عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
زه‌یتی بێوه‌ژنه‌كه‌ 
1
ژنی پیاوێك له‌ كۆمه‌ڵی پێغه‌مبه‌ران هاواری بۆ ئه‌لیشه‌ع كرد و گوتی: «گه‌وره‌م، تۆ ده‌زانیت كه‌ مێرده‌كه‌م له‌ یه‌زدان ده‌ترسا، به‌ڵام به‌ قه‌رزاری مرد. به‌ڵام ئێستا خاوه‌ن قه‌رزه‌كه‌ی هاتووه‌ هه‌تا دوو كوڕه‌كه‌م بۆ خۆی بكاته‌ كۆیله‌.»
2
ئه‌لیشه‌ع وه‌ڵامی دایه‌وه‌: «چیت بۆ بكه‌م؟ پێم بڵێ له‌ ماڵه‌وه‌ چیت هه‌یه‌؟»
ئه‌ویش گوتی: «كه‌نیزه‌كه‌ت له‌ ماڵه‌وه‌ جگه‌ له‌ گۆزه‌یه‌ك زه‌یت هیچی دیكه‌ شك نابات.»
3
ئه‌لیشه‌عیش گوتی: «بڕۆ له‌ ده‌ره‌وه‌ له‌ هه‌موو دراوسێكانت داوای قاپوقاچاغ بكه‌. قاپوقاچاغێكی زۆر بهێنه‌ نه‌ك كه‌م.
4
پاشان بڕۆ ژووره‌وه‌ و ده‌رگا له‌سه‌ر خۆت و كوڕه‌كانت دابخه‌، زه‌یت له‌ناو هه‌موو قاپه‌كان بكه‌، ئه‌وه‌ی پڕبوو له‌لایه‌ك دایبنێ.»
5
ئه‌ویش له‌لای ڕۆیشت و ده‌رگاكه‌ی له‌سه‌ر خۆی و كوڕه‌كانی داخست، ئه‌وان قاپه‌كانیان بۆی ده‌هێنایه‌ پێشه‌وه‌ و ئه‌ویش تێی ده‌كردن.
6
كاتێك قاپه‌كان پڕ بوون، به‌ كوڕه‌كه‌ی گوت: «قاپێكی دیكه‌م بۆ بهێنه‌.»
ئه‌ویش وه‌ڵامی دایه‌وه‌: «هیچ قاپێك نه‌ماوه‌.» ئیتر زه‌یته‌كه‌ وه‌ستا.
7
ژنه‌كه‌ چوو و به‌ پیاوه‌كه‌ی خودای ڕاگه‌یاند، ئه‌ویش گوتی: «بڕۆ زه‌یته‌كه‌ بفرۆشه‌ و قه‌رزه‌كه‌ت بده‌ره‌وه‌، ئه‌وه‌ش كه‌ ده‌مێنێته‌وه‌ خۆت و كوڕه‌كانت پێی بژین.»
زیندووبوونه‌وه‌ی كوڕی شونه‌مییه‌كه‌ 
8
ڕۆژێكیان ئه‌لیشه‌ع چوو بۆ شونێم، له‌وێ ژنێكی ناودار هه‌بوو، پێداگری كرد له‌لای ئه‌و نان بخوات. ئیتر هه‌ر كاتێك ده‌په‌ڕییه‌وه‌، ده‌چووه‌ لای ئه‌و بۆ نانخواردن.
9
ژنه‌كه‌ به‌ مێرده‌كه‌ی خۆی گوت: «من زانیومه‌ ئه‌و پیاوه‌ی كه‌ هه‌میشه‌ به‌لاماندا تێده‌په‌ڕێت، پیاوێكی پیرۆزی خودایه‌.
10
با ژوورێكی بچووك له‌ سه‌ربان دروستبكه‌ین، تێیدا جێیه‌كی نوستن و مێز و كورسی و چرایه‌كی بۆ دابنێین، بۆ ئه‌وه‌ی ئه‌گه‌ر هاته‌ لامان له‌وێ بمێنێته‌وه‌.»
11
ڕۆژێك ئه‌لیشه‌ع هاته‌ ئه‌وێ، چووه‌ ژووره‌كه‌ی سه‌ره‌وه‌ و له‌وێ پاڵكه‌وت.
