عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
چاككردنه‌وه‌ی نه‌عمان له‌ نه‌خۆشی گولی 
1
نه‌عمانی سه‌ركرده‌ی سوپای پاشای ئارام پیاوێكی مه‌زن بوو له‌لای گه‌وره‌كه‌ی و سه‌ر بڵند بوو، له‌به‌ر ئه‌وه‌ی یه‌زدان له‌ ڕێگه‌ی ئه‌وه‌وه‌ ڕزگاریی به‌ ئارام به‌خشی. ئه‌م پیاوه‌ پاڵه‌وانێكی به‌هێز بوو، به‌ڵام گه‌ڕوگول[a] بوو.
2
چه‌ند چه‌ته‌یه‌ك له‌ ئارامییه‌كان بۆ تاڵان چووبوون و له‌ خاكی ئیسرائیله‌وه‌ كچێكی هه‌رزه‌كاریان له‌گه‌ڵ خۆیان هێنابووه‌وه‌، خزمه‌تی ژنه‌كه‌ی نه‌عمانی ده‌كرد.
3
كچه‌ به‌ خانمه‌كه‌ی گوت: «خۆزگه‌ گه‌وره‌م پێغه‌مبه‌ره‌كه‌ی سامیره‌ی ده‌بینی! چونكه‌ ئه‌و له‌ گولییه‌كه‌ی چاكی ده‌كرده‌وه‌.»
4
نه‌عمان چوو بۆ لای گه‌وره‌كه‌ی و قسه‌كه‌ی كچه‌ ئیسرائیلییه‌كه‌ی پێ ڕاگه‌یاند.
5
پاشای ئارامیش گوتی: «كه‌واته‌ بڕۆ، منیش نامه‌یه‌ك بۆ پاشای ئیسرائیل ده‌نێرم.» ئینجا نه‌عمان ڕۆیشت، له‌گه‌ڵ ده‌ستی ده‌ تالنت[b] زیو و شه‌ش هه‌زار شاقل[c] زێڕ و ده‌ قات جلی برد.
6
نامه‌كه‌ی بۆ پاشای ئیسرائیل هێنا، تێیدا نووسرابوو: «له‌گه‌ڵ ئه‌و نامه‌یه‌ نه‌عمانی خزمه‌تكارم ده‌نێرمه‌ لات، له‌ گولییه‌كه‌ی چاكی بكه‌ره‌وه‌.»
7
هه‌ر كه‌ پاشای ئیسرائیل نامه‌كه‌ی خوێنده‌وه‌، جله‌كانی له‌به‌رخۆی دادڕی و گوتی: «ئایا من خودام هه‌تا بمرێنم و زیندوو بكه‌مه‌وه‌؟ بۆچی ئه‌مه‌ پیاوێكی بۆ ناردووم هه‌تا له‌ گولییه‌كه‌ی چاكی بكه‌مه‌وه‌؟ بزانن و سه‌یر بكه‌ن چۆن شه‌ڕم پێ ده‌فرۆشێت!»
8
كاتێك ئه‌لیشه‌عی پیاوی خودا بیستییه‌وه‌ پاشای ئیسرائیل جله‌كانی له‌به‌ر خۆیدا دادڕیوه‌، ناردی بۆ لای پاشا و گوتی: «بۆچی جله‌كانت له‌به‌ر خۆتدا دادڕیوه‌؟ با بێته‌ لای من و بزانێت كه‌ پێغه‌مبه‌رێك له‌ ئیسرائیل هه‌یه‌.»
9
ئینجا نه‌عمان به‌ ئه‌سپ و گالیسكه‌كانییه‌وه‌ هات و له‌ به‌رده‌رگای ماڵی ئه‌لیشه‌ع وه‌ستا.
10
ئه‌لیشه‌عیش نێردراوێكی نارده‌ لای و گوتی: «بڕۆ له‌ ڕووباری ئوردون حه‌وت جار خۆت بشۆ، گۆشته‌كه‌ت چاك ده‌بێته‌وه‌ و پاك ده‌بیته‌وه‌.»
