عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
له‌ ماوه‌ی پاشایه‌تی یه‌هۆیاقیم نه‌بوخودنه‌سری پاشای بابل هێرشی كرده‌ سه‌ری، یه‌هۆیاقیم سێ ساڵ ملكه‌چی بوو، به‌ڵام پاشان هه‌ڵگه‌ڕایه‌وه‌ و لێی یاخی بوو.
2
جا یه‌زدان چه‌ته‌كانی بابلی و ئارامی و مۆئابی و عه‌مۆنییه‌كانی نارده‌ سه‌ری، ئه‌وانی نارده‌ سه‌ر یه‌هودا هه‌تا به‌پێی ئه‌و وشه‌یه‌ی یه‌زدان كه‌ له‌سه‌ر ده‌ستی به‌نده‌ پێغه‌مبه‌ره‌كانی فه‌رمووبووی له‌ناوی ببه‌ن.
3
بێگومان ئه‌وه‌ش به‌پێی فه‌رمانی یه‌زدان بوو له‌سه‌ر یه‌هودا، هه‌تا به‌هۆی گوناهه‌كانی مه‌نه‌شه‌وه‌ له‌به‌رده‌می خۆی لایانببات، به‌هۆی هه‌موو ئه‌وه‌ی كردی.
4
هه‌روه‌ها به‌هۆی ئه‌و خوێنه‌ بێتاوانه‌ی كه‌ ڕشتی و ئۆرشه‌لیمیشی پڕكرد له‌ خوێنی بێتاوان، ئینجا یه‌زدان نه‌یویست بیبه‌خشێت.
5
ڕووداوه‌كانی دیكه‌ی پاشایه‌تی یه‌هۆیاقیم و هه‌موو ئه‌وه‌ی كردی له‌ په‌ڕتووكی كاروباری ڕۆژانه‌ی پاشاكانی یه‌هودا تۆمار كراون.
6
یه‌هۆیاقیم له‌گه‌ڵ باوباپیرانی سه‌ری نایه‌وه‌، ئیتر یه‌هۆیاكینی كوڕی له‌دوای خۆی بوو به‌ پاشا.
7
پاشای میسریش جارێكی دیكه‌ له‌ خاكه‌كه‌ی خۆی ده‌رنه‌چوو، چونكه‌ پاشای بابل له‌ دۆڵی میسره‌وه‌ هه‌تا ڕووباری فوراتی داگیر كردبوو، هه‌موو ئه‌و خاكه‌ی كه‌ هی پاشای میسر بوو.
پاشایه‌تی یه‌هۆیاكین 
8
یه‌هۆیاكین گه‌نجێكی هه‌ژده‌ ساڵان بوو كه‌ بوو به‌ پاشا، سێ مانگ له‌ ئۆرشه‌لیم پاشایه‌تی كرد، دایكیشی ناوی نه‌حوشتای كچی ئه‌لناتان بوو، خه‌ڵكی ئۆرشه‌لیم بوو.
9
ئه‌میش له‌به‌رچاوی یه‌زدان خراپه‌كاری كرد، هه‌روه‌ك هه‌موو ئه‌وه‌ی باوكی كردبووی.
10
له‌و كاته‌دا ئه‌فسه‌ره‌كانی نه‌بوخودنه‌سری پاشای بابل چوونه‌ سه‌ر ئۆرشه‌لیم و شاره‌كه‌یان گه‌مارۆ دا.
11
ئینجا نه‌بوخودنه‌سری پاشای بابل خۆی هاته‌ سه‌ر شاره‌كه‌، له‌ كاتێكدا ئه‌فسه‌ره‌كانی گه‌مارۆیان دابوو.
12
یه‌هۆیاكینی پاشای یه‌هودا له‌گه‌ڵ دایكی و خزمه‌تكاره‌كانی و میره‌كانی و كاربه‌ده‌ستانی خۆیان ڕاده‌ستی پاشای بابل كرد.
له‌ ساڵی هه‌شته‌می پاشایه‌تی نه‌بوخودنه‌سر پاشای بابل، یه‌هۆیاكینی ده‌ستگیر كرد.
13
پاشان نه‌بوخودنه‌سر هه‌موو گه‌نجینه‌كانی په‌رستگای یه‌زدان و كۆشكی پاشای به‌تاڵ كرد، هه‌موو ئه‌و قاپوقاچاغه‌ زێڕینانه‌شی برد كه‌ سلێمانی پاشای ئیسرائیل له‌ په‌رستگای یه‌زدان دروستی كردبوون، هه‌روه‌ك یه‌زدان فه‌رمووی.
14
هه‌موو ئۆرشه‌لیمی ڕاپێچ كرد: و هه‌موو ئه‌فسه‌ر و جه‌نگاوه‌ره‌كان و پیشه‌وه‌ر و ئاسنگه‌ره‌كانی ڕاپێچ كرد، ده‌ هه‌زار ڕاپێچكراو بوون، كه‌س نه‌مایه‌وه‌ جگه‌ له‌ ڕه‌شوڕووته‌كانی گه‌لی خاكه‌كه‌.
15
نه‌بوخودنه‌سر یه‌هۆیاكینیشی ڕاپێچی بابل كرد، له‌گه‌ڵ دایكی پاشا و ژنه‌كانی پاشا و كاربه‌ده‌سته‌كانی و ڕابه‌رانی خاكه‌كه‌، له‌ ئۆرشه‌لیم به‌ دیلی گرتن و بۆ بابل ڕاپێچی كردن.
16
هه‌روه‌ها پاشای بابل هه‌موو جه‌نگاوه‌ره‌ تواناداره‌كانی ده‌ستگیر كرد كه‌ ژماره‌یان حه‌وت هه‌زار بوو، هه‌روه‌ها پیشه‌وه‌ر و زێڕنگه‌ره‌ شاره‌زاكانیش هه‌زار كه‌س بوون، هه‌موو پاڵه‌وانه‌كانی جه‌نگی ڕاپێچی بابل كرد.
17
پاشای بابل مه‌ته‌نیای مامی یه‌هۆیاكینی له‌ جێیه‌كه‌ی كرده‌ پاشا و ناوه‌كه‌شی گۆڕی بۆ سدقیا.
پاشایه‌تی سدقیا 
18
سدقیا گه‌نجێكی بیست و یه‌ك ساڵان بوو كه‌ بوو به‌ پاشا، یازده‌ ساڵ له‌ ئۆرشه‌لیم پاشایه‌تی كرد. دایكی ناوی حه‌موته‌لی كچی یه‌رمیای خه‌ڵكی لیڤنا بوو.
19
ئه‌میش له‌به‌رچاوی یه‌زدان خراپه‌كاری كرد، وه‌ك هه‌موو ئه‌وه‌ی یه‌هۆیاقیم كردی.
20
له‌به‌ر تووڕه‌یی یه‌زدان بوو كه‌ ئه‌مانه‌ له‌ ئۆرشه‌لیم و له‌ یه‌هودا ڕوویدا، هه‌تا ئه‌وه‌ی له‌به‌رده‌م خۆیدا ده‌ریكردن.
ئه‌وه‌ بوو سدقیا له‌ پاشای بابل یاخی بوو.