12
ئینجا به‌ گێحه‌زیی خزمه‌تكاری گوت: «ئه‌و ژنه‌ شونه‌مییه‌م بۆ بانگ بكه‌.» ئه‌ویش بانگی كرد و ژنه‌كه‌ له‌به‌رده‌م گێحه‌زی ڕاوه‌ستا.
13
ئه‌لیشه‌ع به‌ گێحه‌زیی گوت: «پێی بڵێ: ”ئه‌وه‌تا تۆ ئه‌و هه‌موو زه‌حمه‌تییه‌ت بۆ ئێمه‌ كێشاوه‌. چۆن چاكه‌ت بده‌مه‌وه‌؟ هیچت هه‌یه‌ هه‌تا له‌باره‌یه‌وه‌ قسه‌ له‌گه‌ڵ پاشا یاخود سه‌ركرده‌ی سوپادا بكرێت؟“»
ژنه‌كه‌ش وه‌ڵامی دایه‌وه‌: «من له‌نێو كه‌سوكاری خۆمم و پێویستم به‌ هیچ نییه‌.»
14
ئه‌لیشه‌عیش پرسی: «ئه‌ی چی بۆ بكرێت؟»
گێحه‌زیش گوتی: «منداڵی نییه‌ و مێرده‌كه‌شی پیره‌.»
15
ئینجا ئه‌لیشه‌ع گوتی: «بانگی بكه‌.» ئه‌ویش بانگی كرد و له‌ به‌رده‌رگاكه‌ ڕاوه‌ستا.
16
ئه‌لیشه‌ع پێی گوت: «ساڵی داهاتوو له‌م كاته‌ كوڕێك له‌ باوه‌ش ده‌گریت.»
ژنه‌كه‌ گوتی: «نه‌خێر گه‌وره‌م، ئه‌ی پیاوی خودا، درۆ له‌گه‌ڵ كه‌نیزه‌كه‌ت مه‌كه‌!»
17
له‌دوای ئه‌وه‌ ژنه‌كه‌ سكی پڕ بوو، كوڕێكی بوو، له‌ ساڵی داهاتوو له‌ هه‌مان ئه‌و كاته‌ی كه‌ ئه‌لیشه‌ع پێی گوتبوو.
18
كوڕه‌كه‌ گه‌وره‌ بوو، ڕۆژێك كوڕه‌كه‌ چووه‌ ده‌ره‌وه‌ بۆ لای باوكی، كه‌ له‌لای دروێنه‌كه‌ره‌كان بوو.
19
به‌ باوكی گوت: «ئای سه‌رم! ئای سه‌رم!»
باوكیشی به‌ خزمه‌تكاره‌كه‌ی گوت: «هه‌ڵیبگره‌ و بیبه‌ بۆ لای دایكی.»
20
خزمه‌تكاره‌كه‌ش هه‌ڵیگرت و بردییه‌وه‌ لای دایكی. هه‌تا نیوه‌ڕۆ له‌سه‌ر ئه‌ژنۆی دایكی دانیشت، ئینجا مرد.
21
ئه‌ویش چووه‌ سه‌ره‌وه‌ له‌سه‌ر جێی نوستنه‌كه‌ی پیاوه‌كه‌ی خودا داینا، ده‌رگاكه‌ی له‌سه‌ر داخست و هاته‌ ده‌ره‌وه‌.
22
ئینجا مێرده‌كه‌ی بانگكرد و گوتی: «خزمه‌تكارێك و ماكه‌رێكم بۆ بنێره‌، هه‌تا به‌ په‌له‌ بچم بۆ لای پیاوه‌كه‌ی خودا و بگه‌ڕێمه‌وه‌.»
23
ئه‌ویش پرسیاری كرد: «بۆچی ئه‌مڕۆ ده‌چیته‌ لای؟ خۆ ئه‌مڕۆ نه‌ جه‌ژنی سه‌ره‌مانگه‌ و نه‌ شه‌ممه‌یه‌.»
ژنه‌كه‌ش گوتی: «هیچ نییه‌.»