11
به‌ڵام نه‌عمان به‌ تووڕه‌ییه‌وه‌ ڕۆیشت و گوتی: «وام دانا كه‌ دێته‌ ده‌ره‌وه‌ بۆ لام و ڕاده‌وه‌ستێت، به‌ ناوی یه‌زدانی خوداكه‌یه‌وه‌ ده‌پاڕێته‌وه‌ و ده‌ستی به‌سه‌ر شوێنه‌كه‌دا ده‌هێنێت و گه‌ڕوگولییه‌كه‌ چاك ده‌بێته‌وه‌.
12
ئایا ئه‌ڤانا و په‌ڕپه‌ڕ، دوو ڕووباره‌كه‌ی دیمه‌شق، له‌ هه‌موو ئاوه‌كانی ئیسرائیل چاكتر نین؟ ئایا نه‌مده‌توانی خۆمیان تێدا بشۆم و پاك ببمه‌وه‌؟» له‌به‌ر ئه‌وه‌ گه‌ڕایه‌وه‌ و به‌ تووڕه‌ییه‌وه‌ ڕۆیشت.
13
خزمه‌تكاره‌كانی نه‌عمان هاتنه‌ پێشه‌وه‌ و پێیان گوت: «ئه‌ی باوكمان، ئایا ئه‌گه‌ر پێغه‌مبه‌ره‌كه‌ شتێكی گه‌وره‌ی پێت بگوتایه‌، نه‌تده‌كرد؟ به‌ڵام چه‌ند ئاسانتره‌ كه‌ گوتی: ”خۆت بشۆ و پاك ببه‌وه‌!“»
14
ئیتر چووه‌ خواره‌وه‌ و به‌پێی قسه‌ی پیاوه‌كه‌ی خودا، حه‌وت جار خۆی له‌ ڕووباری ئوردون نوقوم كرد، گۆشته‌كه‌ی گه‌ڕایه‌وه‌ وه‌ك گۆشتی كوڕێكی گه‌نج و پاك بووه‌وه‌.
15
ئینجا نه‌عمان له‌گه‌ڵ هه‌موو له‌شكره‌كه‌ی گه‌ڕایه‌وه‌ بۆ لای پیاوه‌كه‌ی خودا. له‌به‌رده‌می ڕاوه‌ستا و گوتی: «ئێستا ده‌زانم كه‌ له‌ هه‌موو جیهان هیچ خودایه‌ك نییه‌ بێجگه‌ له‌ خودای ئیسرائیل. ئێستاش ئه‌م دیارییه‌ له‌ خزمه‌تكاره‌كه‌ت وه‌ربگره‌.»
16
پێغه‌مبه‌ره‌كه‌ وه‌ڵامی دایه‌وه‌: «به‌ یه‌زدانی زیندوو، ئه‌وه‌ی ده‌یپه‌رستم، وه‌ریناگرم.» ئینجا زۆری لێكرد هه‌تا وه‌ریبگرێت، به‌ڵام ڕازی نه‌بوو.
17
نه‌عمان گوتی: «ئه‌گه‌ر وه‌ریناگریت، كه‌واته‌ ڕێم پێبده‌ باری دوو هێستر خۆڵ له‌گه‌ڵ خۆم ببه‌م، له‌به‌ر ئه‌وه‌ی خزمه‌تكاره‌كه‌ت جارێكی دیكه‌ قوربانی سووتاندن و سه‌ربڕاو بۆ هیچ خودایه‌كی دیكه‌ بێجگه‌ له‌ یه‌زدان ناكات.
18
به‌ڵام با له‌ شتێك یه‌زدان له‌ خزمه‌تكاره‌كه‌ت خۆشبێت: كاتێك گه‌وره‌كه‌م ده‌چێته‌ په‌رستگای ڕیمۆن بۆ ئه‌وه‌ی كڕنۆش ببات، پشت به‌ من ده‌به‌ستێت، ده‌بێ منیش له‌گه‌ڵ ئه‌و كڕنۆش ببه‌م، با یه‌زدان له‌و شته‌ی خزمه‌تكاره‌كه‌ت خۆشبێت.»
19
ئه‌لیشه‌عیش گوتی: «به‌خێر بچیت.»
