‌تانبه‌مه‌ لای ئه‌و پیاوه‌ی به‌دوایدا ده‌گه‌ڕێن.» ئیتر هه‌موویانی برده‌ سامیره‌.
20
له‌دوای ئه‌وه‌ی چوونه‌ ناو سامیره‌، ئه‌لیشه‌ع گوتی: «ئه‌ی یه‌زدان، چاوی ئه‌مانه‌ بكه‌ره‌وه‌ با ببینن.» یه‌زدانیش چاوی كردنه‌وه‌ و بینییان وا له‌ناو سامیره‌ن.
21
كاتێك پاشای ئیسرائیل ئه‌وانی بینی، به‌ ئه‌لیشه‌عی گوت: «باوكه‌، ئایا بیانكوژم؟ ئایا بیانكوژم؟»
22
ئه‌ویش گوتی: «مه‌یانكوژه‌. ئه‌گه‌ر تۆ ئه‌وانه‌ ناكوژیت كه‌ به‌ شمشێر و كه‌وانه‌كه‌ت به‌ دیلت گرتوون، ئیتر چۆن ئه‌مانه‌ ده‌كوژیت؟ نان و ئاویان له‌پێش دابنێ، با بخۆن و بخۆنه‌وه‌، ئینجا بچنه‌وه‌ لای گه‌وره‌كه‌یان.»
23
ئه‌ویش خوانێكی گه‌وره‌ی بۆ ئاماده‌كردن، خواردیان و خواردیانه‌وه‌، به‌ڕێی كردن و گه‌ڕانه‌وه‌ لای گه‌وره‌كه‌یان. ئیتر چه‌ته‌كانی ئارام وازیان له‌ هێرشكردنه‌ سه‌ر خاكی ئیسرائیل هێنا.
برسیێتی له‌ كاتی گه‌مارۆی سامیره‌ 
24
پاش ماوه‌یه‌ك، به‌ن‌هه‌ده‌دی پاشای ئارام هه‌موو سوپاكه‌ی كۆكرده‌وه‌ و جوڵاندی و سامیره‌ی گه‌مارۆ دا.
25
له‌ شاره‌كه‌ بووه‌ هۆی قاتوقڕییه‌كی گه‌وره‌، گه‌مارۆكه‌ درێژه‌ی كێشا هه‌تا وای لێهات سه‌ری كه‌رێك به‌ هه‌شتا شاقل زیو[a] و چاره‌كه‌ قاپێكی[b] ڕیقنه‌ی[c] كۆتریش به‌ پێنج شاقل زیو[d] ده‌فرۆشرا.
26
كاتێك پاشای ئیسرائیل له‌سه‌ر شووراكه‌ تێده‌په‌ڕی، ژنێك هاواری لێكرد و گوتی: «ئه‌ی پاشای گه‌وره‌م، یارمه‌تیم بده‌!»
27
ئه‌ویش وه‌ڵامی دایه‌وه‌: «ئه‌گه‌ر یه‌زدان یارمه‌تیت نه‌دات، من به‌ چی یارمه‌تیت بده‌م؟ به‌ جۆخینه‌كه‌[e] یان به‌ مه‌ی گوشه‌ره‌كه‌؟»
28
ئینجا پاشا لێی پرسی: «چیته‌؟»
ئه‌ویش گوتی: «ئه‌م ژنه‌ پێی گوتم: ”كوڕه‌كه‌ت بهێنه‌ با ئه‌مڕۆ بیخۆین و سبه‌ینێش كوڕه‌كه‌ی من ده‌خۆین.“
29
ئیتر كوڕه‌كه‌ی منمان لێنا و خواردمان، بۆ ڕۆژی دواتر كه‌ پێم گوت: ”كوڕه‌كه‌ت بهێنه‌ با بیخۆین،“ به‌ڵام كوڕه‌كه‌ی خۆی شارده‌وه‌.»
30
كاتێك پاشا گوێی له‌ قسه‌كانی ئه‌م ژنه‌ بوو، جله‌كانی له‌به‌رخۆی دادڕی. كه‌ به‌سه‌ر شووراكه‌ تێده‌په‌ڕی، خه‌ڵك بینییان وا له‌ ژێره‌وه‌ به‌رگی له‌ گوش[f] دروستكراوی له‌به‌ره‌.
31
پاشا گوتی: «با خودا توندترین سزام بدات، ئه‌گه‌ر ئه‌مڕۆ سه‌ری ئه‌لیشه‌عی كوڕی شافات نه‌په‌ڕێنم!»
32
له‌و كاته‌دا ئه‌لیشه‌ع له‌ ماڵه‌كه‌ی خۆی دانیشتبوو، ڕیش سپییه‌كانیش له‌لای دانیشتبوون. پاشا نێردراوێكی پێش خۆی نارده‌ لای، به‌ڵام به‌ر له‌وه‌ی نێردراوه‌كه‌ بگاته‌ لای، ئه‌لیشه‌ع به‌ پیره‌كانی گوت: «بینیتان چۆن ئه‌و پیاوكوژه‌ كه‌سێكی ناردووه‌ هه‌تا سه‌رم بپه‌ڕێنێت؟ ببینن، كاتێك پیاوه‌كه‌ گه‌یشت، ده‌رگاكه‌ دابخه‌ن و نه‌هێڵن ده‌رگاكه‌ بكاته‌وه‌. من دڵنیام پاشا خۆی له‌دوای ئه‌وه‌وه‌ دێت.»
33
هێشتا قسه‌ی له‌گه‌ڵ ده‌كردن نێردراوه‌كه‌ گه‌یشته‌ لای، له‌دوای ئه‌ویش پاشا گه‌یشت. پێی گوتن: «ئه‌و به‌ڵایه‌ له‌لایه‌ن یه‌زدانه‌وه‌یه‌. ئیتر بۆچی زیاتر چاوه‌ڕێی یه‌زدان بكه‌م؟»
  1. a. 6‏:25 نزیكه‌ی كیلۆگرامێك.
  2. b. 6‏:25 چاره‌كه‌ قاپێك: نزیكه‌ی 0,3 لیتر.
  3. c. 6‏:25 جیقنه‌
  4. d. 6‏:25 نزیكه‌ی 55 گرام.
  5. e. 6‏:27 جۆخین یان سه‌رخه‌رمان ئه‌و زه‌وییه‌ ته‌رخانكراوه‌یه‌ كه‌ له‌لایه‌ن وه‌رزێر و جوتیاره‌وه‌ به‌كارهێنراوه‌ بۆ كوتانی دانه‌وێڵه‌ له‌سه‌ری له‌دوای كۆكردنه‌وه‌ی له‌ كێڵگه‌.
  6. f. 6‏:30 ڕیشاڵێكی ڕووه‌كییه‌ كه‌ له‌و سه‌رده‌مه‌ به‌رگی ماته‌می لێ دروستده‌كرا.