24
كورتانی له‌ ماكه‌ره‌كه‌ به‌ست و به‌ خزمه‌تكاره‌كه‌ی گوت: «لێخوڕه‌ و خێرا بڕۆ، له‌به‌ر من خاو مه‌كه‌ره‌وه‌ هه‌تا خۆم پێت نه‌ڵێم.»
25
ئینجا ڕۆیشت و له‌ كێوی كارمه‌ل گه‌یشته‌ لای پیاوه‌كه‌ی خودا.
كاتێك پیاوه‌كه‌ی خودا له‌ دووره‌وه‌ بینی به‌ گێحه‌زی خزمه‌تكاری گوت: «ته‌ماشا، ئه‌وه‌ شونه‌مییه‌كه‌یه‌.
26
ئێستا به‌ره‌وپیری ڕابكه‌ و پرسیاری سه‌لامه‌تی خۆی و مێرده‌كه‌ی و كوڕه‌كه‌ی لێ بكه‌.»
ژنه‌كه‌ش گوتی: «باشین.»
27
كاتێك ژنه‌كه‌ له‌ چیاكه‌ گه‌یشته‌ لای پیاوه‌كه‌ی خودا، قاچه‌كانی گرت. گێحه‌زیش هاته‌ پێشه‌وه‌ هه‌تا دووری بخاته‌وه‌، به‌ڵام پیاوه‌كه‌ی خودا گوتی: «لێیگه‌ڕێ، چونكه‌ زۆر دڵی ته‌نگه‌، یه‌زدان ئه‌و كاره‌ی لێم شارده‌وه‌ و پێی ڕانه‌گه‌یاندم.»
28
ئینجا ژنه‌كه‌ گوتی: «ئایا من داوای كوڕم له‌ گه‌وره‌م كرد؟ نه‌مگوت، ”هه‌ڵممه‌خه‌ڵه‌تێنه‌؟“»
29
ئه‌لیشه‌عیش به‌ گێحه‌زی گوت: «كه‌واكه‌ت له‌ ناوقه‌دت ببه‌سته‌، گۆچانه‌كه‌م له‌ده‌ست بگره‌ و به‌ په‌له‌ بڕۆ، ئه‌گه‌ر چاوت به‌ یه‌كێك كه‌وت سڵاوی لێ مه‌كه‌، ئه‌گه‌ر یه‌كێكیش سڵاوی لێكردیت، وه‌ڵامی مه‌ده‌ره‌وه‌. گۆچانه‌كه‌م له‌سه‌ر ده‌موچاوی كوڕه‌كه‌ دابنێ.»
30
به‌ڵام دایكی كوڕه‌كه‌ گوتی: «به‌ یه‌زدانی زیندوو و به‌ گیانی تۆ، به‌جێت ناهێڵم.» ئیتر هه‌ستا و دوای كه‌وت.
31
گێحه‌زی له‌پێشیانه‌وه‌ ڕۆیشت و گۆچانه‌كه‌ی له‌سه‌ر ده‌موچاوی كوڕه‌كه‌ دانا، به‌ڵام نه‌ ده‌نگی هه‌بوو نه‌ هه‌ست. ئینجا گێحه‌زی گه‌ڕایه‌وه‌ بۆ لای ئه‌لیشه‌ع و پێی ڕاگه‌یاند، گوتی: «كوڕه‌كه‌ هه‌ڵنه‌ستایه‌وه‌.»
32
كاتێك ئه‌لیشه‌ع چووه‌ ناو ماڵه‌كه‌، بینی كوڕه‌كه‌ له‌سه‌ر جێگاكه‌ی مردووه‌.
33
جا چووه‌ ژووره‌وه‌ و ده‌رگاكه‌ی له‌سه‌ر خۆی و منداڵه‌كه‌ داخست، له‌ یه‌زدان پاڕایه‌وه‌.
34
پاشان چووه‌ سه‌ر جێگاكه‌ و له‌سه‌ر كوڕه‌كه‌ پاڵكه‌وت، ده‌می خسته‌ سه‌ر ده‌می و چاوه‌كانی له‌سه‌ر چاوه‌كانی و ده‌سته‌كانی له‌سه‌ر ده‌سته‌كانی. كه‌ له‌سه‌ری درێژ بوو، جه‌سته‌ی كوڕه‌كه‌ گه‌رم داهات.