دوای ئه‌وه‌ی نه‌عمان ڕۆیشت و كه‌مێك لێی دووركه‌وته‌وه‌،
20
گێحه‌زیی خزمه‌تكاری ئه‌لیشه‌عی پیاوی خودا گوتی: «گه‌وره‌م ڕازی نه‌بوو ئه‌و شته‌ له‌ نه‌عمانی ئارامی وه‌ربگرێت كه‌ هێنا بووی، به‌ڵام به‌ یه‌زدانی زیندوو من به‌دوایدا ڕاده‌كه‌م و شتێكی لێ وه‌رده‌گرم.»
21
ئیتر گێحه‌زی دوای نه‌عمان كه‌وت، كاتێك نه‌عمان بینی به‌دوایدا ڕاده‌كات، له‌ گالیسكه‌كه‌ دابه‌زی به‌ره‌وپیری چوو، گوتی: «ها خێره‌؟»
22
گێحه‌زیش گوتی: «خێره‌، گه‌وره‌م منی ناردووه‌ بۆ ئه‌وه‌ی پێت بڵێم: ”دوو گه‌نج له‌ كۆمه‌ڵی پێغه‌مبه‌رانه‌وه‌ هاتوونه‌ته‌ لام، له‌ ناوچه‌ شاخاوییه‌كانی ئه‌فرایمه‌وه‌. تالنتێك[d] زیو و دوو ده‌سته‌ جلیان پێبده‌.“»
23
نه‌عمانیش گوتی: «فه‌رموو دوو تالنت زیو ببه‌.» زۆری له‌ گێحه‌زی كرد و دوو تالنت زیو له‌ دوو تووره‌كه‌ له‌گه‌ڵ دوو قات جلی دایه‌ ده‌ست دوو خزمه‌تكاری خۆی، هه‌ڵیانگرت و له‌پێش گێحه‌زییه‌وه‌ ڕۆیشتن.
24
كه‌ گه‌یشتنه‌ گرده‌كه‌، گێحه‌زی شته‌كانی لێ وه‌رگرتن و خستییه‌ ماڵه‌وه‌، خزمه‌تكاره‌كانی به‌ڕێكرد و گه‌ڕانه‌وه‌.
25
كاتێك گێحه‌زی هات و له‌به‌رده‌م گه‌وره‌كه‌ی ڕاوه‌ستا، ئه‌لیشه‌عی لێی پرسی: «ئه‌ی گێحه‌زی، له‌كوێ بوویت؟»
ئه‌ویش وه‌ڵامی دایه‌وه‌: «خزمه‌تكاره‌كه‌ت بۆ هیچ جێگایه‌ك نه‌چووه‌.»
26
به‌ڵام ئه‌لیشه‌ع پێی گوت: «ئایا ڕۆحم له‌گه‌ڵتدا نه‌بوو كاتێك پیاوه‌كه‌ له‌ گالیسكه‌كه‌ دابه‌زی بۆ ئه‌وه‌ی به‌ره‌وپیرت بێت؟ ئێستا كاتی وه‌رگرتنی زیو و جلوبه‌رگه‌؟ یان وه‌رگرتنی باخی زه‌یتوون و ڕه‌ز و مه‌ڕ و مانگا و كۆیله‌ و كه‌نیزه‌یه‌؟
27
گه‌ڕوگولییه‌كه‌ی نه‌عمان هه‌تاهه‌تایه‌ به‌ خۆت و نه‌وه‌كانته‌وه‌ ده‌نووسێت و له‌ كۆڵتان نابێته‌وه‌.» ئیتر گێحه‌زی به‌ گه‌ڕوگولی له‌به‌رده‌م ئه‌لیشه‌ع چووه‌ ده‌ره‌وه‌، وه‌ك به‌فر سپی بوو.
  1. a. 5‏:1 گه‌ڕوگول: نه‌ك ته‌نها گولی، به‌ڵام ئه‌م وشه‌یه‌ بۆ چه‌ند نه‌خۆشییه‌كی جیاوازی پێست به‌كارده‌هێنرا.
  2. b. 5‏:5 ده‌ تالنت: نزیكه‌ی 340 كیلۆگرام.
  3. c. 5‏:5 شه‌ش هه‌زار شاقل: نزیكه‌ی 70 كیلۆگرام.
  4. d. 5‏:22 تالنتێك: نزیكه‌ی 34 كیلۆگرام.