35
ئینجا ئه‌لیشه‌ع هه‌ستا و له‌ناو ژووره‌كه‌ ده‌هات و ده‌چوو، چووه‌وه‌ سه‌ر جێگاكه‌ و له‌سه‌ر كوڕه‌كه‌ درێژبووه‌وه‌. كوڕه‌كه‌ حه‌وت جار پژمی و چاوه‌كانی كرده‌وه‌.
36
ئه‌لیشه‌ع گێحه‌زیی بانگكرد و گوتی: «ئه‌و شونه‌مییه‌ بانگ بكه‌.» ئه‌ویش بانگی كرد، كاتێك هاته‌ ژووره‌وه‌ ئه‌لیشه‌ع پێی گوت: «كوڕه‌كه‌ت هه‌ڵبگره‌.»
37
هات و خۆی هاویشته‌ به‌ر پێی، كڕنۆشی برد. پاشان كوڕه‌كه‌ی هه‌ڵگرت و چووه‌ ده‌ره‌وه‌.
مه‌رگ له‌ناو مه‌نجه‌ڵ! 
38
ئه‌لیشه‌ع گه‌ڕایه‌وه‌ گلگال، له‌و ناوچه‌یه‌ قاتوقڕی سه‌ریهه‌ڵدا. كاتێك كۆمه‌ڵی پێغه‌مبه‌ره‌كان له‌به‌رده‌می دانیشتبوون، به‌ خزمه‌تكاره‌كه‌ی گوت: «مه‌نجه‌ڵه‌ گه‌وره‌كه‌ بخه‌ سه‌ر ئاگر و خواردنێك بۆ كۆمه‌ڵی پێغه‌مبه‌ران ئاماده‌ بكه‌.»
39
یه‌كێك چووه‌ ده‌ره‌وه‌ بۆ هێنانی گژوگیا له‌ كێڵگه‌، بڕكێكی گوژاڵكی بینی و پڕ به‌ دامێنی لێی ڕنی، هات پارچه‌پارچه‌ی كرد و له‌ناو مه‌نجه‌ڵه‌كه‌ی كرد، كه‌سیشیان نه‌یزانی.
40
ئینجا بۆ پیاوه‌كانیان تێكرد هه‌تا بیخۆن. ئه‌وه‌ بوو كه‌ خواردنه‌كه‌یان خوارد، هاواریان كرد و گوتیان: «ئه‌ی پیاوی خودا، مه‌نجه‌ڵه‌كه‌ مه‌رگی تێدایه‌!» ئیتر نه‌یانتوانی بیخۆن.
41
ئه‌لیشه‌عیش گوتی: «هه‌ندێك ئارد بهێنن.» له‌ناو مه‌نجه‌ڵه‌كه‌ی كرد و گوتی: «بۆ خه‌ڵكه‌كه‌ تێ بكه‌، با بیخۆن.» ئیتر مه‌نجه‌ڵه‌كه‌ هیچ شتێكی خراپی تێدا نه‌ما.
ناندانی سه‌د پیاو 
42
پیاوێك له‌ به‌عل‌شالیشاوه‌ هات، بیست نانی جۆی یه‌كه‌مین به‌رهه‌م و هه‌ندێك گوڵه‌گه‌نمی نوێی له‌ناو تووره‌كه‌یه‌كدا بۆ پیاوی خودا هێنا. ئه‌لیشه‌عیش گوتی: «بیده‌ به‌ خه‌ڵكه‌كه‌ با بیخۆن.»
43
خزمه‌تكاره‌كه‌ی لێی پرسی: «چۆن ئه‌مه‌ له‌به‌رده‌م سه‌د پیاو دابنێم؟»
به‌ڵام ئه‌لیشه‌ع وه‌ڵامی دایه‌وه‌: «بیده‌ به‌ خه‌ڵكه‌كه‌ با بیخۆن، چونكه‌ یه‌زدان ئه‌مه‌ ده‌فه‌رموێت: ”ده‌خۆن و له‌به‌ریشیان ده‌مێنێته‌وه‌.“»
44
ئینجا له‌به‌رده‌میان داینا و خواردیان، له‌به‌ریشیان مایه‌وه‌، هه‌روه‌ك یه‌زدان فه‌رمووی.